ဘဏ္ဍာရေးဝန်ကြီးဌာန

December 1, 2015

ပြည်ပကြွေးမြီ ဒေါ်လာသန်း ၉၀၀၀ ကျော်ရှိနေဟု ဘဏ္ဍာရေးဝန်ကြီး ရှင်းလင်း

မြန်မာနိုင်ငံရဲ့ ပြည်ပကြွေးမြီဟာ ၂၀၁၅ ခုနှစ် ဇွန်လကုန်အထိ အမေရိကန်ဒေါ်လာ သန်း ၉၀၀၀ ကျော်ရှိတယ်လို့  ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးဝင်းရှိန်က ပြောပါတယ်။ နိုဝင်ဘာ ၃၀ ရက်နေ့က ကျင်းပတဲ့ ပြည်ထောင်စုလွှတ်တော် အစည်းအဝေးမှာ ပြည်တွင်းအခွန်များ ဦးစီးဌာနရဲ့ ခြောက်လပတ် အခွန်ကောက်ခံရရှိမှု နှိုင်းယှဉ်ချက်နဲ့ ပြည်ပကြွေးမြီ ကိစ္စတွေနဲ့ ပတ်သက်လို့ ဘဏ္ဍာရေးဝန်ကြီးက ရှင်းလင်းပြောကြားသွားတာပါ။ ပြည်ပနိုင်ငံတွေကနေ ၁၉၈၈ မတိုင်ခင်က ရယူခဲ့တဲ့ ချေးငွေ အမေရိကန်ဒေါ်လာ ၄၂၆၆ သန်း၊ ၁၉၈၈-၈၉ ကနေ ၂၀၁၀-၁၁ အထိ စာချုပ်ချုပ်ဆို ချေးယူခဲ့တဲ့ ချေးငွေက ဒေါ်လာ ၃၃၃၁ သန်းနဲ့ ၂၀၁၁-၁၂ ခုနှစ် နောက်ပိုင်းမှာ အမေရိကန်ဒေါ်လာ ၁၅၀၂ သန်း ချေးယူခဲ့တယ်လို့ ဆိုပါတယ်။ ဘဏ္ဍာရေးဝန်ကြီး ဦးဝင်းရှိန်က "ပြည်ပချေးငွေနဲ့ ဆောင်ရွက်တဲ့ စီမံကိန်းတွေရဲ့ အကောင်အထည်ဖော်မှုအလိုက်၊ အချိန်ကာလအလိုက်၊ ချေးငွေများ ထပ်မံထုတ်ယူ သုံးစွဲတာတွေ၊ အရင်းပြန်လည်ပေးဆပ်တာတွေ၊ ငွေလဲလှယ်နှုန်းပမာဏ ပြောင်းလဲတာတွေကြောင့် ပြည်ပကြွေးမြီ စာရင်းဟာလည်း အချိန်နဲ့အမျှ ပမာဏ ပြောင်းလဲမှုရှိတယ်" လို့  ပြောပါတယ်။ ကမ္ဘာ့နိုင်ငံတိုင်းဟာ နိုင်ငံဖွံ့ဖြိုးတိုးတက်ရေးနဲ့ နိုင်ငံအကျိုးစီးပွား ဖြစ်ထွန်းရေးအတွက် ပြည်ပချေးငွေ ရယူလုပ်ဆောင်ကြတဲ့အကြောင်း၊ မြန်မာနိုင်ငံအနေနဲ့လည်း နိုင်ငံဖွံ့ဖြိုးတိုးတက်ရေးအတွက် ပြည်ပချေးငွေတွေကို စိစစ်ရယူတာ၊ ကြွေးမြီစီမံခန့်ခွဲမှုကို စနစ်တကျ ဆောင်ရွက်တာတွေ လုပ်ဆောင်နေကြောင်းနဲ့ ပြည်ပချေးငွေ အများစုဟာ တလုံးတခဲတည်း ရတာမဟုတ်ဘဲ စည်းကမ်းသတ်မှတ်ချက်နဲ့အညီ လုပ်ငန်း အကောင်အထည်ဖော်မှုအပေါ် မူတည်ပြီး ချေးငွေထုတ်ယူရရှိ သုံးစွဲနေတယ်လို့လည်း ၀န်ကြီးက ပြောသွားပါတယ်။ အခုအခါ ပြည်သူ့ကြွေးမြီ စီမံခန့်ခွဲမှု ဥပဒေမူကြမ်းကိုလည်း ရေးဆွဲပြုစုပြီး ပြည်ထောင်စုလွှတ်တော်ကို တင်ပြထားပြီ ဖြစ်ပါတယ်။
6 years Ago

