မတ္တရာ

May 7, 2022

မတ္တရာမြို့နယ်၌ မီး‌ရှို့အသတ်ခံရသည့် ၆ လောင်းတွေ့ရှိ ၊အမျိုးသမီး ၂ ဦးကို စစ်တပ်က ဖမ်းဆီး ဝါးချွန်ဖြင့်ထိုးကာ နှိပ်စက်

မန္တလေးတိုင်း၊ မတ္တရာမြို့နယ်အရှေ့ပိုင်းက ဒေသကာကွယ်ရေးစခန်းတခုကို  မေ ၄ ရက်မှာ စစ်ကောင်စီတပ်က တိုက်ခိုက်စီးနင်းခဲ့ပြီးနောက် ဖမ်းဆီးခံရသူ ၆ ယောက်ကို သတ်ဖြတ် မီးရှို့ထားခဲ့တဲ့ မီးကြွင်း အရိုးစုတွေကို  မေ ၆ ရက်မှာ  ဒေသခံတွေက တွေ့ရှိခဲ့ပါတယ်။

စစ်ကောင်စီတပ်ဖွဲ့ဝင် အင်အား၂၀၀ လောက်ဟာ  မေ ၄ ရက် မနက် ၇ နာရီလောက်က  ကားလေး ၆ စီး၊ ကားကြီး ၆ စီးနဲ့ လာရောက်ခဲ့ပြီး မြောင်းသစ်ကျေးရွာတောင်ဘက် အင်းရွာအကြားက ဒေသကာကွယ်ရေးစခန်းကို စီးနင်းခဲ့တာကြောင့် နှစ်ဖက် တိုက်ပွဲ ဖြစ်ပွားခဲ့သလို စခန်းမှာ တွေ့ရှိသူ ၆ ယောက်ကို ဖမ်းဆီးသွားခဲ့တာလို့ ဒေသခံတွေက ပြောပါတယ်။ 

ဒါ့အပြင် လက်လုပ်သေနတ်‌ ၃ လက် ၊G 22 မောင်းပြန် သေနတ် ၂ လက် ၊ကျည်ဘောက် ၆ ခု၊ လက်လုပ်မိုင်းတွေ၊ ဆိုင်ကယ် ၁၀ စီးလောက်နဲ့  မီးစက်တွေကို သိမ်းဆည်းသွားတယ်လို့ သိရပါတယ်။

ဖမ်းမိသူတွေကို စစ်မေးခဲ့ပြီး‌တဲ့နောက် တခြားစခန်းတစ်ခုကိုလည်း သွားရောက်စီးနင်းခဲ့ကာ  စခန်းကနေ ဆိုင်ကယ်  ၅ စီးနဲ့ ပစ္စည်းတွေကို သိမ်းဆည်းသွားတယ်လို့လည်း သိရပါတယ်။

အဲဒီနောက် မေ ၅ ရက်မှာ  ဖမ်းဆီးထားသူ ၆ ဦးကို သတ်ဖြတ်မီးရှို့ခဲ့တာဖြစ်ပြီး အသတ် ခံခဲ့ရသူတွေဟာ အသက် ၂၅ နှစ်ကနေ အသက် ၃၀ ကျော် အရွယ်ရှိ အမျိုးသား ၄ ယောက်နဲ့ အသက် ၄၀ ကျော် အရွယ်အမျိုးသမီးတယောက်နဲ့  အသက် ၂၀ ဝန်းကျင်ခန့် အမျိုးသမီး တယောက်တို့ ဖြစ်ပါတယ်။  အဆိုပါ အမျိုးသမီးနှစ်ယောက်ဟာ   သားအမိတော်စပ်တယ်လို့ ဒေသခံတွေက ပြောပါတယ်။

စစ်ကောင်စီတပ်တွေဟာ မေလ ၅ ရက်  ည ၇ နာရီလောက်မှာ သဖန်းကိုင်းကျေးရွာအတွင်း ဝင်ရောက်ခဲ့ပြီး  အမျိုးသမီး ၂ ယောက်ကို ဖမ်းဆီးကာ ဝါးချွန်တွေနဲ့ထိုးတာ၊ ဦးခေါင်းနဲ့ ကိုယ်လုံးတွေကို ပြင်းပြန်ထန်ထန် ရိုက်နှက် စစ်ဆေးတာတွေပြုလုပ်ခဲ့တယ်လို့ သိရပါတယ်။ 

ဒါ့အပြင် ကျေးရွာအတွင်းရှိ နေအိမ် ၄ လုံးကို  စစ်ဆေးရှာဖွေခဲ့ပြီး  နေအိမ် ၁ လုံးကို လည်း မီးရှို့ခဲ့ပါတယ်။

