မကွေး

January 2, 2022

စစ်ကိုင်းနှင့်မကွေးတိုင်းတို့တွင် တိုက်ပွဲများဖြစ်ပွား၊ ဒေသခံနေအိမ်အချို့ကို စစ်တပ်က ဖျက်ဆီး

စစ်ကိုင်းနှင့်မကွေးတိုင်းတို့မှာ စစ်ကောင်စီတပ်နဲ့ ဒေသခံပြည်သူ့ကာကွယ်ရေးတပ်တွေ တိုက်ပွဲဖြစ်ပွားတာကြောင့် နှစ်ဘက် ထိခိုက်ကျဆုံးတာတွေ ရှိခဲ့ပြီး ဒေသခံပြည်သူအချို့ရဲ့ နေအိမ်တွေလည်း မီးရှို့ဖျက်ဆီးခံခဲ့ရတယ်လို့ သိရပါတယ်။

စစ်ကိုင်းတိုင်း၊ ကလေးမြို့နယ်တောင်ပိုင်း ကြံသာကျေးရွာမှာ တပ်စွဲထားတဲ့ စစ်ကောင်စီတပ်နဲ့ ဒေသခံပြည်သူ့ကာကွယ်ရေးတပ်ဖွဲ့တို့ ဇန်နဝါရီ ၁ ရက် မနက် ၉ နာရီကျော်လောက်ကစပြီး ၃ နာရီလောက်ကြာ တိုက်ပွဲဖြစ်ပွားခဲ့ပါတယ်။

CDF-KKG တပ်ဖွဲ့ဝင်တွေ ထောင်ထားတဲ့ မိုင်း ၄ ကြိမ်ဆွဲတိုက်ခိုက်ခဲ့ပြီး စစ်ကောင်စီဘက်က အထိခိုက်အကျအဆုံးများနိုင်ပေမဲ့ စာရင်းအတိအကျကိုတော့ အတည်မပြုနိုင်သေးဘူးလို့ CDF-KKG က ပြောပါတယ်။

ကလေးမြို့နယ် တောင်ပိုင်းက ကြံသာကျေးရွာမှာ တပ်စွဲထားတဲ့ စစ်ကောင်စီတပ်အင်အား ၅၀ လောက်ကို ပြည်သူ့ကာကွယ်ရေးတပ်ဖွဲ့က ဇန်နဝါရီ ၁ ရက်နေ့မနက်ပိုင်းမှာ ဒရုန်းတွေလွှတ်ပြီး အင်အားနဲ့ အနေအထားကို ထောက်လှမ်းခဲ့ပြီးမှ တိုက်ခိုက်ခဲ့တာလို့ ဆိုပါတယ်။

တိုက်ခိုက်ခံရပြီးနောက် စစ်ကောင်စီခြေလျင်စစ်ကြောင်းဟာ မှန်တောကျေးရွာအတွင်းက နေအိမ် တွေနဲ့ ဆိုင်ကယ်တချို့ကို မီးရှို့ဖျက်ဆီးကာ အဖိုးတန်ပစ္စည်းတွေ ယူဆောင်သွားကြတယ်လို့ ဒေသခံတွေက ပြောပါတယ်။

“ကမ်းပါးနီတံတားဘက်ကို ဂန့်ဂေါ -ကလေးလမ်းမကြီး အတိုင်းရော တောလမ်းတွေကိုရော အသုံးပြုပြီးတော့ စစ်ကြောင်းဖြန့်ကြတယ်။ အဲ့မှာ CDF ထောင်ထားတဲ့ မိုင်းတွေ တိုက်မိပြီး ပေါက်ကွဲမှုတွေဖြစ်တယ်။ သူတို့ဘက်က အသေထိခိုက်တာတွေဖြစ်တော့ တွေ့ရာရမ်းသန်းပစ်ရာက CDF တို့နဲ့ အပြန်အလှန်ပစ်ခတ်မှုတွေဖြစ်ကြတာပေါ့၊ မှန်တောမှာ ရွာသားနှစ်ယောက်ကို ဖမ်းခေါ်သွားတယ်။ အိမ်တွေကိုလည်း ၁၀ လုံးမကဘူး ဖောက်ထွင်းမွှေနှောက်သွားတာ ဆိုင်ကယ် ၃ စီးကိုလည်း မီးရှို့သွားတယ်”လို့ ဒေသခံတစ်ဦးက ပြောပါတယ်။

