မင်းအောင်လှိုင်

February 3, 2023

ပြည်သူ့ခုံရုံးတက်ရမယ့်စာရင်းနဲ့ နိုင်ငံ့သစ္စာဖေါက် ဘွဲ့ပေး ဘွဲ့ယူတွေ

နိုင်ငံဖျက် စစ်ဓားပြမင်းအောင်လှိုင်နဲ့ လက်ပါးစေ နောက်လိုက်မိစ္ဆာတအုပ်ဟာ သူတို့ မတရားရယူထားတဲ့ စည်းစိမ်ဥစ္စာရာထူးတွေကို ကာကွယ်ဖို့ တိုင်းပြည်ကို လောင်မီးတိုက်ပြီး ပြည်သူလူထုကို အရက်စက်အကြမ်းကြုတ်ဆုံးနည်းလမ်းတွေသုံးပြီး အသက်ငင်နေတဲ့ကျားပမာ ဆိုးသွမ်းယုတ်မာနေကြတာဟာ ၂ နှစ်တာပြည့်ပြီဖြစ်ပါတယ်။ 

စစ်ဘီလူးသဘက်အုပ်စုဟာ နိုင်ငံရေး၊ စစ်ရေး၊ စီးပွားရေး၊ လူမှုရေး၊ သံတမန်ရေးစတဲ့ စစ်မျက်နှာအသီးသီးမှာ အဘက်ဘက်ကျရှုံးလို့ သူတို့ကိုကပ်မြှောင်ထောက်ခံနေကြတဲ့ အမည်ပျက်အမျိုးမျိုးနဲ့ ပြည်သူ့အမုန်းခံ အပယ်ခံပုဂ္ဂိုလ်၊ ရဟန်း၊ ပါတီအနည်းစုနဲ့ မချိမဆန့်ကျားကန်ထားရင်း တစတစ ရုပ်ပိုင်း စိတ်ပိုင်းဆုတ်ယုတ်ယိမ်းယိုင်လာနေပါတယ်။

အဲ့ဒီလိုကျဆင်းလာတဲ့စိတ်ဓါတ်တွေကျားကန်ဖို့နဲ့ သူတို့လုပ်ရပ်မှားတွေကို ပိုမိုထောက်ခံလာ‌စေဖို့ ပြီးခဲ့တဲ့ (၇၅) နှစ်မြောက် စိန်ရတုလွတ်လပ်ရေးနေ့ ၂၀၂၃ ခုနှစ် ဇန်နဝါရီ ၁ ရက် ကနေ စပေးခဲ့ရာမှာ  ၂ ရက်နေ့မှာတင် သူ့ကိုယ်သူ လူသတ်သမား ကြည်လင်းဆရာတော်လို့ ပြောတဲ့ ဝီရသူနဲ့တကွ စစ်အုပ်စုနဲ့ပနံသင့်တဲ့သူတွေ၊ အမျိုးသားရေးတက်ကြွလှုပ်ရှားသူတွေ၊ ဒေါက်တာ‌အေးမောင်တို့လို စစ်တပ်လိုလားသူတွေကို ဂုဏ်ထူးဆောင်ဘွဲ့အနေနဲ့ သီရိပျံချီဘွဲ့ ၁၆၈ ဘွဲ့၊ ဝဏ္ဏကျော်ထင်ဘွဲ့  ၁၅၃ ဘွဲ့၊ အလင်္ကာကျော်စွာဘွဲ့ ၁၈ ဘွဲ့နဲ့ သိပ္ပံကျော်စွာဘွဲ့ ၅ ဘွဲ့ ကိုပေးအပ်ခဲ့ပါတယ်။

