မတူပီ

October 17, 2021

မတူပီတွင် လက်နက်ကြီးထိမှန် မိုင်းနင်းမိသဖြင့် ၂ ဦးသေဆုံး၊ မြိုင်ပြည်သူ ၂ ဦးဖမ်းဆီးခံရ

ချင်းပြည်နယ် မတူပီမြို့နယ်မှာ အောက်တိုဘာ ၁၆ ရက်နေ့ မွန်လွဲပိုင်းက အကြမ်းဖက်စစ်အုပ်စု ဘက်က ပစ်တဲ့ လက်နက်ကြီးကျည်ထိမှန်ကာ မိုင်းနင်းမိတာကြောင့် ၆ နှစ်အရွယ်ကလေး တစ်ယောက်အပါအဝင် ၂ ယောက် သေဆုံးခဲ့တယ်လို့ CDF (မတူပီ) ကနေ သိရပါတယ်။

အကြမ်းဖက်စစ်ကောင်စီတပ်တွေက မနေ့က မွန်းလွဲ ၂ နာရီလောက်မှာ လက်နက်ကြီးနဲ့ ရမ်းသမ်း ပစ်ခတ်တာကြောင့် ၆ နှစ်သားကလေးတစ်ယောက်နဲ့ စစ်အုပ်စုက ထောင်ထားတဲ့ မိုင်းကို နင်းမိကာ လူကြီးတစ်ယောက် သေဆုံးခဲ့ပြီး မတူပီ-မင်းတပ် ကားလမ်းမှာလည်း လက်နက်ကြီးထိမှန်ပြီး ပြည်သူတစ်ယောက် ဒဏ်ရာရရှိသွားတယ်လို့ CDF (မတူပီ) ရဲ့ တာဝန်ရှိသူတစ်ယောက်က DVB ကို ပြောပါတယ်။

ပြည်သူတွေ အသက်ဆုံးရှုံးနစ်နာမှုတွေအတွက် CDF (မတူပီ) အနေနဲ့ အထူးဝမ်းနည်းကြေကွဲရပြီး အကြမ်းဖက်စစ်ကောင်စီတပ်တွေကို လက်တုံ့ပြန်သွားမယ်လို့ ဆိုပါတယ်။

မတူပီမြို့နယ်ထဲမှာ အောက်တိုဘာ ၁၅ ရက်နေ့ကလည်း CDF(မတူပီ)နဲ့ အကြမ်းဖက် စစ်ကောင်စီတပ်တွေ တိုက်ပွဲဖြစ်ပွားခဲ့ပြီးတော့ စစ်ကောင်စီဘက်က ၂ ယောက် သေဆုံးပြီးတော့ CDF တပ်ဖွဲ့ဘက်က ထိခိုက်ကျဆုံးတာမရှိဘူးလို့ ထုတ်ပြန်ထားပါတယ်။

မကွေးတိုင်းဒေသကြီး မြိုင်မြို့နယ်မှာလည်း အောက်တိုဘာ ၁၆ ရက်နေ့ ညနေပိုင်းက ဒေသခံပြည်သူ ၂ ယောက်ကို အကြမ်းဖက်စစ်တပ်က ဖမ်းဆီးပြီး ကျေးရွာ ၃ ရွာက နေအိမ်တွေကို အကြမ်းဖက်မွှေနှောက်ဖျက်ဆီးသွားတယ်လို့ ဒေသခံရွာသားတွေဆီကနေ သိရပါတယ်။

စစ်ကောင်စီသတင်းပေး ဒလန်တွေက PDF တွေရှိတယ်ဆိုပြီးတော့ မဟုတ်မမှန် သတင်းပေးတာကြောင့် စစ်ကား ၂ စီး အင်အား ၅၀ လောက်နဲ့ရောက်လာပြီးတော့ ဝါးရင်းချိုင်ရွာက ဒေါ်ပဲခူးရီနဲ့ ဝက်ပုတ်(ရွာမ)က ကိုဇော်မင်းထိုက်တို့ကို ဖမ်းဆီးသွားတယ်လို့ ဒေသခံရွာသားတစ်ယောက်က ပြောပါတယ်။ 