ဒါ့အပြင် ကျေးရွာထဲက ထွက်ပြေးတိမ်းရှောင်ကြတဲ့ ကျေးရွာသားတွေကိုလည်း စစ်ကောင်စီတပ်က လိုက်လံပစ်ခတ်ခဲ့ပြီး ထိခိုက်ဒဏ်ရာရသူ မရှိခဲ့ဘူးလို့ ဆိုပါတယ်။

တန့်ဆည်မြို့ပေါ်မှာတော့ နေအိမ်တွေကို လိုက်လံချိပ်ပိတ်နေတဲ့ စစ်ကောင်စီတပ်ဖွဲ့ကို ဇန်နဝါရီ ၁ ရက် ညနေပိုင်းက အနီးကပ်မိုင်းဆွဲခဲ့တာကြောင့် စစ်ကောင်စီ တပ်သား ၅ ဦးသေဆုံးပြီး ထိခိုက်ဒဏ်ရာရရှိသူများပြားတယ်လို့ တန့်ဆည် ဖီးနစ်ပြည်သူ့ကာကွယ်ရေးတပ်ဖွဲ့က ထုတ်ပြန်ထားပါတယ်။

စစ်ကောင်စီတပ်တွေဟာ ဇန်နဝါရီ ၁ ရက်  ညနေ ၃ နာရီကျော်က တန့်ဆည်မြို့ မေတ္တာမြိုင်ရပ်ကွက်က ကိုဇင်မိုးအောင် နေအိမ်နဲ့ ရွာသစ်ကျေးရွာက ကိုအေးကျော်ဝင်းရဲ့နေအိမ်တွေအား PDF အဖွဲ့တွေကို ထောက်ပံ့ပေးနေတယ်ဆိုတဲ့ စွပ်စွဲချက်နဲ့ ချိပ်ပိတ်ခဲ့ပြီး အပြန်မှာ မိုင်းဆွဲခံရတာလို့ ဒေသခံတွေဆီက သိရပါတယ်။

တန့်ဆည်ရဲစခန်းက ပြီးခဲ့တဲ့နှစ် နိုဝင်ဘာလက စတင်ပြီး တန့်ဆည်မြို့ပေါ်က နေအိမ်တွေကို PDF အဖွဲ့တွေနဲ့ ဆက်နွှယ်ထောက်ပံ့မှုတွေ ပေးနေတယ်လို့ဆိုကာ နေအိမ် ၈ လုံးကို ချိပ်ပိတ်ခဲ့ပါတယ်။

ဇန်နဝါရီ ၁ ရက်မနက်  ၉ နာရီဝန်းကျင်ကလည်း ရေဦးမြို့ အင်တောကျေးရွာမှာ ကင်းလှည့်နေတဲ့ စစ်ကောင်စီတပ်သားတွေကို တန့်ဆည်မြို့နယ် ပြည်သူ့ကာကွယ်ရေးတပ်ဖွဲ့က မိုင်းဆွဲတိုက်ခိုက်ခဲ့တာကြောင့် တပ်မ ၇၇ က စစ်ကောင်စီ တပ်သား ၅ ဦး သေဆုံးခဲ့ပြီး  ဒဏ်ရာရရှိသူများတယ်လို့လည်း သိရပါတယ်။

ဝက်လက်မြို့နယ်မှာလည်း ပြီးခဲ့တဲ့နှစ် ဒီဇင်ဘာ ၃၁ ရက်နေ့ကလည်း စစ်ကောင်စီတပ်နဲ့ ဝက်လက်မြို့နယ်ပြည်သူ့ကာကွယ်ရေးတပ်တွေ ထိတွေ့တိုက်ပွဲဖြစ်ခဲ့တယ်လို့ သိရပါတယ်။

