မန်ချက်စတာ ယူနိုက်တက်

A d v e r t i s e m e n t With Us

February 16, 2020

ယူနိုက်တက်အတွက် သွင်းဂိုးတိုင်း ကွယ်လွန်သူ ညီမကို ရည်ညွှန်းမည်ဟု အီဂါလိုပြော

ယူနိုက်တက်အသင်းအတွက် သွင်းယူပေးမယ့် သွင်းဂိုးတိုင်းက မကြာသေးခင်က ကွယ်လွန်သွားခဲ့ပြီဖြစ်တဲ့ ညီမဖြစ်သူကို ရည်ညွှန်းတယ်လို့  ယူနိုက်တက် တိုက်စစ်မှူးသစ် အိုဒီရွန်အီဂါလိုက ပြောဆိုခဲ့ပါတယ်။  အီဂါလိုရဲ့ ညီမဖြစ်သူဟာ ပြီးခဲ့တဲ့ ဒီဇင်ဘာလမှာ သေဆုံးသွားခဲ့တာပါ။ နိုင်ဂျီးရီးယား လက်ရွေးစင် တိုက်စစ်မှူးဟာ ဇန်နဝါရီ အပြောင်းအရွှေ့ နောက်ဆုံးရက်မှာမှ အိုးထရက်ဖို့ဒ်ကို ခြောက်လ အငှားစာချုပ်နဲ့ ရောက်ရှိလာခဲ့သူပါ။  တခြားအသင်းဖော်တွေ စပိန်နိုင်ငံ မာဘယ်လာမှာ စခန်းသွင်း လေ့ကျင့်နေချိန်မှာ အီဂါလိုဟာ မန်ချက်စတာမြို့မှာ တဦးတည်း လေ့ကျင့်ခန်းဆင်းနေပြီး သူဟာ ချဲလ်ဆီးအသင်းနဲ့ ရင်ဆိုင်မဲ့ တနင်္လာနေ့ ပွဲစဉ်မှာ ယူနိုက်တက်အသင်းအတွက် ပထမဆုံး ပွဲထွက်လာနိုင်ချေ ရှိနေပါတယ်။  ယူနိုက်တက်အသင်းအတွက် ပွဲထွက်ဖို့ အဆင်သင့်ဖြစ်နေချိန်မှာ အီဂါလိုက ဒီဇင်ဘာလက သူတို့မိသားစုရဲ့ စိတ်ထိခိုက်စရာ ဖြစ်ရပ်ကို ထုတ်ဖော် ပြောဆိုလိုက်တာပါ။ အသက် ၃၀ အရွယ် တိုက်စစ်မှူးရဲ့ ညီမဖြစ်သူ အသက် ၂၉ နှစ်အရွယ် မာရီအတိုလီဟာ ဒီဇင်ဘာလတုန်းက ကနေဒါမှာရှိတဲ့ နေအိမ်မှာ ရုတ်တရက် ကွယ်လွန်သွားခဲ့ပါတယ်။  ဒီဖြစ်ရပ်က သူ အပါအဝင် မိသားစုတစ်ခုလုံးအတွက် ဖြေမဆည်နိုင်စရာ အခိုက်အတန့် ဖြစ်ခဲ့တယ်လို့ အီဂါလိုက ဝန်ခံပါတယ်။ “ညီမက ကျနော်တို့ကို ထာဝရခွဲခွာသွားပြီးတော့ သူ့ကို နောက်ထပ် ဘယ်တော့မှ တွေ့ခွင့်မရှိတော့ဘူးဆိုတဲ့ ဖြစ်ရပ်က အရမ်းပဲ စိတ်ထိခိုက်စေခဲ့ပါတယ်” လို့ တိုက်စစ်မှူးက The Sun သတင်းဌာနကို ပြောခဲ့ပါတယ်။  “တခါတလေ တကိုယ်တည်း အထီးကျန်ချိန်မှာ သူ့ကို သတိရပါတယ်။ ကျနော့် နှလုံးသားထဲ ဒီဝေဒနာက ပြင်းပြင်းထန်ထန်ကို စွဲကျန်နေပါတယ်။ ဒါဟာ အရမ်းကို နာကျင်စရာကောင်းတဲ့ ဆုံးရှုံးမှုတခုပါ။ ဒါပေမဲ့ ယောက်ျားတယောက်အနေနဲ့ ကြံ့ကြံ့ခံနိုင်ဖို့ ကြိုးစားနေပါတယ်” လို အီဂါလိုက ပြောပါတယ်။  သေဆုံးသွားခဲ့ပြီဖြစ်တဲ့ အစ်မကို ဂုဏ်ပြုဖို့ အီဂါလိုက သူ့ရဲ့ ဘောလုံးကန်ဖိနပ်တွေမှာ ညီမနာမည်ကို ရေးထိုးထားကြောင်း ပြောဆိုကာ သူ ဝတ်ဆင်မယ့် ယူနိုက်တက်အင်္ကျီရဲ့ အောက်မှာလည်း သူ့ညီမနာမည် ပါတဲ့တီရှပ်ကို ဝတ်ဆင်သွားမယ်လို့ ဆိုပါတယ်။ ဒါ့ကြောင့် သူဟာ ယူနိုက်တက်အတွက် ပွဲဦးထွက်မှာ ဂိုးသွင်းနိုင်မယ်ဆိုရင် သူ့ညီမ နာမည်ပါတဲ့ အင်္ကျီကို ဖော်ထုတ် အောင်ပွဲခံသွားမှာလည်း သေချာသလောက် ရှိနေပါတယ်။ အခုချိန်ကစပြီးတော့ ကစားသမားဘဝ ပြီးဆုံးတဲ့အချိန်အထိ သွင်းယူနိုင်တဲ့ ဂိုးတိုင်းကို ညီမအတွက် ရည်ညွှန်းသွားမယ်လို့လည်း  အီဂါလိုက ပြောပါတယ်။
1 year Ago

