မက္ကဆီကိုနိုင်ငံ

August 21, 2021

မက္ကဆီကိုနိုင်ငံတွင် ရေဒီယိုသတင်းထောက် ၁ ဦးအသတ်ခံရ

မက္ကဆီကိုနိုင်ငံ၊ ပင်လယ်ကမ်းခြေဒေသ၊ ဗဲယ်ရာခရုဇ်ပြည်နယ်၊ အယ်ရိုက်ဇဘာမြို့မှာ အမည်မသိတိုက်ခိုက်သူတွေကြောင့် ရေဒီယိုသတင်းထောက်တဦး သူ့ရဲ့နေအိမ်အပြင်ဘက်မှာ အသတ်ခံခဲ့ရတယ်လို့ ဒေသအာဏာပိုင်တွေက သြဂုတ် ၁၉ ရက်က ပြောပါတယ်။

အိုရီစတီရီယို ရေဒီယိုဌာနရဲ့ ပြည်တွင်းနိုင်ငံရေးသတင်းတွေ တင်ဆက်ပေးနေတဲ့  သတင်းထောက် ဟာစင်တို ရိုမဲရိုဟာ အိစ်တခ်ဂျိုကိတလန် မြူနီစီပယ်နယ်မြေအနီးမှာ မနက်ပိုင်း တိုက်ခိုက်ခံရပြီးနောက် သေဆုံးသွားတာလို့ အာဏာပိုင်တွေက ပြောကြားခဲ့ပါတယ်။ 

ရိုမဲရိုဟာ သူ့ရဲ့မော်တော်ယာဉ်နဲ့ မြို့ကိုဖြတ်ပြီး မောင်းနေတုန်း တိုက်ခိုက်ခံရတာလို့ ဒေသခံမီဒီယာတွေမှာ ဖော်ပြကြပါတယ်။ 

ရိုမဲရိုဟာ သူ့ရဲ့အလုပ်တာဝန်နဲ့ပတ်သက်ပြီး ခြိမ်းခြောက်မှုတွေ လက်ခံရရှိခဲ့တယ်လို့ အမည်မဖော်လိုတဲ့ ရေဒီယိုဌာန ပြောခွင့်ရအမျိုးသမီးတယောက်က ရိုက်တာကို ပြောကြားပါတယ်။

သတင်းထောက်တွေကို အကာအကွယ်ပေးဖို့ ရည်ညွှန်းဖွဲ့စည်းထားတဲ့ အကျိုးအမြတ်မယူတဲ့အဖွဲ့ Article-19 ရဲ့ စာရင်းအရ သတင်းထောက်ဆိုတဲ့ အလုပ်အကိုင်ကြောင့် ၂၀၀၀ ပြည့်နှစ်ကတည်းက တိုင်းပြည်မှာ သတင်းထောက် ၁၄၁ ယောက် အသတ်ခံခဲ့ရပြီး ဒီစာရင်းထဲမှာ ဟာစင်တို ရိုမဲရိုကို မထည့်ရသေးပါဘူး။

ဂျာနယ်လစ်တွေအပေါ် အကြမ်းဖက်မှုကို မရပ်တန့်စေတဲ့ အဓိကအကြောင်းရင်းတခုကတော့ ပြစ်မှုကျူးလွန်သူတွေဟာ သူတို့အပြစ်ပေးမခံရဘူးဆိုတာ သိနေလို့ပဲလို့ ဂျာနယ်လစ် ဟွမ်ဟိုဆေး အင်န်ရိကေးက ပြောပါတယ်။ 

သူတို့ကို ဘယ်သူမှ ဘာမှ လုပ်မပေးဘူး။ အခု ဒီကိုရောက်နေတဲ့ သတင်းသမားတွေအများကြီးဟာ အာဏာပိုင်တွေနဲ့ လူမှုအသိုင်းအဝိုင်းက ဖယ်ကြဉ်ထားသလို ခံစားကြရတယ်လို့လည်း ဆိုပါတယ်။ အစိုးရအဖွဲ့အစည်းတွေက သတင်းထောက်တွေကို မကာကွယ်ဘူး၊ သူတို့က အလုပ်မလုပ်ကြဘူး လို့လည်း ပြောသွားပါတယ်။

2 months Ago

August 3, 2020

မက္ကဆီကိုနိုင်ငံတွင် သတင်းထောက် ၁ ဦးကို သေနတ်သမားများ အသေပစ်သတ်

မက္ကဆီကိုနိုင်ငံ အနောက်တောင်ပိုင်းက ဂွါရဲရိုပြည်နယ် အစ်ဂွါလာမြို့ထဲမှာ သေနတ်သမားတွေက သတင်းထောက်တယောက်ကို သြဂုတ် ၂ ရက်က အသေပစ်သတ်ခဲ့တယ်လို့ ဒေသခံ အာဏာပိုင်တွေက ပြောပါတယ်။ ပီအမ်နိုတစ်စီးယပ်စ် အင်တာနက်သတင်းဌာနက ပါဘလို မောရူဂါရက်ဇ်ဟာ ရဲသက်တော်စောင့်တယောက်နဲ့အတူ သန်းခေါင်ကျော်အချိန်မှာ အစ်ဂွါလာ စားသောက်ဆိုင်ထဲ  ညစာ စားနေတုန်း ဘယ်သူဘယ်ဝါ မသိတဲ့သူတွေက သူတို့ကို ပစ်သတ်ခဲ့တာလို့ ဂွါရဲရိုပြည်နယ် အစိုးရရှေ့နေတွေက ကြေညာချက် ထုတ်ပြန်ပါတယ်။ သတ်ဖြတ်မှုနဲ့ပတ်သက်ပြီး သူ့သတင်းဌာနနဲ့ ဂါရဲရိုပြည်နယ် လူ့အခွင့်အရေးကော်မရှင်တို့ကလည်း ဖေ့စ်ဘွတ်ခ်ပေါ်မှာ ကြေညာချက် ထုတ်ပြန်ပါတယ်။ “သတင်းထောက်နဲ့အတူ သက်တော်စောင့်ပါ သေဆုံးတယ်။ သတင်းထောက်ဟာ ၂၀၁၆ ခုနှစ်ကလည်း လုပ်ကြံခံရဖူးပြီး ရှင်သန်လွတ်မြောက်ခဲ့တယ်” လို့ ဒေသခံ အရာရှိတယောက်က ပြောပါတယ်။ ပစ်ခတ်ရတဲ့ အကြောင်းရင်းကို ရှင်းရှင်းလင်းလင်း မသိရသေးပါဘူး။ ဂွါရဲရိုပြည်နယ်ဟာ မက္ကဆီကိုနိုင်ငံအတွင်း အကြမ်းဖက်မှု အများဆုံး ပြည်နယ်တွေထဲက တခုပါ။  ဒါဟာ မက်ဆီကိုနိုင်ငံအတွင်း ဒီနှစ်ထဲမှာ လေးယောက်မြောက် သတင်းထောက် အသတ်ခံရမှုလို့ နယ်စည်းမခြား သတင်းထောက်များအဖွဲ့က ပြောပါတယ်။
1 year Ago
More News
Up