မအူပင်မြို့နယ်

September 20, 2021

မအူပင်မြို့နယ်တွင် Mytel တာဝါတိုင် မိုင်းခွဲဖျက်ဆီးခံရ

ဧရာဝတီတိုင်းဒေသကြီး၊ မအူပင်မြို့နယ်မှာ စက်တင်ဘာ ၁၉ ရက် ညပိုင်းက စစ်တပ်ပိုင်  Mytel တာဝါတိုင် တစ်တိုင် မိုင်းခွဲ ဖျက်ဆီးခံခဲ့ရပါတယ်။

မအူပင်မြို့နယ်၊ တလုတ်လပ် ၃ မိုင်ကျေးရွာမှာရှိတဲ့ Mytel တာဝါတိုင်ဟာ ည ၈ နာရီလောက်က ဖေါက်ခွဲဖျက်ဆီးခံလိုက်ရတယ်လို့ ဒေသခံတွေက ပြောပါတယ်။

“အသံကတော့ အတော်ကျယ်တယ်။ ပေါက်ကွဲအားပြင်းတယ် အိမ်တောင်တုန်သွားတယ်။ ညဘက်ဆိုတော့ ဘယ်သူမှ ထွက်မကြည့်ရဲဘူး"လို့ ၃ မိုင်ကျေးရွာ ဒေသခံတစ်ဦးက ပြောပါတယ်။

ပေါက်ကွဲမှုဖြစ်ပွားပြီး မကြာခင် စစ်ကောင်စီတပ်ဖွဲ့ဝင်တွေရောက်လာပြီး ကျေးရွာ လူကြီး နှစ်ယောက်ကို စစ်ဆေးဖို့ ခေါ်ဆောင်သွားကြောင်းသိရပါတယ်။

"မနက်မှ သိတာ ကျေးရွာ လူကြီး နှစ်ယောက်ကိုလည်း ခေါ်သွားတယ်။ ဘယ်ခေါ်သွား တယ်ဆိုတာတော့ ခု ချိန်ထိမသိရသေးဘူး"ဒေသခံက ပြောပါတယ်။

မအူပင်မြို့နယ်မှာ Mytel တာဝါတိုင် ပေါက်ကွဲဖျက်ဆီးခံရတာ ပထမဆုံးအကြိမ် လည်းဖြစ်ပါတယ်။

မအူပင်မြို့နယ်မှာ စစ်ကောင်စီတပ်ဖွဲ့ဝင်တွေက ကင်းပုန်းဝပ်ပြီး ဒလန်တွေရဲ့ သတင်းပေးချက်အရ လိုက်လံဖမ်းဆီးတာ လူဦးရေ ၆၀ ကျော်ရှိပြီး ၁၀ ဦးလောက်လည်း ပြန်လည် လွတ်မြောက်လာပါတယ်။

2 months Ago

December 29, 2020

မအူပင်မြို့နယ်တွင် လယ်ဧက ၁၀၀၀ ကျော် ရေနစ်မြုပ်နေ 

ဧရာဝတီတိုင်းဒေသကြီး၊ မအူပင်မြို့နယ်၊ ရွှေတောင်မှော်ကျေးရွာမှာ လယ်ဧက ၁၀၀၀ ကျော် ရေနစ်မြုပ်နေတာကြောင့် စပါးတွေပျက်စီးပြီး တောင်သူတွေ အခက်အခဲတွေဖြစ်ပေါ်နေပါတယ်။ ရွှေတောင်မှော်ကျေးရွာ အမှတ် ၄ ရပ်ကွက်က စိုက်ပျိုးပြီးတဲ့ လယ်တွေထဲမှာ အင်းတွေ ချောင်းတွေတိမ်ကောလာပြီး ရေနစ်မြုပ်နေတာကြောင့် တာဝန်ရှိသူတွေအနေနဲ့ လာရောက်ကြည့်ရှု ပြီး ကူညီပေးစေချင်တယ်လို့ တောင်သူတွေက ပြောပါတယ်။ ရွှေတောင်​​မှော်​​ကျေးရွာ အမှတ် (၄) ရပ်ကွက်နေ ဦးကျော်ကျော်က "မိုးတွင်ကာလမှာ ကတည်းက ရေစီးရေလာက မရှိတော့တာ လယ်ကွင်းထဲ ​ရေမပြတ်​ဖြစ်​နေတာ​ကြောင့် ဒီ​နေ့ အချိန်ထိ ​ရေနစ်မြုပ်နေတာပါ။​ ဒေသအတွင်းရှိ တာဝန်ရှိသူ​တွေအနေနဲ့ ​အောက်ခြေအထိ လာရောက်ကြည့်ရှုစစ်​ဆးမှု​တွေ ပြုလုပ်ပြီးဒေသအတွင်းက လယ်သမား​တွေရဲ့ အခက်အခဲ​တွေကို အကူညီပေးစေလိုပါတယ်​"လို့ ပြောပါတယ်။ လယ်ကွင်းတွေထဲမှာ ရေနစ်မြုပ်တာတွေ ရှိနေတာကြောင့် ရိတ်သိမ်းပြီးတဲ့ ကောက်လှိုင်း တွေ လမ်းပေါ်သယ်ယူဖို့အခက်အခဲတွေရှိလာပြီး စပါးတွေပျက်စီးတဲ့အခြေအနေတွေ ဖြစ်လာ တယ်လို့ ဆိုပါတယ်။ အင်းတွေ ချောင်းတွေ တိမ်ကောလာလို့ ရေကြီး နစ်မြုပ်မှုဖြစ်ပေါ်နေတဲ့ အမှတ် ၄ ရပ်ကွက်မှာ မျိုးစပါး စိုက်ပျိုးတဲ့ ဧကပေါင်း ၃၀၀၀ ကျော် ရှိတဲ့အထဲက ဧက ၁၀၀၀ ကျော်လောက်က ရေကြီးနစ်မြုပ်တဲ့ အခြေအနေတွေနဲ့ ရင်ဆိုင်နေရ တာဖြစ်တယ်လို့ ဒေသခံတွေထံက သိရပါတယ်။ သတင်း- မင်းထက်မုန်း (ပုသိမ်)၊ ဓာတ်​ပုံ-​အောင်​မြသန်း(မအူပင်)
11 months Ago
More News
Up