မင်းကင်းတွင် စက်နှင့်အမှတ်စဉ် တပ်ထားသည့် လင်းယုန်ငှက် တွေ့

December 6, 2017

မင်းကင်းတွင် စက်နှင့်အမှတ်စဉ် တပ်ထားသည့် လင်းယုန်ငှက် တွေ့

ဒီဇင်ဘာ ၅ ရက်နေ့က မင်းကင်း တောင်တွင်းနယ်ထဲက ကျေးရွာတရွာမှာ ထူးခြားတဲ့ ငှက်တကောင်ကို ဖမ်းမိခဲ့တယ်လို့ ဒေသခံတွေက ပြောပါတယ်။ အဲ့ဒီငှက်ရဲ့ ကျောမှာ GPS လို့ စာတမ်းပါတဲ့ စက်တပ်ဆင်ထားပြီး ခြေထောက်မှာလည်း အမှတ်စဉ် ၂၇၂ ဆိုတဲ့ သံကွင်းခတ်ထားတယ်လို့ သိရပါတယ်။ မင်းကင်းမြို့နယ် တောင်တွင်းချောင် ၃၆ ရွာထဲက တရွာအပါအဝင်ဖြစ်တဲ့ သာစည်ရွာရဲ့ အပြင်ဘက် ကောက်ရိုးပုံပေါ်မှာ နားနေတဲ့ လင်းယုန်ငှက်ကြီးကို ရွာသားတယောက်က လေးခွနဲ့ ပစ်ပြီး အသက်ရှင်ရက် ဖမ်းဆီးရခဲ့တာပါ။ တောင်တွင်းမှာနေတဲ့ ဒေသခံတဦးက “ငှက်အနေအထားကတော့ မွန်ဂိုလီးယား အမဲလိုက် ငှက်ပုံစံရှိနေပြီး ဆောင်းခိုရင်း မြန်မာနိုင်ငံဘက် ရောက်လာတာ ဖြစ်နိုင်တယ်”လို့ ပြောပါတယ်။ လတ်တလောမှာတော့ သက်ဆိုင်ရာကနေ စုံစမ်းစစ်ဆေးမှု ပြုလုပ်မှာဖြစ်ပြီး  ဒီငှက်နဲ့ပတ်သက်ပြီး တိကျတဲ့အဖြေ မရသေးဘဲ ရှိနေပါတယ်။ သတင်း - မင်းရဲစစ်နိုင်
3 years Ago
Up