မအူပင်မြို့နယ်

November 24, 2022

မအူပင်မြို့နယ်၌ မူလတန်းလွန်ကျောင်းသားအချင်းချင်း ဓားထိုးမှုဖြစ်

ဧရာဝတီတိုင်း၊ မအူပင်မြို့နယ်မှာ နိုဝင်ဘာ ၂၁ ရက်က မူလတန်းလွန်ကျောင်းသားအချင်းချင်း ဓားထိုးမှု ဖြစ်ပွားခဲ့ပေမဲ့ စစ်ကောင်စီက ခုံစောင်းနဲ့တိုက်မိတာဖြစ်ကြောင်း သတင်းလွှင့်ဖို့ ဆရာ ဆရာမတွေကို စေခိုင်းထားတယ်လို့ ဒေသခံတွေထံက သိရပါတယ်။ 

တလုပ်လပ်အနောက်ကျေးရွာအုပ်စု၊ တာကောက်ကျေးရွာ မူလတန်းလွန်ကျောင်းက ၇ တန်းကျောင်းသား တယောက်ဟာ ကျောင်းဆင်းချိန်မှာ ၈ တန်းကျောင်းသား တယောက်ကို အသင့်ယူဆောင်လာတဲ့ ဓားနဲ့ထိုးမှုဖြစ်ပွားခဲ့တာလို့ ဒေသခံက ပြောပါတယ်။

“ခုစစ်တပ်က ကျောင်းအုပ်ကိုခေါ်တွေ့ပြီး ဒီဖြစ်စဉ်ကို မပျံ့အောင်လုပ်ဖို့ ပြီးတော့ ခုံနဲ့တိုက်မိတာ ပြောဖို့ မှာထားတယ် သတင်းပျံ့ရင် အရေးယူမယ်ဆိုပြီး ခြိမ်းခြောက်တာမျိုးလည်း လုပ်တယ်ကြားတယ်”လို့ ဒေသခံတဦးက ပြောပါတယ်။

ကျောင်းဆင်းချိန်မှာ ၇ တန်းကျောင်းသားက ၈ တန်းကျောင်းသားကို ဓားနဲ့ထိုးတာကြောင့် ဘယ်ဘက် မျက်ခုံးနားကို ထိုးမိသွားလို့ မအူပင်ဆေးရုံကြီးကို ပို့ဆောင်ထားရတယ်လို့ ဆိုပါတယ်။ 

ကျေးရွာထဲမှာတော့ ကျောင်းသားအချင်းချင်းဆော့ရာကနေ ခုံနဲ့တိုက်မိလို့ မျက်ခုံးကွဲပြီး ဆေးရုံတင်ထားရတယ်လို့ သတင်းတွေကို ကျေးရွာအုပ်ချုပ်ရေးတာဝန်ရှိသူတွေကပါ လိုက်လံပြောဆိုနေတယ်လို့ ဒေသခံ တွေက ပြောပါတယ်။ 

ကျောင်းနေအရွယ် ကျောင်းသားတွေ ခုလိုမျိုး ဓားအသင့်ယူဆောင်လာတာဟာ အန္တရာယ်များပြီး စိတ်ပူရတဲ့အနေအထားဖြစ်ကာ အခန့်မသင့်ရင် အသက်အန္တရာယ်ပါ ထိခိုက်လာနိုင်တယ်လို့ ဒေသခံတွေက ဆိုပါတယ်။

2 months Ago

October 25, 2022

မအူပင်မြို့နယ်အတွင်း ကျေးရွာတွေကို စစ်ကောင်စီက ကင်းစောင့်ခိုင်းပြီး ငွေတောင်းနေ

ဧရာဝတီတိုင်း၊ မအူပင်မြို့နယ်မှာ စစ်ကောင်စီက ကျေးရွာ ၈၈ ရွာကို နေ့ရောညပါ ကင်းစောင့်ခိုင်းပြီး ငွေတောင်းခံနေတယ်လို့ ဒေသခံတွေက ပြောပါတယ်။

မအူပင်မြို့နယ်မှာရှိတဲ့ ကျေးရွာ ၈၈ ရွာကို စက်တင်ဘာလကုန်ပိုင်းက စတင်ကာ နေ့ရော ညပါကင်းစောင့်ခိုင်းပြီး မစောင့်နိုင်တဲ့သူတွေကို ကျပ် ၁၀,၀၀၀ ကောက်ခံနေတာလို့ ဆိုပါတယ်။

“ကင်းက နေ့ရော ညပါ အလှည့်ကျ စောင့်နေရတာ၊ မြို့မှာတော့မစောင့်ရဘူး၊ ရွာတွေဘက်ပဲ စောင့်ရတာ။ မစောင့်နိုင်ပြန်ရင်လည်း ၁ သောင်းပေးရတယ်” လို့ မအူပင်မြို့ခံတဦးက ပြောပါတယ်။

စစ်ကောင်စီခန့် ကျေးရွာအုပ်ချုပ်ရေးမှူးတွေက ရန်ကုန်တိုင်းနဲ့ထိစပ်နေတဲ့ မအူပင်မြို့နယ်အတွင်းက ကျေးရွာတွေမှာ လုံခြုံရေးအကြောင်းပြ ကင်းစောင့်ခိုင်းပြီး ငွေတောင်းခံနေသလို ရန်ကုန်တိုင်းအတွင်း တွံတေးမြို့နယ်က ကျေးရွာတွေမှာလည်း ကင်းစောင့်ခိုင်းနေတယ်လို့ ဆိုပါတယ်။

မအူပင်မြို့နယ်အတွင်းက ကျေးရွာတွေမှာ စစ်ကောင်စီသတင်းပေးတွေနဲ့ ပြည်သူ့စစ်အဖွဲ့ဝင်တွေကလည်း ကင်းစောင့်တဲ့နေရာတွေကို လိုက်စစ်ဆေးပြီး ဆဲဆိုတာတွေ ပြုလုပ်လေ့ရှိတယ်လို့ ဒေသခံတွေက ပြောပါတယ်။

3 months Ago
More News
Up