မာန်အောင်

A d v e r t i s e m e n t With Us

January 29, 2020

ပြည်ပဖားမျိုးနှင့် ဒေသဖားမျိုးစပ် ဖားမွေးမြူရေးလုပ်ငန်း အောင်မြင်မှုရရှိနေ

ရခိုင်ပြည်နယ်၊ မာန်အောင်မြို့နယ်မှာ ပြည်ပဖားမျိုးစိတ်နဲ့ ဒေသဖားမျိုးစိတ် ပေါင်းစပ်ကာ ဖားသားပေါက် မွေးမြူရေးလုပ်ငန်း အောင်မြင်နေတယ်လို့ ဖားမွေးမြူရေး လုပ်ကိုင်သူတွေက ပြောပါတယ်။ မာန်အောင်မှာ ဖားမွေးမြူရေးလုပ်ငန်းကို ၂၀၁၇ ခုနှစ်က စတင်လုပ်ဆောင်တာဖြစ်ပြီး လက်ရှိမွေးမြူသူ ၅ ဦးရှိပါတယ်။ ပြည်ပဖားတမျိုးတည်း မွေးမြူရာမှာ ရာသီဥတုနဲ့ကိုက်ညီမှု မရှိတဲ့အတွက် သေဆုံးတာရှိခဲ့ပြီး အခုဒေသဖားမျိုးစိတ်နဲ့ သားဖောက်စနစ်ပြုလုပ်ကာ မွေးမြူတဲ့အခါမှသာ အောင်မြင်မှု ရရှိလာတယ်လို့ ရခိုင်ပြည်နယ် မာန်အောင်မြို့က ဖားမွေးမြူသူ ကိုကျော်ဆန်းထွေးက ပြောပါတယ်။ “ပြည်ပဖားသီးသန့် မွေးကြည့်တော့ ဒီကရာသီဥတုနဲ့ ကိုက်ညီမှုမရှိလို့ သေကျေပျက်စီးမှု များတယ်။ ၂၀၁၈ မှာတော့ ဒေသဖားတွေကို ဝယ်ပြီး ပြည်ပဖားနဲ့ သဘာဝစနစ် မျိုးစပ်ပြီး သားဖောက်တယ်။ အခုဆို အဆင်ပြေတယ် အောင်မြင်တယ်။” လက်ရှိ ပြည်တွင်းဖြစ် ဒေသဖားတွေမှာ အလွန်ရှားပါးနေပြီး စားသုံးသူအတွက် လုံလောက်မှု မရှိတဲ့အတွက် ပြည်ပနိုင်ငံတွေကနေ မှာယူစားသုံးနေကြရပြီး မြန်မာပြည်တွင်းမှာ မွေးမြူထုတ်လုပ်ရေးစနစ်တခု ဖြစ်ပေါ်လာဖို့ ရည်ရွယ်လုပ်ဆောင်နေတယ်လို့ သိရပါတယ်။ ဖားမွေးမြူရေး လုပ်ဆောင်ရာမှာ ဖားအရွယ်အစားအလိုက် ရောဂါပိုးမွှား မဖြစ်စေဖို့ ကာကွယ်ရေးနည်းစနစ်တွေကို အထူးလုပ်ဆောင်ရပြီး ဖားတွေ စားသုံးဖို့ အစာပြုလုပ်ရေးစနစ်မှာ အခက်အခဲရှိတဲ့အတွက် ဖားစာ ထုတ်လုပ်တဲ့နည်းစနစ်ကို အစိုးရအနေနဲ့ ကူညီထောက်ပံ့ပေးဖို့ လိုအပ်နေပါတယ်။  ဖားမွေးမြူသူ ကိုကျော်ဆန်းထွေးက “ကျနော်တို့က ဖားမွေးမြူရေးစနစ်မှာ ဖားတွေကို အရွယ်အစားအလိုက်ခွဲပြီး ထိန်းသိမ်းစောင့်ရှောက်ရေးပြုလုပ်ဖို့ အရေးကြီးတယ်။ ပြီးတော့ ဖားစာထုတ်လုပ်မှုစနစ်က အရမ်းအခက်အခဲ ရှိတယ်။ အခု ထိုင်း၊ ဗီယက်နမ် စတဲ့ဘက်က အစာကို မှာယူနေရတယ်။ အဲဒါကြောင့် ပြည်တွင်းက ဖားစာထုတ်လုပ်နိုင်တဲ့ ဖားစာထုတ်လုပ်တဲ့ နည်းစနစ်ကို အစိုးရက ထောက်ပံ့ပေးဖို့လိုတယ်။” မြန်မာနိုင်ငံမှာ ဖားမွေးမြူတဲ့လုပ်ငန်းကို ၂၀၁၅ ခုနှစ်က စတင် စမ်းသပ်မွေးမြူလာကြပြီး ဟော်မုန်းနဲ့ သားဖောက်တာရှိသလို သဘာဝအတိုင်း ဖားသားဖောက်တဲ့ နည်းစနစ်နဲ့လည်း လုပ်ဆောင်ကြပါတယ်။ အခုအခါမှာ ဖားမွေးမြူရေးစနစ်ကို ရခိုင်ပြည်နယ်၊ မြစ်ကြီးနား၊ ရန်ကုန်တိုင်း၊ ကရင်ပြည်နယ်၊ မန္တလေးတိုင်းတို့မှာ မွေးမြူနေရပြီး ဖားသားပေါက် တကောင်ကို ကျပ် ၂၀၀ အကောင်ကြီး တပိဿာကို ကျပ်  ၉၀၀၀ မှ ၁၅၀၀၀ အထိ ပြည်တွင်းစျေးကွက်မှာ အရောင်းအဝယ်စျေး ဖြစ်နေတယ်လို့ သိရပါတယ်။ သားချစ်ဇော်
1 year Ago