အကြမ်းဖက်စစ်ကောင်စီတပ်တွေဟာ ဝါးရင်းချိုင်ရွာ၊ ဝက်ပုတ်ရွာနဲ့ အိုင်မရွာတွေမှာ တစ်အိမ်ဝင်တစ်အိမ်ထွက် မွှေနှောက်ဖျက်ဆီးပြီး ငွေတစ်သိန်းကျပ်နဲ့ ပစ္စည်းတစ်ချို့ကိုလည်း ယူဆောင်သွားတယ်လို့ ဆိုပါတယ်။

အကြမ်းဖက်စစ်အုပ်စုတွေဝင်ရောက် မွှေနှောက်တာကြောင့် ကျေးရွာ ၃ ရွာက ဒေသခံပြည်သူတွေဟာ ဘေးလွတ်ရာကို ထွက်ပြေးတိမ်းရှောင်နေကြရတယ်လို့ ပြောပါတယ်။

မြိုင်မြို့နယ် ကံနက်ကျေးရွာမှာလည်း အောက်တိုဘာလ ၁၅ ရက်နေ့ မနက်ပိုင်းက ဒေသခံ လူငယ် ၂ ယောက်ကို အကြမ်းဖက်စစ်တပ်က ဖမ်းဆီးသွားပြီးတော့ နေအိမ်တွေကို ဖျက်ဆီးသွားတယ်လို့ သိရပါတယ်။

1 month Ago

September 26, 2021

ချင်းပြည်နယ်ကို ၂ ပတ်အတွင်း စစ်ရေးအရ အပြတ်ချေမှုန်းမည်ဟု စစ်ကောင်စီ ခြိမ်းခြောက်

ချင်းပြည်နယ်ကို အချိန် သီတင်း  ၂ ပတ်အတွင်း စစ်ရေးအရ အပြတ်ချေမှုန်းမယ်လို့ စစ်ကောင်စီက သတင်းလွှင့်ခဲ့တဲ့အပေါ် ချင်းပြည်နယ်ဒေသခံ CDF တွေရှိတဲ့နေရာကိုရောက်ရင် အဖြေကို သိရလိမ့်မယ်လို့ မင်းတပ် CDF တာဝန်ရှိသူက တုံ့ပြန်ပြောကြားလိုက်ပါတယ်။ 

ချင်းပြည်နယ် ထန်တလန်၊ ဟားခါး၊ မတူပီမြို့တွေကို ပြီးခဲ့တဲ့ရက်ပိုင်းအတွင်း  စစ်ကောင်စီက အကြမ်းဖက်တိုက်ခိုက်နေတာကြောင့် မြို့ခံတွေဟာ ဘေးလွတ်ရာကို ရှောင်နေကြရပါတယ်။ စက်တင်ဘာ ၂၅ ရက်မှာတော့ စစ်ကောင်စီက ချင်းပြည်နယ်ကို အချိန် ၂ ပတ်အတွင်း စစ်ရေးအရ အပြတ်ချေမှုန်းမယ်ဆိုတဲ့သတင်းစကား ထွက်ပေါ်ခဲ့ပါတယ်။

ချင်းပြည်နယ်ကို စစ်ရေးအရ ၂ ပတ်အတွင်း ချေမှုန်းမယ်ဆိုတဲ့  သတင်းစကားဟာ စစ်ကောင်စီက ချင်းလူမျိုးတွေအားလုံးကို သတ်ဖြတ်မယ်လို့ ခြိမ်းခြောက်တာဖြစ်တယ်လို့ ချင်းပြည်နယ်ဒေသခံ နိုင်ငံရေးသမားတစ်ယောက်က ပြောပါတယ်။

စက်တင်ဘာ ၂၅ ရက်နဲ့  ၂၆ ရက်နေ့တွေမှာ ချင်းပြည်နယ်အတွင်း တိုက်ပွဲတွေ အနည်းငယ် ပြန်ငြိမ်သက်သွားပေမယ့် ကောင်းသောငြိမ်သက်ခြင်းတော့ မဟုတ်ဘူးလို့ မင်းတပ် CDF တာဝန်ရှိသူက ပြောပါတယ်။

