မိုးကုတ်

November 25, 2021

မိုးကုတ်မြို့ Super Coffee ရုံးတွင် ဓားပြတိုက်ခံရပြီး မန်နေဂျာ ပစ်သတ်ခံရ

မန္တလေးတိုင်း၊ မိုးကုတ်မြို့၊ ခါတော်မှီရပ်ကွက်ရှိ  Super ကော်ဖီမစ်ဖြန့်ဖြူးရေးရုံးကို နိုဝင်ဘာ ၂၅ ရက် ဒီမနက်ပိုင်း ၉ နာရီလောက်က သေနတ်သမားတွေကဝင်စီးပြီး မန်နေဂျာကို ပစ်သတ်ကာ  ငွေကျပ် သိန်းရာဂဏန်း  ယူသွားတယ်လို့ မြို့ခံတွေထံက သိရပါတယ်။ 

အမည်မသိ သေနတ်သမား  ၆ ဦးက Super Coffee ရုံးထဲကို ဝင်လာပြီးနောက် ဆာလာအိတ်ထဲ ဝှက်လာတဲ့ သေနတ်တွေထုတ်ပြီး မန်နေဂျာကို ပစ်သွားခဲ့တာဖြစ်တယ်လို့ဆိုပါတယ်။

" လူ ၆ ယောက်ဝင်လာတယ်။ အထဲမှာရှိတဲ့လူတွေအကုန်လုံး ဒူးထောက်လက်မြှောက်ခိုင်းတယ်။ နင်တို့ကိုမပစ်ဘူး ကြောက်စရာမလိုဘူးလို့ပြောတယ်။ သူတို့ဝင်လာချိန်မှာ မန်နေဂျာက မျက်နှာသစ်နေတာ။  မန်နေဂျာကို  သေနတ်နဲ့  ၅ ချက်ပစ်သွားတယ်" လို့ မြို့ခံတစ်ဦး ကပြောပါတယ်။

မန်နေဂျာက ရင်ဘတ်ကို သေနတ်နဲ့ ပစ်ခံရတဲ့ ဒဏ်ရာကြောင့် ဆေးရုံ ရောက်တော့အသက်ပါမလာတော့ဘူးလို့လည်း  ဆိုပါတယ်။ 

ရုံးထဲမှာလူတွေ အများကြီးရှိနေချိန် သေနတ်သမားတွေက ဂိုဒေါင်မှူးကို ပိုက်ဆံတွေ ယူခိုင်းတဲ့အပြင်   ရုံးက Laptop ကွန်ပြူတာတွေကိုပါ သိမ်းဆည်းသွားပြီး ရုံးငွေပမာဏ သိန်းရာဂဏန်းလောက်ထိပါသွားတယ်လို့ သိရပါတယ်။

အဆိုပါရုံးက စူပါကော်ဖီမစ်တွေဖြန့်ဖြူးတဲ့အပြင် ပစ္စည်းအမျိုးပေါင်း ၃၀၀ နီးပါးကို ဖြန့်ဖြူးနေတဲ့ရုံးဖြစ်ပါပါတယ်။

အဆိုပါ လုယက်ပစ်ခတ်မှုကို ဘယ်အဖွဲ့ ဘယ်သူတွေက ကျူးလွန်ခဲ့တယ်ဆိုတာ မသိရသေးပါဘူး။ မိုးကုတ်မြို့မှာ စစ်ကောင်စီတပ်က အာဏာသိမ်းပြီးနောက်ပိုင်း ဓားပြတိုက်မှုတွေ ဆက်တိုက်ဖြစ်ပေါ်နေပါတယ်။ 

မိုးကုတ်မြို့အနီးက လူပြတ်တဲ့နေရာတွေနဲ့ တချို့နေအိမ်တွေမှာ ဓားပြတိုက်ခံနေရပြီး အသက် အန္တရာယ်ပေးမှာကြောက်လို့  တိတ်ဆိတ်စွာနေ နေကြရတယ်လို့ မြို့ခံတွေက  ဆိုပါတယ်။

3 days Ago

November 21, 2021

မိုးကုတ် သပိတ်ခေါင်းဆောင်နေအိမ်ကို စစ်တပ်က ဖျက်ဆီး၊ ပြည်သူတစ်ဦးအား ရိုက်နှက်ဖမ်းဆီး

မန္တလေးတိုင်း မိုးကုတ်မြို့မှာ ပြည်သူတစ်ဦးအား ခေါင်းကိုအိတ်အမဲစွပ် ရိုက်နှက်ဖမ်းဆီးသွားပြီး သပိတ်ခေါင်းဆောင်တစ်ဦးရဲ့ နေအိမ်ကိုလည်း စစ်ကောင်စီတပ်က ဝင်ရောက်ဖျက်ဆီးသွားတယ်လို့ ဒေသခံတွေက ပြောပါတယ်။ 

