မလေးရှားဝန်ကြီးချုပ်

November 29, 2021

စင်ကာပူဝန်ကြီးချုပ်နှင့် မလေးရှားဝန်ကြီးချုပ်တို့ နယ်စပ်ဂိတ် ပြန်ဖွင့်ပွဲတွင် တွေ့ဆုံ

စင်ကာပူဝန်ကြီးချုပ် လီရှန်လွန်းနဲ့ မလေးရှားဝန်ကြီးချုပ် အစ်မေးလ်ဆာဘရီယာကွတ်ဘ်တို့ဟာ နိုဝင်ဘာ ၂၉ ရက်က နှစ်နိုင်ငံ နယ်စပ်ပြန်ဖွင့်ပွဲမှာ  လူချင်းတွေ့ဆုံနှုတ်ဆက်ခဲ့ကြပါတယ်။

ကမ္ဘာ့လူအစည်ကားဆုံး ကုန်းမြေနယ်စပ်တွေထဲကတခုဖြစ်တဲ့ စင်ကာပူ-မလေးရှား နယ်စပ်ကို ပြန်ဖွင့်လို့ ကာကွယ်ဆေးထိုးထားပြီးသား ခရီးသည်တွေကို နယ်စပ်ဖြတ်ဖို့ ခွင့်ပြုလိုက်ပါတယ်။

ကိုဗစ်-၁၉ ကပ်ရောဂါကူးစက်မှုကြောင့် ၂ နှစ်နီးပါး ပိတ်ထားတဲ့ ဝုဒ်လန်းစ် နယ်စပ်ဖြတ်ကူးရေး စခန်းရဲ့ စစ်ဆေးရေးဂိတ်မှာ ဘတ်စ်ကားဘေးကိုရပ်ရင်း ခေါင်းဆောင် ၂ ယောက်ဟာ လက်ဝှေ့ယမ်း စကားပြောရင်း လက်သီးချင်းထိလျက် နှုတ်ဆက်နေကြပုံရုပ်သံကို စင်ကာပူ ဝန်ကြီးချုပ်ရုံးက ထုတ်လွှင့်ပြသပါတယ်။

ဒီခရီးစဉ်ဟာ မလေးရှားဝန်ကြီးချုပ်အတွက် စင်ကာပူကို ဝန်ကြီးချုပ်အနေနဲ့ ပထမဆုံး တရားဝင် အလည်အပတ် ခရီးစဉ် ဖြစ်လာပါတယ်။

ဒီဇင်ဘာလလယ်ကနေ နောက်ပိုင်းကစပြီး ပြန်ဖွင့်ရေး စီမံကိန်းထဲမှာ ယေဘုယျ ခရီးသည်တွေကိုပါ ထည့်ဝင် လည်ပတ်ခွင့်ပြုဖို့ နှစ်နိုင်ငံလုံးက ရည်မှန်းထားတယ်လို့ လီရှန်လွန်း ပူးတွဲသတင်းစာရှင်းလင်းပွဲမှာ ပြောပါတယ်။

နောက်ဆုံး အစီအစဉ်အောက်မှာ နေ့စဉ် နှစ်ဘက်စလုံးက ခရီးသည်ဦးရေ ၁၄၄၀ စီဟာ ရောဂါခြေချုပ်နဲ့ နေစရာမလိုဘဲ ကုန်းမြေနယ်စပ်ကို ဖြတ်ကျော်နိုင်မှာပါ။ သူတို့ဟာ သွားမယ့်နိုင်ငံမှာ နိုင်ငံသား၊ အမြဲတမ်းနေထိုင်ခွင့် ဒါမှမဟုတ် ကာလရှည်ပြည်ဝင်ခွင့် ကိုင်ဆောင်ထားဖို့တော့ လိုပါတယ်။

ကူးစက်ကပ်ဘေးမဆိုက်ခင်က မလေးရှား ပြည်သူ ၃ သိန်းလောက်ဟာ စင်ကာပူကို နေ့တိုင်း သွားလေ့ရှိပါတယ်။

၂၀၂၀ မတ်လမှာ နယ်စပ်ကို ရုတ်တရက် ပိတ်လိုက်ချိန်မှာတော့ ထောင်သောင်းချီနေတဲ့ နှစ်နိုင်ငံစလုံးက လူတွေဟာ တဘက်စီမှာ မိသားစု အလုပ်အကိုင်တွေနဲ့ ခွဲရင်း သောင်တင် နေခဲ့ကြပါတယ်။

3 days Ago

October 26, 2021

စစ်ခေါင်းဆောင်ကို ထိပ်သီးအစည်းအဝေး ပေးမတက်သည့်ဆုံးဖြတ်ချက် အပြည့်အဝထောက်ခံ ဟု အာဆီယံ ခေါင်းဆောင်အချို့ပြော

