မိုင်းရှင်းလင်း

May 10, 2022

ယင်းမာပင်မြို့နယ်၌ စစ်ကောင်စီတပ်ဖွဲ့ မိုင်းရှင်းလင်းစဉ် ပေါက်ကွဲမှုဖြစ်

စစ်ကိုင်းတိုင်း၊ ယင်းမာပင်မြို့နယ်မှာ မေ ၁၀ ရက် နေ့လယ် ၂ နာရီလောက်က  မိုင်းပေါက်ကွဲမှုဖြစ်ပွားပြီး စစ်ကောင်စီတပ်ဖွဲ့ဝင်တချို့ ထိခိုက်သေဆုံးမှုရှိခဲ့တယ်လို့ ဒေသခံတွေက ပြောပါတယ်။

မိုင်းရှင်းလင်းရေးပြုလုပ်နေတဲ့ စစ်ကောင်စီတပ်ဖွဲ့က မိုင်းကို ထိကိုင်နေစဥ် မိုင်းပေါက်ကွဲခဲ့တာဖြစ်ပြီး စစ်ကောင်စီတပ်သား သေဆုံးထိခိုက်မှုရှိနိုင်ပေမဲ့ အတိအကျမသိဘူးလို့ ချိုမိုင်မိုင် PDF အဖွဲ့ဝင်က ပြောပါတယ်။

မိုင်းရှင်းလင်းတဲ့အဖွဲ့ဟာ ဘန့်ဘွေးရွာမကျေးရွာအတွင်းမှာ တပ်စွဲနေထိုင်တဲ့ စစ်ကောင်စီ တပ်ဖွဲ့ဖြစ်ပြီး အင်အား ၂၀ လောက်နဲ့မိုင်းရှင်းလင်းရေးဆောင်ရွက်နေစဥ် မုံရွာ-ယာကြီး- ကလေးဝ လမ်းပိုင်း ၅ မိုင်တိုးဂိတ်အနီးမှာ ပေါက်ကွဲခဲ့တာဖြစ်ပါတယ်။

အဲဒီပေါက်ကွဲခဲ့မိုင်းဟာ အဆင့်မြှင့်တင်လုပ်ဆောင်ထားတဲ့မိုင်းဖြစ်ပြီး National People Defence Force-(Yinmarbin)အဖွဲ့ထောင်ထားတဲ့မိုင်းဖြစ်ကာ မိုင်းပေါက်ကွဲမှုဖြစ်ပြီးနောက် စစ်ကောင်စီ တပ်ဖွဲ့တွေက သေနတ်နဲ့ပစ်ဖောက်ခဲ့ကာ ဘန့်ဘွေးရွာမကျေးရွာဘက်ကို ပြန်သွားကြတယ်လို့ ဒေသခံတွေက ‌ဆိုပါတယ်။

ဒါ့အပြင် အရင်နေ့က မူးယစ်ဆေးသုံးစွဲလွန်ပြီး သေဆုံးခဲ့တယ်လို့ ယူဆရတဲ့ စစ်ကောင်စီတပ်သား တယောက်ရဲ့ အလောင်းဟာ ဘန့်ဘွေးရွာမကျေးရွာအနီး လက်ပန်ဆိုင်းပုဒ်အရှေ့ဘက်တစ်နေရာမှာ တွေ့ရှိခဲ့ရပြီး အဲဒီအလောင်းကိုလည်း စစ်ကောင်စီတပ်ဖွဲ့က ဒီကနေ့ မနက်ပိုင်းက လာရောက်သယ်ယူသွားကြတယ်လို့  ဒေသခံ ပြည်သူတယောက်က ပြောပါတယ်။

အရင်ကလည်း ဘန့်ဘွေးရွာမကျေးရွာအတွင်း တပ်စွဲနေထိုင်တဲ့ စစ်ကောင်စီတပ်ဖွဲ့ဝင် တပ်သား တယောက် အပြင်ထွက်မူးယစ်ဆေးဝယ်လာစဥ်မှာ မူးယစ်ဆေးတွေနဲ့အတူ  ဖမ်းမိခဲ့တဲ့ဖြစ်စဥ် ရှိခဲ့ဘူးတယ်လို့ ချိုမိုင်မိုင် PDF အဖွဲ့ဝင်က ပြောပါတယ်။

9 months Ago

November 14, 2020

ဝိုင်းမော်မြို့နယ်ရှိ စစ်ရှောင်များ နေရပ်ပြန်နိုင်ရေးအတွက် မိုင်းရှင်းလင်း

ကချင်ပြည်နယ်၊ ဝိုင်းမော်မြို့နယ် ဒဘတ်ယာန်ကျေးရွာက စစ်ရှောင်ပြည်သူတွေ လုံခြုံစွာ နေရပ်ပြန်နိုင်ဖို့အတွက် မိုင်းရှင်းလင်းတာတွေကို နိုဝင်ဘာ ၁၃ ရက်နေ့ကနေ စတင်ဆောင်ရွက်ခဲ့တယ်လို့ ဒေသခံတွေက ပြောပါတယ်။ ပူတာအိုဘက်မှာ လက်တွေ့အိမ်ဆောက်ပေးနေပြီဖြစ်ကာ ဝိုင်း‌မော်၊ ဒဘတ်ယာန်ကျေးရွာမှာက မိုင်းရှင်းလင်းခြင်း လုပ်ဆောင်ဖို့ လိုအပ်တဲ့အတွက် မြောက်ပိုင်းတိုင်း စစ်ဌာနချုပ် မိုင်းရှင်းလင်းရေးအဖွဲ့တွေနဲ့ စတင်လုပ်ဆောင်နေတာလို့ ကချင်စစ်ဘေးရှောင်ပြည်သူများ ကူညီစောင့်ရှောက်ရေးအဖွဲ့တစ်ခုဖြစ်တဲ့ KHCC အဖွဲ့က ဆရာခါးလီက ပြောပါတယ်။  အိမ်ခြေ ၆ ခုကို စတင်ရှင်းလင်းနိုင်ခဲ့ပြီး မိုင်းရှင်းလင်းပြီးပါက လူနေ အိမ်ဆောက်လုပ်ရေးကို ဖေဖော်ဝါရီအကုန်မှာ အပြီးသတ်လုပ်ဆောင်သွားမှာ ဖြစ်ပါတယ်။   စစ်ရှောင်‌ဒေသခံ ပြည်သူအိမ်‌ခြေ ၂၀၀ ကျော်ကတော့ ဧပြီလလောက်မှာ နေရပ်ပြန်နိုင်ဖို့ မျှော်မှန်းထားတယ်လို့ သိရပါတယ်။  ၂၀၁၉ ခုနှစ်က စတင်ကာ စစ်ရှောင်ပြည်သူတွေ နေရပ်ပြန်နိုင်ရေး စတင်လုပ်ဆောင်ခဲ့တာဖြစ်ပြီး  နိုဝင်ဘာ ၁၂ ရက်နေ့က ဝိုင်းမော်မြို့နယ် ဒဘတ်ယာန်‌ကျေးရွာမှာ မြေယာပိုင်ဆိုင်မှုတွေကို သက်ဆိုင်ရာ ဌာနဆိုင်ရာတွေနဲ့ စိစစ်တဲ့အပိုင်းတွေကို စတင်လုပ်ဆောင်နိုင်ခဲ့ပြီလို့ သိရပါတယ်။ သတင်း - ဇုန်းကျန်း
2 years Ago
Up