မန်းရွှေစက်တော်ဘုရားပွဲ

April 6, 2018

မန်းရွှေစက်တော်ဘုရားပွဲကို နှစ်ဆန်း ၁ ရက်ထိဆက်လက်ကျင်းပမည်

မန်းရွှေစက်တော်ဘုရားပွဲတော်မှာ တည်းခိုဆောင်တွေနဲ့ ဈေးဆိုင်တွေ ဖျက်သိမ်းပြီး ပြန်သွားကြပြီဆိုတဲ့သတင်းဟာ မမှန်ကန်ဘဲ နှစ်ဆန်း ၁ ရက်အထိ ဘုရားပွဲဆက် ကျင်းပသွားမယ်လို့ မန်းရွှစက်တော် ဂေါပကအဖွဲ့က ပြောပါတယ်။ မန်းရွှေစက်တော်ဘုရားပွဲအတွက် ဖွင့်လှစ်ထားတဲ့ တည်းခိုဆောင်တွေနဲ့ ဈေးဆိုင်တွေဟာ မိုးလေဝသအခြေအနေတွေကြောင့် ရေဘေးဒုက္ခကြုံရမှာ ကြောက်လို့ ဖျက်သိမ်းပြီး ပြန်သွားကြပြီ ဆိုတဲ့ ကောလာဟလသတင်းတွေက အခုရက်ပိုင်းမှာ ပျံ့နှံ့နေတာပါ။ မန်းရွှေစက်တော်ဘုရားပွဲတော်ကို နှစ်စဉ် ကျင်းပတဲ့အတိုင်း တပို့တွဲလဆန်း ၅ ရက်ကနေ  မြန်မာနှစ်ဆန်း ၁ ရက်အထိ ပြုလုပ်သွားမှာဖြစ်တယ်လို့ ဂေါပကအဖွဲ့ဝင် ဦးမြင့်သိန်းက အတည်ပြုပြောပါတယ်။ “မန်းရွှေစက်တော် ဗုဒ္ဓပါဒပူဇနိယပွဲတော် စည်ကားမှုကို ပျက်ပြားအောင် နှောင့်ယှက်သူတွေက အခုနှစ်မှ မဟုတ်။ အရင်နှစ်တွေကလည်း ပွဲတော်အတွင်းမှာ မီးလောင်မယ်။ ရေကြီးမယ်လို့ ကောလာဟလသတင်းတွေကို အခုလို လွှင့်ပြီး ဘုရားဖူး ပြည်သူတွေကို ခြိမ်းခြောက်ခဲ့တာမျိုး ရှိခဲ့ဖူးတယ်။” ဘုရားပွဲတော်ဈေးကော်မတီဥက္ကဋ္ဌ ဦးအေးကိုက “အရင်ရက်ပိုင်းလောက်က မိုးဇလဌာနကနေ ထုတ်ပြန်ထားတဲ့ သတင်းအချက်အလက်တွေ ကြည့်ပြီး မန်းရွှေစက်တော် ဗုဒ္ဓပါဒပူဇနိယပွဲတော်ကို ပျက်စီးအောင် အချိန်ကိုက် အခုလို သတင်းအမှားတွေနဲ့ သူတို့ ဖေ့စ်ဘွတ်ခ် တွေပေါ်ကနေ တိုက်ခိုက်နေတာသာ ဖြစ်တယ်”လို့ ပြောပါတယ်။ ဒါ့အပြင် တည်းခိုဆောင်လုပ်ငန်းရှင်တွေကလည်း “အခုအချိန်ဟာ ပွဲတော်ထဲမှာ အစည်ကားဆုံးရက်တွေဗျ။ ကျောင်းသားတွေ စာမေးပွဲဖြေပြီးကတည်းက တော်တော်လေး စည်ကားလာတာ မျက်မြင်ကိုယ်တွေ့ပဲ။ ပြီးတော့ နိုင်ငံခြားသားတွေတောင် လာကြတယ်ဗျာ။ ဘယ်လိုနိုင်ငံတွေက လာကြတာလဲတော့ မသိဘူး။ တည်းခိုဆောင်တွေ အားလုံးနဲ့ ဈေးဆိုင်တွေ ရှိပါသေးတယ်” လို့ တည်းခိုဆောင်တွေနဲ့ ဈေးဆိုင်တွေ ပွဲတော်အတွင်းမှာ ခင်းကျင်း ရောင်းချနေသေးကြောင်း ရှိနေတာကို ရှင်းပြပါတယ်။ မကွေးတိုင်း၊ မင်းဘူး စကုမြို့နယ်ထဲက မန်းရွှေစက်တော် ဗုဒ္ဓပါဒ ပူဇနိယပွဲတော်ဟာ မြန်မာနိုင်ငံမှာ ကျိုက်ထီးရိုးဘုရားပွဲတော်ပြီးရင် ဒုတိယရက်အရှည်ဆုံး ဘုရာပွဲတော်လည်း ဖြစ်ပါတယ်။
3 years Ago