ဝက်လက်မြို့ နယ်အရှေ့ခြမ်း ဘုရားလေးကုန်းကျေးရွာ အတွင်းမှာ တပ်စွဲထားတဲ့ စစ်ကောင်စီ  အင်အား ၇၀ လောက်နဲ့ ဒေသကာကွယ်ရေးတပ်တွေ ညနေ ၄ နာရီဝန်းကျင်မှာ စတင် တိုက်ပွဲဖြစ်ပွားခဲ့ကြပြီး စစ်ကောင်စီတပ်ဖွဲ့ဝင် ၁၂ ဦး ကျဆုံးခဲ့တယ်လို့ ဝက်လက်ပြည်သူ့ကာကွယ်ရေးတပ်ဖွဲ့ က ထုတ်ပြန်ထားပါတယ်။ 

ဒီနောက် စစ်ကောင်စီတပ်က ညအချိန် စစ်ရဟတ်ယာဉ် ၂ စီးသုံးပြီး ထပ်မံ တိုက်ခိုက်ခဲ့တာကြောင့် PDF ရဲဘော် ၁ ဦး ကျဆုံးခဲ့တယ်လို့ ဒေသကာကွယ်ရေးတပ်ဖွဲ့တွေဆီက သိရပါတယ်။

ဇန်နဝါရီလ ၁ ရက်နေ့ မနက် ၆ နာရီလောက်ကလည်း စစ်ကောင်စီတပ် အင်အား ၃၀ လောက်က ဘုရားလေးကုန်းကျေးရွာထဲမှာ လှည့်လည်ပြီး နေအိမ်တွေကို မီးရှို့ဖျက်ဆီးနေတာကြောင့် ဒေသကာကွယ်ရေးပူးပေါင်းတပ်တွေက ဝင်ရောက်ပစ်ခတ်ရာမှ ညနေ ၅ နာရီလောက်အထိ နှစ်ဖက် တိုက်ပွဲအပြင်းအထန် ဖြစ်ပွားခဲ့တယ်လို့ သိရပါတယ်။ 

ဝက်လက်ဒေသကာကွယ်ရေးတပ်ဖွဲ့ တပ်ရင်း ၂ တာဝန်ရှိသူတစ်ဦးက “ညနေ ၅ နာရီအထိ တိုက်ပွဲပြင်းထန်နေခဲ့ပါတယ်။ ပစ်ခတ်မှုကြောင့် ရွာအရှေ့ဘက်ကို ထွက်ပြေးသွားတဲ့ အကြမ်းဖက် စစ်သား ၃၀ လောက်ကို ကျနော်တို့အဖွဲ့က ကျားထိုးလိုက်ပစ်နေချိန် ညနေ ၆ နာရီလောက်မှာ နမခ က ဟတ်စကီးနဲ့ တိုက်ပွဲဖြစ်ပွားရာ ဘုရားလေးကုန်းကျေးရွာအနီးတဝိုက်မှာ မိနစ် ၃၀ လောက် စက်သေနတ်တွေ၊ ဗုံးသီးတွေနဲ့ အဆက်မပြတ်ကြဲချခဲ့တယ်” လို့ ပြောပါတယ်။

နှစ်ဘက်တိုက်ပွဲအတွင်း စစ်ကောင်စီတပ်သား ၄၀ လောက် သေဆုံးခဲ့ကြောင်း  ဒေသကာကွယ်ရေးတပ်တွေက ထုတ်ပြန်ထားပေမယ့် ဒီဗွီဘီက သီးခြားအတည်မပြုနိုင်သေးပါဘူး။

ဇန်နဝါရီ ၁ ရက်နေ့ မနက် ၃ နာရီလောက်က ဝက်လက်မြို့နယ် ဆားတောင်ကျေးရွာနဲ့ ရွာသာကြီးကျေးရွာကြား  တစ်ကောင်ဒေါင့်ကျေးရွာအနီးမှာ စစ်ကောင်စီ Express ကားတစ်စီးကို ဒေသကာကွယ်ရေးပြောက်ကျားအဖွဲ့က မိုင်း ၇ လုံးနဲ့ တိုက်ခိုက်ခဲ့တယ်လို့ NUG ကာကွယ်ရေးဝန်ကြီးဌာန စစ်ရေးသတင်းအကျဥ်းချုပ်မှာ ဖော်ပြထားပါတယ်။

