မယ်ဆိုင်

November 9, 2021

မယ်ဆိုင်တွင် တရားမဝင် အလုပ်သမားများတင်လာသည့်ကား ယာဉ်တိုက်မှုဖြစ်

ထိုင်း-မြန်မာနယ်စပ်၊ ချင်းရိုင်းခရိုင်၊ မယ်ဆိုင်မြို့နယ်မှာ နိုဝင်ဘာ ၉ ရက် ဒီနေ့မနက် တရားမဝင်အလုပ်သမားတွေ တင်ဆောင်လာတဲ့ ကားတစ်စီး ယာဉ်တိုက်မှုဖြစ်ပြီး  မြန်မာ အလုပ်သမား ၂ ဦးနဲ့ ယာဉ်မောင်းရော ယာဉ်နောက်လိုက်ပါ ထွက်ပြေးလွတ်မြောက်နေတယ်လို့ မယ်ဆိုင်သတင်းမှာ ဖော်ပြပါတယ်။ 

ဒီကနေ့မနက် ၃ နာရီလောက်က မယ်ဆိုင်မြို့ ကော်ချန့်အုပ်စု ဆန်နားရပ်ကွက်ထဲမှာ ယာဉ်မတော်တဆထိခိုက်မှုဖြစ်ကြောင်းသိရတဲ့အတွက် ကော်ချန့်ရဲစခန်း တာဝန်ရှိသူတွေက သွားရောက်စစ်ဆေးရာမှာ မှန်လုံကားတစ်စီးက လမ်းဘေးဇရပ်တစ်ခုကို ကားခေါင်းနဲ့ ဝင်တိုက်ထားပြီး ထိခိုက်ဒဏ်ရာရသူတော့ မရှိဘူးလို့  တာဝန်ရှိသူကပြောပါတယ်။ 

စစ်ဆေးချက်အရ ကားပေါ်စီးနင်းလိုက်ပါလာသူ ၁၈ ဦးရှိပြီး ရှမ်းပြည်နယ် လွိုင်လင်ခရိုင် မိုင်းရှူးမြို့နယ်ကလာကြကြောင်း၊ လမ်းပန်းနဲ့ ဘန်ကောက်ခရိုင်မှာ အလုပ်သွားလုပ်ဖို့ ဝင်လာကြတာဖြစ်ပြီး ပွဲစားကို တစ်ဦးလျှင် ဘတ် ၂၀၀၀၀ ကျော်ပေးရကာ သူတို့စီးလာတဲ့ကားက လမ်းအကွေ့မှာအရှိန်မထိန်းနိုင်ဘဲ လမ်းဘေးကဇရပ်ကိုဝင်တိုက်မိတာလို့ ဆိုပါတယ် ။ 

ယာဉ်မောင်းသမားနဲ့ ယာဉ်နောက်လိုက် အပါအဝင် ရွှေ့ပြောင်းလုပ်သား ၂ ဦးကတော့ ထွက်ပြေးလွတ်မြောက်သွားကြောင်း ၊ အဆိုပါ ယာဉ်မောင်းနဲ့ ယာဉ်နောက်လိုက်ဟာလည်း မြန်မာနိုင်ငံသားဖြစ်ပြီး ဘယ်သူဘယ်ဝါဆိုတာ သိရပြီဖြစ်လို့  လိုက်လံစုံစမ်းဖမ်းဆီးနေတယ်လို့ ဆိုပါတယ်။

ကျန်ရှိအလုပ်သမား ၁၆ ဦးကိုတော့ လဝက ဥပဒေနဲ့အရေးယူဖို့ ကော်ချန့်ရဲစခန်းမှာ ထိန်းသိမ်းထားတယ်လို့ ရဲစခန်းတာဝန်ရှိသူက သတင်းထောက်တွေကို ပြောပါတယ်။ 

မြန်မာပြည်တွင်းမှာ နိုင်ငံရေးမတည်ငြိမ်မှု ၊ စားဝတ်နေရေးကျပ်တည်းမှုတွေကြောင့် နိုင်ငံသားအမြောက်အများ အိမ်နီးချင်းထိုင်းနိုင်ငံမှာ ထွက်ပြေးခိုလှုံလာပြီး အဖမ်းခံရတာနေ့စဉ်လို ရှိနေပါတယ်။

