ဘူးသီးတောင်မြို့နယ်

June 18, 2020

ဘူးသီးတောင်မြို့နယ်တွင် ကိုဗစ်-၁၉ ရောဂါအတည်ပြုလူနာ ၃ ဦးအထိ ရှိလာ

ရခိုင်ပြည်နယ်၊ ဘူးသီးတောင်မြို့နယ်မှာ ကိုဗစ်-၁၉ ရောဂါပိုးတွေ့ရှိသူ အတည်ပြုလူနာ  ၃ ဦးအထိ ရှိလာပြီဖြစ်တယ်လို့  ဘူးသီးတောင်မြို့နယ် ကျန်းမာရေးဌာနကနေ သိရပါတယ်။ ဘူးသီးတောင်မြို့နယ်အုပ်ချုပ်ရေးမှူး ဦးရွှေလှအောင်က “အခု တတိယမြောက် ပိုးတွေ့သူက ဒုတိယမြောက် ကိုဗစ်-၁၉ ရောဂါပိုး တွေ့ရှိသူ လူနာအမှတ် ၂၆၂ နဲ့ ထိတွေ့ခဲ့တဲ့ ကျီးနှုတ်သီးကျေးရွာက လူရဲ့သမီး ဖြစ်တယ်” လို့ အတည်ပြုပြောပါတယ်။ ဘူးသီးတောင်မြို့မှာ တတိယမြောက် ပိုးတွေ့သူ လူနာအမှတ် ၂၆၃ ဟာ ဒုတိယမြောက် ကိုဗစ်-၁၉ ရောဂါပိုးတွေ့ရှိသူ လူနာအမှတ် ၂၆၂ နဲ့ ထိတွေ့ခဲ့သူဖြစ်ကြောင်း ကျန်းမာရေးနှင့် အားကစားဝန်ကြီးဌာနကလည်း ဒီနေ့မနက်  တရားဝင်သတင်းထုတ်ပြန်ထားပါတယ်။ လူနာအမှတ် ၂၆၃ ဟာ အသက် ၁၇ နှစ်အရွယ် အမျိုးသမီးတစ်ဦးဖြစ်ပြီး  မောင်တောမြို့ရှိ လှဖိုးခေါင်ယာယီပြန်လည်လက်ခံရေးစခန်း Facility Quarantine စင်တာမှာ ရှိနေကာ မောင်တောခရိုင်ပြည်သူ့ဆေးရုံကို ပို့ဆောင်ပြီး ဆေးကုသပေးမယ်လို့ ခရိုင်ကျန်းမာရေးဌာနက သိရပါတယ်။ အဆိုပါလူနာသစ် အမျိုးသမီးရဲ့ဖခင်ဖြစ်တဲ့ ကိုဗစ်-၁၉ လူနာအမှတ် ၂၆၂ ဟာ အသက် ၆၃ နှစ်အရွယ် အမျိုးသားတစ်ဦးဖြစ်ပြီး ဘင်္ဂလားဒေ့ရှ်နိုင်ငံ ကူတူပါလောင်ဒုက္ခသည်စခန်းမှာ ဆေးကုသမှုခံယူပြီး မေလဆန်းပိုင်းက ဘူးသီးတောင်မြို့ကို ပြန်လည်ရောက်ရှိလာသူဖြစ်ပါတယ်။ ဇွန် ၅ ရက်နေ့ကမှ အိမ်နီးနားချင်းတွေရဲ့ သတင်းပေးချက်အရ အုပ်ချုပ်ရေးနဲ့ ကျန်းမာရေးဌာနက သိရှိခဲ့တာ ဖြစ်ပါတယ်။ အဲဒီလိုသိရပြီးနောက် ဘူးသီးတောင်မြို့ အမှတ် (၄) ရပ်ကွက်မှာရှိတဲ့ သူ့နေအိမ်ကို ဇွန် ၅ ရက်နေ့မှာ သက်ဆိုင်ရာတာဝန်ရှိသူတွေက သွားရောက်စစ်ဆေးခဲ့ရာမှာ သူနဲ့ မိသားစုဝင်တွေကပါ ဘင်္ဂလားဒေ့ရှ်နိုင်ငံမှာ ဆေးသွားရောက်ကုသတာမရှိဘူးလို့ ငြင်းဆိုနေတဲ့အတွက် ဇွန် ၆ ရက်နေ့မှာ ထပ်မံသွားရောက်စစ်ဆေးရာ ဘူးသီးတောင်မြို့နယ် တောင်ဘဇာကျေးရွာအုပ်စု ကျီးနှုတ်သီးကျေးရွာမှာ ရှိတဲ့ သူ့သမီးနေအိမ်ကို ထွက်ပြေးသွားခဲ့တာလည်း ဖြစ်ပါတယ်။ ဒီနောက် သူ့ကို ကျီးနှုတ်သီးရွာကနေ  ဖမ်းပို့ဖို့ပေးဖို့  အုပ်ချုပ်ရေးဌာနက အမိန့်ထုတ်လိုက်တဲ့အတွက် ဘူးသီးတောင်မြို့ကို ပြန်လည်ထွက်ပြေးလာပါတယ်။ ဇွန်လ ၁၀ ရက်နေ့မှာ သူ့ရဲ့ နှာခေါင်းနဲ့အာခေါင်တို့ဖတ်ယူပြီး ဓာတ်ခွဲစစ်ဆေးရာ ဇွန် ၁၅ ရက်နေ့မနက်မှာ ရောဂါပိုးတွေ့ရှိကြောင်း ကျန်းမာရေးနှင့် အားကစားဝန်ကြီးဌာနက တရားဝင် သတင်းထုတ်ပြန်ထားပါတယ်။ အခု ကူးစက်ခံရသူ လူနာအမှတ် ၂၆၃ ဟာလည်း  ကျီးနှုတ်သီးကျေးရွာကို လာရောက်နေထိုင်ခဲ့တဲ့ ဖခင်ဖြစ်သူ လူနာအမှတ် ၂၆၂ ကတဆင့် ရောဂါပိုးကူးစက်ခံရတာ ဖြစ်ပါတယ်။ လက်ရှိ ရခိုင်ပြည်နယ်အတွင်း ကိုဗစ်-၁၉ ရောဂါပိုးတွေ့ရှိသူ စုစုပေါင်း ၉ ဦးအထိ ရှိနေပါတယ်။ ဘူးသီးတောင်မြို့မှာ ၃ ဦး၊ မောင်တောမြို့မှာ ၄ ဦး တွေ့ရှိထားပြီး သံတွဲမှာ ၁ ဦးနဲ့ တောင်ကုတ်မှာ ၁ ဦး တို့ ဖြစ်ပါတယ်။ သတင်း-လင်းလက်
10 months Ago