“စစ်ကောင်စီတပ်တွေနဲ့ CDF တွေ အပြန်အလှန် စောင့်ကြည့်နေကြပြီး အချိန်မရွေး တိုက်ပွဲဖြစ်နိုင်တဲ့ အခြေအနေ ဖြစ်ပါတယ်။ စစ်ကောင်စီဘက်က လှုပ်ရှားမှုတွေကို စောင့်ကြည့်နေပြီး CDF က အဆင်သင့်ပြင်ထားတယ်” လို့ မင်းတပ် CDF တာဝန်ရှိသူတစ်ဦးက ပြောပါတယ်။

စက်တင်ဘာ ၁၈ ရက်နေ့ စစ်ကောင်စီရဲ့ အကြမ်းဖက်ပစ်ခတ်မှုတွေကြောင့် စက်တင်ဘာ ၂၀ ရက်နေ့မှာ ထန်တလန်မြို့ခံတွေဟာ မြို့လုံးကျွတ် ထွက်ပြေးတိမ်းရှောင်ခဲ့ရပါတယ်။

ဟားခါးမြို့ကိုလည်း စက်တင်ဘာ ၁၉ ရက်နေ့ ညမှာ စစ်ကောင်စီက လက်နက်ကြီးတွေနဲ့ ပစ်ခတ်အကြမ်းဖက်ခဲ့တာကြောင့် မြို့ခံတချို့ဟာ နေအိမ်စွန့်ခွာ ထွက်ပြေးနေရပါတယ်။ 

စက်တင်ဘာ ၂၄ ရက်နေ့မှာတော့ မတူပီမြို့ကို စစ်ကောင်စီက ဝင်ရောက်အကြမ်းဖက်ခဲ့ပြီး ပြည်သူတချို့ကို ဖမ်းဆီးခဲ့ပါတယ်။

စစ်ကောင်စီက ချင်းပြည်နယ် ဟားခါးမြို့ကလွဲပြီး ကျန်တဲ့ ၈ မြို့နယ်စလုံးကို အင်တာနက်တွေ ဖြတ်တောက်ထားပါတယ်။

အင်တာနက်နဲ့ ဖုန်းလိုင်းပြတ်တောက်မှုတွေကြောင့် ချင်းပြည်နယ်ထဲမှာ ဘဏ်စနစ်နဲ့ ငွေလွှဲလုပ်ငန်းတွေအားလုံး ရပ်ဆိုင်းကုန်ပြီး ပြည်သူတွေ ငွေသားရဖို့အတွက်လည်း ခက်ခဲနေပါတယ်။

ထန်တလန်မြို့နဲ့ ဟားခါးမြို့မှာ စစ်ဘေးရှောင်ပြည်သူ ၂၀၀၀၀ ကျော်ရှိနေပြီး ဒုက္ခသည်စခန်းတွေ ဖွင့်ဖို့စီစဉ်နေတယ်လို့ ချင်းနှစ်ချင်းခရစ်ယာန်အဖွဲ့ချုပ် ဥက္ကဋ္ဌက အတည်ပြုထားပါတယ်။

မင်းတပ်မြို့ကိုတော့ စစ်ကောင်စီက ဇွန်လဆန်းမှာ အကြမ်းဖက်တိုက်ခိုက်ခဲ့တာကြောင့် သောင်းနဲ့ချီတဲ့ ပြည်သူတွေဟာ စစ်ဘေးရှောင်ခဲ့ရပါတယ်။ 

မင်းတပ်ပြည်သူတွေကို UNHCR က အကူအညီပေးဖို့ ကြိုးစားခဲ့ပေမယ့် စစ်ကောင်စီက ကန့်သတ်ခဲ့တာကြောင့် ပြည်သူတွေဟာ အကူအညီတွေကို မရခဲ့ပါဘူး။ ချင်းပြည်နယ်မှာ စစ်ရေးကို အခြေခံပြီးဖြစ်နေတဲ့ အခက်အခဲတွေကိုဖြေရှင်းဖို့ ကြိုးစားပြီးနည်းလမ်းရှာနေတယ်လို့ CDF တွေက ပြောပါတယ်။

2 months Ago
More News
Up