မန္တလေး သံဃသမဂ္ဂ သပိတ်စစ်ကြောင်း

September 29, 2021

မန္တလေးတွင် စစ်တပ်က ဘုန်းကြီးကျောင်းများကို ဝင်ရောက်စီးနင်းပြီး သံဃာတော်အချို့ကို ဖမ်းဆီး

မန္တလေးမြို့မှာ စက်တင်ဘာ ၂၈ ရက်က  ကျောင်းတိုက် ၃ တိုက်ကို စစ်ကောင်စီတပ်သားတွေ ဝင်ရောက်စီးနင်းခဲ့ပြီး သံဃာတော်တချို့ ဖမ်းဆီးသွားသလို မော်တော်ယာဉ်နဲ့ ဆိုင်ကယ်တွေကိုလည်း ယူဆောင်သွားပါတယ်။

မဟာအောင်မြေမြို့နယ် ၃၇ လမ်း နဲ့ ၃၈ လမ်းကြား၊ ၈၆ လမ်းနဲ့ ၈၇ လမ်းကြားက ကင်းဝန်မင်းကြီးကျောင်းတိုက်ကို စစ်ကောင်စီတပ်သားတွေက အရပ်ဝတ်တွေနဲ့ နှစ်ကြိမ်  ဝင်ရောက်စီးနင်းခဲ့ပြီး ဦးပညာသီဟကို ဖမ်းဆီးခဲ့တဲ့အပြင် မော်တော်ကားပါ သိမ်းယူသွားခဲ့ပါတယ်။

ချမ်းအေးသာစံမြို့နယ်ထဲက မဟာဝိဇီတာရာမတိုက် တေဇာလင်္ကာရကျောင်းကိုလည်း စစ်တပ်က စီးနင်းဝင်ရောက်ပြီး ဆရာတော်နဲ့ တပည့် ရဟန်းတပါး၊ လူနှစ်ယောက်ကို ခေါ်ဆောင်သွားတဲ့အပြင် ကား၂ စီး၊ ဆိုင်ကယ် ၄ စီးပါ သိမ်းယူသွားတယ်လို့ သိရပါတယ်။

ဒါ့အပြင် ပြည်ကြီးတံခွန်မြို့နယ် စိတ္တသုခပတ္တမြားကျောင်းတိုက်ကိုလည်း ဝင်ရောက်စီးနင်း ရှာဖွေခဲ့တယ်လို့ သိရပါတယ်။

“ဘာသာရေးဆိုင်ရာ ကျောင်းတိုက်တွေအတွင်းကို ကျောင်းတိုက် နာယကဆရာတော်တွေရဲ့ ခွင့်ပြုချက်မရဘဲ အကြမ်းဖက်ဝင်ရောက်တာ သံဃာပိုင် အများပြည်သူ လှူဒါန်းထားတဲ့ ပစ္စည်းတွေ ကို ခိုးယူလုယက်ဖျက်ဆီးတာဟာ  အဆိပ်သီးစားတာ ဖြစ်တယ်။ မိမိစားတဲ့ အဆိပ်သီးဟာ မိမိကိုသာလျှင် ကိုယ်ဆင်းရဲ စိတ်ဆင်းရဲဖြစ်စေပြီး အသေဆိုးသေကြရမယ်” လို့ ဆရာတော်တစ်ပါးက မိန့်ပါတယ်။

အခုလို ကျောင်းတိုက်တွေ ဝင်ရောက်စီးနင်းတာနဲ့ သံဃာတော်တွေ ဖမ်းဆီးခေါ်ဆောင်တာဟာ စစ်ကောင်စီအနေနဲ့ သံဃသမဂ္ဂသပိတ်စစ်ကြောင်းကို ဖြိုခွဲဖို့လုပ်နေတာဖြစ်ပြီး သံဃသမဂ္ဂသပိတ်စစ်ကြောင်းအနေနဲ့လည်း စစ်အာဏာရှင်တွေ ကျရှုံးရေးအတွက် နေ့စဉ် ချီတက်ဆန္ဒပြနေဆဲ ဖြစ်ပါတယ်။

2 months Ago

April 29, 2021

ရက်ပေါင်း (၈၀) မြောက်ချီတက်ခဲ့တဲ့ မန္တလေး သံဃသမဂ္ဂ သပိတ်စစ်ကြောင်း

မန္တလေးမြို့မှာ ဧပြီလ ၂၉ ရက် မွန်းလွဲပိုင်းက စစ်အာဏာရှင် အလိုမရှိကြောင်းနဲ့ အမျိုးသားညီညွှတ်ရေးအစိုးရ (NUG) ကို ထောက်ခံကြောင်း မန္တလေး သံဃသမဂ္ဂစစ်ကြောင်း ချီတက်ဆန္ဒပြခဲ့ကြပါတယ်။

မန္တလေး သံဃသမဂ္ဂစစ်ကြောင်းဟာ အာဏာသိမ်းစစ်ကောင်စီရဲ့ အတားအဆီးတွေ ဘယ်လိုရှိရှိ နေ့စဉ် ချီတက်ဆန္ဒပြနေတဲ့ စစ်ကြောင်းတစ်ခုဖြစ်ပြီး ဒီကနေ့ဆိုရင် ရက်ပေါင်း (၈၀) မြောက်ထိ ရှိပြီဖြစ်ပါတယ်။

စစ်ကြောင်းမှာ မန္တလေးမြို့ လေးပြင် လေးရပ်က ဆရာတော် သံဃာတော်တွေအပြင် လူငယ်လူရွယ်တွေပါ ပူးပေါင်းပါဝင်ကြပြီး စစ်ကြောင်းကို အောင်မြင်စွာ လူစုခွဲနိုင်ခဲ့ကြပါတယ်။

7 months Ago
Up