မိုးကုတ်

January 26, 2023

မိုးကုတ်ကျောက်မျက်လုပ်ကွက် ၂ ခုအတွက် NUG ဖိတ်ခေါ်

မြန်မာ့နွေဦးတော်လှန်ရေးအတွက်ဘဏ္ဍာရန်ပုံငွေ ရှာဖွေနိုင်ဖို့ အမျိုးသားညီညွတ်ရေးအစိုးရ (NUG) က မိုးကုတ်ရတနာနယ်မြေမှာ ကျောက်မျက်တူးဖော်ခွင့် (Mining Right) ကို နိုင်ငံတော်နဲ့ အကျိုးတူဆောင်ရွက်သွားမယ့် စီမံကိန်းကို စတင်လိုက်ပြီး ရင်းနှီးမြှုပ်နှံလိုသူတွေကို ဖိတ်ခေါ်နေပါတယ်။

လတ်တလောမှာတော့ ဒီစီမံကိန်းမှာ ဘောလုံးကြီးလုပ်ကွက် အမှတ် ၁ နဲ့ ဓာတ်တော်လုပ်ကွက်အမှတ် ၂ ဆိုပြီး ဖိတ်ခေါ်ထားတာဖြစ်ကာ ရင်းနှီးမြှုပ်နှံသူတွေဘက်က ရှယ်ယာ ၄၉ ရာခိုင်နှုန်းနဲ့ အစိုးရဘက်က ရှယ်ယာ ၅၁ ရာခိုင်နှုန်းစီနဲ့ လုပ်ငန်းလုပ်ကိုင်ခွင့် ၁၀ နှစ်သက်တမ်း ချပေးသွားမယ်လို့ ထုတ်ပြန်ချက်မှာ ဖော်ပြပါတယ်။

အကျယ်အဝန်း ၅၅ ဒသမ ၇၀ ဧကပေါ်မှာ တည်ရှိတဲ့ ဘောလုံးကြီးလုပ်ကွက်ကတော့ အမေရိကန်ဒေါ်လာ ၁၀ သန်းဖိုးထိ အလားအလာရှိနိုင်ပြီး ဒေါ်လာ ၂၃၅,၂၀၀ နဲ့ ရင်းနှီးမြှုပ်နှံ လုပ်ကိုင်နိုင်မှာဖြစ်ကာ အကျယ်အဝန်း ၂၇ ဧကပေါ်မှာတည်ရှိတဲ့ ဓာတ်တော်လုပ်ကွက်ကတော့ အမေရိကန်ဒေါ်လာသန်း ၁၂၀ ဖိုးထိ အလားအလာရှိနိုင်ပြီး ဒေါ်လာ ၂,၈၂၂,၄၀၀ နဲ့ ရင်းနှီးမြှုပ်နှံလုပ်ကိုင်နိုင်မယ်လို့ ဆိုပါတယ်။

ဒီစီမံကိန်းနဲ့ပတ်သက်ပြီး ရောင်းချခွင့်ဆိုင်ရာ အသေးစိတ် အချက်အလက်တွေကိုတော့ လာမယ့် ဇန်နဝါရီ ၂၉ ရက်မှာထုတ်ပြန်သွားမှာဖြစ်ပြီးတော့ စိတ်ပါဝင်စားသူတွေအနေနဲ့ သိရှိလိုတဲ့ အချက်အလက်တွေ  ဝက်ဘ်ဆိုက်စာမျက်နှာ www.earlypartnership.org နဲ့ NUG အစိုးရ စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှု ဝန်ကြီးဌာန အီးမေးလ်လိပ်စာ [email protected] တို့ဆီ ဆက်သွယ်နိုင်မယ်လို့ ဆိုပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာဖြစ်ပြီး NUG အစိုးရကလည်း အချိန်ကာလ ၂ နှစ်နီးပါးကြာ နွေဦးတော်လှန်ရေး အောင်မြင်နိုင်ဖို့အတွက် အဘက်ဘက်က ကြိုးပမ်းအားထုတ်နေတာ ဖြစ်ပါတယ်။