March 14, 2018

မန်းရွှေစက်တော်ဘုရားပွဲ ယာဉ်ရပ်နားခ ကောက်ခံနေမှု ရပ်ဆိုင်းတော့မည်

မကွေးတိုင်းဒေသကြီး မင်းဘူး စကုမြို့နယ်မှာ ကျင်းပနေတဲ့ မန်းရွှေစက်တော်ဘုရားပွဲတော် မော်တော်ယာဉ် ရပ်နားထိန်းသိမ်းခ ကောက်ခံနေမှုကို ဘုရားဖူးပြည်သူတွေ ရဲ့ဆန္ဒကို လိုက်လျောပြီး ရပ်ဆိုင်းတော့မယ်လို့ သိရပါတယ်။ ငဖဲမြို့နယ် NLD ပါတီဝင်တဦးဖြစ်တဲ့ ကိုကျော်သောင်းက “မတ်လ ၁၃ ရက်နေ့က ကိစ္စတခုနဲ့ ဝန်ကြီးချုပ်ဆီ သွားတာဗျ။ ဝန်ကြီးချုပ် ဒေါက်တာအောင်မိုးညိုက မန်းရွှေစက်တော်မှာ ယာဉ်ဝင်ခ ကောက်ခံနေတာ တော်တော်တရားလွန်တယ်။ လေလံရထားတဲ့လူကို ပိုက်ဆံ ပြန်ပေးလိုက်ဖို့ ပြောလိုက်တယ်။၊ ရပ်သင့်တာပေါ့ဗျာ။ နှစ်တိုင်း တောင်းတယ်။ မနှစ်က မတောင်းဘူး။ မနှစ်က ကျနော်လည်း ရွှေစက်တော်ဂေါပက အဖွဲ့ဝင် လုပ်ခဲ့တယ်။ ဒီနှစ်က ပြန်တောင်းတယ်ဆိုတော့ မနှစ်က တနှစ်လေးပဲ ကင်းလွတ်ခွင့်ရတာပေါ့ဗျာ။ ကားဝင်ကြေးတို့ ဂိတ်ကြေးတို့ ဆိုတာ။ အဲတော့ ရွှေစက်တော် ပွဲတော်အတွင်း ဘုရားဖူးလာဖို့ ဝင်ကြေးပေးရသလို ဖြစ်နေတာပေါ့။ ဝန်ကြီးချုပ် ပြောတဲ့အတိုင်း တည်ရင် ကောင်းတာပေါ့၊ ညနေ ၃ နာရီလောက်က ဝန်ကြီးချုပ်က ပြောတာ။ ဘုရားဖူး ပြည်သူတွေ အကုန်ဝမ်းသာကြမှာပေါ့"လို့ ပြောပါတယ်။ မန်းရွှေစက်တော် ဈေးသည်တဦးဖြစ်တဲ့ ကိုမျိုးက ဒီသတင်းကြားရတာ အတိုင်းမသိ ဝမ်းသာမိကြောင်း ပြောပါတယ်။ “ဘုရားဖူး ပြည်သူတွေအတွက် သတင်းကောင်းတခုပဲလေ။ ပွဲတော်ကာလကလည်း ၁ လလောက်ပဲ ကျန်တော့တာ၊ ဝန်ကြီးချုပ်နဲ့ ဂေါပကအဖွဲ့ကို ကျေးဇူးတင်တယ်။" မန်းရွှေစက်တော်ဘုရား ဂေါပက ဥက္ကဋ္ဌ ဦးသိန်းလှိုင်က "ခုတရက် နှစ်ရက်အတွင်း တရားဝင်းစာ ရောက်လာတဲ့နေ့က စပြီးရုပ်သိမ်းမှာဖြစ်ကြောင်း အသိပေးပါတယ် ခင်ဗျ။ ကျနော်တို့က ကောင်းမယ်ထင်လို့ အများသဘောတူ ဆုံးဖြတ်ပြီးတော့ လုပ်တဲ့ဟာပါ။ ပွဲတော်ပြီးဖို့လည်း ၁ လသာသာပဲ ကျန်ပါတော့တယ်။ ဒီမိုကရေစီခေတ်မှာ အများဆန္ဒ လိုက်လျောတာ ကောင်းပါတယ်။ ကိုယ်စီ တာဝန်ယူနိုင်ရင် ကောင်းတာပေါ့" လို့ ပြောပါတယ်။ မန်းရွှေစက်တော် ဘုရားပွဲတော်မှာ ဗုဒ္ဓမြတ်စွာဘုရားရဲ့ ခြေတော်ရာ နှစ်ဆူကို ဖူးမြော်နိုင်ပြီး မန်းချောင်းအတွင်း ရေကစား အပန်းဖြေတဲ့ ဘုရားဖူးပြည်သူများ အထူးစည်ကားတဲ့ နေရာတခုလည်း ဖြစ်ပါတယ်။ သတင်း - မင်းထီး
3 years Ago
Up