မန္တလေးထောင်

November 17, 2022

စစ်ကောင်စီက မန္တလေးထောင်မှ အကျဉ်းသား ၄၅၀ ကျော်လွှတ်၊ နိုင်ကျဉ်း ၁၅ ဦးသာပါဝင်

စစ်ကောင်စီက နိုဝင်ဘာ ၁၇ ရက် ဒီနေ့ကျရောက်တဲ့ ၁၀၂ နှစ်မြောက် အမျိုးသားနေ့မှာ အကျဉ်းထောင်တွေထဲ ထောင်ဒဏ်ကျခံနေရတဲ့ အကျဉ်းသားတွေကို လွတ်ငြိမ်းချမ်းသာခွင့်နဲ့ လွှတ်ပေးနေပြီး မန္တလေး အိုးဘိုအကျဉ်းထောင်ကနေ အကျဉ်းသား အကျဉ်းသူ စုစုပေါင်း ၄၅၀ ကျော် လွှတ်ပေးခဲ့တဲ့အထဲမှာ ပုဒ်မ ၅၀၅(က) နဲ့ တရားစွဲဆိုခံရပြီး ထောင်ကျနေတဲ့ နိုင်ငံရေးအကျဉ်းသား ၁၄ ဦးနဲ့ အကျဉ်းသူ ၁ ဦးသာ ပါတယ်လို့ သိရပါတယ်။

အိုးဘိုအကျဉ်းထောင်နဲ့ နီးစပ်သူတဦးက “လွှတ်ပေးတဲ့အထဲမှာ တခြားအကျဉ်းသားတွေ များတယ်။ နိုင်ငံရေးအကျဉ်းသားက နည်းတယ်။ ညနေပိုင်းမှာ လူ ၃၀၀ လောက် လွှတ်ပေးတာ” လို့ ပြောပါတယ်။

၁၀၂ နှစ်မြောက် အမျိုးသားနေ့မှာ စစ်ကောင်စီက အကျဉ်းထောင်တွေကနေ အကျဉ်းသား ၅,၇၀၀ ကျော်ကို လွတ်ငြိမ်းချမ်းသာခွင့်နဲ့ လွှတ်ပေးခဲ့ပြီး ပြစ်ဒဏ်လွတ်ငြိမ်းခွင့် ပေးလိုက်သူတွေထဲမှာ နိုင်ငံတော်အတိုင်ပင်ခံရုံးဝန်ကြီး ဦးကျော်တင့်ဆွေ၊ ပြည်ထောင်စု  ရွေးကောက်ပွဲကော်မရှင်အဖွဲ့ဝင် ဦးသန်းဌေး၊ တနင်္သာရီတိုင်းဝန်ကြီးချုပ်ဟောင်း ဒေါက်တာလဲ့လဲ့မော်၊ ပန်းချီဆရာ ထိန်လင်း၊ လူရွှင်တော် ဟာသ သရုပ်ဆောင် ဆင်မ၊ စာရေးဆရာ မောင်သာချို၊ အမျိုးသားဒီမိုကရေစီအဖွဲ့ချုပ် ပြောခွင့်ရသူ ဒေါက်တာမျိုးညွန့်၊ ဝါရင့်ရှေ့နေကြီး ဦးကျော်ဟိုး စသူတွေ ပါဝင်ပါတယ်။

ဒါ့အပြင် ဩစတြေးလျနိုင်ငံသား စီးပွားရေးပညာရှင် ပါမောက္ခ မစ္စတာရှောင်တာနယ်၊ ဗြိတိန်နိုင်ငံသူ မစ္စဗစ်ကီဘိုမင်၊ ဂျပန်နိုင်ငံသား မှတ်တမ်းရုပ်ရှင်ဒါရိုက်တာ တိုရူကူဘိုတာနဲ့ အမေရိကန်နိုင်ငံသား ကိုကျော်ဌေးဦးတို့လည်း ပြန်လွှတ်ပေးမယ့်စာရင်းမှာ ပါဝင်တာ ဖြစ်ပါတယ်။

ဒါ့အပြင် ရာဇသတ်ကြီး ဥပဒေပုဒ်မ ၅၀၅(က) နဲ့ တရားစွဲဆိုထားတဲ့ ရုပ်ရှင်မင်းသမီး ဖွေးဖွေးနဲ့ အဆိုတော် နီနီခင်ဇော်တို့ အပါအဝင် အနုပညာရှင် ၁၁ ဦးကိုလည်း စွဲဆိုထားတဲ့ အမှုတွေကို ပိတ်သိမ်းခဲ့ပါတယ်။

