မန္တလေး

February 4, 2023

မန္တလေးတွင် ကြက်ကြော်ဆိုင်ရှင် ၁ ဦး ဖမ်းဆီးခံရ

မန္တလေးတိုင်း မဟာအောင်မြေမြို့နယ်၊ မဟာ‌မြိုင် (၁) ရပ်ကွက်၊ ၆၈ လမ်း × ၄၂ လမ်း ကြားမှာ ဖွင့်လှစ်ထားတဲ့ LFC ကြက်ကြော်ဆိုင်ပိုင်ရှင်ဖြစ်သူကို ဖေဖော်ဝါရီ ၂ ရက် ညနေ ၄ နာရီလောက် က စစ်ကောင်စီတပ်ဖွဲ့ဝင်တွေက လာရောက်ဖမ်းဆီးသွားခဲ့ပြီး မိသားစုဝင်တွေနဲ့ လက်ရှိအချိန် အထိ အဆက်အသွယ်မရသေးဘူးလို့  သိရပါတယ်။ 

ဖေဖော်ဝါရီလ ၂ ရက်နေ့က စစ်ကောင်စီရဲ့ သတင်းပေး တယ်လီဂရမ်ချန်နယ်ကနေ အဖမ်းခံရသူရဲ့ ပုံ၊ လိပ်စာနဲ့ အသံတိတ်သပိတ် ပါဝင်ဖို့ ပြောဆိုထားတဲ့ စခရင်ရှော့ပုံတွေနဲ့ မန္တလေးက စစ်ကောင်စီနဲ့ ရဲတပ်ဖွဲ့တွေ ဖမ်းဆီးပေးဖို့ ပြောဆိုထားတာပါ။ 

မိသားစုဝင်နဲ့ နီးစပ်သူတဦးက "ကိုဇေ ဖမ်းခံရတယ်။ ၂ ရက်နေ့ ညနေ ၄ နာရီလောက်က ဆိုင်မှာ ရှိနေတုန်း လာခေါ်သွားတာ၊ အခုထိ ဘာမှအဆက်အသွယ်မရသေးပါဘူး၊ သူက ဖေ့ဘွတ်ခ်မှာ ဖော်လိုဝါ များတယ်။ silent strike ၁ ရက်နေ့ကပုံတွေ တင်လိုက်လို့ စစ်တပ်က သိပြီး လာဖမ်းတာ။ အကောင့်မှာ ဆိုင်လိပ်စာတင်ထားတော့ ညနေပိုင်းလောက် လာခေါ်သွားတာ။ အခုထိ ဘာမှ သတင်းမရသေးဘူး " လို့ ပြောပါတယ်။ 

မန္တလေးမှာ Silent Strike တိတ်ဆိတ်ငြိမ်သက်ခြင်းသပိတ် လှုပ်ရှားမှုတွေကို လူမှုကွန်ရက် ပေါ်တင်လို့ အဖမ်းခံရသူ  ၂ ဦးထက်မနည်း ရှိနေပြီး စစ်ကောင်စီသတင်းပေးချန်နယ်တွေမှာ လိပ်စာနဲ့တကွ ဖမ်းဖို့ အတင်ခံရသူ ၂ ဦးလည်း ထွက်ပြေးနေရတယ်လို့ သိရပါတယ်။

လူမှုကွန်ရက်ပေါ် စစ်ကောင်စီဆန့်ကျင်ရေးပို့စ်တင်လို့ ဆိုပြီး ပြီးခဲ့တဲ့ ရက်ပိုင်းကလည်း မန္တလေးတိုင်း၊ နေပြည်တော်နယ်မြေမှာ   လူငယ်အမျိုးသမီး ၃ ယောက် ဖမ်းဆီးခံထားရတဲ့အပြင်  အကြမ်းဖက်တိုက်ဖျက်ရေး ဥပဒေပုဒ်မတွေနဲ့ပါ တရားစွဲဆိုခံထားရပါတယ်။

1 day Ago

January 27, 2023

မန္တလေးရှိ ပီနံအိတ်စက်ရုံ မီးလောင်

မန္တလေးမြို့၊ ပြည်ကြီးတံခွန်မြို့နယ်၊ (စျ) ရပ်ကွက်၊ ၆၉ လမ်းနဲ့ လမ်း ၇၀ ကြား၊ ၁၃၈ လမ်းနဲ့ ၁၃၉ လမ်းကြားရှိ ပီနံအိတ်စက်ရုံမှာ ဇန်နဝါရီ ၂၇ ရက် မနက် ၃ နာရီက မီးလောင်ခဲ့ပါတယ်။

စက်ရုံအတွင်း စွန့်ပစ်ပစ္စည်းဂိုထောင်မှာ ပီနံအိတ်အခွံအဟောင်းတွေ စုပုံထားရှိရာကနေ အောင်းအပူဖြစ်ပြီး မီးစတင်လောင်ကျွမ်းခဲ့တာလို့ မီးသတ်ဦးစီးဌာနကနေ သိရပါတယ်။

မီးလောင်မှုကြောင့် အလျား ၈၀၊ အနံ ၈၀ ပေ၊ Steel Structure အဆောက်အဦ ၁ လုံး (တန်ဖိုးငွေ ကျပ် ၉၆ သိန်း)၊ ပီနံအိတ်ခွံဟောင်းများ (တန်ဖိုးငွေ ကျပ် ၇၁ သိန်း)၊ စုစုပေါင်း ဆုံးရှုံးမှုတန်ဖိုး ငွေကျပ် ၁၆၇ သိန်း မီးလောင်ဆုံးရှုံးခဲ့တယ်လို့ မီးသတ်ဦးဌာနက ဆိုပါတယ်။

မီးလောင်မှုနဲ့ပတ်သက်ပြီး အသက် ၅၁ နှစ်အရွယ် အမျိုးသားတဦးကို စက်မှုနယ်မြေရဲစခန်းမှာ (ပ) ၂၆/၂၀၂၃၊ ရာဇသတ်ကြီး ဥပဒေပုဒ်မ - ၂၈၅ နဲ့ အရေးယူ ဆောင်ရွက်ထားတယ်လို့ သိရပါတယ်။

1 week Ago
More News
Up