ပြီးခဲ့တဲ့နှစ် ဒီဇင်ဘာ ၃၁ ရက် ညပိုင်းကလည်း မကွေးတိုင်း၊ ရေစကြိုမြို့နယ် မအူရဲစခန်းအတွင်းက ပစ်ခတ်တဲ့ လက်နက်ကြီး ထိမှန်တာကြောင့် ကျေးရွာသားတစ်ဦး  ဝမ်းဗိုက် အပြင်းအထန် ဒဏ်ရာရရှိပြီး ဆေးရုံတင်ထားရတယ်လို့ ကျေးရွာဒေသခံတွေက ပြောပါတယ်။

ရဲစခန်းအတွင်းက ပစ်လိုက်တဲ့ လက်နက်ကြီးကျည်ဟာ မအူပန်းခြံအနီးက ဆိုင်တစ်ဆိုင်အနီးမှာ ကျရောက်ပေါက်ကွဲတာလို့ ဒေသခံတဦးက ပြောပါတယ်။

“ညက ပေါက်ကွဲတာပါ။ လက်နက်ကြီးတင်မကဘူး လက်နက်ငယ်တွေနဲ့ရော ရဲစခန်းထဲက ပစ်ဖောက်ကြတယ်။ လက်နက်ကြီးတစ်ခုက ပန်းခြံနားက ဆိုင်ရှေ့မှာ ကျပေါက်ကွဲသွားတာ ဆိုင်ထဲမှာ အိပ်ပျောနေတဲ့ ဦးအေးလွင်က ဗိုက်မှာ ထိမှန်သွားတယ်။ ဒဏ်ရာက ပြင်းထန်တော့ မုံရွာဆေးရုံကိုပို့ထားတယ်။ စိုးရိမ်ရတယ်လို့ ပြောတယ်။ လက်နက် ကြီးငယ်တွေနဲ့ New Year ညမှာ သူတို့တပ်စွဲထားတဲ့ မြို့ထဲကနေရာတွေမှာလည်း ပစ်ဖောက်ကြတယ်။” 

ပြီးခဲ့တဲ့နှစ် နိုဝင်ဘာ ၁၈ ရက်နေ့ကလည်း မအူရဲကင်းစခန်းကို ရေစကြို ပြည်သူ့ကာကွယ်ရေးတပ်ဖွဲ့တွေက မီးရှို့ဖျက်ဆီး တိုက်ခိုက်သိမ်းပိုက်ခဲ့ပြီး ရဲ ၂ ယောက်ရဲ့ သေနတ်တွေ သိမ်းဆည်းရမိခဲ့ပါသေးတယ်။

ရေစကြိုမြို့ ရေလယ်ကျွန်းကျေးရွာမှာ သောင်တင်နေတဲ့ ကျောက်စိမ်းတင် ရေယာဉ် ၂ စီးပေါ် ပါလာတဲ့ စစ်ကောင်စီတပ်က ကျေးရွာတွေအတွင်းကို  ဇန်နဝါရီ ၁ ရက် မနက်အစောပိုင်းက လက်နက်ကြီးငယ်တွေနဲ့ ပစ်ခတ်ခဲ့တယ်လို့ သိရပါတယ်။

ပစ်ခတ်တာကြောင့် ချင်းယားကျေးရွာက ပြည်သူတွေ မိုးကွဲကျေးရွာကို ရှောင်တိမ်းထွက်ပြေးကြပြီး ညောင်ပင်ကျေးရွာက ပြည်သူတွေဟာလည်း ငတရော်ကျေးရွာ ဘက်ကို ထွက်ပြေးတိမ်းရှောင်ကြတယ်လို့ သိရပါတယ်။

4 weeks Ago

December 30, 2021

မကွေးမြို့တွင် လျှပ်စစ်ထရမ်စဖော်မာ ၁ ခု ဗုံးခွဲခံရ

မကွေးတိုင်း၊ မကွေးမြို့၊ ဗိုလ်ချုပ်လမ်းက မြို့နယ်လျှပ်စစ်ရုံးဝန်းအတွင်း၊ လမ်းဘေးရုံး ခြံစည်းရိုးအနီးမှာရှိတဲ့ လျှပ်စစ်ဓာတ်အားပေး ထရမ်စဖော်မာမှာ ဒီဇင်ဘာ ၃၀ ရက်နေ့ မနက် ၄ နာရီခွဲဝန်းကျင်က ဗုံး ၁ လုံးပေါက်ကွဲခဲ့တယ်လို့ သိရပါတယ်။