ဘူးသီးတောင်မြို့နယ်တွင် ကိုဗစ်-၁၉ ရောဂါ အတည်ပြုလူနာသစ် ၁ ဦးထပ်တွေ့

ရခိုင်ပြည်နယ်၊ ဘူးသီးတောင်မြို့နယ်မှာ ကိုဗစ်-၁၉ ရောဂါ အတည်ပြုလူနာသစ် ၁ ဦး ထပ်မံတွေ့ရှိရတယ်လို့ ကျန်းမာရေးနဲ့ အားကစားဝန်ကြီးဌာနက ဒီနေ့ ဇွန်လ၁၈ ရက်မနက် သတင်းထုတ်ပြန်ပါတယ်။ အဆိုပါလူနာသစ်ဟာ အသက် ၁၇ နှစ်အရွယ်အမျိုးသမီးတစ်ဦးဖြစ်ပြီး ပြည်ပကိုခရီးသွားခဲ့တာ မရှိပေမဲ့ အတည်ပြုလူနာ အမှတ် ၂၆၂ နဲ့ ထိတွေ့မှုရှိခဲ့လို့ မောင်တောမြို့နယ်မှာ အသွားအလာကန့်သတ်ထားရှိခံနေရသူဖြစ်ပါတယ်။ အမျိုးသားကျန်းမာရေးဓာတ်ခွဲမှုဆိုင်ရာဌာန(ရန်ကုန်) (NHL) မှ (ဒုတိယအသုတ်) ဓာတ်ခွဲနမူနာ (၆၅၉)ခု နဲ့ ရန်ကုန်မြို့၊ အမှတ် (၁) တပ်မတော်ဆေးရုံကြီး(ကုတင် - ၁၀၀၀)မှ (ဒုတိယအသုတ်) ဓာတ်ခွဲနမူနာ (၂၃၅)ခု  စုစုပေါင်း (၈၉၄) ခုကို ဒီနေ့ မနက် အစောပိုင်းက စစ်ဆေးပြီးစီးခဲ့ရာမှာ လူနာသစ် တစ်ဦး ထပ်တွေ့ရတာပါ။  ဇွန်လ ၁၈ ရက် မနက် ၈ နာရီအထိ မြန်မာနိုင်ငံမှာ ကိုဗစ်-၁၉ ရောဂါ  အတည်ပြုလူနာ ပေါင်း ၂၆၃ ဦး၊ သေဆုံးသူ ၆ ဦး၊ ရောဂါပိုးကင်းစင်လာသူ  ၁၇၉ ဦးနဲ့ အဲဒီထဲက ၁၆၂ ဦးကို ဆေးရုံမှ ဆင်းခွင့်ပြုခဲ့ပြီးဖြစ်ပါတယ်။
10 months Ago

