မကွေးမြို့

September 16, 2022

မကွေးမြို့ ဧရာဝတီမြစ်အတွင်း ကလေး ၂ ဦး ရေထဲမျောပါ၊ ၁ ဦး ပျောက်ဆုံးနေ

မကွေးမြို့ ဧရာဝတီမြစ်အတွင်းမှာ စက်တင်ဘာ ၁၆ ရက် မနက်ပိုင်းက ကလေးနှစ်ယောက် ရေနစ်မြုပ်ပြီး တယောက် ရေထဲမျောပါသွားခဲ့တယ်လို့ ခေမာ လူမှုကယ်ဆယ်ရေး အသင်းရဲ့ ဦးဆောင်သူ ကိုပိုင်က ဒီဗွီဘီကို ပြောပါတယ်။

မကွေးမြို့ အောင်မေတ္တာရပ်ကွက် ၁၄ လမ်း ဧရာဝတီမြစ်ကမ်းဘေးမှာ ဒီနေ့ စက်တင်ဘာ ၁၆ ရက် မနက် ၁၀ နာရီကျော်လောက်က ယောကျ်ားလေးတယောက်နဲ့ မိန်းကလေးတယောက် ရေချိုးဆင်းရာ ရေထဲမျောပါသွားလို့ မိန်းလေးတယောက်သာ အသက်ရှင်လျက် ပြန်လည် ဆယ်ယူနိုင်ခဲ့တယ်လို့ ဆိုပါတယ်။

“သူတို့က ပလတ်စတစ်ကောက်ရင်းနဲ့ ဧရာဝတီမြစ်ထဲမှာ ရေဆင်းချိုးကြတာပါ။ သုံးယောက်မှာ အသက် ၁၉ နှစ်အရွယ် မိန်းကလေးကတော့ ရေချိုးပြီး ကမ်းနားမှာထိုင်နေတဲ့အချိန် အသက် ၁၄ နှစ်အရွယ် မိန်းကလေး ၁ ယောက်နဲ့ ၁၃ နှစ်အရွယ် ၂ ယောက် ရေထဲမျောပါသွားလို့ လိုက်လံဆယ်ယူရာ မိန်းကလေးတယောက်သာ အသက်ရှင်လျက် ဆယ်ယူနိုင်ခဲ့တာ။ ကျနော်တို့က သတင်းကြားကြားချင်း လိုက်လံရှာဖွေသေးတယ်၊ ဘယ်လိုမှရှာမတွေ့ခဲ့ဘူး။ အခုလက်ရှိတော့ မီးသတ်တပ်ဖွဲ့ရယ်၊ ကျနော်တို့ ခေမာလူမှုကယ်ဆယ်ရေးအသင်းနဲ့ တခြားပရဟိတအဖွဲ့တွေ ပူးပေါင်းပြီး ပိုက်စိတ်တိုက်ပြီး ရှာဖွေကယ်ဆယ်ရေးတွေ ပြုလုပ်နေကြတယ်။”

မိုးရာသီကာလမှာ ဧရာဝတီမြစ်ရေ မြင့်တက်လေ့ရှိတာကြောင့် ရေဆင်းချိုးတဲ့ပြည်သူတွေ နှစ်စဥ်လိုလို ရေစီးနဲ့ မျောပါ သေဆုံးသူတွေရှိတယ်လို့ သိရပါတယ်။

2 weeks Ago

June 1, 2022

မကွေးမြို့ အမှတ် ၂ ရဲစခန်းတွင် စခန်းမှူးကို စစ်ကောင်စီတပ်သားက ထိုးကြိတ်

မကွေးတိုင်း၊ မကွေးမြို့ အမှတ် ၂ ရဲစခန်းမှာ မေ ၃၁ ရက်က စစ်ကောင်စီတပ်သားတယောက်နဲ့ ရဲတပ်ဖွဲ့ဝင်တွေ ခိုက်ရန်ဖြစ်ပွားခဲ့တယ်လို့ မကွေးနယ်မြေရဲစခန်းမှ ရဲတပ်သားတယောက်က ဒီဗွီဘီကို ပြောပါတယ်။

