မန္တလေးခရိုင်

August 30, 2021

မန္တလေးခရိုင်တွင် ကိုဗစ်-၁၉ ရောဂါဖြင့် ၁၀ ဦး ထပ်မံ သေဆုံး

မန္တလေးခရိုင်အတွင်း သြဂုတ် ၂၉ရက်က ကိုဗစ်-၁၉ ရောဂါနဲ့  သေဆုံးသူ ၁၀ ဦး ရှိတယ်လို့ မြို့ခံလူမှုကူညီရေးအသင်းကနေ သိရပါတယ်။ 

မန္တလေးဆေးရုံကြီးရင်ခွဲရုံမှာ ကိုဗစ်လူနာ ၅ ဦး၊ Grand Mandalay ဆေးရုံမှ ကိုဗစ်လူနာ ၁ ဦး၊ ခုတင် ၃၀၀ သင်ကြားရေးဆေးရုံမှ ကိုဗစ်လူနာ ၁ ဦး၊ ရင်ဘတ်တူညီနောင်ဆေးရုံမှ ကိုဗစ်လူနာ ၁ ဦး၊ အရပ်ထဲမှာ ကိုဗစ်လူနာ ၁ ဦးနဲ့ သံသယလူနာ ၁ဦး စုစုပေါင်း ၁၀ ဦး သေဆုံးခဲ့တာပါ။ 

ဖော်ပြပါ ကိုဗစ်ကြောင့် သေဆုံးသူ စာရင်းဟာ မန္တလေးမြို့ခံပရဟိတအသင်းတချို့ရဲ့ ကူညီဆောင်ရွက်ပေးခဲ့ အချက်အလက်တွေသာဖြစ်ပါတယ်။ 

ဇူလိုင်လက နေ့စဉ် သေဆုံးသူ အယောက် ၇၀ အထက်မှာ ရှိခဲ့ပြီး သြဂုတ်လမှ စတင်ကာ သေဆုံးသူ လျော့နည်းလာခဲ့ပြီး သြဂုတ် နောက်ဆုံးအပတ်မှာ တစ်ရက် သေဆုံးသူ ၁၀ ဦး ဝန်းကျင်သာ ရှိတော့တာပါ။ 

သေဆုံးသူအများစုက အသက်အရွယ်ကြီးသူတွေ ရောဂါအခံရှိသူတွေ ဖြစ်ပြီး ဆေးခန်းမပြသနိုင်တာ၊ ဆေးဝါးအခက်အခဲ၊ အောက်ဆီဂျင်အခက်အခဲတွေနဲ့ သေဆုံးကြတာပါ။ 

စစ်ကောင်စီ ကျန်းမာရေးဝန်ကြီးဌာနရဲ့  သြဂုတ် ၂၈ရက် ထုတ်ပြန်ချက်မှာ မန္တလေးခရိုင်အတွင်း ကိုဗစ်-၁၉ ပိုးတွေ့ရှိသူ ၃ ဦး ရှိပြီး ကိုဗစ်လူနာ ၂ ဦး သေဆုံးခဲ့တယ်လို့ ထုတ်ပြန်ထားပါတယ်။ 

မန္တလေးမြို့ ချမ်းမြသာစည်မြို့နယ်မှာ ကိုဗစ်ကူးစက်ခံရသူ ၃ ဦး၊ အောင်မြေသာစံနဲ့ ပြည်ကြီးတံခွန်မြို့နယ်တို့မှာ ကိုဗစ်လူနာ ၂ ဦး သေဆုံးခဲ့တယ်လို့ စစ်ကောင်စီက ထုတ်ပြန်ထားတာပါ။ 

လက်ရှိ မန္တလေးတိုင်းဒေသကြီးအတွင်းရှိ မြို့နယ် ၂၀ မြို့နယ်ကို Stay At Home သတ်မှတ်ထားပါတယ်။

3 weeks Ago

August 23, 2021

မန္တလေးခရိုင်၌ အပြင်ထွက်ခွင့်ကန့်သတ်ချက် ဖြေလျှော့ပေးခဲ့သော်လည်း စစ်ဆေးဖမ်းဆီးနေ

မန္တလေးခရိုင်မှာ အပြင်ထွက်ခွင့် ကန့်သတ်ချက်တွေကို ဖြေလျှော့လိုက်ကြောင်း သြဂုတ် ၂၂ရက် ညပိုင်းက ထုတ်ပြန်ထားပေမယ့် သြဂုတ် ၂၃ ရက် မနက်ပိုင်းမှာ စစ်ဆေးဖမ်းဆီးတာတွေ ပြုလုပ်နေတယ်လို့  မန္တလေးမြို့ခံတွေက ပြောပါတယ်။

“မနေ့ညက အပြင်ထွက်ခွင့် ကန့်သတ်တာတွေ လျှော့ပေးလိုက်တယ်လို့ သတင်းတွေ့ပေမယ့် မနက်က ဖမ်းဆီးစစ်ဆေးနေတုန်းပါ။ စာထုတ်တာ တစ်ဖွဲ့၊ ဖမ်းတာက တစ်ဖွဲ့၊ စျေးဝယ်ကတ်ပေးတာတစ်ဖွဲ့၊ စျေးဝယ်ကတ်ပါလည်း ဖမ်းတဲ့တစ်ဖွဲ့၊ ဖျက်သိမ်းတာက တစ်ဖွဲ့၊ ဖျတ်သိမ်းလည်း မသိဘူးဖမ်းမယ်ဆိုတဲ့တစ်ဖွဲ့ ဖြစ်နေတယ်” လို့ မန္တလေးမြို့ခံတစ်ဦးက ပြောပါတယ်။

သြဂုတ် ၄ ရက် နဲ့ ၁၃ ရက်က ထုတ်ပြန်ချက်တွေမှာ မန္တလေးခရိုင်အတွင်းရှိ မြို့နယ် ၅ မြို့နယ်အတွင်း မနက် ၉ နာရီမှာ  ညနေ ၃ နာရီခွဲထိ အပြင်မထွက်ဖို့နဲ့ သတ်မှတ်အချိန်အတွင်း စျေးဝယ်ကတ်၊ နယ်ကျော်ကတ်နဲ့သာ သွားလာကြဖို့ ပါဆယ်စနစ်နဲ့သာ ရောင်းချဖို့ စတဲ့ အချက်တွေ ထုတ်ထားပါတယ်။

သြဂုတ် ၂၃ ရက်မှာတော့ အချိန်ကန့်သတ်ချက်တွေ၊ စျေးဝယ်ကတ်၊ နယ်ကျော်ကတ်ကိစ္စတွေ ၊ ပါဆယ်စနစ်နဲ့ ရောင်းချဖို့ကိစ္စတွေ မပါတော့ဘဲ ထုတ်ပြန်ထားတာ တွေ့ရပါတယ်။

မန္တလေးခရိုင်ကို Stay At Home အစီအစဉ် အကျုံးဝင်ကြောင်း သြဂုတ် ၃၁ ရက်ထိ ထုတ်ပြန်ထားတာကြောင့် Stay at Home သတ်မှတ် စည်းကမ်းအတိုင်း နေထိုင်ရမှာဖြစ်တယ်လို့ သိရပါတယ်။

4 weeks Ago
More News
Up