ဒါ့အပြင် NUG အစိုးရအနေနဲ့ ​နွေဦး​တော်လှန်​ရေးရန်ပုံ​ငွေ ရှာဖွေပေးနေရာမှာ ​ငွေတိုက်စာချုပ်ရောင်းချတာတွေ၊ အာဏာသိမ်း​စစ်ခေါင်းဆောင် မင်း​အောင်လှိုင် မတရားရယူသိမ်းပိုက်ထားတဲ့ နေအိမ်တွေနဲ့ ရန်ကုန် နဲ့ မန္တ​လေးမြို့တွေက စစ်တပ် သိမ်းယူထားတဲ့ ​မြေနေရာတွေ​ပေါ်မှာ အိမ်ရာတွေ ဆောက်လုပ်ရောင်းချမယ့် စီမံကိန်းတွေကနေ အမေရိကန်ဒေါ်လာ သန်း ၁၀၀ ​ကျော်ရရှိထားခဲ့ပြီဖြစ်တယ်လို့လည်း ပြောထားပါတယ်။

5 days Ago

January 24, 2023

မိုးကုတ် ကျပ်ပြင်ရဲစခန်းအနီး ဗုံးပေါက်ကွဲ

မန္တလေးတိုင်း၊ မိုးကုတ်မြို့အနောက်ပိုင်း ကျပ်ပြင်ရဲစခန်းအနီးမှာ ဇန်နဝါရီ ၂၃ ရက် ည ၇ နာရီလောက်က ဗုံးပေါက်ကွဲခဲ့တယ်လို့ ဒေသခံတွေဆီက သိရပါတယ်။

“အရင်ရှေ့တရက်ကလည်း ကျပ်ပြင်က ဒေါ်နန်းကြည်တောင်နားမှာ ဗုံးတလုံးကွဲသေးတယ်။ မနေ့ညက ရဲစခန်းနားမှာကွဲတာ၊ လူထိခိုက်မှုတော့ မရှိဘူး။ အစတွေတော့ ခေါင်မိုးတွေမှာ လာမှန်တယ်” လို့ ရပ်ကွက်နေ ဒေသခံတဦးက ပြောပါတယ်။

ကျပ်ပြင်ရဲစခန်းအနီးမှာ ဗုံးပေါက်ကွဲခဲ့ပြီးနောက် သေနတ်ပစ်သံ ငါးချက်ခန့်ကြားခဲ့ရပြီး ရပ်ကွက်တွေအတွင်း စစ်ကောင်စီတပ်က လှည့်လည်စစ်ဆေးတာတွေ လုပ်ခဲ့တယ်လို့ သိရပါတယ်။

မိုးကုတ်မြို့အနောက်ပိုင်း မိုင်းဟုမ်းကျေးရွာအနီးမှာ စစ်တပ်က ဇန်နဝါရီ ၂၀ ရက်က လေယာဥ်အသုံးပြု ပစ်ခတ်ခဲ့တာကြောင့် NUG PDF တပ်ရင်း-၁၂၂၂ က စစ်ကြောင်းမှူး ကျဆုံးခဲ့တယ်လို့ သိရပါတယ်။

စစ်​ကောင်စီတပ်နဲ့ ပြည်သူ့ကာကွယ်ရေးတပ်ဖွဲ့တွေ မြို့အနီးတဝိုက်မှာ ထိတွေ့မှု ဖြစ်ပွားခဲ့ပြီးနောက် မြို့တွင်းမှာ အခုလို ဗုံးပေါက်ကွဲမှုတွေ ဖြစ်ပွားခဲ့ပေမဲ့ ဘယ်အဖွဲ့က လုပ်ဆောင်တယ် ဆိုတာကိုတော့ တရားဝင် သတင်းထုတ်ပြန်တာ မရှိသေးပါဘူး။

7 days Ago
More News
Up