ပြီးခဲ့တဲ့ စနေနေ့ကလည်း တရားမဝင်အလုပ်သမား ၂၃ ဦး တင်လာတဲ့ကားတစ်စီး ထိုင်းမြောက်ပိုင်း ကမ်ဖိုင်ဖစ်ခရိုင်မှာ ယာဉ်တိမ်းမှောက်လို့ မြန်မာလုပ်သား ၃ ဦးသေဆုံး ၄ ဦးဒဏ်ရာရကာ ပွဲစားက တာဝန်မယူဘဲထွက်ပြေးပြီး အားလုံးကို ရာဘာခြံတစ်ခုထဲမှာ စွန့်ပစ်ထားခဲ့ပါတယ်။ 

ကိုးကား- Maesai Press

3 weeks Ago

November 1, 2021

တာချီလိတ်နှင့် မယ်ဆိုင်တွင် ရေကြီးရေလျှံ

ရှမ်းပြည်အရှေ့ပိုင်း၊ တာချီလိတ်မြို့နယ်ထဲမှာ အောက်တိုဘာ ၃၁ ရက် မနေ့ညက မိုးသည်း ထန်တာကြောင့် မယ်ဆိုင်ချောင်းရေပြည့်လျှံကျပြီး ချောင်းဘေးနှစ်ဘက်ရှိ လူနေအိမ်တွေထဲ ရေဝင်ကုန်ပါတယ်။

ဒီနေ့မနက် ၅ နာရီကျော်လောက်က တာချီလိတ်မြို့ တာလော့ရပ်ကွက်ထဲမှာ ရေတွေ တက်လာလို့ အရေးကြီးတဲ့ပစ္စည်းတွေကို အမြင့်ပိုင်းကို ကူညီပြောင်းရွှေ့ပေးခဲ့ကြတယ်လို့ တာချီလိတ် နာရေးကူညီမှုအသင်း တာဝန်ရှိသူတစ်ဦးက ဒီဗွီဘီကို ပြောပါတယ်။ 

“ကျနော်တို့ အရင်ဆုံးသိမြင်ရတာကတော့ တာလော့ရပ်ကွက်ထဲမှာပေါ့နော်။ မနက် ၅ နာရီခွဲ လောက်မှာ ရေတွေက ခါးဝက်လောက်ထိတက်လာလို့  ဆိုင်ကယ်တွေ ကားတွေသွားပြီး ကူညီ သယ်ရွှေ့ပေးခဲ့ကြပါတယ်။ ရေကြီးတဲ့နေရာတွေကတော့ ဒီမယ်ဆိုင်ချောင်းဘေးတလျှောက် ရပ်ကွက် အကုန်လုံးလိုပါပဲ။  ဒီတာလော့ရပ်ရယ် မကာအိုခမ်းရပ် မယ်ခေါင်ရပ်၊ ဆန်ဆိုင်း ရပ်ကွက်တွေပေါ့။  အပျက်အစီး ကြီးကြီးမားမားမရှိပါဘူး။ ဆိုင်ကယ်တွေကားတွေ နည်းနည်း ပျက်တယ်၊ အခုတော့ ရေတွေတရိပ်ရိပ်ပြန်ကျနေပါပြီ။” 

ဆန်ဆိုင်း (က) ရပ်ကွက်နေပြည်သူတစ်ဦးကလည်း သူတို့ဆီမှာ ခါတိုင်းလည်း ရေကြီးပေမယ့် ဒီတခေါက်တော့ တော်တော်ဆိုးကြောင်း၊ အိမ်ထဲမှာရေတွေပြည့်လို့ မီးလည်းပျက်၊ ထမင်းဟင်းလည်းချက်လို့မရ၊ ဘယ်မှလည်းသွားလို့ မရကြောင်း၊ မနက် ၉ နာရီခွဲလောက်မှာတော့ ရေက ၄ လက်မလောက်ပြန်ကျသွားပြီလို့ ပြောသွားပါတယ်။ 

အလားတူ ထိုင်းဘက်ခြမ်း မယ်ဆိုင်ချောင်းအနီးက ဆိုင်လုမ်းကျွိုင်းဈေးနဲ့  ရပ်ကွက်အချို့မှာ ရေတွေဝင်ပြီး ပစ္စည်းတွေ အမြင့်ကိုရွှေ့ပြောင်းခဲ့ကြရပါတယ်။ 

မနက် ၁၀ နာရီလောက်မှာ ရေပြန်ကျသွားကြောင်း၊ ရေကျတဲ့နေရာကို မယ်ဆိုင်မြို့နယ်အုပ်ချုပ်ရေးမှူးနဲ့အဖွဲ့က လာရောက်စစ်ဆေးပြီး လိုအပ်တာတွေအကူအညီပေးကာ ရွှံ့နွံတွေကို သန့်ရှင်းရေးပြန်လုပ်နေကြရတယ်လို့ မယ်ဆိုင်ဒေသခံက ပြောပါတယ်။ 

4 weeks Ago
More News
Up