မဟာချိုင်

A d v e r t i s e m e n t With Us

January 26, 2021

ထိုင်းနိုင်ငံ မဟာချိုင် ပုစွန်စျေးက မြန်မာလုပ်သား ၈ ဦး လမ်းဘေးတွင် စွန့်ပစ်ခံရ

ထိုင်းနိုင်ငံ၊ ကန်ဖဲဖစ်မြို့ စာသင်ကျောင်းရှေ့ ကုန်းကျော်တံတားအောက်မှာ မဟာချိုင် ပုစွန်စျေးက မြန်မာလုပ်သား ၈ ယောက်  ဇန်နဝါရီလ ၂၄ ရက်နေ့က လမ်းဘေးမှာ စွန့်ပစ်တာခံခဲ့ရတယ်လို့ AAC မဟာမိတ်အဖွဲ့ ထိုင်းအခြေစိုက် အလုပ်သမားကူညီရေးအဖွဲ့ရဲ့ အထွေထွေတာဝန်ခံ ဦးရဲမင်းက ပြောပါတယ်။ 

အဲ့ဒီနေရာက ဒေသခံတွေ မြန်မာအလုပ်သမားတွေကို မသင်္ကာတဲ့အတွက်ကြောင့် တာဝန်ရှိသူတွေကို သတင်းပေးလိုက်ပြီး ထိုင်းရဲတပ်ဖွဲ့က လာရောက်ထိန်းသိမ်း စစ်ဆေးမေးမြန်းခဲ့ရာ မဟာချိုင် ပုစွန်စျေးက အလုပ်ရှင်တစ်ယောက်က ကားပေါ်တင်လာပြီး အခုလိုလမ်းဘေးမှာ စွန့်ပစ်သွားတာ ဖြစ်တယ်လို့ သိရပါတယ်။

ထိုင်းအာဏာပိုင်တွေက မြန်မာလုပ်သား ၈ ယောက်ကို ကိုဗစ်-၁၉ ပိုးရှိမရှိ စစ်ဆေးပေးနေကာ ကွာရန်တင်းထားရှိပါတယ်။ မဟာချိုင် ပုစွန်စျေးကို lockdown ချထားတဲ့အတွက် အလုပ်မပေး နိုင်တာကြောင့် ထိုင်းအလုပ်ရှင်က အခုလိုစွန့်ပစ်တာဖြစ်တယ်လို့ ထိုင်းရောက်မြန်မာ လုပ်သားတွေကို ကူညီပေးနေတဲ့ ဦးရဲမင်းကပြောပါတယ်။

ဒါ့အပြင် လွန်ခဲ့တဲ့ ၃ ရက်ကလည်း ပုစွန်စျေးကနေ အလုပ်သမားအယောက် ၂၀ ဟာ အလုပ်ကနေ မောင်းထုတ်ခြင်းခံခဲ့ရပါသေးတယ်။ ဇန်နဝါရီလ ၂၅ ရက်နေ့အထိ lockdown ချထားတဲ့ပုစွန်စျေးမှာ ပိုးတွေ့သူပေါင်း ၁၀၀ ကျော်ရှိပါတယ်။

သတင်း - Ei Thazin Khine၊ ဓာတ်ပုံ - U Ye Min

1 month Ago

December 23, 2020

လော့ဒေါင်းချထားသည့် မဟာချိုင်က မြန်မာအလုပ်သမားများ အလှူရှင် ထောက်ပံ့မှုဖြင့် စားသောက်နေရ 