မကွေးမြို့ဒေသခံတဦးက “ဗုံးကွဲသံကြားရပြီး ဗိုလ်ချုပ်လမ်းတလျှောက်က ရုံးတွေနဲ့ အိမ်တွေ မီးပျက်သွားတယ်။ ဘယ်တတ်နိုင်မလဲ၊ ကလေးတွေကိုလည်း အပြစ်မမြင်ရက်ပါဘူး။ ကျနော်တို့ကကို ရုံးတွေကိုပေးတဲ့ ထရမ်စဖော်မာက မီးယူမိနေတာကိုးဗျ'' လို့ ပြောပါတယ်။

ဗုံးပေါက်ကွဲမှုကြောင့် ထရမ်စဖော်မာနဲ့ ဆက်စပ်ပစ္စည်းတွေ ပျက်စီးသွားတယ်လို့ မြို့နယ်လျှပ်စစ်ရုံးရဲ့ တာဝန်ကျဝန်ထမ်းတဦးက ပြောပါတယ်။

“၃၁၅ ကေဗွီအေ ထရန်စဖော်မာနဲ့ ဆက်စပ်ပစ္စည်းတွေ ပျက်စီးသွားပြီး မီးပြန်လည်ပို့လွှတ်နိုင်ရေးကို အမြန်ဆုံးဆောင်ရွက်နေပါတယ်။” 

အဆိုပါဗုံးခွဲတိုက်ခိုက်မှုကို ဘယ်အဖွဲ့က ပြုလုပ်သွားတယ်ဆိုတာတော့ ထုတ်ပြန်ကြေညာထားတာ မရှိသေးပါဘူး။

အခုဗုံး ဖောက်ကွဲတဲ့ မြို့နယ်လျှပ်စစ်ရုံးအနီးမှာ စစ်ကောင်စီရဲ့တိုင်းရဲတပ်ဖွဲ့မှူးရုံး၊ အစိုးရအဖွဲ့တွေအပြင် အခြားဌာနဆိုင်ရာရုံးတွေ တည်ရှိနေတာလို့ ဒေသခံတွေဆီကသိရပါတယ်။

4 weeks Ago

မကွေးနှင့် စစ်ကိုင်းတိုင်းတွင် စစ်တပ်ကအင်အားအများအပြားဖြင့် ထိုးစစ်ဆင်နေသဖြင့် ဒေသခံ ထောင်ချီ ထွက်ပြေး

မကွေးတိုင်းဒေသကြီး ရေစကြိုမြို့နယ်၊ စစ်ကိုင်းတိုင်းဒေသကြီး မြောင်မြို့နယ်စပ်ကြားနဲ့ ကလေးမြို့နယ်တို့မှာ စစ်ကောင်စီတပ်တွေ အင်အားအများအပြားနဲ့ ထိုးစစ်ဆင်နေပြီး ပေါက်ကွဲမှုတွေ ဆက်တိုက်ဖြစ်နေတဲ့အတွက် ဒေသခံ ထောင်ချီ ထွက်ပြေးတိမ်းရှောင်နေကြရတယ်လို့ သိရပါတယ်။

ဒီဇင်ဘာ ၂၉ ရက်နေ့က မြောင်မြို့နယ် ဇီးကျွန်းကျေးရွာကို ရောက်ရှိနေတဲ့ စစ်ကောင်စီတွေဟာ ဒီဇင်ဘာ ၃၀ ရက်နေ့ မနက် ၈ နာရီ ဝန်းကျင်မှာ ရေစကြိုမြို့ မြေနုကျွန်း ကျေးရွာတွေဘက်ကို ရောက်ရှိလာပြီး စက်လှေ ၃ စီးနဲ့ မြစ်တွင်းမြစ်ရိုးအတိုင်း ဆန်တက်လာခဲ့တာလို့ ဒေသခံတွေက ပြောပါတယ်။

