ရှမ်းပြည်နယ်အရှေ့ပိုင်း မိုင်းဆတ်မြို့နယ်၊ မိုင်းနင်းကျေးရွာရှိ မီးဘေးသင့် အိမ်ခြေ ၂၀ ကျော်က ပြည်သူတွေ စားဝတ်နေရေး အခက်အခဲ ကြုံနေကြပြီး အကူအညီလိုအပ်နေတယ်လို့ သိရပါတယ်။
မိုင်းနင်းကျေးရွာ မတ်လ ၂၀ ရက်နေ့က မီးလောင်မှုဖြစ်ပွားခဲ့တာကြောင့် အိမ်ခြေ ၂၀ ကျော်မီးလောင်ဆုံးရှုံးပြီး အမျိုးသား ၁ ဦး အပြင်းအထန် ဒဏ်ရာရရှိခဲ့တာလို့ ဒေသတဦးက ဒီဗွီဘီကို ပြောပါတယ်။
"မီးလောင်တဲ့နေရာက ဈေးနားမှာပါ။ ဈေးဆိုင်ခန်းတချို့လည်း မီးထဲပါသွားပြီး တချို့ကတော့ ပစ္စည်းနည်းနည်း ပြန်ရသေးတယ်။ သူများအိမ်ကနေ စလောင်တာ အိမ်ခြေ ၂၀ ကျော်ထိ မီးကူးစက်သွားတယ်။ ရွာက မြို့နဲ့အလှမ်းဝေးတော့ လျှပ်စစ်မီးလည်း မရသေးဘူး။ မနက်အစော ထမင်းထချက်ရင်း လောင်တာဖြစ်နိုင်တယ်။”
မီးလောင်မှုကြောင့် ပျက်စီးဆုံးရှုံးမှုတော့ မသိရသေးဘဲ ဒဏ်ရာရတဲ့ လူနာကိုတော့ ကျိုင်းတုံဆေးရုံ ပို့ဆောင်ထားတယ်လို့ သိရပါတယ်။
အဆိုပါကျေးရွာဟာ အိမ်ခြေ ၁၀၀ ကျော်ရှိပြီး မီးလောင်ဆုံးရှုံးမှုကြောင့် အိုးမဲ့အိမ်မဲ့ ဖြစ်သွားတဲ့ ပြည်သူတွေ အကူအညီလိုအပ်နေတယ်လို့ သိရပါတယ်။
ရှမ်းပြည်နယ်အရှေ့ပိုင်း မိုင်းဆတ်မြို့မှာ ဇန်နဝါရီ ၁၈ ရက် ည ၉ နာရီလောက်က မိုးသည်းထန်စွာရွာသွန်းပြီး လေပြင်းတွေပါတိုက်ခတ်လို့ ဓာတ်တိုင်တွေ ကျိုးသွားတယ်လို့ ဒေသခံတွေဆီက သိရပါတယ်။
မိုင်းဆတ်မြို့ခံတယောက်က "ညက ၉ နာရီ မထိုးခင်ကတည်းက မိုးတွေတအားရွာပြီး လေတွေပါတိုက်တာပါ။ မိုးသီးတွေပါကျတယ်” လို့ ပြောပါတယ်။
မိုးနဲ့လေပြင်းတိုက်ခတ်မှုတွေကြောင့် မိုင်းဆတ်မြို့အတွင်း ကျဒယ်လမ်းဆုံ ကနေ ပညာရေးမှူးရုံးကို သွားရာလမ်းပေါ်ရှိ 11KV Line နဲ့ 400V ဓာတ်အားလိုင်းနဲ့ နှစ်ထပ်လိုင်းဓာတ်အားတိုင် ၁၀ တိုင်ကျော်လောက် ကျိုးကျပျက်စီးသွားတယ်လို့ သိရပါတယ်။
"ညက မိုးတွေ လေတွေသည်းပြီး နောက်မီးပျက်သွားတယ်။ ဒီကနေ့ မနက်ထိ မီးမလာသေးဘူးလို့ "ဒေသခံ တဦးကပြောပါတယ်။
အလားတူ ရှမ်းပြည်နယ်အရှေ့ပိုင်း တာချီလိတ်မြို့မှာလည်း လေပြင်းတွေတိုက်ခတ်ခဲ့တယ်လို့ သိရပါတယ်။