စစ်အာဏာသိမ်းပြီးတဲ့နောက်ပိုင်း ၂၀၂၁ ခုနှစ် ဖေဖော်ဝါရီမှ ၂၀၂၂ ခုနှစ် နိုဝင်ဘာ ၁၆ ရက်အထိ ဖမ်းဆီးချုပ်နှောင်ခံထားရသူ အရပ်သားပြည်သူ စုစုပေါင်း ၁၃,၀၁၅ ဦးရှိပြီး ၁,၆၄၈ ဦးဟာ ထောင်ဒဏ်ချမှတ်ခံထားရတယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း (AAPP) က ထုတ်ပြန်ထားပါတယ်။

3 months Ago

August 12, 2020

မန္တလေးထောင်တွင် ဆယ်တန်းစာမေးပွဲဖြေဆိုခဲ့သည့် ကျောင်းသား ၁ ဦး  ၃ ဘာသာဂုဏ်ထူးထွက်

တက္ကသိုလ်ဝင်တန်း စာမေးပွဲကို အကျဉ်းထောင်ထဲက ဖြေဆိုသွားတဲ့ ကျောင်းသားတယောက်ဟာ မန္တလေးတိုင်းထဲမှာ ဝိဇ္ဇာဘာသာတွဲ အမှတ်အများဆုံး ၁၀ ယောက်စာရင်းဝင်ပြီး ၃ ဘာသာ ဂုဏ်ထူးလည်း ထွက်ခဲ့ပါတယ်။ မန္တလေး ဗဟိုအကျဉ်းထောင် (အိုးဘိုထောင်) စာစစ်ဌာနမှာ ခုံအမှတ် မနမ-၅၆၉၅ နဲ့ ဖြေဆိုခဲ့တဲ့ ကျောင်းသားဟာ စာမေးပွဲ ဖြေပြီးနောက် ဧပြီ ၁၇ ရက်မှာ နိုင်ငံတော် လွတ်ငြိမ်းချမ်းသာခွင့်နဲ့ လွတ်မြောက်သွားခဲ့ပါတယ်။ သူဟာ ပထဝီ၊ သမိုင်း၊ ဘောဂဗေဒ ဘာသာတို့ဂုဏ်ထူးထွက်ခဲ့သလို မန္တလေးတိုင်းရဲ့ ဝိဇ္ဇာတွဲအမှတ်အများဆုံးစာရင်းမှာ အမှတ်ပေါင်း ၄၆၂ မှတ်နဲ့ အဆင့် ၇ ရခဲ့တယ်လို့ ပြည်ထဲရေးဝန်ကြီးဌာနက ဆိုပါတယ်။ တနိုင်ငံလုံးက အကျဉ်းထောင်တွေကနေ တက္ကသိုလ်ဝင်စာမေးပွဲဖြေဆိုသူတွေထဲမှာ ၄ ဘာသာနဲ့ ၃ ဘာသာ ဂုဏ်ထူးရှင် ၁၄  ယောက်အပါအဝင် ဂုဏ်ထူးရသူ ၇၈ ယောက်ရှိပြီး စုစုပေါင်းအောင်မြင်သူ ၁၀၈ ယောက်ရှိပါတယ်။ အခုနှစ်မှာ တနိုင်ငံလုံး အကျဉ်းထောင် ၁၁ ခုက အကျဉ်းသား ၁၆၂ ယောက်၊ အကျဉ်းသူ ၁၃ ယောက်၊ အချုပ်သား ၂ ယောက်၊ အချုပ်သူ ၁ ယောက်၊ စုစုပေါင်း ၁၇၈ ယောက် ဝင်ရောက် ဖြေဆိုခဲ့ကြတာပါ။ အောင်မြင်သူတွေထဲမှာ ၄ ဘာသာ ဂုဏ်ရှင် ၁ ယောက်၊ ၃ ဘာသာ ဂုဏ်ထူးရှင် ၁၁ ယောက်၊ ၂ ဘာသာ ဂုဏ်ထူးရှင် ၂၈ ယောက်နဲ့ ၁ ဘာသာ ဂုဏ်ထူးရှင် ၃၈ ယောက် ပါဝင်ပါတယ်။ မနှစ်ကထက် ဖြေဆိုသူများလာခဲ့ပြီး အောင်မြင်တဲ့ ရာခိုင်နှုန်းကတော့ ၆၀ ဒသမ ၆၇ ရာခိုင်နှုန်းဖြစ်တာကြောင့် အရင်နှစ်တွေထက် အောင်ချက်ရာခိုင်နှုန်းလည်း တက်လာပါတယ်။
2 years Ago
Up