December 13, 2019

မန်ယူနိုက်တက်က အေဇက် အယ်လ်ခမာကို ၄ ဂိုးပြတ် အနိုင်ရရှိ (ရုပ်သံဟိုက်လိုက်)

ဒီနေ့မနက်အစောပိုင်း ယှဉ်ပြိုင်ကစားခဲ့ကြတဲ့ ယူရိုပါလိဂ်အုပ်စု (L) နောက်ဆုံးပွဲစဉ်မှာ မန်ချက်စတာ ယူနိုက်တက်အသင်းက အေဇက် အယ်လ်ခမာကို ၄ ဂိုးပြတ် အနိုင်ရရှိသွားပါတယ်။ မန်ယူနိုက်တက် အိမ်ကွင်းမှာ ယှဉ်ပြိုင်ကစားခဲ့တာဖြစ်ပြီး အရန်လူအများပြားနဲ့ ပွဲထွက်ကစားခဲ့ပါတယ်။ မန်ယူနိုက်တက်က ဘောလုံးပိုင်ဆိုင်မှု အနည်းငယ် အသာစီးယူကစားနိုင်ခဲ့ပြီး လူငယ်တိုက်စစ်မှူး ဂရင်းဝုဒ်ရဲ့ ခြေစွမ်းပြ ဂိုးတွေနဲ့အတူ အနိုင်ရရှိခဲ့တာပါ။ ယူနိုက်တက်အတွက် အနိုင်ဂိုးတွေကိုတော့ ဒုတိယပိုင်း ပွဲကစားချိန် ၅၃ မိနစ်မှာ အသင်းခေါင်းဆောင် အက်ရှ်လေယန်းက သွင်းယူခဲ့ပါတယ်။ ဒီနောက် ပွဲကစားချိန် ၅၈ မိနစ်နဲ့ ၆၄ မိနစ်တွေမှာ ဂရင်းဝုဒ်က ၂ ဂိုး သွင်းယူခဲ့ပြီး ပွဲချိန် ၆၂ မိနစ်မှာ မာတာက ပင်နယ်တီကတဆင့် ၁ ဂိုး သွင်းယူခဲ့ပြီး ၄ ဂိုးပြတ် အနိုင်ရရှိခဲ့တာပါ။ အုပ်စု (L) တခြားပွဲစဉ်မှာတော့ ပါတီဇန်က အက်ဖ်စီ အက်စတာနာကို ၄-၁ ဂိုးနဲ့ အနိုင်ရရှိသွားပါတယ်။ အုပ်စု (L) မှာ မန်ယူနိုက်တက်က ရမှတ် ၁၃ မှတ်နဲ့ အုပ်စုပထမ၊ အေဇက် အယ်လ်ခမာက ရမှတ် ၉ မှတ် အုပ်စုဒုတိယနဲ့ နောက်တဆင့်ကို တက်ရောက်သွားပါတယ်။ ယူရိုပါလိဂ်မှာ ပရီးမီးယားလိဂ်က အာဆင်နယ် နဲ့ ဝုလ်ဗာဟန်တန်အသင်းတို့လည်း နောက်တဆင့်ကို အသီးသီးတက်ရောက်သွားပါတယ်။ 
1 year Ago
Up