ကွင်းလယ်လူ ဒက်ကလန်ရိုက်ဟာ တချိန်မှာ အင်္ဂလန်အသင်းခေါင်းဆောင်ဖြစ်လာမယ့်သူလို့ ဝက်စ်ဟမ်းနည်းပြ ဒေးဗစ်မိုယက်စ်က ချီးကျူးသွားပါတယ်။
ရိုက်ဟာ ပြီးခဲ့တဲ့တနင်္ဂနွေနေ့က ကစားခဲ့တဲ့ ကစ်ဒါမင်းစတားနဲ့ အက်ဖ်အေဖလားပွဲစဉ်မှာ လူစားဝင်ကစားပြီးနောက် ပွဲပြီးခါနီးမှ ချေပဂိုး သွင်းခဲ့ပါတယ်။
ဝက်စ်ဟမ်းဟာ ရိုက်ရဲ့ ချေပဂိုးကြောင့် အချိန်ပိုဆက်ကစားခဲ့ရပြီး ဘိုဝင်ရဲ့ မိနစ် ၁၂၀ သွင်းဂိုးနဲ့ နောက်တစ်ဆင့်တက်ခဲ့ပါတယ်။
နည်းပြမိုယက်စ်ကတော့ ကွင်းလယ်လူ ဒက်ကလန်ရိုက်ဟာ အလွန်တိုးတက်လာတဲ့ လူငယ်ကစားသမားဖြစ်ပြီး အတွေ့အကြုံကောင်းတွေလည်းရှိတယ်လို့ ချီးကျူးပါတယ်။
“သူက မာ့ခ်နိုဘယ်ဆီကတော့ သင်ယူလေ့လာမှုတွေလုပ်တယ်။ သူ့အနေနဲ့ အင်္ဂလန်အသင်းက ဟာရီကိန်းနဲ့ မက်ဂွဲယားတို့ဆီကလည်း အတုယူစရာရှိတာတွေယူရမယ်လို့ ကျနော်အများကြီးပြောခဲ့ဖူးတယ်။ ဒါကြောင့် အနာဂတ်မှာ သူဟာ အင်္ဂလန်အသင်းခေါင်းဆောင်တစ်ဦး ဖြစ်လာဖို့ အကောင်းဆုံးအခွင့်အရေးရှိတယ်ဆိုတာ သံသယဖြစ်စရာမရှိပါဘူး”လို့ နည်းပြမိုယက်စ်က ပြောပါတယ်။
အသက် ၂၃ နှစ်ပဲရှိသေးတဲ့ ဒက်ကလန်ရိုက်ဟာ အင်္ဂလန်အတွက် ၂၇ ပွဲကစားပြီး ၂ ဂိုး သွင်းထားပါတယ်။
ယူရိုပါလိဂ်ပြိုင်ပွဲမှာ ၂ ပွဲဆက်တိုက်ဂိုးသွင်းပြီး တိုက်စစ်စွမ်းဆောင်ရည် တိုးတက်လာတဲ့ ဒက်ကလန်ရိုက်ကို ဝက်စ်ဟမ်း နည်းပြ ဒေးဗစ်မိုယက်စ်ကချီးကျူးပါတယ်။
ဝက်စ်ဟမ်း ကွင်းလယ်ခံကစားသမား ဒက်ကလန်ရိုက်ဟာ ဒိုင်နမိုဇာဂရက်နဲ့ ယူရိုပါလိဂ်အုပ်စုအဖွင့်ပွဲစဉ်မှာ အနိုင်ဂိုးတစ်ဂိုးသွင်းခဲ့သလို ရက်ပစ်ဗီယင်နာနဲ့ ပွဲမှာလည်း တစ်ဂိုးထပ်သွင်းခဲ့တာပါ။
ဒက်ကလန်ရိုက်ရဲ့ဂိုးဟာ အလွန်ကောင်းမွန်ပြီး တိုက်စစ်လိုက်ပါ ဂိုးသွင်းနိုင်စွမ်းလည်းရှိသူဖြစ်တယ်လို့နည်းပြ မိုယက်စ်ကချီးကျူးခဲ့တာပါ။
“သူကပိုပြီး စွမ်းဆောင်နိုင်တယ်ဆိုတာ စတင်ပြသနေပြီ။ တကယ်လည်း အခုထက်ပိုစွမ်းဆောင်နိုင်သူပါ။ ကန်ချက်ကောင်းကောင်းတွေသူလုပ်နိုင်တယ်။ ခြုံပြောရရင်တော့ ပိုပြီးတိုးတက်လာတဲ့ကွင်းလယ်ကစားသမား ဖြစ်ပါတယ်” လို့ ဒက်ကလန်ရိုက်ရဲ့ခြေစွမ်းကို နည်းပြ မိုယက်စ်ကချီးကျူးခဲ့ပါတယ်။
ဝက်စ်ဟမ်းအသင်းဟာ ယူရိုပါလိဂ်အုပ်စုအဆင့်မှာ ၂ ပွဲကစား ၂ ပွဲနိုင် ရလဒ်နဲ့ အုပ်စုဒုတိယနေရာက ဒိုင်နမို ဇာဂရက်ဇ်ကို ၃ မှတ်ဖြတ်ပြီး ဦးဆောင်ထားပါတယ်။
