မင်းတပ်တိုက်ပွဲ

November 8, 2021

မင်းတပ်တိုက်ပွဲတွင် စစ်ကောင်စီတပ်သား ၅၀ ကျော် သေဆုံး

ချင်းပြည်နယ် မင်းတပ်မြို့မှာ ပြီးခဲ့တဲ့ ၄ ရက်အတွင်းဖြစ်ပွားခဲ့တဲ့ တိုက်ပွဲတွေမှာ အကြမ်းဖက်စစ်ကောင်စီတပ်သား အယောက်  ၅၀ ကျော် သေဆုံးခဲ့တယ်လို့ ဒေသခံ ကာကွယ်ရေးတပ်တွေထံက သိရပါတယ်။

နိုဝင်ဘာ ၃ ရက်က  သံချပ်ကာကား ၂ စီးအပါအဝင် စစ်ကား ၇၅ စီးကို ချင်းပြည်ကာကွယ်ရေးတပ် မင်းတပ်(CDF-MINDAT)က မတူပီ-မင်းတပ် လမ်းကြားတနေရာမှာ ကြားဖြတ်တိုက်ခိုက်ခဲ့ပြီး စစ်ကောင်စီဘက်က ၁၀ ယောက်လောက် သေဆုံးခဲ့သလို အဲဒီတိုက်ပွဲမှာ CDF-MINDAT က ၃ ယောက် ဒဏ်ရာရပြီး အသက် ၇၃ နှစ်အရွယ် ပညာရေးအငြိမ်းစား ရဲဘော်တယောက်ဟာ ဒဏ်ရာ ပြင်းထန်လို့ ကျဆုံးခဲ့ပါတယ်။

နိုဝင်ဘာ ၄ ရက်နေ့ မနက်ပိုင်းမှာ မင်းတပ်-မတူပီလမ်း ၆ မိုင်အကျော်မှာ စစ်ကြောင်းထိုးလာတဲ့ စစ်ကောင်စီတပ်တွေဟာ ပဒေသာမိုင်းကြောင့် ၅ ယောက်လောက်ကျဆုံးပြီး ဒဏ်ရာရသူတွေလည်း ရှိခဲ့တယ်လို့  CDF-MINDAT ကထုတ်ပြန်ပါတယ်။

နေ့လယ်ပိုင်းမှာလည်း မင်းတပ်-မတူပီ မိုင်တိုင် ၄၃ မှာ မတူပီကနေ ပြန်ဆင်းလာတဲ့ သံချပ်ကာ ၂ စီးပါတဲ့ ယာဉ်တန်းကို CDF-MINDAT က ရှေ့နောက် ညှပ် တိုက်ခိုက်ခဲ့ပြီး စစ်ကောင်စီဘက်က အယောက် ၂၀ လောက် သေဆုံးခဲ့တယ်လို့ ဆိုပါတယ်။

နောက်ဆုံးက ကားကို တိုက်ခိုက်နေချိန်မှာ စစ်ကောင်စီတပ်သားက ကားကို မောင်းပြေးတာကြောင့် ကားအောက်မှာ ဝပ်နေသူတွေ အကာအကွယ်မဲ့ပြီး အကျအဆုံးများတာလို့ ဆိုပါတယ်။

နိုဝင်ဘာ ၆ ရက် မနက်ပိုင်းမှာလည်း ၃၁ မိုင်ကိုရောက်လာတဲ့ စစ်ကောင်စီယာဉ်တန်းရှည်ကို CDF-MINDAT နဲ့ ဒေသခံရွာသားတွေ ပူးပေါင်းတိုက်ခိုက်ခဲ့ကြလို့ စစ်ကောင်စီတပ်သား ၈ ယောက်လောက် သေဆုံးခဲ့ပါတယ်။

စစ်ကောင်စီတပ်သားတွေဟာ လွန်ခဲ့တဲ့ တပတ်က မတူပီကိုလာတဲ့လမ်းမှာ ရွာသားတွေရဲ့ နွားနောက်တွေကို သတ်စားတာ၊ အိုးအိမ်တွေကို ဖျက်စီးတာတွေကြောင့် ရွာသားတွေလည်း ပါဝင်တိုက်ခိုက်လာကြတာလို့ ဆိုပါတယ်။

