မိုင်းဆွဲတိုက်ခိုက်ခံရ

January 24, 2023

မြိုင်တွင် စစ်ကောင်စီရှေ့ပြေးတပ်သားများ မိုင်းဆွဲတိုက်ခိုက်ခံရပြီး အယောက် ၂၀ သေဆုံး

မကွေးတိုင်း၊ မြိုင်မြို့နယ်ထဲမှာ စစ်ကောင်စီရိက္ခာပို့ယာဉ်တန်းရဲ့ ရှေ့ပြေးခြေလျင် တပ်သားတွေကို ဒေသခံ ပြည်သူ့ကာကွယ်ရေးတပ်ဖွဲ့တွေက မိုင်း ၁၅ လုံးဆွဲ တိုက်ခိုက်ခဲ့တာကြောင့် စစ်ကောင်စီဘက်က အယောက် ၂၀ သေဆုံးခဲ့တယ်လို့ မြိုင်မြို့နယ် မြေအောက်တော်လှန်ရေး တပ်ဖွဲ့ Myaing Underground Defence Force-MUGDF က ပြောပါတယ်။

“ကျနော်တို့ ဆင်ထားတဲ့မိုင်းတွေအပေါ် အရောက်မှာ ဆွဲလိုက်တာ၊ သေဆုံး ၂၀ လောက်ရှိတယ်၊ မိုင်းထိလို့ ဖောကား ၃ စီးလောက်နဲ့ လာသယ်သွားတယ်၊ ပခုက္ကူ တပ်မ ၁၀၁ ထဲက ဖောကား ၆ စီးနဲ့ထွက်လာတဲ့ စစ်သားတွေလို့ သိရတယ်။”

ဇန်နဝါရီ ၂၃ ရက် ညနေ ၃ နာရီလောက်က တိုက်ခိုက်ခဲ့တာဖြစ်ပြီး ပခုက္ကူမြို့ကနေ Well-2 ရေနံမြေစခန်းကို သွားရောက်မယ့် စစ်ကောင်စီရိက္ခာပို့ယာဉ်တန်းရဲ့ ခြေလျင်အင်အား ၅၀ ကျော်ပါတဲ့ ရှေ့ပြေးခြေလျင်တပ်သားတွေကို ကိုင်းတောမရဲစခန်းနဲ့ Well-2 ရေနံမြေစခန်းအကြားမှာ မြိုင်မြို့နယ် မြေအောက်တော်လှန်ရေးတပ်ဖွဲ့ Myaing Underground Defence Force-MUGDF နဲ့အတူ ပြည်သူ့ကာကွယ်ရေးတပ်ဖွဲ့-မြိုင်မြို့နယ် တပ်ခွဲ-၁၊ တပ်ခွဲ -၄( စင်္ကြာ) ၊ မုန်တိုင်းတပ်ဖွဲ့တို့ပူးပေါင်းလုပ်ဆောင်ခဲ့ကြတာလို့ ဆိုပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ် တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။

စစ်တပ်ရိက္ခာပို့ယာဉ်တန်းရဲ့ ရှေ့ပြေးခြေလျင် တပ်သားတွေ တိုက်ခိုက်ခံရတာကြောင့် ထိခိုက်ကျဆုံးမှုအခြေအနေကို စစ်ကောင်စီက သတင်းထုတ်ပြန်တာ မရှိသေးပါဘူး။

5 days Ago

January 16, 2023

မွန်ပြည်နယ် နယ်လုံဝန်ကြီးဟောင်း စီးလာသည့်ကား မိုင်းဆွဲတိုက်ခိုက်ခံရ

မွန်ပြည်နယ်၊ လုံခြုံရေးနဲ့ နယ်စပ်ရေးရာဝန်ကြီးဟောင်း အငြိမ်းစား ဗိုလ်မှူးကြီး ဝင်းနိုင်ဦး စီးလာတဲ့ကားကို ဇန်နဝါရီ ၁၅ ရက် ည ၆ နာရီခွဲလောက်မှာ အဝေးထိန်းမိုင်းနဲ့ ဖောက်ခွဲ တိုက်ခိုက်ခဲ့တယ်လို့ မုဒုံမြို့နယ်ပြည်သူ့ကာကွယ်ရေးတပ်ဖွဲ့(ပကဖ)က ထုတ်ပြန်ပါတယ်။

မြို့မ (၃) ရပ်ကွက်၊ ဦးစံဖေလမ်းမှာနေတဲ့ ဗိုလ်မှူးကြီးဟောင်း ဝင်းနိုင်ဦးကို အိမ်အပြန် စောင့်ပြီး အိမ်ခြံဝအနီးမှာ အဝေးထိန်းမိုင်းနဲ့ ဖောက်ခွဲတိုက်ခိုက်ခဲ့တာဖြစ်ပြီး လူထိခိုက်ဒဏ်ရာ ရတာ မရှိပေမဲ့ ကားကတော့ ထိခိုက်ပျက်စီးခဲ့တယ်လို့ မုဒုံ(ပကဖ) က ဆိုပါတယ်။

ဒေသခံတွေကတော့ ဗိုလ်မှူးကြီး ဝင်းနိုင်ဦး(အငြိမ်းစား) ရဲ့ကား မိုင်းဆွဲတိုက်ခိုက်ခံရတာ မှန်ကန်ကြောင်းနဲ့ ထိခိုက်ပျက်စီးမှု အခြေအနေ အသေးစိတ် မသိရဘူးလို့ ပြောပါတယ်။

မိုင်းဆွဲတိုက်ခိုက်ခံရပြီးနောက် စစ်ကောင်စီတပ်က ဒေသခံ ၁၀ ဦး ထက်မနည်း ဖမ်းဆီးထားကာ မုဒုံမြို့မရဲစခန်းမှာ စစ်ဆေးမေးမြန်းပြီး တချို့ကို ပြန်လွှတ်ပေးခဲ့တယ်လို့ ဆိုပါတယ်။

ဗိုလ်မှူးကြီး ဝင်းနိုင်ဦး(အငြိမ်းစား)ဟာ ၂၀၂၀ အထွေထွေရွေးကောက်ပွဲတုန်းက ကြံ့ခိုင်ရေးပါတီ ကနေ မုဒုံမြို့နယ်မဲဆန္ဒနယ် ပြည်နယ်လွှတ်တော်ကိုယ်စားလှယ်နေရာက ဝင်ရောက်ယှဉ်ပြိုင်ခဲ့ပေမဲ့ ရှုံးနိမ့်ခဲ့ပါတယ်။

လက်ရှိမှာတော့ ဗိုလ်မှူးကြီး ဝင်းနိုင်ဦး(အငြိမ်းစား)ဟာ မွန်ပြည်နယ် ဗုဒ္ဓဘာသာကလျာဏ ယုဝအသင်း(YMBA) မှာ ဥက္ကဋ္ဌအဖြစ် ဆောင်ရွက်နေတာ ဖြစ်ပါတယ်။

2 weeks Ago
More News
Up