မိုးကုတ်မြို့က သပိတ်ခေါင်းဆောင်တစ်ဦးဖြစ်တဲ့ ဦးစိုးဌေး နေအိမ်ကို စစ်ကောင်စီတပ်သားတွေက နိုဝင်ဘာ ၂၀ ရက်နေ့ မနက်ပိုင်းက အင်အားအလုံးအရင်းနဲ့ ရောက်လာ​တာလို့ ဒေသခံတဦးက ပြောပါတယ်။

"သေနတ်ပစ်သံတွေ ဆက်တိုက်ကြားရတယ်၊ ဦးစိုးဌေးခြံကိုဝင်ပစ်တာ၊ လူက ဘယ်သူမှမရှိဘူး။ သူတို့ဘာ သူတို့ ဝင်ပစ်သွားတာ၊ ပျက်စီးစေချင်လို့ပစ်တော့ ပျက်စီးတာတွေတော့ ရှိတာပေါ့။”

“မှန်တံခါးတွေလည်း ဖျက်ဆီးသွားတယ်၊ အိမ်ကမီးစက်တောင် လေးယောက် မနိုင်မနင်းသယ်သွားသေးတယ်။ ဘဲငန်း ၃ ကောင်ကိုလည်း ဘာလို့ ဖမ်းသွားလဲ မသိဘူး"လို့ ဦးစိုးဌေးက သူ့လူမှုကွန်ရက်ကတဆင့် ပြောထားပါတယ်။

နေအိမ်မှာ လူမရှိနေတာ လအတော်ကြာမြင့်ပြီဖြစ်သလို ဦးစိုးဌေးကိုလည်း စစ်ကောင်စီတပ်က  ပုဒ်မ ၅၀၅ ကနဲ့ ဝရမ်းထုတ်ပြီးနောက် ဇနီးနဲ့သမီးကို ဓားစာခံလုပ် ဖမ်းဆီးထောင်ချခဲ့သေးတယ်လို့ သိရပါတယ်။

အောက်တိုဘာ ၁၈ ရက်နေ့က ဦးစိုးဌေးရဲ့ဇနီးနဲ့သမီးတို့ အိုးဘိုထောင်ကနေ လွတ်မြောက်လာခဲ့ပေမယ့် ဖမ်းဆီးခံထားရတဲ့ သားအကြီးဖြစ်သူကိုတော့ ဒီနေ့အထိ အဆက်သွယ်မရသေးဘူးလို့ သိရပါတယ်။

မိုးကုတ်မြို့အရှေ့ပိုင်းက ပြည်သူတစ်ဦးကိုလည်း စစ်​ကောင်စီတပ်တွေက နိုဝင်ဘာ ၂၀ ရက်နေ့ ညနေ ၄ နာရီဝန်းကျင်လောက်က ခေါင်းကိုအဝတ်မဲစွပ်ရိုက်နှက်ပြီး ဖမ်းဆီးသွားတယ်လို့ သိရပါတယ်။

ဒေသခံတဦးက "ဒလန်တိုင်လို့ဖြစ်မယ်၊ အိမ်ကိုစစ်ကား ၅ စီးနဲ့လာဖမ်းတာ၊ ရိုက်နှက်ပြီးကိုဖမ်းတာ။ ခေါင်းကိုအဝတ်မဲစွပ်ပြီး ဆွဲခေါ်ဖမ်းသွားတာ" လို့ ပြောပါတယ်။

ဖမ်းဆီးခံရသူဟာ ကျန်းမာရေးမကောင်းတဲ့ ပရဟိတသမားတစ်ဦးဖြစ်ပြီး ဘာကြောင့် ဖမ်းဆီးတယ်ဆိုတာတော့ မသိရဘူးလို့ ဆိုပါတယ်။

မိုးကုတ်မြို့မှာ နိုဝင်ဘာ ၁၄ ရက်နေ့ကစပြီး စစ်ကောင်စီ တပ်စခန်းအချို့နဲ့ အချုပ်ထောင်အပါအဝင် စစ်ကောင်စီ တပ်ကင်းပုန်းနေရာတွေမှာပါ တိုက်ခိုက်ခံခဲ့ရတာကြောင့် စစ်ကောင်စီတပ်သား စစ်သား ၂၀ သေဆုံးသွားခဲ့တယ်လို့ သိရပါတယ်။

မိုးကုတ်မြို့မှာ စစ်ကောင်စီတပ်က အင်အားအလုံးအရင်းနဲ့ ကင်းပုန်းချထားတဲ့အပြင် လက်နက်အပြည့်အစုံနဲ့ ကင်းလှည့်နေတာကြောင့်  ဒေသခံတွေ စိုးရိမ်ထိတ်လန့်နေကြပါတယ်။

မိုးကုတ်မြို့မှာ နိုဝင်ဘာ ၁၉ရက်နေ့ည​က ညဘက်အပြင်ထွက်တဲ့ ဆိုင်ကယ်တစ်စီးကိုလည်း စစ်ကောင်စီတပ်က ပစ်ခတ်ခဲ့သေးတယ်လို့ သိရပါတယ်။

1 week Ago
More News
Up