“မနက် အစောလောက်က ရွှေတချောင်းဝန်းကျင်က မြေနုကျွန်းတွေဘက်ကို စက်လှေ ၃ စီးနဲ့လာကြတယ်။ သူတို့ရောက်လာပြီးတော့ ပေါက်ကွဲသံတွေ အုန်းအုန်း ဒိုင်းဒိုင်းနဲ့ သေနတ်ပစ်သံတွေရော ကြားတော့ အနီးကျင်းရွာတွေ အကုန်ထွက်ပြေးကြတာပေါ့၊ အနီးဝန်းကျင်က ကျေးရွာတွေ အကုန်ပါပဲ ထွက်ပြေးကြရတာ။ မနေ့ကလည်း တိုက်ပွဲဖြစ်တယ် ရွာခံတွေလည်း မြေစာပင်ဖြစ်နေရတာပါ။ အခု စခတွေက ရောက်လာလိုက် အခုပစ်ဖောက်လိုက် ရွာခံတွေလည်း အခုထွက်ပြေးလိုက်၊ နည်းနည်းကြာရင် အခြေအနေလေးကြည့်ပြီးပြန်လာလိုက်နဲ့” လို့ ဒေသခံတစ်ဦးက ပြောပါတယ်။

ရေစကြိုမြို့နယ် ဝါယာအုပ်စု ကျောက်ခတ်ကျေးရွာကို  ဒီဇင်ဘာ ၃၀ ရက်နေ့ မနက် ၁၁ နာရီခွဲလောက်မှာ စစ်ကောင်စီတပ် အင်အား ၂၀ လောက်နဲ့ ဝင်ရောက်လာတာကြောင့်  ကျေးရွာဒေသခံတွေ ထွက်ပြေးတိမ်းရှောင်နေကြရပြီး မထွက်ပြေးနိုင်သူတွေကို  စစ်ဆေးမေးမြန်းတာတွေ ပြုလုပ်နေတယ်လို့ ကျေးရွာဒေသခံတွေက ပြောပါတယ်။

ရေစကြိုမြို့နယ် ဆင်မရဲကျေးရွာကိုလည်း ဒီနေ့မနက် ၁၀ နာရီခွဲလောက်မှာ ဖောကား ၄ စီးနဲ့ စစ်ကောင်စီအင်အား ၁၀၀ ကျော် အလုံးအရင်းနဲ့ ဝင်ရောက်လာတယ်လို့ ဒေသခံတွေက ပြောပါတယ်။

ရေစကြိုမြို့နယ် မအူအုပ်စုမှာလည်း စစ်ကောင်စီက အင်အား ၂၀ လောက်နဲ့  တပ်စွဲထားပြီး ဒီဇင်ဘာ ၂၉ ရက်နေ့ နေ့လယ်ပိုင်း ကင်းလှည့်စဉ် ရေစကြို၊ ချောင်းဦးနဲ့ မြင်းခြံ ဒေသခံ ပြည်သူ့ကာကွယ်ရေးတပ်ဖွဲ့တွေ စုပေါင်းပြီး မိုင်းဆွဲတိုက်ခိုက်ခဲ့တာကြောင့် တပ်သား ၇ ဦးသေဆုံးခဲ့တယ်လို့ N- Yso ပြောက်ကျားတပ်ဖွဲ့က သိရပါတယ်။

ဒီဇင်ဘာ ၃၀ ရက်နေ့မှာ ရေစကြို - ချောင်းဦးလမ်းပိုင်းကို စစ်ကောင်စီ ကားတွေက လှုပ်ရှားသွားလာနေတဲ့အတွက် ယာဉ်တွေ ဖြတ်သန်းသွားလာခြင်းမလုပ်ဖို့  N- Yso ပြောက်ကျားတပ်ဖွဲ့က  ထုတ်ပြန်ထားပါတယ်။

စစ်ကိုင်းတိုင်း ကလေးမြို့နယ်အတွင်း ရွာလေးရွာကိုလည်း ဒီဇင်ဘာ ၂၉ ရက်နေ့က စစ်ကောင်စီတပ်တွေ ထိုးစစ်ဆင်လာသောကြောင့် ဒေသခံပြည်သူ ထောင်ကျော်ထွက်ပြေးနေရတယ်လို့ သိရပါတယ်။