May 13, 2020

ဘူးသီးတောင်မြို့နယ်တွင် မိုင်းပေါက်ကွဲ၍ သရက်သီးသွားခူးသည့် ကလေးငယ် ၂ ဦးသေ၊ ၁ ဦး ဒဏ်ရာရ

ရခိုင်ပြည်နယ်၊ ဘူးသီးတောင်မြို့နယ်၊ သရက်ပြင်ကျေးရွာကို သရက်သီးကောက်သွားတဲ့ ကလေးငယ် ၃ ဦး မေလ ၁၂ ရက် မနက် ၁၁ နာရီလောက်က မိုင်းနင်းမိ ပေါက်ကွဲကာ ကလေးငယ် ၂ ဦးသေဆုံးပြီး ၁ ဦးဒဏ်ရာရရှိတယ်လို့ ဘူးသီးတောင်မြို့နယ် အုပ်ချုပ်ရေးမှူး ဦးရွှေလှအောင်က ပြောပါတယ်။ "ကလေးတွေက သရက်ပြင်ကျေးရွာကနေ သရက်သီးသွားခူးကြတယ်လို့ သိရတယ်။ အဲဒီ မိုင်းပေါက်ပြီး မိန်းကလေးတဦးနဲ့ ယောကျ်ားလေးတဦး သေသွားတယ်လို့ သိရတယ်။ ကျန်မိန်းကလေး တဦးက ဒဏ်ရာရရှိခဲ့တယ်။ မိုင်းက ဘယ်သူထောင်တာလဲ ဘယ်သိပါမလဲ။ ကိုယ်ဟာကိုယ် လာကြည့်ပါ လို့သာ ပြောရတော့မယ်။ သရက်ပြင်ရွာမှာ အခု လူနေထိုင်တာ မရှိပါဘူး။ အခုကလေးတွေက ရှာကေရွာက ဖြစ်တယ်။" မိုင်းပေါက်ကွဲမှုကြောင့် ရှာကေမွတ်ဆလင်ကျေးရွာနေ ၁၀ နှစ်အရွယ် ရန်ဟဲလ်နာ ဟာ မိုင်းပေါက်ကွဲရာနေရာမှာ ဦးခေါင်းပွင့်ထွက်ဒဏ်ရာနဲ့ သေဆုံးသွားခဲ့ပြီး အဒူလာမိန် (၁၅ နှစ်)ကတော့ ညာဘက်ခြေထောက်ပြတ်ဒဏ်ရာရရှိကာ ဘူးသီးတောင်ဆေးရုံသို့ ပို့ဆောင်စဉ် လမ်းမှာ သေဆုံးသွားခဲ့ပါတယ်။ ဒဏ်ရာရရှိသူ ဖုံညိုလိပ်ကျေးရွာ ရပ်ကွက် ၁၀ မှာနေတဲ့ အသက် ၁၂ နှစ်အရွယ် ရှာကေခါဘေဘီရဲ့ ညာဘက်လက်မောင်းမှာ ဒဏ်ရာရရှိခဲ့ကြောင်း  ရှာကေကျေးရွာ တာဝန်ခံ ဖူလ်ဆီရာမောက်ကလည်း အတည်ပြုပြောပါတယ်။ သရက်ပြင်ကျေးရွာမှာ အိမ်ခြေ ၃၀၀ ကျော်ရှိပြီး၂၀၁၉ ခုနှစ် အောက်တိုဘာ ၅ ရက်နေ့က အေအေနဲ့ စိုင်းတင်တံတားပေါ်မှာ လုံခြုံရေးယူထားတဲ့ ရဲတပ်ဖွဲ့ဝင်တွေ၊ တပ်မတော်တပ်ဖွဲ့တွေနဲ့ တိုက်ပွဲပြင်းထန်စွာဖြစ်ပွားခဲ့ပြီးနောက် သရက်ပြင်ရွာသားတွေဟာ ရွာကထွက်ပြေးပြီး ဒီနေ့အထိ ဘူးသီးတောင်မြို့ပေါ် စစ်ဘေးရှောင်စခန်းတွေမှာ ခိုလှုံနေကြပါတယ်။ ရခိုင်ပြည်နယ်အတွင်း တပ်မတော်နဲ့ အေအေတို့ တိုက်ပွဲဖြစ်ပွားနေတာ ၂ နှစ်ကျော်လောက် ကြာမြင့်လာနေပြီး  စစ်ကျန်လက်နက်တွေ ပေါက်ကွဲမှု၊ ထောင်ထားတဲ့မိုင်းတွေ ပေါက်ကွဲခဲ့တဲ့ အတွက် အရပ်သားထိခိုက် သေဆုံးတာတွေ ပိုမိုမြင့်တက်နေပါတယ်။ သတင်း- လင်းလက်
11 months Ago
More News
Up