ပြည်တွင်းစစ်မီးတောက်ကြီးအောက် နိုင်ငံသူနိုင်ငံသားတွေ ငရဲကျသလို ဆင်းရဲကျပ်တည်းလို့ တိုင်းပြည်စီးပွားရေး ပြိုလဲနေချိန်မှာ အမေရိကန်ဒေါ်လာ ၃၃ သန်းပမာဏတန်ဖိုးနဲ့ ညီမျှတဲ့ ပြည်သူ့ဘဏ္ဍာငွေ ကျပ်  ၇ ဘီလီယံကျော်ကို အလွဲသုံးစားပြုပြီး ပြည်သူတွေအပေါ် သစ္စာဖေါက်ခဲ့သူတွေ၊ သီလယုတ်ညံ့သူတွေ၊ နာမည်ဆိုး နာမည်ပျက်သူတွေကိုသာမက မတရားမှုကို လက်မခံကြတဲ့ လူရိုသေရှင်ရိုသေ ရဟန်းရှင်လူပုဂ္ဂိုလ်တွေ၊ စစ်တပ်ရဲ့လုပ်ရပ်ကို မထောက်ခံကြတဲ့သူတွေအထဲက ပြည်သူကလေးစားတဲ့စာရေးဆရာတွေ၊ အနုပညာသည်တချို့ကိုပါ ဂုဏ်ထူးဆောင်ဘွဲ့တွေ မလိုချင်မှန်း မယူချင်မှန်းသိလျှက်နဲ့ အိမ်တိုင်ရာရောက် ဇွတ်လိုက် ပေးအပ်တယ်ဆိုတာ မြန်မာ့သမိုင်းမှာ အကြီးကျယ်ဆုံး၊ နိုင်ငံတော်သစ္စာ ဖေါက်ဖျက်ပုန်ကန်မှုကြီးအတွက် ရသမျှအမှုတွဲလိုက်တွဲတာဖြစ်သလို သူတို့ ဘယ်လောက် တပ်ပျက်နေပြီဆိုတာလည်း ညွှန်ပြနေတာဖြစ်ပါတယ်။

နိုင်ငံတိုင်းမှာ ခေတ်အဆက်ဆက် တရားသဖြင့်အုပ်ချုပ်တဲ့ အစိုးရဖြစ်ဖြစ်၊ တရားမဲ့အုပ်စိုးတဲ့အာဏာရှင်ဓားပြဖြစ်ဖြစ်၊ တိုင်းပြည်အတွက် ထူးထူးချွန်ချွန်အမှုထမ်းသူတွေ၊ သစ္စာခံနောက်လိုက်‌နောက်ပါတွေကို ဂုဏ်ထူး၊ ဘွဲ့ထူးတွေပေးအပ်လေ့ရှိကြပါတယ်။

ပြည်ထောင်စုမြန်မာနိုင်ငံတော်မှာလည်း ၁၉၄၈ ခုနှစ် ဇန်နဝါရီလ ၄ ရက်နေ့မှာ အချုပ်အခြာအာဏာပိုင် လွတ်လပ်တဲ့နိုင်ငံအဖြစ်ရောက်ရှိအချိန်ကစပြီး နိုင်ငံတော်သမ္မတကနေ ဂုဏ်ထူးဘွဲ့ထူး‌တွေကို နှစ်စဉ် လွတ်လပ်ရေးနေ့အထိမ်းအမှတ်အဖြစ် ချီးမြှင့်ခဲ့ပါတယ်။

ဂုဏ်ထူးဘွဲ့ထူး‌တွေကို သင်္ဂဟ၊ ဘွဲ့၊ တံဆိပ်ဆိုပြီး  ၃ မျိုးခွဲခြားထားရာမှာ သင်္ဂဟပြီးရင် ဘွဲ့၊ ဘွဲ့ရဲ့အောက် တံဆိပ်လို့သတ်မှတ်ထားပါတယ်။ ဘွဲ့အမျိုးအစားထဲမှာ သီရိပျံချီ၊ ဝဏ္ဏကျော်ထင်၊ အလင်္ကာကျော်စွာ၊ သိပ္ပံကျော်စွာ၊ ဇေယျကျော်ထင်ဆိုပြီး ၅ မျိုးရှိပါတယ်။

ဂုဏ်ထူးဘွဲ့ထူး‌တွေထဲမှာ သင်္ဂဟက အမြင့်ဆုံး ဖြစ်ပြီး သုဓမ္မနဲ့ စည်သူတို့က သင်္ဂဟအောက်မှာရှိပါတယ်။ အဲ့ဒီသင်္ဂဟကြီးတခုလုံးရဲ့အကြီးအကဲကတော့ နိုင်ငံတော် သမ္မတဖြစ်ပါတယ်။ ဒါကြောင့် သမ္မတတိုင်းမှာ ဒီသင်္ဂဟနှစ်ခုလုံးရဲ့ အမြင့်ဆုံးဘွဲ့တွေကို အလိုအလျောက် ပိုင်ဆိုင်ပါတယ်။