“စစ်ကောင်စီတပ်က နတ်ချောင်း၊ ချောင်းခွ၊ ဟားခါးလေး၊ ရေစို နဲ့ ပန်းမွန်ချောင်း ကျေးရွာတွေက စစ်ကြောင်းထိုးတယ်၊ လက်နက်ကြီးတွေနဲ့ ပစ်ခတ်တဲ့အတွက် ကျနော်တို့ ဒေသခံတွေ ဘေးလွတ်ရာထွက်ပြေးနေတယ်” လို့ ဒေသခံတစ်ဦးက ပြောပါတယ်။

ဘေးလွတ်ရာ ထွက်ပြေးတိမ်းရှောင်နေရတဲ့ ပြည်သူတွေကို ကလေး PDF   CNDF ၊ Zomi PDF နဲ့ ပြည်သူ့ကာကွယ်ရေးပူးပေါင်းတပ်တွေက စောင့်ရှောက်ပေးနေတယ်လို့ သိရပါတယ်။

4 weeks Ago

မကွေးနှင့် စစ်ကိုင်းတိုင်းတို့တွင် စစ်ကောင်စီတပ် ယာဉ်တန်းများ တိုက်ခိုက်ခံရ

မကွေးတိုင်းနဲ့ စစ်ကိုင်းတိုင်းတို့မှာ ဒီဇင်ဘာ ၂၉ ရက်နေ့က စစ်ကောင်စီတပ် ယာဉ်တန်းတွေ မိုင်းဆွဲတိုက်ခိုက်ခံရပြီး သေဆုံးဒဏ်ရာရသူများတယ်လို့ သိရပါတယ်။

မကွေးတိုင်း၊ ဂန့်ဂေါမြို့ဘက်ကနေ ကလေးမြို့ဘက်ကို စစ်ကြောင်းထိုးလာတဲ့ စစ်ယာဥ်တန်းကို ဒီဇင်ဘာလ ၂၉ ရက်နေ့မှာ PDF-ဂန့်ဂေါ တပ်ခွဲ (၂၁) ဗိုလ်ရွှေကျားအဖွဲ့က မိုင်တိုင်အမှတ် ၃၂ နားမှာ မိုင်းဆွဲတိုက်ခိုက်ခဲ့ရာ စစ်ကောင်စီတပ်သား ၃ ယောက် သေဆုံးခဲ့တယ်လို့ PDF-ဂန့်ဂေါရဲ့ ပြန်ကြားရေးတာဝန်ခံက ပြောပါတယ်။

ဒါ့အပြင် PDF-ဂန့်ဂေါ တပ်ခွဲ ၇ နွေဦးအဖွဲ့ကလည်း မိုင်တိုင်အမှတ် ၃၄ နားမှာ စစ်ယာဥ်တန်းကို မိုင်းဆွဲတိုက်ခိုက်ခဲ့ရာ စစ်ကောင်စီဘက်က တပ်ကြပ်ကြီး တစ်ယောက်အပါအဝင် ၆ ယောက်သေဆုံးခဲ့တယ်လို့ ဆိုပါတယ်။

မိုင်တိုင်အမှတ် ၃၅ နားမှာတော့ PDF-ဂန့်ဂေါ တပ်ခွဲ ၃ က ဗိုလ်မြတ်ထွန်းဦးဆောင်တဲ့ အဖွဲ့က မိုင်းဆွဲတိုက်ခိုက်ခဲ့ရာ စစ်ကားတစ်စီး ထိခိုက်ပျက်စီးသွားတယ်လို့ပြောပါတယ်။

စစ်ကောင်စီတပ်တွေဘက်က ပြန်လည်ပစ်ခတ်ပေမဲ့ PDF တပ်ဖွဲ့ဝင်တွေ အထိခိုက်အကျဆုံး မရှိဘဲ ဘေးအန္တရာယ်ကင်းကင်းနဲ့ ဆုတ်ခွာနိုင်ခဲ့တယ်လို့ဆိုပါတယ်။