ကိုဗစ်-၁၉ ကူးစက်သူတွေ ရာနဲ့ချီတွေ့လို့ဆိုပြီး လော့ဒေါင်းချခံထားရတဲ့ စမွတ်စာခွန်ခရိုင် မဟာချိုင်က မြန်မာလုပ်သားတွေဟာ အလုပ်မဆင်းရတော့တာကြောင့် ဝင်ငွေလည်းမရှိလို့ အလှူရှင်တွေ ထောက်ပံ့မှုနဲ့ စားသောက်နေရပါတယ်။  အထူးသဖြင့် လူပေါင်း ၄,၀၀၀ ကျော်ရှိတဲ့ တလတ်ကုန့်(ပုစွန်ဈေး)တဝိုက်က အလုပ်သမားတွေဟာ အလုပ်မလုပ်ရတာ တစ်ပတ်နီးပါးရှိပြီမို့ ဝင်ငွေမရှိဘဲ ထိုင်းတာဝန်ရှိသူနဲ့ မြန်မာအလုပ်သမားအဖွဲ့အစည်းက လာရောက်ဝေငှတာတွေနဲ့ စားသောက်နေရတယ်လို့  ပုစွန်ဈေးထဲက အလုပ်သမားတစ်ဦးဖြစ်သူ ကိုအောင်ခိုင်မိုးက ဒီဗွီဘီကို ပြောပါတယ်။  လော့ဒေါင်းလုပ်ထားပေမယ့် အခက်အခဲ ကြီးကြီးမားမားတော့ မရှိပါဘူး။ ဒါပေမဲ့ အလုပ်မဆင်းရတော့ ဝင်ငွေမရှိဘူးပေါ့။ စားဖို့သောက်ဖို့ကတော့ သက်ဆိုင်ရာက နေ့တိုင်းလို လာဝေပါတယ်။ ငါးသေတ္တာတွေ၊ ခေါက်ဆွဲခြောက်တွေ ပါတယ်၊ သောက်ရေသန့်ဘူးကလည်း အလုံအလောက်ရတယ်၊ အလှူရှင်တွေ လာချထားပေးတယ်။  အေအေစီအဖွဲ့ကလည်း ဟင်းချက်စရာတွေ လာလှူထားပါတယ်ခင်ဗျ။”  သူတို့နေတဲ့ အနီးတဝိုက်မှာ မြန်မာလုပ်သားတွေ ထောင်နဲ့ချီရှိပြီး ကိုဗစ်-၁၉ ပိုးတွေ့တာ ၅၀၀ ကျော်ရှိတယ်လို့ ထိုင်းတာဝန်ရှိသူတွေက ပြောပေမယ့် ဘယ်သူက ပိုးကူးမကူးဆိုတာ မသိရကြောင်း၊ နာမည်နဲ့ ဖုန်းနံပါတ်ယူထားပြီး ပိုးတွေ့တဲ့လူ ဖုန်းဆက်ရမှာဖြစ်ပြီး နေမကောင်းရင် အဲဒီအနီးမှာ လာဖွင့်ထားတဲ့ ယာယီဆေးရုံကို သွားပြဖို့ ကြေညာထားတယ်လို့ သူက ဆက်ပြောပါတယ်။  ပိတ်မိနေတဲ့ အလုပ်သမားတွေကို လိုအပ်တာတွေ သွားရောက်ကူညီပေးနေတဲ့ အေအေစီ မြန်မာအလုပ်သမားကူညီစောင့်ရှောက်ရေး မဟာမိတ်အဖွဲ့တာဝန်ခံ ကိုရဲမင်းကတော့  စမွတ်စာခွန်မှာ မြန်မာရွှေ့ပြောင်းလုပ်သား တစ်ထောင်ကျော် ကိုဗစ်-၁၉ ကူးစက်ခံရတယ်လို့ တာဝန်ရှိသူတွေက ပြောပေမယ့် ပထမဆုံးပိုးတွေ့တဲ့ ထိုင်းအမျိုးသမီးနဲ့ ဆက်စပ်တဲ့ အလုပ်သမား ၁၀ ဦးလောက်သာ ဆေးရုံတက်နေတယ်ဆိုတာ သိရပြီး ကျန်သူ‌တွေ ဘယ်နှယောက် ဆေးရုံတက်ရလဲဆိုတာ မသိရဘူးလို့ ဆိုပါတယ်။ လူပေါင်း ၄၀၀၀ ကျော်လောက်ရှိတဲ့ ပုစွန်ဈေးအနီးတဝိုက်မှာလည်း ပိုးတွေ့လူနာတွေ လာခေါ်သွားတာ မရှိသေးကြောင်း၊ ဘယ်သူ့မှာ ပိုးရှိနေလဲဆိုတာ မသိရလို့ အလုပ်သမားတွေကြား တယောက်နဲ့တယောက် သံသယဖြစ်နေကြတယ်လို့ ပြောပါတယ်။  “တလတ်ကုန့်ပုစွန်ဈေးနားနေတဲ့လူတွေတော့ ခုထိ လူနာတင်ကားနဲ့လာခေါ်တာ တယောက်မှ မရှိသေးဘူးတဲ့၊ သူတို့က ပိုးရှိတဲ့သူကို တစ်ဦးချင်းပဲ အကြောင်းကြားမယ်ဆိုတော့ ဘယ်သူက အကြောင်းကြားခံရလဲဆိုတာ မသိဘူး။ သူတို့ချင်းလည်း မပြောကြဘူး။ အဲဒီတော့ တယောက်ကိုတယောက် သံသယနဲ့နေပြီး ပိုးမရှိသူတွေလည်း စိုးရိမ်စိတ်နဲ့ နေနေရတာပေါ့နော်။ အစားအသောက်ကတော့ အလှူရှင်တွေ မပြတ်ရှိပါတယ်။ သူတို့အလှူရှင်တွေလည်း လာလှူတယ်၊ တခြားခရိုင်က မြန်မာအလုပ်သမားတွေကလည်း ဒီစမွတ်စာခွန်က မြန်မာတွေအတွက် အလှူငွေတွေ လွှဲလာကြတယ်။ ပိတ်မိတဲ့သူတွေက ဟင်းသီးဟင်းရွက်အသီးအနှံတွေ ပိုပြီးလိုတယ်ဆိုလို့ ကနေ့လည်း ကားတစ်စီးနဲ့ အပြည့်သွားလှူခဲ့ပါတယ်ခင်ဗျ။”  စမွတ်စာခွန်မှာ မြန်မာလုပ်သားတွေ အမြောက်အမြား ကိုဗစ်ကူးစက်တဲ့ သတင်းကြောင့် မြန်မာရွှေ့ပြောင်းလုပ်သားပေါ် ခွဲခြားဆက်ဆံမှုတွေ၊ ပြစ်တင်နှိမ်ချမှုတွေလည်း ပြင်ပမှာရော လူမှုကွန်ရက်တွေမှာပါ ပြန့်နေလို့ လူမျိုးရေးမုန်းတီးမှုမဖြစ်အောင် ဘန်ကောက်ရှိ မြန်မာသံရုံးအနေနဲ့  စာထုတ်ပြီး မေတ္တာရပ်ခံပေးသင့်တယ်လို့ ကိုရဲမင်းက ပြောသွားပါတယ်။  စမွတ်စာခွန်က မြန်မာလုပ်သားတွေရဲ့ အခြေအနေအပေါ် ကူညီစောင့်ရှောက်နေမှုနဲ့ပတ်သက်လို့ ဘန်ကောက် ထိုင်း မြန်မာသံရုံးနဲ့ သက်ဆိုင်ရာအလုပ်သမားသံအရာရှိတွေကိုတော့ ဆက်သွယ်မေးမြန်းလို့ မရသေးပါဘူး။  ထိုင်းနိုင်ငံရဲ့ ကိုဗစ်-၁၉ ကူးစက်မှုအခြေအနေနဲ့ ပတ်သက်ပြီး ဒီကနေ့ ဒီဇင်ဘာ ၂၃ ရက် ထုတ်ပြန်ချက်အရ ပိုးတွေ့လူနာသစ် ၄၆ ဦးရှိပြီး အများစုက ပုစွန်ဈေးနဲ့ဆက်နွှယ်နေတဲ့ အခြားခရိုင်ရောက် ထိုင်းလူမျိုးတွေ ဖြစ်ပါတယ်။ ရွှေ့ပြောင်းလုပ်သားထဲမှာ ပိုးတွေ့သူအသစ် မရှိပါဘူး။  ထိုင်းနိုင်ငံမှာ ကိုဗစ်-၁၉ ကူးစက်ခံရသူ စုစုပေါင်း ၅၇၆၂ ဦးရှိကာ သက်သာလို့ ဆေးရုံက ဆင်းရသူ ၄၀၉၅ ဦး နဲ့ သေဆုံးသူ အယောက် ၆၀ ရှိပါတယ်။  ဓာတ်ပုံ - AAC
2 months Ago
More News
Up