သီရိပျံချီဘွဲ့ကိုနိုင်ငံအတွက်ကောင်းရာကောင်းကျိုးကို ဖြစ်ထွန်းအောင် ထူးကဲကောင်းမွန်စွာ ဆောင်ရွက်ခဲ့ကြသူတွေကိုချီးမြှင့်တာဖြစ်ပြီး ဝဏ္ဏကျော်ထင်ဘွဲ့ကိုတော့ အများပြည်သူတို့အတွက် ကောင်းရာကောင်းကြောင်းကို ဖြစ်ထွန်းအောင် ထူးကဲကောင်းမွန်စွာ ဆောင်ရွက်ခဲ့ကြသူတွေကို ချီးမြှင့်တာဖြစ်ပါတယ်။

အလင်္ကာကျော်စွာဘွဲ့ကို‌တော့ စာပေ ပရိယတ္တိ၊ သုခုမပညာ၊ ကခုန်ခြင်း၊ သီဆိုခြင်း၊ ရေးဖွဲ့ခြင်း၊ ဂီတပညာအရပ်ရပ်တွေမှာ ထူးခြားကောင်းမွန်စွာ တတ်မြောက်သူတွေကို ချီးမြှင့်တာဖြစ်ပါတယ်။ သိပ္ပံကျော်စွာဘွဲ့ကို သိပ္ပံပညာ၊ ကုန်ကူးသန်းရောင်းဝယ်ရေးနဲ့ စက်မှုလက်မှုပညာရပ်တွေမှာ ထူးကဲကောင်းမွန်စွာဆောင်ရွက်သူ‌တွေကို ချီးမြှင့်ပြီး ဇေယျကျော်ထင်ဘွဲ့ကိုတော့ စစ်ဘက်ဆိုင်ရာ အမှုထမ်းကောင်းခြင်းအတွက် ချီးမြှင့်တာဖြစ်ပါတယ်။

ပြည်သူ့က ရွေးကောက်တင်မြှောက်တဲ့ အရပ်သားအစိုးရလက်ထက်မှာ သီရိပျံချီဘွဲ့ချီးမြှင့်ခံရသူတွေထဲမှာ  မြန်မာနိုင်ငံသူနိုင်ငံသားတွေ လေးစားကြည်ညိုကြရတဲ့ ကမ္ဘာ့ကုလသမဂ္ဂ အတွင်းရေးမှူးချုပ် ဦးသန့် (၁၉၅၃)၊ ဆရာဇေယျ (၁၉၅၅) တို့ဟာ ထင်ရှားပြီး၊ ဝဏ္ဏကျော်ထင်ဘွဲ့ချီးမြှင့်ရသူ‌တွေထဲမှာတော့ နိုင်ငံကျော်စာဆိုတော်တွေဖြစ်ကြတဲ့ ဆရာ‌ဇော်ဂျီ (၁၉၆၁)နဲ့ ဆရာကြီးမင်းသုဝဏ် (၁၉၆၂) တို့ဟာ အထူးထင်ရှားလှပါတယ်။ 

ဒီဆောင်းပါးမှာအဓိက မီးမောင်းထိုးပြချင်တာက လွတ်လပ်ရေးရခါစက ပါလီမန်ဒီမိုကရေစီလက်ထက်မှာ ချီးမြှင့်တဲ့လူပုဂ္ဂိုလ်ရှင်ရဟန်းတွေဟာ နိုင်ငံနဲ့ပြည်သူတို့အတွက် ကောင်းရာကောင်းကြောင်းကို အမှန်တကယ်ဖြစ်ထွန်းအောင် ထူးကဲကောင်းမွန်စွာ ဆောင်ရွက်ခဲ့ကြသူတွေ၊ သမိုင်းကြောင်းကောင်းရှိသူတွေဖြစ်သလို ပြည်သူလူထုက ကြည်ညိုလေးစားခံရသူတွေ ဖြစ်ကြပါတယ်။

