မကွေးတိုင်း၊ မင်းဘူးမြို့မှာ မတ် ၂ ရက် ည ၁ နာရီခွဲလောက်က ဟင်းချက် လျှပ်စစ်ဒယ်အိုး ရှော့ခ်ဖြစ်ရာက နေအိမ်တအိမ်မှာ မီးလောင်မှုဖြစ်ပွားပြီး အနီးနားက ဆိုင်ခန်းတွေကိုပါ မီးကူးစက်ကာ ဆိုင်ခန်း ၃ ခန်း မီးလောင်သွားတယ်လို့ မြို့ခံတွေဆီက သိရပါတယ်။
မြို့ခံတဦးက “ည ၁ နာရီခွဲလောက်က စလောင်တာ။ ဆိုင်ခန်းသုံးခန်းတော့ ပါသွားတယ်။ မီးညွန့်ကျိုးသွားတဲ့အတွက် သက်သာသွားတာပါ” လို့ ပြောပါတယ်။
ညနေ ၄ နာရီမှာ လျှပ်စီးမီးပြတ်သွားတဲ့အခါ လျှပ်စစ်ဒယ်အိုးကို ပိတ်ဖို့ မေ့နေခဲ့တာဖြစ်ပြီး ညသန်းခေါင် ၁၂ နာရီလောက်မှ မီးပြန်လာတဲ့အခါ အိမ်ရှင်တွေ အိပ်မောကျနေတုန်း အဲဒီအိုးက အပူလွန်ကဲပြီး မီးထလောင်တာဖြစ်တယ်လို့ နီးစပ်သူတွေက ပြောပါတယ်။
မီးလောင်မှုနဲ့ပတ်သက်ပြီး တရားဥပဒေအရ အမှုဖွင့်တိုင်ကြားခြင်း ရှိ၊ မရှိ စစ်ကောင်စီလက်အောက်ခံ မီးသတ်ဦးစီးဌာနကို ဆက်သွယ်ပေမဲ့ အခုထိ ဆက်သွယ်လို့ မရသေးပါဘူး။
လျှပ်စစ်နဲ့ စွမ်းအင်ဝန်ကြီးဌာနက လျှပ်စစ်မီးကို အကန့်အသတ်နဲ့ပဲ ပေးရာမှာ လူအိပ်မောကျချိန်တွေမှ မီးလာတာတွေရှိနေလို့ ဒေသခံတွေ အခက်အခဲ တွေ့နေကြပါတယ်။
မကွေးတိုင်း၊ စလင်းမြို့နယ်၊ လင်းဇင်းနယ်မြေရဲစခန်းကို အောက်တိုဘာ ၃၀ ရက် မနက် အစောပိုင်းမှာ မိုင်းဆွဲ တိုက်ခိုက်ခဲ့တယ်လို့ မင်းဘူးခရိုင်ပြည်သူ့ကာကွယ်ရေးတပ်မတော် (အနောက်ပိုင်းတိုင်း)က သိရပါတယ်။
လင်းဇင်းနယ်မြေရဲစခန်းကို မနေ့ မနက် ၂ နာရီလောက်မှာ ပြည်သူ့ကာကွယ်ရေးတပ်မတော် (အနောက်ပိုင်းတိုင်း) စလင်းတပ်ခွဲက စခန်းမှူးရဲ့ အိပ်ဆောင်ထဲ ဝင်ပြီး မိုင်း ၂ လုံး ထောင်ကာ အဝေးထိန်းစက်နဲ့ ဖောက်ခွဲ တိုက်ခိုက်ခဲ့တာလို့ ပြည်သူ့ကာကွယ်ရေးတပ်မတော် (အနောက်ပိုင်းတိုင်း) က တပ်ရင်းမှူး ဗိုလ်လျှပ်စီးက ပြောပါတယ်။
“ရဲဘော်လေးတွေ ဝင်ပြီး မိုင်းထောင်ခဲ့တဲ့နောက် ဖောက်ခွဲ တိုက်ခိုက်ရာမှာ မိုင်း နှစ်လုံးစလုံး ပေါက်ကွဲပေမဲ့ ရဲတွေရဲ့ သေဆုံးဒဏ်ရာရတဲ့ အခြေနေကို အတိကျမသိရသေးဘူး။ ကျနော်တို့က အထိအခိုက် မရှိ ဆုတ်ခွာခဲ့တယ်”
ခုလို မိုင်းဆွဲ တိုက်ခိုက်ခံရတာနဲ့ ပတ်သက်လို့ ရဲတွေ ထိခိုက်သေဆုံးတဲ့ အခြေအနေကို သီးခြား အတည်မပြုနိုင်သလို စစ်ကောင်စီဘက်ကလည်း သတင်းထုတ်ပြန်တာ မတွေ့ရသေးပါဘူး။