“မကွေးလေတပ်စခန်း ဌာနချုပ်က စစ်ကောင်စီတပ်သားကို မကွေး အမှတ် ၂ နယ်မြေ ရဲစခန်းမှာ ချုပ်နှောင်ထားတာဗျ။ အဲဒါကို လေတပ်စခန်းက အရာရှိတွေက လာထုတ်တဲ့အချိန်မှာ လက်ထိတ်ဖြုတ်ပေးလိုက်တော့ စခန်းမှူး ရဲအုပ်အောင်စိုးကို အဲဒီစစ်သားက လက်သီးနဲ့ ထထိုးတာ။”

ရဲစခန်းက အကြီးဆုံးဖြစ်တဲ့ စခန်းမှူးကို စစ်သားက ထိုးတဲ့အတွက် ရဲတပ်ဖွဲ့ဝင်တွေ မခံနိုင်ဘဲ ရုန်းရင်းဆန်ခတ်ဖြစ်ပြီး အဲဒီစစ်သားကို ဖမ်းဆီးကာ သူ့တို့အရာရှိနဲ့ ပြန်လွှဲပေးလိုက်တယ်လို့ ဆိုပါတယ်။

“စစ်စည်းကမ်း ထိန်းသိမ်းရေးအရတော့ အရေးယူမှာပေါ့။ စခန်းမှူးအပါအဝင် ကျနော်တို့ စခန်းက ရဲတွေကိုလည်း စုံစမ်းစစ်ဆေးရေး ခုံရုံးဖွဲ့ပြီး စစ်ဆေးနိုင်တယ်” လို့ ပြောပါတယ်။

ဆက်လက်ပြီး အဲဒီရဲတပ်သားက “အဲဒီကောင်က မိုက်ကို မိုက်ရိုင်းတာပါဗျာ။ အသက်အရွယ်အရ ကြည့်မယ်ဆိုရင်လည်း ကိုယ့်အဖေအရွယ်လောက်ရှိတာကို ကိုယ်ထိလက်ရောက် ကျူးလွန်တယ်။ စစ်တပ်ကတော့ အာဏာမသိမ်းခင်ကတည်းက ရဲတွေကို ဖိနှိပ်အနိုင်ကျင့်တယ်။ အခု အာဏာသိမ်းလိုက်တော့ ပိုပြီး ချို (ဂျို) ကြွသွားတာပေါ့။ ရဲထဲမှာ ရဲချုပ်၊ တိုင်းမှူး၊ ခရိုင်မှူး အဆင့်ရှိတဲ့သူတွေဆိုရင် အကုန်လုံးနီးပါး စစ်တပ်က အသွင်ပြောင်းလာတာဖြစ်ပြီး ရဲစစ်စစ်က ရှားတယ်။ ကျနော်တို့လည်း စစ်အာဏာရှင်စနစ်ကို မကြိုက်ပေမဲ့ မိသားစုအခက်အခဲကြောင့် ရုန်းမထွက်နိုင်သေးတာ” လို့ ပြောပါတယ်။

အဲဒီစစ်သား အချုပ်ထဲကို ဘယ်လိုရောက်လာတယ် ဆိုတာကိုတော့ သူ့တာဝန်ချိန် မဟုတ်တဲ့အတွက် မသိကြောင်း၊ ဆိုင်ကယ်တစီးကို ၂ ယောက်စီးတဲ့ ကိစ္စကနေ ပြဿနာ စဖြစ်တယ်လို့ကြားကြောင်း၊ ရဲတွေကိုလည်း ဆိုင်ကယ် ၂ ယောက် စီးရဲစီးကြည့်ဆိုပြီး ကြိမ်းဝါးသွားကြောင်း ဆိုပါတယ်။

4 months Ago
More News
Up