မတ္တရာနယ်ခံတစ်ဦးက "ဒီက တောသူတောင်သားတွေက အိမ်တစ်လုံးဖြစ်အတွက် နှစ်ပေါင်း နှစ်ဆယ်လောက်စုဆောင်းပြီးတော့ ချွေးနည်းစာလေးတွေနဲ့ အိမ်ဆောက်ရတာ ဆိုတော့လေ၊ အပြစ်ရှိရင် အပြစ်ရှိတဲ့သူပဲ ဖမ်းသင့်တာပေါ့။ အပြစ်မရှိတဲ့လူတွေလည်း ဖမ်းတာကတော့ မကောင်းဘူးလို့ ယူဆပါတယ်"လို့ ပြောပါတယ်။

မတ္တရာအရှေ့ပိုင်းနယ်မှာ မွှေနှောက်နေတဲ့ စစ်ကောင်စီတပ်တွေဟာ မေ ၆ ရက်မှာ  ပြန်သွားခဲ့ပြီးနောက် စစ်ယာဉ်တန်းကို ဒဟတ္တောကျေးရွာအနီး မိုင်းဆွဲတိုက်ခိုက်ခံခဲ့ရတာကြောင့် ပြန်လည် ပစ်ခတ်ခဲ့တဲ့အတွက် သပြေခြံအတွင်းမှာရှိတဲ့ အမျိုးသမီးကြီးတယောက်  ကျည်သင့် သေဆုံးခဲ့တယ်လို့  မတ္တရာ နယ်ခံတွေကပြောပါတယ်။

မေလ ၄ ရက်က  စစ်ကောင်စီတပ်တွေရဲ့ ဝင်ရောက်စီးနင်းမှုမှာ ဒေသခံကာကွယ်ရေးတပ်ဖွဲ့တွေနဲ့ တိုက်ပွဲဖြစ်ပြီး စစ်ကောင်စီဘက်က ၁၁ ဦး ကျဆုံးကာ ၅ ဦးဒဏ်ရာရ ခဲ့တယ်လို့လည်း သိရပါတယ်။

2 weeks Ago

April 19, 2022

မတ္တရာတွင် စစ်ကောင်စီယာဉ်တန်း မိုင်းဆွဲခံရသဖြင့် ၂၀ ခန့်သေဆုံး၊ သဖန်းကိုင်းရွာနေအိမ် ၇ လုံး မီးရှို့ဖျက်ဆီး

မန္တလေးတိုင်း မတ္တရာမြို့နယ် သဖန်းကိုင်းရွာ နဲ့ မြောင်သစ်ကျေးရွာအနီးမှာ ဧပြီလ ၁၉ ရက် မနက် ၄ နာရီကျော်လောက်က စစ်ကောင်စီတပ်ယာဉ်တန်း မိုင်းဆွဲတိုက်ခိုက်ခံခဲ့ရပါတယ်။

စစ်ကောင်စီတပ်ယာဉ်တန်းကို မတ္တရာ PDF ၊ နဂါးညီနောင်၊ MDY၊ ဇာမဏီ စတဲ့ အဖွဲ့ ၄ ဖွဲ့ ပူးပေါင်းတိုက်ခိုက်ခဲ့တာဖြစ်ပြီး စစ်ကောင်စီတပ်သား ၂၀ ဦး သေဆုံးတယ်လို့ ထုတ်ပြန်ထားပါတယ်။

မတ္တရာမြို့နယ်မှာ နေထိုင်သူတဦးက “မနေ့က ခြေတော်ရာဘက်ကနေ သဖန်းကိုင်းကို ရောက်လာတယ်။ သဖန်းကိုင်းမှာ နေအိမ် မီးရှို့တာတွေ လုပ်တယ်။ မနက်ကျတော့ သဖန်းကိုင်းကနေ မြောင်သစ်ဘက်ကို အလာမှာ မိုင်းဆွဲတိုက်ခိုက်ခံရတာ” လို့ ပြောပါတယ်။

သဖန်းကိုင်းရွာမှာ အင်အား ၅၀ လောက်ပါတဲ့ စစ်ကောင်စီတပ်က မီးရှို့တာကြောင့် နေအိမ် ၇ လုံး မီးလောင်ဆုံးရှုံးခဲ့ရပါတယ်။

မိုင်းဆွဲတိုက်ခိုက်ခံရတဲ့ စစ်ကောင်စီတပ်အဖွဲ့ဟာ ကျပ်ပြင်ရွာမှာ နေအိမ်တွေကိုလည်း တအိမ်တက်ဆင်း စစ်ဆေးတာတွေလုပ်နေပြီး ရွာသားတွေကို PDF တွေ နေတဲ့နေရာ မေးမြန်းနေတယ်လို့ ဆိုပါတယ်။

သဖန်းကိုင်းရွာ နဲ့ မြောင်သစ်ကျေးရွာအနီး မိုင်းဆွဲတိုက်ခိုက်ခံရတာနဲ့ပတ်သက်ပြီး စစ်ကောင်စီဘက်က သတင်းထုတ်ပြန်တာ မရှိသေးပါဘူး။

1 month Ago
More News
Up