January 11, 2020

မာန်အောင်ခရီးသွားဇုန်ကို ၂၀၂၀ ပြည့်နှစ် အောက်တိုဘာတွင် ဖွင့်လှစ်မည်

ရခိုင်ပြည်နယ် ၁၇ မြို့နယ်ထဲက မာန်အောင်ကျွန်းသဘာဝကမ်းခြေမှာ ဟိုတယ်ဇုန်နဲ့ ခရီးသွားလုပ်ငန်း အပိုင်း ၁ ကို ၂၀၂၀ ပြည့် နှစ်ကုန်ပိုင်းလောက် ဖွင့်လှစ်သွားမယ်လို့ သိရပါတယ်။ မာန်အောင်အများပိုင်ကုပ္ပဏီ ဥက္ကဋ္ဌ ဦးထွန်းလှိုင်က "ကျနော်တို့ ဒီအပိုင်း ၁ ဖြစ်တဲ့ သဘာဝကမ်းခြေ ဟိုတယ်ဇုန်နဲ့ ခရီးသွားလုပ်ငန်းကို ဒီ ၂၀၂၀ အောက်တိုဘာလလောက်မှာ စတင် ဖွင့်လှစ်နိုင်ဖို့ လုပ်ဆောင်ထားပါတယ်။ ဟိုတယ် ၁၂ လုံးကိုတော့ အခုလက်ရှိတည်ဆောက်နေတာ ၅၀ ရာခိုင်နှုန်းလောက်တော့ ပြီးစီးနေပါပြီ" လို့ပြောပါတယ်။ ရခိုင်ပြည်နယ် မာန်အောင်ဒေသမှာ မာန်အောင်အများပိုင်ကုမ္ပဏီ (MPC) က အကောင်အထည်ဖော်ဆောင်ရွက်သွားမယ့် Master Plan ၁၀ ခုထဲမှာ လေဆိပ်အဆင့်မြှင့်တင်ရေး၊ ဆိပ်ကမ်းအဆင့်မြှင့်တင်ရေး၊ လမ်းတံတားအဆင့်မြှင့်တင်ရေး၊ လျှပ်စစ်စွမ်းအင်ရရှိရေး၊ သောက်သုံးရေရရှိရေး၊ ရေဆိုးသန့်စင်စနစ်ဆောင်ရွက်ရေး၊ အမှိုက်စီမံခန့်ခွဲရေး၊ မြို့ပြဖွံ့ဖြိုးမှုဆိုင်ရာစီမံကိန်းနှင့်အညီ ဖွံ့ဖြိုးရေးဆိုင်ရာဇုန်များ အကောင် အထည်ဖော်ရေး၊ မွေးမြူရေး၊ ပတ်ဝန်းကျင်နဲ့ကိုက်ညီတဲ့ ဟိုတယ်နှင့် ခရီးသွားလုပ်ငန်း အကောင်အထည်ဖော်ဆောင်ရေးတို့ ပါဝင်မှာဖြစ်ပါတယ်။ မာန်အောင်ဒေသခံ ကိုအောင်မြင့်သူက "အခု မာန်အောင်မှာ ခရီးသွားလုပ်ငန်းတွေ စတင်အကောင်အထည်ဖော် လုပ်ဆောင်နေပြီဆိုတော့ ဒီဒေသမှာက ခရီးသွားလုပ်ငန်းနဲ့ပဲ တသက်လုံး ရှေ့ဆက်သွားတော့မှာလေ။ အရေးကြီးဆုံးက ရိုးရာတွေကို ထိန်းသိမ်းတတ်ဖို့အတွက် သင်တန်းတွေကိုလည်း လုပ်ဆောင်ပေးဖို့လိုတယ်” လို့ ဒီဗွီဘီကိုပြောပါတယ်။ အဲဒီဟိုတယ်ဇုန်ကို မာန်အောင်မြို့နယ်ထဲက ကအီးအုပ်စု၊ ကအီးကျေးရွာ ကမ်းခြေမှာ တည်ဆောက်နေတာဖြစ်ပြီး ဒေသခံအများစုကတော့ အလုပ်အကိုင် အခွင့်အလမ်း ရရှိဖို့ မျှော်လင့်နေကြတယ်လို့ သိရပါတယ်။ သားချစ်ဇော်
1 year Ago
Up