ဇန်နဝါရီ ၂၂ ရက် နေ့လယ် ၂ နာရီလောက်က စစ်ကောင်စီတပ် အင်အားအလုံးအရင်းနဲ့ နေရာအတိအကျလာပြီး ပစ်ခတ်ဖမ်းဆီးခဲ့တာကြောင့် မန္တလေးတိုင်း အခြေစိုက် MSTF အထူးပြောက်ကျားတပ်ဖွဲ့က ခေါင်းဆောင် ၅ ဦး အဖမ်းခံလိုက်ရတယ်လို့ MSTF ပြန်ကြားရေးက ထုတ်ပြန်ထားပါတယ်။
ဒါ့အပြင် MSTF နဲ့ ချိတ်ဆက်ထားတဲ့ တခြားအဖွဲ့အစည်းနဲ့ ပုဂ္ဂိုလ်တွေကိုလည်း ဘေးကင်းရာ အမြန်ဆုံး တိမ်းရှောင်ကြဖို့ ထုတ်ပြန်ချက်ထဲမှာ သတိပေးထားပါတယ်။
ခေါင်းဆောင်တွေ ဖမ်းဆီးခံရပေမယ့် ကျန်ရှိ MSTF တပ်သားတွေအနေနဲ့ နောက်တွန့် ကြောက်ရွှံ့နေမှာမဟုတ်ဘဲ ချမှတ်ထားတဲ့ လမ်းစဉ်အတိုင်းလိုက်နာပြီး ပြည်သူလူထုအား ဆက်လက်ကာကွယ်ပေးသွားမယ်လို့ ထုတ်ပြန်ချက်ထဲမှာ ပြောထားပါတယ်။
မန္တလေးမြို့၊ အောင်မြေသာစံမြို့နယ်၊ ဥပုသ်ရပ်ကွက်၊ ၉ လမ်း၊ လမ်း ၇၀ နဲ့ ၇၃ လမ်းကြားရှိ မန္တလေးတိုင်းဒေသကြီးလွှတ်တော်ရုံး ဝင်ပေါက်ဂိတ် ရဲကင်းကို ဇန်နဝါရီ ၈ ရက် ဒီမနက် ၈ နာရီလောက်က လက်ပစ်ဗုံးနဲ့ ပစ်ခံခဲ့ရပါတယ်။
လွှတ်တော်အဝင်ပေါက် ရဲကင်းအမိုးပေါ်ကို လက်ပစ်ဗုံးကျရောက် ပေါက်ကွဲခဲ့တာဖြစ်ပြီး အဆောက်အအုံ အနည်းငယ် ထိခိုက်ပျက်စီးသွားကာ လူထိခိုက်ဒဏ်ရာရတာတော့မရှိဘူးလို့ သိရပါတယ်။
တချိန်တည်းမှာပဲ အောင်မြေသာစံမြို့နယ် ၁၉ လမ်း၊ ၈၆ လမ်းနဲ့ ၈၇ လမ်းကြားရှိ အောင်မြေသာစံရပ်ကွက် အုပ်ချုပ်ရေးမှူးရုံး လက်ပစ်ဗုံးနဲ့ ပစ်ခံခဲ့ရပြီး ပြတင်းပေါက် မှန်တွေ ပျက်စီးသွားခဲ့ပါတယ်။
