မိုင်းကွဲ

December 1, 2021

တန့်ဆည် အ.ထ.က (၁) အဝင်ဝကင်းတဲ မိုင်းကွဲ၊ စစ်ကောင်စီတပ်သား ၄ ဦးသေ

စစ်ကိုင်းတိုင်း၊ တန့်ဆည်မြို့ အ.ထ.က ၁ မှာ ဒီဇင်ဘာလ ၁ ရက် မနက်ပိုင်းက စစ်ကောင်စီ စစ်တပ်ဖွဲ့ တပ်စွဲထားတဲ့ အထက်တန်းကျောင်း အဝင်ဝကင်းတဲ မိုင်းကွဲတာကြောင့် စစ်သား ၄ ဦး သေဆုံးခဲ့တယ်လို့ ဒေသခံတွေဆီက သိရပါတယ်။

“အ.ထ.က (၁) ထဲ တပ်စွဲတာ သုံးရက်ရှိပြီ။ စစ်အင်အား ၃၀ လောက်တော့ရှိတယ်။ ဒီနေ့ မနက်ပိုင်းပေါက်ကွဲတော့ လူနာတင်ယာဉ်တွေနဲ့သွားပြီး သယ်နေတာတွေ့ရတယ်။ တော်တော်များများ ထိခိုက်လောက်တယ်”လို့ မြို့ခံတစ်ဦးက ပြောပါတယ်။

အခုပြောက်ကျားတိုက်ခိုက်မှုကို TaZe Tiger အဖွဲ့ကပြုလုပ်တာဖြစ်ပြီး ၄ ဦးသေဆုံးကာ အများအပြား ဒဏ်ရာရတယ်လို့ ကြေညာချက်ထုတ်ပြန်ထားပါတယ်။

စစ်ကောင်စီတပ်သားတွေ သေဆုံးဒဏ်ရာရမှုအခြေအနေနဲ့ပတ်သက်ပြီး ဒီဗွီဘီက သီးခြားအတည်မပြုနိုင်သေးပါဘူး။

အဆိုပါမိုင်းခွဲတိုက်ခိုက်ခံရပြီးနောက် စသ်ကောင်စီတပ်သားတွေဟာ ရမ်းသမ်းပစ်ခတ်တာ တွေ ပြုလုပ်ပြီး ကျောင်းရှေ့က သီရိကန်ဈေးတန်းကိုလည်း ပိတ်ခိုင်းခဲ့တယ်လို့ ဒေသခံတွေဆီက သိရပါတယ်။

တန့်ဆည်မြို့မှာ နိုဝင်ဘာလ ၂၆ ရက်နေ့ကလည်း မြို့နယ်တရားရုံးအနီး ဗုံးပေါက်ကွဲခဲ့လို့ စစ်ကောင်စီတပ်သား ၃ ဦး သေဆုံးခဲ့တယ်လို့ သိရပါတယ်။

1 year Ago

November 26, 2021

ဖားကန့် မှော်စီစာ အထကကျောင်းရှေ့၌ မိုင်းကွဲ၊ ဆရာ ဆရာမနှင့် ကျောင်းသူအချို့ ဒဏ်ရာရ

ကချင်ပြည်နယ်၊ ဖားကန့်မြို့နယ်၊ လုံးခင်းကျေးရွာအုပ်စု မှော်စီစာ အထက ကျောင်းခွဲမှာ နိုဝင်ဘာ ၂၆ ရက် ဒီမနက်က  မိုင်းပေါက်ကွဲပြီး  ဆရာ/ဆရာမနဲ့ ကျောင်းသူ ကျောင်းသားအပါအဝင်  အနည်းဆုံး  ၆ ယောက်လောက်  ထိခိုက်ဒဏ်ရာရခဲ့ပါတယ်။

ဒီမနက် ၈ နာရီ ၁၅ မိနစ်လောက်က ကျောင်းသားတွေနဲ့ ဆရာ/ဆရာမတွေ ကျောင်းကိုအလာ ကျောင်းအဝင်ဝနားမှာ မိုင်းပေါက်ကွဲမှုဖြစ်လို့  ထိခိုက်ဒဏ်ရာရသူတွေကို ဖားကန့်ဆေးရုံကို ပို့ဆောင်ပေးခဲ့တယ်လို့  မြန်မာနိုင်ငံလူမှုကယ်ဆယ်ရေးအဖွဲ့ ဖားကန့်မြို့နယ် ဥက္ကဋ္ဌ ကိုဂျက်က ဒီဗွီ ဘီကို ပြောပါတယ်။ 

“မိုင်းထိဒဏ်ရာရသူတွေရှိတယ်ဆိုပြီး ဖုံးဆက်လာတော့ ကျနော်တို့အဖွဲ့က ကား ၂ စီးနဲ့ လူနာတွေကို သွားသယ်ပြီး ဖားကန့်ဆေးရုံပို့ထားပေးပါတယ်။ ဒဏ်ရာက သူတို့ ကျောမှာ ၊ ဗိုက်မှာ ၊ ခြေထောက်နဲ့ ပေါင်တွေမှာထိတယ်၊ စုစုပေါင်း ၆ ယောက်။ ဆိုင်ကယ်သမား ၁ ယောက်၊ ပြီးတော့ ဆရာ ၁ ယောက် ၊ ဆရာမ ၂ ယောက် နဲ့ ကျောင်းသူ ၂ ယောက် ၊ အဲဒီထဲမှာ ဆိုင်ကယ်သမားနဲ့ ကျောင်းဆရာတစ်ယောက်က သွေးထွက်လွန်တော့ စိုးရိမ်ရတယ်။ ”

မျက်မြင်တွေပြောပြချက်အရ ဆိုင်ကယ်သမားက အရင်ဆုံးကျောင်းရှေ့ဖြတ်လာရာမှာ ထောင်ထားတဲ့မိုင်းပေါက်တာဖြစ်ပြီး နောက်ကလိုက်လာတဲ့ ဆရာဆရာမနဲ့ ကျောင်းသူတွေပါ ထိကုန်တာလို့ ဒေသခံက ပြောတယ်။

အဆိုပါပေါက်ကွဲမှုမှာ ကျောင်းဆရာ ၂ ယောက်၊ ဆရာမ ၃ ယောက်၊ ကျောင်းသား ၁ ယောက် ၊ ကျောင်းသူ ၁ ‌ယောက်နဲ့ ကျောင်းသားမိဘ ၁ ယောက် စုစုပေါင်း ၈ ဦး ထိခိုက်ဒဏ်ရာရတယ်လို့ စစ်ကောင်စီပြန်ကြားရေးသတင်းမှာ ဖော်ပြပါတယ်။ 

ကျောင်းအုပ်ဆရာမကြီးက လိုက်ထရပ်ကားမောင်းလာပြီး ကျောင်းကွေ့အဝင် မြောင်းနားမှာ ရှိတဲ့ မိုင်းပေါက်ကာ ကားနောက်ဘီးပွင့်သွားတာလို့  ဆိုပါတယ်။  အဆိုပါ စာသင်ကျောင်းမှာ ဒီလ ၆ ရက်နေ့ကလည်း မိုင်း ၁ လုံးပေါက်ကွဲခဲ့ပြီး အဲတုန်းကတော့ ထိခိုက်ဒဏ်ရာရသူတော့ မရှိပါဘူး။  

1 year Ago
More News
Up