November 26, 2015

အခွန်ကောက်ခံရရှိမှု ယမန်နှစ်နှင့်ယှဉ်လျှင် လျော့နည်း

မနှစ်က ပထမ ၆ လပတ်နဲ့ ယှဉ်မယ်ဆိုရင် ဒီနှစ်မှာ ပြည်ထောင်စုရဲ့ အခွန်ဝင်ငွေဟာ ကျပ်သန်းပေါင်း တသိန်းခုနစ်သောင်းကျော် လျော့နည်း ရရှိခဲ့ပါတယ်။ ၂၀၁၅-၁၆ ခုနှစ် ပထမ ၆ လပတ် အခွန်ကောက်ခံရရှိတာနဲ့ ပတ်သက်ပြီး နိုဝင်ဘာ ၂၄ ရက် ပြည်ထောင်စုလွှတ်တော်မှာ ဘဏ္ဍာရေးဝန်ကြီးဌာန ပြည်ထောင်စုဝန်ကြီးက လာရောက်ရှင်းလင်းခဲ့တာပါ။ ၂၀၁၄-၁၅ ဘဏ္ဍာနှစ် ပထမ ၆ လမှာ အခွန်ရရှိမှုက ကျပ်ဘီလျံ ၂၅၂၉ ဒသမ ၀၁ သန်းဖြစ်ပြီး ၂၀၁၅-၁၆ ပထမ ၆ လပတ်မှာတော့ ၂၃၅၇ ဒသမ ၈ ဘီလျံ ဖြစ်ပါတယ်။ "ဒီလို နှိုင်းယှဉ်ကြည့်မယ်ဆိုလို့ရှိရင် ပမာဏအနေနဲ့ ကွဲပြားခြားနားမှု ရှိပါတယ်။ ဒါပေမယ့် လျာထားချက်ထက် အကောင်အထည်ဖော်နိုင်မှု ရာခိုင်နှုန်းအနေနဲ့ တိုးတက်လာတဲ့ အနေအထား ရှိပါတယ်" လို့်  ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးဝင်းရှိန်က ပြောပါတယ်။ ကောက်ခံရရှိတာမှာ ၀င်ငွေနဲ့ ပိုင်ဆိုင်မှုအပေါ် ကောက်တဲ့အခွန်နဲ့ ၀င်ငွေခွန်ကတော့ အများဆုံးဖြစ်ပါတယ်။ ကုန်သွယ်လုပ်ငန်းခွန်၊ ရေနံနဲ့ သဘာဝဓာတ်ငွေ့ ထုတ်ယူတဲ့အပေါ် ကောက်ခံတဲ့ အခွန် စတာတွေကတော့ လျော့နည်းခဲ့တာပါ။ လျှပ်စစ်ဓာတ်အားထုတ်ယူတဲ့အတွက် ကောက်တဲ့အခွန်၊ သွင်းကုန်အတွက် ကောက်တဲ့လိုင်စင်ခ စတာတွေကတော့ လျာထားတာထက် တိုးလာခဲ့ပါတယ်။ ဒီလို အခွန်ငွေရရှိတဲ့ အခြေအနေအပေါ် လာမယ့် ပြည်ထောင်စုလွှတ်တော်မှာ ကိုယ်စားလှယ်တွေက ဆွေးနွေးသွားဖို့ ရှိနေပါတယ်။
6 years Ago
Up