တစ်ကျော့ပြန် ပြန်လည်စည်ကားနေတဲ့ ထားဝယ်ခရိုင် ကံပေါက်ဒေသက လောင်းကစားဝိုင်းတခုအနီးမှာ မိုင်းခွဲ သတိပေးခဲ့တယ်လို့ ဒေသကာကွယ်ရေးတပ်ဖွဲ့က ဇန်နဝါရီလ ၁၉ ရက်နေ့က ထုတ်ပြန်ထားပါတယ်။
ကံပေါက်ဒေသမှာ စစ်တပ်က အာဏာသိမ်းပြီးတဲ့နောက် တစ်ကျော့ပြန် ပြန်လည်စည်ကားလာတဲ့အတွက် အခုလို မိုင်းခွဲသတိပေးလိုက်တာလို့ ဆိုပါတယ်။
ပေါက်ကွဲတဲ့အသံက တော်တော်ကျယ်ပြီး မိုင်းပေါက်ကွဲမှုကြောင့် ထိခိုက်ဒဏ်ရာ ရရှိသူ မရှိဘူးလို့လဲ ဒေသခံ တစ်ဦးက ပြောပါတယ်။
အဆိုပါ လောင်းကစားဝိုင်းတွေဟာ ပွဲတော်လိုဖြစ်နေပြီး ရွာစဉ်လှည့်လည်ကာ အလှည့်နဲ့ လုပ်နေကြကာ အရင်က ဒီလိုမျိုး မလုပ်တာကြာပြီလို့ ဒေသခံ အမျိုးသမီးတစ်ဦးက ပြောပါတယ်။
လောင်းကစားဝိုင်းတွေဟာ ပြည်သူတွေရဲ့ စာရိတ္တကိုပျက်ပြားစေတဲ့အပြင် စစ်ကောင်စီကို ဆက်ကြေးပေးနေရတာဖြစ်တဲ့အတွက် နမူနာအနေနဲ့ အခုလို သတိပေးရတာလို့ ဒေသကာကွယ်ရေးတပ်ဖွဲ့ ထုတ်ပြန်ချက်မှာ ဖော်ပြထားပါတယ်။
အာဏာသိမ်းပြီး တပတ်အကြာ ကံပေါက်ဒေသ အုန်းပင်ကွင်းကျေးရွာအုပ်စုက လောင်ကစားဝိုင်းတခုကို စစ်တပ်က ဖမ်းပြီး ရက်အနည်းငယ်အတွင်း ပြန်လွှတ်ပေးခဲ့တဲ့ ဖြစ်စဉ်မျိုးလည်း ရှိခဲ့ပါတယ်။
ထားဝယ်ခရိုင် ရေဖြူမြို့နယ် ကံပေါက်ဒေသမှာ ပေါက်ကွဲမှုဖြစ်ပေါ်နေတာဟာ အခုတကြိမ်အပါအဝင် ၃ ကြိမ်ရှိပြီလို့ သိရပါတယ်။
စစ်ကိုင်းတိုင်း၊ ဝက်လက်မြို့နယ်အတွင်း အတင်းအဓမ္မ ငွေကောက်ခံနေတဲ့ အသေးစားချေးငွေလုပ်ငန်းတွေ ရပ်နားကြဖို့ အသေးစားချေးငွေလုပ်ငန်းရုံးတခုရှေ့မှာ ဖောင်းဒိုင်း ဖောင်းဒိုင်းအဖွဲ့က အောက်တိုဘာလ ၄ ရက် ညနေ ၃ နာရီလောက် မိုင်းခွဲသတိပေးလိုက်ပါတယ်။
အသေးစားချေးငွေ ဆက်လက်ကောက်ခံနေပါက ဝန်ထမ်းတွေရဲ့အသက် အိုးအိမ်ကို တာဝန်ယူမှာမဟုတ်ဘူးလို့ ဆိုပါတယ်။
ပြည်သူလူထုနဲ့ CDM ဝန်ထမ်းတွေ အခက်အခဲအကျပ်အတည်းတွေနဲ့ ရင်ဆိုင်နေရချိန်မှာ ယမင်းသူ၊ ပက်မြန်မာဘဏ် စတဲ့ အသေးစားချေးငွေ လုပ်ငန်းတွေဟာ ချေးငွေတွေကို အတင်းအဓမ္မတောင်းခံတာတွေ ပြုလုပ်နေတဲ့အတွက် အခုလို မိုင်းခွဲသတိပေးလိုက်တာလို့ အဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။
အရေးတော်ပုံ ကာလအတွင်း ချေးငွေလုပ်ငန်းတွေအားလုံး အောက်တိုဘာလ ၇ ရက်နေ့နောက်ဆုံးထား ရပ်နားပေးကြဖို့နဲ့ ဆက်လက်ပြီး တောင်းခံနေမယ်ဆိုပါက ဝန်ထမ်းတွေရဲ့ အသက်အိုးအိမ်ကို တာဝန်ယူတော့မှာမဟုတ်ဘူးလို့ ဆိုပါတယ်။
ဝက်လက်မြို့နယ်အတွင်းက ဖောင်းဒိုင်း ဖောင်းဒိုင်း အဖွဲ့ဟာ စစ်ကောင်စီခန့်အုပ်ချုပ်ရေးမှူးနဲ့ ဒလန်၊ ပျူစောထီး ၆ ဦးအထိ သုတ်သင်ရှင်းလင်းထားပြီး မိုင်တဲလ်တာဝါတိုင် ၉ တိုင်ကိုလည်း ဖောက်ခွဲဖျက်ဆီးထားတယ်လို့ သိရပါတယ်။