အခု အာဏာလုမိစ္ဆာဓားပြမင်းအောင်လှိုင် ‌‌‌‌‌‌‌‌‌‌‌‌‌‌‌‌‌‌‌‌‌‌ဇွတ်ပေးအပ်တဲ့ ဘွဲ့ဆိုးဂုဏ်ထူးဆိုးတွေကို ပြည်သူလူထုရဲ့ မုန်းတီးရွှံရှာမှုခံနေကြရတဲ့ သမိုင်းကြောင်းမကောင်းတဲ့ လူဆိုးလူယုတ်တွေ၊ မကောင်းမှုနဲ့ အသက်မွေးဝမ်းကြောင်းသူတွေ၊ လူသတ်ပြီးသာသနာပြုရတယ်ဆိုပြီး မသိနားမလည်သူတွေကို ဘာသာရေးအစွန်း‌ရောက်အဆိပ်ခတ်တဲ့ ရဟန်းဆိုးတွေသာ လိုလိုလားလား လက်ခံယူ‌ကြတာဖြစ်ပါတယ်။

တနည်းအားဖြင့်ပြောရရင် ပြည်သူတွေက ပြောင်လှောင်နေကြတဲ့ သမ္မတရူးမင်းအောင်လှိုင်က သူခိုးသေဖော်ညှိတဲ့သဘောနဲ့ ပေးအပ်တဲ့အဂ္ဂဗလချာအသီရိအဓမ္မဘွဲ့ဆိုး၊ သူခိုးသီရိအဓမ္မဘွဲ့၊ သူခိုးမဟာသွားရေယိုသူဘွဲ့စတာတွေ၊ အသီရိပျံချီဘွဲ့ဆိုးတွေဟာ ပြည်သူ့ခုံရုံးတက်ရမယ့် နိုင်ငံ့သစ္စာဖေါက်ဘွဲ့ဆိုးတွေဖြစ်ကြပါတယ်။ အဲ့ဒီဘွဲ့ဆိုးတွေကို လိုလိုလားလားယူခဲ့ကြတဲ့သူတွေကို အများပြည်သူတွေက ထုံးတို့လို့မှတ်ထားပါကြောင်း။

မင်းကောင်းချစ်

23 hours Ago

January 30, 2023

မင်းအောင်လှိုင်မှာ ပါတီမှတ်ပုံတင်ဥပဒေပြဋ္ဌာန်းပိုင်ခွင့် ရှိပါရဲ့လား

တကယ်တော့ ၂၀၀၈ ဖွဲ့စည်းပုံဟာ ၂၀၂၁ ခုနှစ်၊ ဖေဖော်ဝါရီ ၁ ရက်ကတည်းက ပျက်ပြယ်ခဲ့ပြီး ဖြစ်ပါတယ်။ ဘာကြောင့် ဖွဲ့စည်းပုံ ပျက်ပြီးဖြစ်တယ်လို့ ပြောကြရသလဲဆိုရင် မင်းအောင်လှိုင် အာဏာလွှဲယူစဉ်က အသုံးပြုခဲ့တဲ့ အရေးပေါ်ကာလဆိုင်ရာ ပြဋ္ဌာန်းချက်များမှာ အမျိုးသားကာကွယ်ရေးနှင့် လုံခြုံရေးကောင်စီကို ခေါ်ယူပြီး ကာချုပ်ထံ အာဏာလွှဲပြောင်း ပေးပိုင်ခွင့်ရှိသူဟာ နိုင်ငံတော်သမ္မတသာ ဖြစ်တယ်လို့ အတိအလင်း ဖော်ပြထားလို့ပါ။ အရေးပေါ်ကာလဆိုင်ရာ ပြဋ္ဌာန်းချက်ထဲမှာ ‘ဒုသမ္မတတဦးဦးက’ လို့ ဖော်ပြမထားသလို ‘ယာယီသမ္မတက’ လုပ်ပိုင်ခွင့်ရှိတယ်လို့လည်း တလုံးတပါဒမျှ ဖော်ပြမထားပါဘူး။ နိုင်ငံတော်သမ္မတ ဦးဝင်းမြင့်ကို ဖမ်းဆီးထိန်းသိမ်းပြီး အာဏာသိမ်းခဲ့တာ ဖြစ်တဲ့အတွက် ၂၀၀၈ ဖွဲ့စည်းပုံ ပျက်ပြီလို့ ပြောကြတာဖြစ်ပါတယ်။

