ဧရာဝတီတိုင်း၊ မအူပင်မြို့နယ် မြို့မရဲစခန်းမှာ နိုဝင်ဘာ ၂ ရက်က အချုပ်သား ၁ ဦးထံကနေ ကိုဗစ်-၁၉ ရောဂါတွေ့ရှိခဲ့တယ်လို့ ခရိုင်ပြည်သူ့ကျန်းမာရေးဦးစီးဌာနက သိရပါတယ်။
ရောဂါပိုးတွေ့ရှိခဲ့တဲ့ အမျိုးသားမှာ အနံ့ပျောက်တဲ့ ဝေဒနာခံစားနေရတယ်သိရလို့ စစ်ဆေးရာကနေ ကိုဗစ်-၁၉ ရောဂါတွေ့ရှိခဲ့တာဖြစ်တယ်လို့ ခရိုင်ပြည်သူ့ကျန်းမာရေးဦးစီးဌာန ဦးစီးမှူး ဒေါက်တာခင်မာစိုးက ပြောပါတယ်။
“အချုပ်ကျနေသူ တစ်ဦးဆီက ကိုဗစ်ပိုးတွေ့တာ ဟုတ်ပါတယ်။ အနံမရဘူးဆိုလို့ စစ်ဆေးရာကနေ ခုလိုတွေ့ရှိတာပါ၊ ကျန်တဲ့လူတွေကို စစ်ဆေးသွားမှာပါ”လို့ ပြောပါတယ်။
ရဲစခန်းအချုပ်မှာ ကိုဗစ်-၁၉ ရောဂါကူးစက်ခံထားရသူ တွေ့ရှိခဲ့တာကြောင့် အချုပ်ကျနေသူ ၉ ယောက်နဲ့ ရဲတပ်ဖွဲ့ဝင်တွေကို ထပ်မံစစ်ဆေးသွားမှာ ဖြစ်တယ်လို့ ဆိုပါတယ်။
အချုပ်ခန်းအတွင်း ကိုဗစ်-၁၉ ရောဂါပိုးတွေ့ရှိခဲ့တဲ့အမျိုးသားဟာ ဖုန်းခိုးမှုနဲ့ အမှုဖွင့်ခံရပြီး အချုပ်ကျနေသူဖြစ်တယ်လို့ ရဲတပ်ဖွဲ့ရဲ့ တာဝန်ရှိသူက ပြောပါတယ်။
မအူပင်အကျဉ်းထောင်မှာ အောက်တိုဘာ ၂၆ ရက်က စတင်ပြီး အကျဉ်းသားနဲ့ ဝန်ထမ်းတွေဆီမှာ ကိုဗစ်-၁၉ ရောဂါပိုးတွေ့ရှိတာ လူဦးရေ ၁၀၀ ကျော်ထိရှိလာပြီဖြစ်ပါတယ်။
သတင်း -မင်းထက်မုန်း (ပုသိမ်) ၊ ဓာတ်ပုံ - အောင်မြသန်း (မအူပင်)
1 year Ago
