မတ္တရာမြို့နယ်

January 24, 2022

မတ္တရာမြို့နယ်၌ လောင်းကစားဝိုင်းများ ဆက်မဖွင့်ကြရန် ပကဖ နောက်ဆုံးအကြိမ် သတိပေး

မန္တလေးတိုင်း၊ မတ္တရာမြို့နယ်အတွင်းမှာ လောင်းကစားဝိုင်းတွေ အင်မတန်များပြားလာတဲ့အတွက် လောင်းကစားဝိုင်းတွေ ဆက်မလုပ်ကြဖို့ ပကဖ (မတ္တရာ)က နောက်ဆုံးအကြိမ် သတိပေးလိုက်ပါတယ်။

စစ်ကောင်စီအာဏာသိမ်းပြီးနောက်ပိုင်း အုပ်ချုပ်ရေး ယန္တရားရဲ့ အကျင့်ပျက်ချစားမှုတွေကြောင့် နေရာအနှံ့ လောင်းကစားဝိုင်းတွေ များပြားလာပြီး ဂျင်ဝိုင်း၊ ကြက်ဝိုင်း၊ဖဲဝိုင်း၊ဂလုံး ဂလုံးဝိုင်း၊စတဲ့ အကြီးစားလောင်းကစားဝိုင်းတွေအပြင် စမာကလာ‌ ခေါ် ၂၄ ရုပ်ပါ မဲကစားဝိုင်းနဲ့ အခြားသော လောင်းကစားမှုတွေကို ဒိုင်ဖွင့်လှစ်ပြီး လောင်းကစားဝိုင်းတွေပြုလုပ်နေကြတာ စိစစ်တွေ့ရှိရတယ်လို့ ဆိုပါတယ်။

မတ္တရာ နယ်ခံ တစ်ဦးက "တော်တော်ဆိုးနေပါတယ်၊ စမာကလာ ခေါ်  ၂၄ ရုပ်ပါ မဲဝိုင်းလေးတွေက ရွာတိုင်းနီးပါးမှာ လာဖွင့်နေကြပြီး တစ်ချို့ရွာတွေဆို နေ့ရောညပါ ဖွင့်ပြီး ကစားနေကြပါတယ်။ ရဲကို လိုင်းကြေးအဖြစ် တစ်ဝိုင်းကို ၅၀၀၀ ပေးသွင်းရတယ် ကြားပါတယ်။ နောက် ဂျင်ဝိုင်း၊ ဖဲဝိုင်း၊ ကြက်ဝိုင်း အကြီးစားကြီးတွေက ငါးဝိုင်းလောက်ရှိပါတယ်။ မတ္တရာ ပုသိမ်ကြီး အစပ်က လှိုင်းပေါက်ရွာမှာဆိုရင် ဂျင်၊ ဖဲ၊ ဖိုး၊ ပြည့်တန်ဆာပါ အစုံရတယ်ကြားသိရပြီး ဓားကိုင်လူမိုက် အစောင့်အရှောက်ကိုက ၂၀ ကျော်လောက်ရှိတယ် ကြားသိထားရတယ်" လို့ ပြောပါတယ်။

လောင်းကစားဝိုင်းတွေ များပြားလာတာကြောင့် နောက်ဆက်တွဲ ခိုးမှု၊ လုယက်မှု၊ ခိုက်ရန်ဖြစ်ပွားမှု၊ အများပြည်သူတွေရဲ့ လုံခြုံရေးကို ထိပါးမှုတွေလည်း များပြား‌လာနေပြီး ပကဖ (မတ္တရာ)ဆီ ပြည်သူ့တိုင်ကြားစာ အမြောက်အများ ရောက်ရှိနေတယ်လို့ ဆိုပါတယ်။

အဲ့ဒီအတွက် လောင်းကစားဝိုင်းတွေနဲ့ လောင်းကစားနည်းတွေကို ဖွင့်လှစ်မကစားကြဖို့ နောက်ဆုံးအကြိမ် ပြင်းထန်စွာ သတိပေးတာဖြစ်ပြီး ပြည်သူတွေအနေနဲ့လည်း လောင်းကစားဝိုင်းတွေနဲ့ နီးကပ်စွာမနေကြဖို့ ပကဖ (မတ္တရာ) က ထုတ်ပြန်အသိပေးထားပါတယ်။

4 days Ago

January 14, 2022

မတ္တရာမြို့နယ် ကောက်ရိုးပုံကျေးရွာက ‌နေအိမ်နှစ်လုံး ထပ်မံမီးရှို့ခံရ

မန္တလေးတိုင်း၊ မတ္တရာမြို့နယ်၊ ကောက်ရိုးပုံကျေးရွာက နေအိမ်တချို့ကို စစ်ကောင်စီတပ်တွေက မီးထပ်ရှို့ခဲ့တယ်လို့ မတ္တရာမြို့ခံတွေဆီက သိရပါတယ်။

ဇန်နဝါရီလ ၁၃ ရက်နေ့ ည ၁၀ နာရီခွဲလောက် နေအိမ်တစ်လုံးကို မီးရှို့ခဲ့ပြီး ည‌ ၁၂ နာရီကျော်မှာ နောက်ထပ်နေအိမ်တစ်လုံးကို မီးထပ်ရှို့ခဲ့တယ်လို့ မြို့ခံတွေက ပြောပါတယ်။

မီးရှို့ခံရတဲ့နေအိမ်တွေဟာ NLD ပါတီထောက်ခံသူတွေရဲ့ နေအိမ်တွေ ဖြစ်တယ်လို့လည်း သိရပြီး ကောက်ရိုးပုံ ကျေးရွာနေပြည်သူတွေကတော့ ထွက်ပြေးတိမ်းရှောင်နေကြရဆဲဖြစ်တယ်လို့ သိရပါတယ်။

ပြီးခဲ့တဲ့ ဒီဇင်ဘာလ ၁၈ ရက်နေ့က ကျေးရွာက စစ်ကောင်စီအားပေး ဒလန်တစ်ဦးရဲ့ နေအိမ် မီးရှို့ခံခဲ့ရပြီးတဲ့နောက် ဇန်နဝါရီ ၁၃ ရက်နေ့မှာ ကျေးရွာနေအိမ် လေးလုံးကို စစ်ကောင်စီဘက်က မီးရှို့ခဲ့တာလို့ ဒေသခံတွေက ပြောပါတယ်။

ဇန်နဝါရီ ၁၃ ရက်နေ့ နေ့လယ်ပိုင်း ကောက်ရိုးပုံကျေးရွာနေ ဒလန်ဆိုပြီး ကျော်ဇောသူ ၃ ဦး သတ်ဖြတ်ခံခဲ့ရတဲ့အတွက် ကျေးရွာနေအိမ်နှစ်လုံးကို စစ်ကောင်စီတပ်တွေက မီးထပ်ရှို့ခဲ့တာလည်း ဖြစ်ပါတယ်။

photo- ယခင်ရက်က မီးရှို့ခံခဲ့ရသောပုံများ

2 weeks Ago
More News
Up