ဒါပေမဲ့လည်း မင်းအောင်လှိုင်တို့ စစ်ခေါင်းဆောင်တစုဟာ သူတို့ တပ်တွင်းအင်အားစုကို ပြန်လည်လှည့်ဖျားဖို့အတွက် ၂၀၀၈ ဖွဲ့စည်းပုံ တည်ရှိနေသေးသယောင် အစဉ်တစိုက် ပြောဆိုခဲ့ကြပါတယ်။ စစ်အုပ်စုက ပြုလုပ်ပေးမယ့် ရွေးကောက်ပွဲကနေ အာဏာလက်တဆစ်စာမျှ ခွဲဝေယူလို့ရရဆိုပြီး ငံ့လင့်ခဲ့ကြတဲ့ ပါတီနိုင်ငံရေးသမားများကလည်း ဖွဲ့စည်းပုံပျက်ပြီးဖြစ်ကြောင်း မပြောဘဲ ယုန်ကလေး နှာစေး နေခဲ့ကြတာပါ။ အခုတော့ ယုန်ကလေးတွေ နှာမစေးနိုင်တော့ အပျက်အပျက်နဲ့ နှာခေါင်းသွေး ထွက်ကုန်ကြပါပြီ။ မင်းအောင်လှိုင်က နိုင်ငံရေးပါတီများ မှတ်ပုံတင်ခြင်းဆိုင်ရာ ဥပဒေကို လက်မှတ်ရေးထိုး ပြဋ္ဌာန်းလိုက်လို့ပါပဲ။

အာဏာလက်တဆစ်စာမျှ ရရဆိုပြီး ငံ့လင့်ခဲ့ကြတဲ့ ပါတီနိုင်ငံရေးသမားတွေဟာ ပါတီမှတ်ပုံတင်ဥပဒေဟာ တင်းကျပ်လွန်းတယ်လို့ပဲ ညည်းတွားနေကြတာကို တွေ့ရပါတယ်။ တကယ်တမ်း ဒီဥပဒေကို ကာချုပ်မင်းအောင်လှိုင်က ပြဋ္ဌာန်းပိုင်ခွင့် ရှိပါရဲ့လားဆိုတာကို ပိုင်းခြားသုံးသပ်ပြတဲ့ ပြည်တွင်း ပါတီနိုင်ငံရေးသမား အခုထိတော့ မတွေ့မမြင်ရသေးပါဘူး။

ဒီဥပဒေကို ပြန်လှန်သုံးသပ်ရင် မင်းအောင်လှိုင်တို့ ကိုင်စွဲထားတဲ့ ၂၀၀၈ ခြေဥဆိုတဲ့ ပေတံကျိုးကြီးနဲ့ပဲ ပြန်တိုင်းထွာရတော့မှာပါပဲ။ သူတို့လုပ်ရပ်ကို သူတို့ ပေတံကျိုးနဲ့ပဲ ပြန်တိုင်းရပါလိမ့်မယ်။ ၂၀၀၈ ခြေဥ ဖြစ်တည်ပြီးနောက် နိုင်ငံရေးပါတီများ မှတ်ပုံတင်ခြင်းဆိုင်ရာ ဥပဒေဟာ သုံးကြိမ် ပြဋ္ဌာန်းခဲ့ပြီး ဖြစ်ပါတယ်။ ပထမတကြိမ်က ပထမလွှတ်တော်မပေါ်မီ စစ်အစိုးရက ပြဋ္ဌာန်းပေးခဲ့တာပါ။ ဒါဟာ အသွင်ကူးပြောင်းဆဲကာလမို့ စစ်အစိုးရက ပြဋ္ဌာန်းခဲ့တာပါ။ နောက်နှစ်ကြိမ်ကတော့ ၂၀၁၁ နဲ့ ၂၀၁၄ ခုနှစ်တွေမှာ ပါတီမှတ်ပုံတင်ဥပဒေကို ပြည်ထောင်စုလွှတ်တော်က ပြင်ဆင်ပြဋ္ဌာန်းခဲ့တာပါ။ ပြည်ထောင်စုလွှတ်တော်က ပြင်ဆင်ရေးဆွဲပြီး သမ္မတဦးသိန်းစိန်က လက်မှတ်ရေးထိုး ပြဋ္ဌာန်းပေးခြင်း ဖြစ်ပါတယ်။ ၂၀၂၀ ရွေးကောက်ပွဲမတိုင်မီ NLD အစိုးရလက်ထက်မှာတော့ ဒီဥပဒေကို အထူးတလည် ပြင်ဆင်ပြဋ္ဌာန်းခြင်း မရှိခဲ့ပါဘူး။ ပထမလွှတ်တော် ပေါ်ပေါက်ပြီးနောက်မှာ ပါတီမှတ်ပုံတင်ဥပဒေကို ပြည်ထောင်စုလွှတ်တော်က ရေးဆွဲပြီး သမ္မတက အတည်ပြု လက်မှတ်ရေးထိုး ပြဋ္ဌာန်းရတာပါ။ လူပုဂ္ဂိုလ်တဦးတယောက်ရဲ့ ဆန္ဒနဲ့ ပြဋ္ဌာန်းခဲ့ခြင်းမျိုး မတွေ့ရပါဘူး။

၂၀၀၈ ခြေဥ အခန်း (၁၀) နိုင်ငံရေးပါတီများ အခန်း၊ ပုဒ်မ (၄၀၉) မှာလည်း ပြည်ထောင်စုလွှတ်တော်သည် နိုင်ငံရေးပါတီများနှင့် စပ်လျဉ်းသည့် လိုအပ်သော ဥပဒေများကို ပြဋ္ဌာန်းရမည်လို့ ဖော်ပြထားပါတယ်။

ဒါပေမဲ့ အခုကာလက လွှတ်တော်တွေ မပေါ်ပေါက်သေးမီ မင်းအောင်လှိုင်တို့က အာဏာဖြတ်သိမ်းသွားတဲ့ကာလ ဖြစ်နေပါတယ်။ ဒီတော့ ကာလုံက ကာချုပ်ကို အာဏာလွှဲပေးစဉ်မှာ ပေးအပ်တဲ့ အခွင့်အာဏာကိုပဲ ပြန်ဆန်းစစ်ကြရမှာပါ။ ၂၀၀၈ ခြေဥ အရေးပေါ်ကာလဆိုင်ရာ ပြဋ္ဌာန်းချက်များ ပုဒ်မ ၄၁၈ (က) မှာ “ပုဒ်မ ၄၁၇ အရ အရေးပေါ်အခြေအနေ ကြေညာသည့် ကိစ္စရပ်တွင် နိုင်ငံတော်သမ္မတသည် နိုင်ငံတော်အတွင်း မူလအခြေအနေသို့ အမြန်ပြန်ရောက်ရှိစေခြင်းငှာ လိုအပ်သည့် အရေးယူဆောင်ရွက်မှုများ ပြုနိုင်ရန် တပ်မတော်ကာကွယ်ရေးဦးစီးချုပ်အား နိုင်ငံတော်၏ ဥပဒေပြုရေး၊ အုပ်ချုပ်ရေးနှင့် တရားစီရင်ရေး အာဏာများကို လွှဲအပ်ကြောင်း ကြေညာရမည်။ ယင်းသို့ ကြေညာသည့်နေ့မှစ၍ လွှတ်တော်အားလုံးနှင့် ဦးစီးအဖွဲ့များ၏ ဥပဒေပြုရေးဆိုင်ရာ လုပ်ငန်းများကို ရပ်ဆိုင်းထားသည်ဟု မှတ်ယူရမည်။ ယင်းလွှတ်တော်များ၏ သက်တမ်းကုန်ဆုံးသည့်အခါ သက်ဆိုင်ရာ လွှတ်တော်များသည် အလိုအလျောက် ဖျက်သိမ်းပြီး ဖြစ်သည်ဟု မှတ်ယူရမည်။” လို့ ဖော်ပြထားပါတယ်။