နိုဝင်ဘာ ၇ ရက်နေ့ မနက်ပိုင်းက မိုင်တိုင် ၂၆ ဝန်းကျင်မှာ စစ်ကောင်စီယာဉ်တန်း ရှေ့ကင်းထွက်လာသူတွေကို CDF-MINDAT က ဆီးကြိုတိုက်ခိုက်ခဲ့လို့ ၁၀ ယောက်လုံး သေခဲ့ပြီး နောက်ဘက် ယာဉ်တန်းက လက်နက်ကြီးတွေ၊ သံချပ်ကာကားက စက်သေနတ်တွေနဲ့ အပြင်းအထန် ခုခံတိုက်ခိုက်ခဲ့တယ်လို့ CDF-MINDAT က ထုတ်ပြန်ထားပါတယ်။

နေ့လယ်ပိုင်းမှာလည်း ယာဉ်တန်းကို အနီးကပ်ဝင်တိုက်ခဲ့ပြီး CDF-MINDAT ရဲ့ လက်နက်ကြီး ပစ်ခတ်တာကြောင့် စစ်ကောင်စီဘက်က ၈ ယောက်လောက်သေဆုံးတယ်လို့ ဆိုပါတယ်။ ၃၁ မိုင်ဝန်းကျင် လမ်းဘေးမှာ ရဲတယောက် အလောင်းကို မြေမြှုပ်ထားတာတွေ့ရပြီး စစ်ကြောင်းမှာ ရဲတွေ၊ မီးသတ်တွေလည်း ပါလာတယ်လို့ ယူဆကြောင်း CDF-MINDAT က ထုတ်ပြန်ပါတယ်။

ဒီမနက် ၁၀ နာရီဝန်းကျင်မှာလည်း ကလေးမြို့ ကနေ ချင်းတောင်ကိုတက်လာတဲ့ စစ်ကောင်စီကားတွေကို PDF Zoland နဲ့ CDM Siyin တို့ပူးပေါင်းဗုံးခွဲတိုက်ခိုက်ခဲ့ပြီး ထိခိုက်တဲ့အခြေအနေ အသေးစိတ်ကို မသိရသေးပါဘူး။

မင်းတပ်မြို့မှာ စစ်ကောင်စီဘက်က လေယာဉ်တွေသုံးပြီး တိုက်ခိုက်တယ်လို့ ဒေသခံတွေက ပြောဆိုပေမဲ့ အတည်ပြုလို့တော့ မရသေးပါဘူး။

ဓာတ်ပုံ -Yaw Mang

4 weeks Ago

November 4, 2021

မင်းတပ်တိုက်ပွဲတွင် စစ်တပ်က ၁၀ ဦးသေဆုံးပြီး CDF က ၁ ဦးကျဆုံး၊ ဆင်ပေါင်ဝဲသတင်းပေး အသတ်ခံရ

ချင်းပြည်နယ် မင်းတပ်မြို့နယ်မှာ နိုဝင်ဘ ၃ ရက်နေ့ မနက်ပိုင်းက မင်းတပ် CDF နဲ့ အကြမ်းဖက်စစ်အုပ်စု တိုက်ပွဲဖြစ်ပွားပြီး စစ်ကောင်စီတပ်သား ၁၀ ယောက်ထက်နည်းသေဆုံးပြီးကာ CDF-မင်းတပ်က တပ်ဖွဲ့ဝင် ၁ ယောက် ကျဆုံးသွားတယ်လို့ ထုတ်ပြန်ထားပါတယ်။

မတူပီဘက်ကနေပြန်ဆင်းလာတဲ့ တင့်ကား ၂ စီးအပါဝင် အကြမ်းဖက်စစ်ကား ၇၅ စီးကို မင်းတပ်နဲ့ မတူပီလမ်းကြား တစ်နေရာမှာ ဒီကနေ့မနက်ပိုင်းက မင်းတပ် CDF က ကြားဖြတ်တိုက်ခိုက်ခဲ့တာကြောင့် စစ်ကောင်စီတပ်သား ၁၀ ယောက်ထက်မနည်း သေဆုံးပြီး အများအပြားဒဏ်ရာရရှိတယ်လို့ ဆိုပါတယ်။