မြန်မာနိုင်ငံရဲ့ ကိုယ်စားပြုမှုနဲ့ ပတ်သက်ပြီး အာဆီယံ ဥက္ကဋ္ဌရဲ့ ဆုံးဖြတ်ချက်ကို မလေးရှားနိုင်ငံအနေနဲ့ အပြည့်အဝထောက်ခံကြောင်း မလေးရှားဝန်ကြီးချုပ် အစ္စမေးလ်ဆာဘရီယာကွတ်ဘ်က အောက်တိုဘာ ၂၆ ရက် ဒီနေ့ စတင်ကျင်းပတဲ့ အာဆီယံထိပ်သီး အစည်းအဝေးနဲ့ ပတ်သက်ပြီး ထုတ်ဖော်ပြောကြားလိုက်ပါတယ်။

အခုထိပ်သီး အစည်းအဝေးပွဲမှာ မြန်မာအတွက် လမ်းဖွင့်ပေးခဲ့ပေမယ့် မြန်မာကိုယ်စားလှယ်မပါဝင်နိုင်တာ အာဆီယံအပြစ်မဟုတ်ဘူးလို့ ကမ္ဘောဒီးယားဝန်ကြီးချုပ် ဟွန်ဆန်ကလည်း ပြောဆိုလိုက်ပါတယ်။

ဒါ့အပြင် မြန်မာစစ်တပ်ဟာ အာဆီယံနဲ့ ပူးပေါင်းဆောင်ရွက်ခြင်း မရှိခဲ့ဘူးလို့ အာဆီယံ အလှည့်ကျ ဥက္ကဋ္ဌတာဝန်  ၂၀၂၂ ခုနှစ်ကျရင် လွှဲပြောင်းယူမယ့် ကမ္ဘောဒီးယားနိုင်ငံရဲ့  ဝန်ကြီးချုပ်က ပြောပါတယ်။

ထိုင်းဝန်ကြီးချုပ် ပရာယွတ်ကတော့ မြန်မာ့အရေးဟာ အာဆီယံဒေသတွင်းမူကို စိန်ခေါ်နေပြီး ပထမခြေလှမ်းအနေနဲ့ အာဆီယံအထူးသံတမန်က မြန်မာနိုင်ငံ အမြန်ဆုံးသွားရောက်ကာ သက်ဆိုင်သူအားလုံးနဲ့ တွေ့ဆုံနိုင်ဖို့လိုတယ်၊ အာဆီယံရဲ့ ချမှတ်ထားတဲ့ မူ(၅)ချက်ကို မြန်မာနိုင်ငံအနေနဲ့ လိုက်နာလုပ်ဆောင်နိုင်ဖို့ တိုက်တွန်းလိုက်ပါတယ်။

အောက်တိုဘာ ၂၆ ရက်ကနေ ၂၈ ရက်နေ့အထိ ကျင်းပနေတဲ့  အာဆီယံထိပ်သီးအစည်းအဝေးမှာ မြန်မာ အာဏာသိမ်းစစ်ခေါင်းဆောင်ကို မဖိတ်ပဲ  နိုင်ငံရေးအရကိုယ်စားမပြုတဲ့  နိုင်ငံခြားရေး အတွင်းဝန် ဦးချမ်းအေးကို အာဆီယံအလှည့်ကျ ဥက္ကဋ္ဌ ဘရူးနိုင်းနိုင်ငံကနေ ဖိတ်ကြားခဲ့ပါတယ်။

နိုင်ငံအဆင့်အကြီးအကဲ  ဒါမှမဟုတ် ပြည်ထောင်စု ဝန်ကြီးအဆင့်  ဖိတ်ကြားမှသာ တက်မယ်လို့ အာဏာသိမ်း စစ်ကောင်စီရဲ့ နိုင်ငံခြားရေးဌာနက အကြောင်းပြန်ခဲ့ပေမယ့် မြန်မာကိုယ်စားလှယ် မပါဝင်ပဲ အာဆီယံထိပ်သီး အစည်းအဝေးကို ဒီနေ့ အာဆီယံ ၉ နိုင်ငံက နိုင်ငံ့ခေါင်းဆောင်တွေနဲ့ စတင်ပြုလုပ်နေပြီ ဖြစ်ပါတယ်။

အခု အာဆီယံထိပ်သီးအစည်းအဝေးရဲ့ ဆက်စပ်အစည်းအဝေးတခုဖြစ်တဲ့ အာဆီယံ-အမေရိကန် ပူးပေါင်းအစည်းအဝေးတခုကို  ၄ နှစ်အတွင်း ပထမဆုံးအနေနဲ့ အမေရိကန် သမ္မတ ဂျိုးဘိုင်ဒင်လည်း ဗီဒီယို ကနေတဆင့် တက်ရောက်ဖို့ရှိနေပါတယ်။ 

Photo-Credit

1 month Ago
More News
Up