ဒီအပိုဒ်မှာ ကာချုပ်ကို ဥပဒေပြုခွင့်အာဏာ ပေးထားပေမဲ့ “နိုင်ငံတော်သမ္မတသည် နိုင်ငံတော် အတွင်း မူလအခြေအနေသို့ အမြန်ပြန်ရောက်ရှိစေခြင်းငှာ လိုအပ်သည့် အရေးယူ ဆောင်ရွက်မှုများ ပြုနိုင်ရန်” ဆိုတဲ့ ရည်ညွှန်းချက် ပါဝင်နေတာကို တွေ့ရပါလိမ့်မယ်။ ဆိုလိုတာက ကာချုပ်မှာ ဥပဒေထုတ်ခွင့်ရှိပေမဲ့ နိုင်ငံတော် မူလအခြေအနေကို ပြန်ရောက်ဖို့ ရည်စူးတဲ့ ဥပဒေပဲ ဖြစ်ရမှာပါ။ နိုင်ငံတော်သမ္မတဦးဆောင်တဲ့ ကာလုံလက်ထဲ အာဏာပြန်အပ်ပြီးမှ ပြုလုပ်ရမယ့် ရွေးကောက်ပွဲနဲ့ စပ်ဆိုင်တဲ့ ပါတီမှတ်ပုံတင်ဥပဒေကို မင်းအောင်လှိုင်က ကြိုတင်စီမံ ပြဋ္ဌာန်းသွားတာဟာ ၂၀၀၈ ခြေဥပါ ပြဋ္ဌာန်းချက်တွေနဲ့ ကိုက်ညီပါရဲ့လား ဆိုတာကို ပါတီနိုင်ငံရေးသမားတွေ အနေနဲ့ ကနဦး ဆန်းစစ်သင့်ပါတယ်။

အာဏာလွှဲအပ်ကာလကို ပထမ ၁ နှစ်နဲ့ ထပ်တိုး ခြောက်လ ၂ ကြိမ်၊ စုစုပေါင်း ၂ နှစ်သာ ခွင့်ပြုပေးထားပြီး သည့်နောက်မှာတော့ သမ္မတဦးဆောင်တဲ့ ကာလုံအဖွဲ့ကို အာဏာပြန်အပ်ရမှာပဲ ဖြစ်ပါတယ်။ ကာလုံထံ အာဏာပြန်ရောက်ပြီးမှ ကာလုံကပဲ ရွေးကောက်ပွဲကော်မရှင်ကို ဖွဲ့စည်းပေးရမယ်ဆိုတဲ့အကြောင်း ပုဒ်မ ၄၂၈ မှာ  “အမျိုးသားကာကွယ်ရေးနှင့် လုံခြုံရေးကောင်စီသည် ဖွဲ့စည်းပုံအခြေခံဥပဒေပါ အဆင့်ဆင့်သော အာဏာပိုင်အဖွဲ့အစည်းများ၊ ကိုယ်ပိုင်အုပ်ချုပ်ခွင့်ရတိုင်း ဦးစီးအဖွဲ့ သို့မဟုတ် ကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့များနှင့် ရွေးကောက်ပွဲကော်မရှင်တို့ကို ဖွဲ့စည်းပုံအခြေခံဥပဒေတွင် ပြဋ္ဌာန်းထားသော သက်ဆိုင်ရာအရည်အချင်းနှင့် ညီညွတ်သည့် ပုဂ္ဂိုလ်များဖြင့် ဖွဲ့စည်းတာဝန်ပေးအပ်ရမည်။” လို့ အတိအလင်း ပြဋ္ဌာန်းထားတာကို တွေ့ရပါတယ်။ ဒါ့ကြောင့် မင်းအောင်လှိုင် ကြိုတင်ဖွဲ့စည်းထားတဲ့ ရွေးကောက်ပွဲ ကော်မရှင်ကရော ဘောင်ကျိုး ၂၀၀၈ ခြေဥနဲ့တောင် ကိုက်ညီပါရဲ့လား ဆိုတာကိုလည်း ပါတီနိုင်ငံရေးသမားများ ဆန်းစစ်သင့်ပါတယ်။ လာရာလမ်းကြောင်း မှန် မမှန် အရင်မကြည့်ဘဲ လားရာလမ်းကြောင်းကိုသာ ပြောနေကြရင်ဖြင့် ......။

စောအဲမွန်

5 days Ago
More News
Up