ဂန့်ဂေါ-ကလေး ကားလမ်းပိုင်းမှာ ဒီဇင်ဘာလ ၂၆ ရက်နေ့ကစလို့ တော်လှန်ရေး အင်အားစုတွေနဲ့ စစ်ကောင်စီတပ်တွေ တိုက်ပွဲပြင်းထန်နေပြီး စစ်ကောင်စီတပ်တွေက လက်နက်ကြီးတွေနဲ့ ရမ်းသမ်းပစ်ခတ်နေတာကြောင့် အသွားလာဆင်ခြင်ကြဖို့နဲ့ အန္တရာယ်ကင်းစွာနေထိုင်ကြဖို့ သတိပေးထားပါတယ်။

စစ်ကိုင်းတိုင်း၊ ပုလဲမြို့နယ်၊ နဂါးမတောင် ကျေးရွာရဲ့ အနောက်ဘက် စိမ်းစိုရုံးအနီးမှာလည်း ဒီဇင်ဘာ ၂၉ ရက်နေ့၊ မွန်းလွဲ ၂ နာရီဝန်းကျင်က စစ်ကား အစီး ၄၀ ကျော်ပါတဲ့ယာဉ်တန်း မိုင်းဆွဲတိုက်ခိုက်ခံရတာကြောင့် စစ်ကောင်စီတပ်သား ၉ ယောက်ထက်မနည်းသေဆုံးပြီး အများအပြား ဒဏ်ရာရရှိသွားကြတယ်လို့ သိရပါတယ်။

ပုလဲပြည်သူ့တော်လှန်ရေးတပ်မတော် PRA တာဝန်ခံ ဗိုလ်ဂျပန်က “ကျနော်တို့ ပုလဲပြည်သူ့တော်လှန်ရေးတပ်မတော် PRA က တပ်ခွဲ ၉ က ဗိုလ်ဂျိုဝါး နဲ့ တပ်ခွဲ ၁၄ က ဗိုလ်ငတေတို့အဖွဲ့က ပဒေသာမိုင်းဆွဲတိုက်ခိုက်ခဲ့ပြီး မိနစ် ၂၀ လောက်အပြန်အလှန် ပစ်ခတ်တိုက်ပွဲဖြစ်ပွားခဲ့တာပါ” လို့ အတည်ပြုပြောပါတယ်။

အဆိုပါ ယာဉ်တန်းဟာ မကွေးတိုင်း၊ ကျောမြို့၊ ကပစ-၂၃ က နေ ထွက်ခွာလာတဲ့ ယာဉ်တန်းဖြစ်ပြီး ဒီဇင်ဘာ ၂၇ ရက်နေ့၊ နေ့လယ်ပိုင်းက ပုလဲ-ဂန့်ဂေါလမ်းပေါ်မှာ ပြည်သူ့တော်လှန်ရေးတပ်မတော် PRA ရဲ့ တပ်ခွဲ ၂၊ တပ်ခွဲ ၁၇ တို့က မိုင်းဆွဲတိုက်ခိုက်ခဲ့ပြီး အပြန်အလှန်ပစ်ခတ်တိုက်ပွဲဖြစ်ပွားခဲ့တာကြောင့် စစ်ကောင်စီတပ်သား ၇ ယောက်ထက်မနည်း သေဆုံးပြီး အများအပြားဒဏ်ရာရခဲ့သေးတယ်လို့ ဆက်လက်ပြောပြပါတယ်။

ဒီဇင်ဘာ ၂၇ ရက်နေ့နဲ့ ဒီဇင်ဘာ ၂၉ ရက်နေ့တွေမှာ စစ်ယာဉ်တန်းကို မိုင်းဆွဲတိုက်ခိုက်ပြီး ထိတွေ့တိုက်ပွဲတွေမှာ ပြည်သူ့ကာကွယ်ရေးတပ်ဖွဲ့တွေဘက်က အထိအခိုက်မရှိခဲ့ဘူးလို့လည်း သိရပါတယ်။

မကွေးနဲ့ စစ်ကိုင်းတိုင်းတို့မှာ မိုင်းဆွဲတိုက်ခိုက်ခံရမှုနဲ့ အပြန်အလှန်ပစ်ခတ်တိုက်ခိုက်မှုတွေကို စစ်ကောင်စီဘက်က သတင်းထုတ်ပြန်ထားတာမရှိသလို အသေးစိတ်သိရှိနိုင်ဖို့ ဒီဗွီဘီက ဆက်လက်စုံစမ်းနေပါတယ်။

4 weeks Ago
More News
Up