မန်နေဂျာ

November 7, 2022

အမျိုးသမီးများသည် အမျိုးသားများထက် သာလွန်သည့် မန်နေဂျာဖြစ်နိုင်ဟု ပုပ်ရဟန်းမင်း ပြော

ပုပ်ရဟန်းမင်းကြီး ဖရန်စစ်က ဗာတီကန်မှာ ခန့်အပ်ထားတဲ့ အမျိုးသမီးတွေဟာ အမျိုးသားတွေထက် သာလွန်တဲ့ မန်နေဂျာတွေဖြစ်နိုင်တာ သက်သေပြခဲ့ပြီး ရိုမန်ကက်သလစ် ဘုရားကျောင်းတွေနဲ့ လူ့အဖွဲ့အစည်းထဲမှာ အမျိုးသားတွေကို အလွန်အကျွံ ကိုးကွယ် ယုံကြည်တာတွေ ရှိနေတယ်လို့ ပုပ်ရဟန်းမင်းကြီး ဖရန်စစ်က နိုဝင်ဘာ ၆ ရက်မှာ ပြောလိုက်ပါတယ်။

ဘာရိန်းနိုင်ငံဆီ လေးရက်ကြာခရီးစဉ်ကနေ ရောမမြို့ကို ပြန်ရောက်လာတဲ့ လေယာဉ်ပေါ်မှာ ပုပ်ရဟန်းမင်းကြီးက ခုလို မှတ်ချက်စကားတွေ ပြောခဲ့တာပါ။

“ဗာတီကန်မှာ အမျိုးသမီးတဦးကို ရာထူး (တာဝန်) ပေးတဲ့အခါတိုင်း အရာတွေ တိုးတက်လာတာကို ကျ‌နော် သတိပြုမိပါတယ်” လို့ ပုပ်ရဟန်းမင်းကြီးက ပြောပါတယ်။

အီရန်ဆန္ဒပြပွဲတွေရဲ့ ရှေ့တန်းက အမျိုးသမီးတွေနဲ့ ပတ်သက်ပြီး ဖရန်စစ်ကို မေးခဲ့ပေမဲ့ ယေဘုယျအားဖြင့် အမျိုးသမီးတွေရဲ့ အခန်းကဏ္ဍနဲ့ပတ်သက်ပြီး မေးခွန်းကို မဖြေခဲ့ပါဘူး။

“အမျိုးသမီးတွေက ရှေ့ကိုတက်ဖို့ မှန်ကန်တဲ့နည်းလမ်းကို ဘယ်လိုရှာလဲဆိုတာ သိတဲ့အတွက် ဒါဟာ တော်လှန်ရေးတခုပါပဲ” လို့လည်း ပုပ်ရဟန်းမင်းကြီးက ပြောပါတယ်။

သူက သူ့ဇာတိ အာဂျင်တီးနား အပါအဝင် ကမ္ဘာတဝန်းမှာ ယောက်ျားကြီးစိုးမှုဝါဒ လွန်ကဲနေသေးတယ်လို့ အသိအမှတ်ပြု ရှုတ်ချခဲ့ပါတယ်။

ပုပ်ရဟန်းမင်းကြီးက “အမျိုးသမီးတွေက လက်ဆောင်တခုပါ။ ဘုရားသခင်က ယောက်ျားနဲ့ မိန်းမကို ဖန်ဆင်းခဲ့တယ်။ အမျိုးသမီးတွေကို ပိုကြီးတဲ့ အခန်းကဏ္ဍတွေကို ပေးစွမ်းနိုင်စွမ်းမရှိတဲ့ လူ့အဖွဲ့အစည်းဟာ ရှေ့ကို မတိုးနိုင်ဘူး” လို့လည်း ပြောခဲ့ပါတယ်။

4 weeks Ago

March 12, 2022

ပခုက္ကူမြို့ မြန်မာ့ရှေ့ဆောင်ဘဏ်ခွဲ မန်နေဂျာကို စစ်ကောင်စီက ဖမ်းဆီး

မကွေးတိုင်း၊ ပခုက္ကူမြို့က မြန်မာ့ရှေ့ဆောင်ဘဏ်ခွဲရဲ့ မန်နေဂျာ အမျိုးသမီး ၁ ဦးကို မတ် ၁၁ ရက်ညနေပိုင်းမှာ စစ်ကောင်စီတပ်တွေက ဖမ်းဆီးသွားတယ်လို့ ဒေသခံတွေဆီကနေ သိရပါတယ်။

ပခုက္ကူမြို့ အမှတ် ၈ ရပ်ကွက်၊အာဇာနည်လမ်းမှာနေထိုင်တဲ့ မြန်မာ့ရှေ့ဆောင်ဘက်ခွဲရဲ့ မန်နေဂျာ ဒေါ်ခင်နှောင်းနှောင်းကို မနေ့ ညနေ ၃ နာရီလောက်မှာ စစ်ကောင်စီတပ်တွေက လာရောက်ဖမ်းဆီးသွားတာလို့  ဒေသခံတစ်ယောက်က ပြောပါတယ်။

မြန်မာ့ရှေ့ဆောင်ဘဏ်ခွဲမန်နေဂျာ ဒေါ်ခင်နှောင်းနှောင်းကို အမျိုးသားညီညွတ်ရေးအစိုးရ NUG ရဲ့ ငွေတိုက်စာချုပ်တွေ လုပ်ပေးတဲ့ဆိုတဲ့ စွပ်စွဲချက်နဲ့ ဖမ်းဆီးသွားတာလို့ ဆိုပါတယ်။

ပခုက္ကူမြို့မှာ မတ် ၈ ရက်ကလည်း စစ်ကောင်စီက အကြမ်းဖက်တိုက်ဖျက်ရေးဥပဒေနဲ့ စွပ်စွဲ ခံရတဲ့ ဒေသခံပြည်သူတွေရဲ့ နေအိမ် ၅ လုံးကို လာရောက်ချိတ်ပိတ် သွားတယ်လို့ ပြောပါတယ်။

စစ်ကောင်စီတပ်တွေဟာ ပခုက္ကူမြို့က ဒေသခံပြည်သူတွေကို ပုဒ်မအမျိုးမျိုးတပ်ပြီး မကြာခဏ မတရားသဖြင့် ဖမ်းဆီးကာ နေအိမ်တွေကို လိုက်လံချိတ်ပိတ်တာတွေ ဆက်တိုက်ပြုလုပ်နေ တယ်လို့ သိရပါတယ်။

9 months Ago
Up