မသန်စွမ်းသူများ

February 23, 2021

မိုးမောက်မြို့ စစ်အာဏာရှင်ဆန့်ကျင်ရေးလူထုလှုပ်ရှားမှုတွင် မသန်စွမ်းသူများလည်းပူးပေါင်း ပါ၀င်

ကချင်ပြည်နယ်၊ မိုးမောက်မြို့မှာ  ဒီနေ့ ဖေဖော်ဝါရီ ၂၃ ရက်နေ့က ပြုလုပ်တဲ့ စစ်အာဏာရှင် ဆန့်ကျင်‌ရေးလူထု ဆန္ဒထုတ်ဖော်ပွဲမှာ မသန်စွမ်းသူတွေလည်း ပူးပေါင်းပါဝင်လာပါတယ်။ 

ဆန္ဒပြရာမှာ ပါဝင်တဲ့ မသန်းစွမ်းသူ တစ်ဦးက “ကျနော်တို့ မသန်စွမ်းတွေရဲ့ အခွင့်အရေးတွေဟာ ၂၀၁၀ မရောက်ခင်က မှောင်အတိ ဖုံးနေခဲ့ရတယ်။ ၂၀၁၀ အစိုးရအသစ်တက်လာပြီးတဲ့နောက်ပိုင်းမှ မသန်စွမ်းသူတွေရဲ့ အခွင့်အရေးဟာ တိုးတက်လာခဲ့တယ်။ အရပ်သားအစိုးရ လက်ထက်မှာ ပိုလို့ကျနော်တို့ အတွက်ဆောင်ရွက်မှုတွေရှိခဲ့တယ်။ စစ်အာဏာရှင်စနစ်ကို ကျနော်တို့လည်း ဆန့်ကျင်ပါတယ်”လို့ ပြောပါတယ်။

ဒီမိုကရေစီဖက်ဒရယ်စနစ်ရမှသာ မြန်မာနိုင်ငံရဲ့ လူ့အခွင့်အရေးတွေအတွက် အဆင်ပြေစေမှာဖြစ်ပြီး လူ့အခွင့်အရေးတွေတိုးတက်လာမှ မသန်စွမ်းတွေအတွက် မျှော်လင့်ချက်ရှိမှာလို့  မသန်စွမ်းတစ်ဦးက ပြောပါတယ်။

ဒီမနက် ဆန္ဒပြပွဲမှာ ကချင်တိုင်းရင်းသားတွေက တယောတူရိယာတီးဝိုင်းတွေနဲ့ ဆန္ဒထုတ်ဖော်ခဲ့ကြပါတယ်။

မိုးမောက်မြို့ရှိ ပြည်သူလူထုဟာ   စစ်အာဏာရှင်ဆန့်ကျင်ရေး လူထုလှုပ်ရှားမှုကို ဖေဖော်ဝါရီ ၁၁ ရက်က စတင်ခဲ့ကြတာဖြစ်ပြီး ဒိမတိုင်ခင်ကတော့  ဗန်းမော်မြို့က လူထုနဲ့ ပူးပေါင်းပါ၀င်ဆန္ဒထုတ်ဖော်ခဲ့ကြတာဖြစ်ပါတယ်။

ဇော်လင်းအောင် (ဗန်းမော်)

11 months Ago

February 13, 2021

မကွေးမြို့တွင် လူဦးရေ ၃ သိန်းကျော် ဆန္ဒပြ၊ မသန်စွမ်းသူများပါဝင်လာ

မကွေးမြို့မှာ ဖေဖော်ဝါရီ ၁၃ ရက်မနက်ပိုင်းက စစ်အာဏာရှင်ကျဆုံးရေး လူဦးရေ ၃ သိန်းကျော် ဆန္ဒပြခဲ့ပြီး မသန်စွမ်းသူတွေပါ ချီတက်ဆန္ဒပြခဲ့ကြပါတယ်။

ရဲတပ်ဖွဲ့ဘက်က အတားအဆီးတွေ ရှိခဲ့ပေမဲ့လည်း ထပ်တိုက်တိုးတာမျိုး မပြုလုပ်ဘဲ ရှောင်ကွင်းလမ်းတွေကနေတဆင့် ချီတက်ဆန္ဒပြနေကြတာပါ။

CDM လှုပ်ရှားမှုမှာ ပါဝင်တဲ့ ဝန်ထမ်းတချို့ကို အာဏာသိမ်းစစ်ကောင်စီက အလုပ်ကနေ ရပ်နားတဲ့စာတွေ ထွက်လာတယ်လို့ ဝန်ထမ်းတွေဆီကနေ သိရပါတယ်။

မကွေးမြို့မှာ စစ်အာဏာရှင်ကျဆုံးရေး လူထုဆန္ဒပြပွဲလုပ်တာ ဒီနေ့နဲ့ဆို ၈ ရက်မြောက်နေ့ဖြစ်ပြီး ဌာနဆိုင်ရာဝန်ထမ်းတွေ၊ ကျောင်းသားတွေ၊ အလွှာပေါင်းစုံ၊ အဖွဲ့အစည်းပေါင်းစုံက အသွင်သဏ္ဌာန်မျိုးစုံနဲ့ ချီတက်ဆန္ဒပြနေကြတာဖြစ်ပါတယ်။

ဆန္ဒပြရာ လမ်းတစ်လျှောက်မှာ ဗိုလ်ချုပ်အောင်ဆန်း ၁၀၆ နှစ်ပြည့် မွေးနေ့အထိန်း အမှတ်အဖြစ် ပဲပြုတ် နံပြားနဲ့ ရေသန့်ဘူးတွေ စတုဒိသာ ကျွေးမွေးခဲ့ကြပါတယ်။

စစ်အာဏာရှင်ကျဆုံးရေး၊ ဒေါ်အောင်ဆန်းစုကြည်နဲ့ ဖမ်းဆီးခံခေါင်းဆောင်များ ချက်ချင်းလွှတ်၊ ၂၀၂၀ ရွေးကောက်ပွဲရလဒ် အတည်ပြုပေး စတဲ့ကြွေးကြော်သံတွေနဲ့အတူ ချီတက် ဆန္ဒပြနေကြတာပါ။

သတင်း-မင်းထီး

12 months Ago
More News
Up