အဲဒီတိုက်ပွဲအတွင်းမှာ အကြမ်းဖက်စစ်ကောင်စီဘက်က လက်နက်ကြီးလက်နက်ငယ်တွေနဲ့ပြန်လည်ပစ်ခတ်တာကြောင့် CDF တပ်ဖွဲ့ဘက်က ၃ ယောက်ဒဏ်ရာရတဲ့ထဲက ဒဏ်ရာပြင်းထန်တဲ့ ရဲဘော်တစ်ယောက်ကျဆုံးခဲ့ရတယ်လို့ ဖော်ပြထားပါတယ်။

မင်းတပ်မြို့နယ်မှာ အောက်တိုဘာ ၃၁ ရက်နေ့ကလည်း မင်းတပ် CDF နဲ့ အကြမ်းဖက်စစ်အုပ်စုတွေ တိုက်ပွဲဖြစ်ပွားခဲ့ပြီးတော့ စစ်ကောင်စီဘက်က ၃ ယောက်သေဆုံးခဲ့ပြီးတော့ ၈ ယောက်ထက်မနည်း ဒဏ်ရာရရှိခဲ့တယ်လို့ သိရပါတယ်။

တိုင်းပွဲတွေအတွင်း စစ်ကောင်စီဘက်က သေဆုံးဒဏ်ရာရရှိမှုတွေနဲ့ ပတ်သက်ပြီး ဒီဗွီဘီက သီးခြား အတည်မပြုနိုင်သေးပါဘူး။

မကွေးတိုင်း ဆင်ပေါင်ဝဲမြို့နယ်မှာ နိုဝင်ဘာ ၃ ရက်နေ့မနက်ပိုင်းက အကြမ်းဖက်စစ်ကောင်စီရဲ့ သတင်းပေးဒလန်တစ်ယောက်အား သုတ်သင်ရှင်းလင်းခဲ့တယ်လို့ No Chair ပြောက်ကျားတပ်ဖွဲ့က ပြောပါတယ်။

ဆင်ပေါင်ဝဲမြို့နယ် ကိုးပင်-အောင်လံ လမ်းမပေါ်မှာရှိတဲ့ ဧကရာဇ်ရွာမှာ ဒီကနေ့မနက် ၉ နာရီလောက်က အကြမ်းဖက်စစ်အုပ်စုရဲ့ သတင်းပေးဒလန် ဘညွှန့်ကို မကွေးအခြေစိုက် No Chair ပြောက်ကျားတပ်ဖွဲ့က သေနတ်နဲ့ ၄ ချက်ပစ်ခတ်ပြီးသုတ်သင်ခဲ့တာလို့ ပြောက်ကျားတပ်ဖွဲ့ ပြန်ကြားရေးတာဝန်ခံ ဗိုလ်မိုးနက္ခတ်က ပြောပါတယ်။

အဲဒီ စစ်ကောင်စီ သတင်းပေးဒလန်ဟာ ဆင်ပေါင်ဝဲမြို့နယ် တိုင်ဒေသကြီးလွှတ်တော်ကိုယ်စားလှယ် ဦးရန်အောင်မျိုးရဲ့ ဖခင်အသတ်ခံရတဲ့ကိစ္စမှာ စစ်အုပ်စုကို သတင်းပေးတာ၊ မီတာခမတရားကောက်ခံတာ၊ မိုင်တဲလ်တိုင်နဲ့ အုပ်ချုပ်ရေးမှူးအားထိပါက ရွာကိုမီးရှို့မယ်၊ NLD ပါတီထောက်ခံသူတွေကို ဖမ်းဆီးမယ်ဆိုပြီး ခြိမ်းခြောက်တာကြောင့် သုတ်သင်လိုက်တာလို့ ဆိုပါတယ်။

အကြမ်းဖက်စစ်အုပ်စုပြုတ်ကျရေးအတွက် လုပ်သင့်လုပ်ထိုက်တာ အကုန်လုပ်မှာဖြစ်လို့ ရှေ့လျှောက်လိုအပ်တာတွေ ပိုမိုလှုပ်ရှားနိုင်ဖို့ ပြည်သူ လူထုရဲ့ အကူညီအများကြီးလိုအပ်တယ်လို့ ပြောက်ကျားအဖွဲ့က ပြောပါတယ်။

4 weeks Ago
More News
Up