ဘူးသီးတောင်

May 27, 2022

ဘူးသီးတောင်မြို့မှ ခမီကျောင်းသား ၁ ဦးအပါအဝင် ၃ ဦး ဆေးတက္ကသိုလ်တက်ခွင့်ရ

ရခိုင်ပြည်နယ်၊ ဘူးသီးတောင်မြို့ကနေ  ၂၀၁၉-၂၀၂၀ ပညာသင်နှစ်မှာ ဂုဏ်ထူးတွေနဲ့ အောင်မြင်ခဲ့ကြတဲ့ ကျောင်းသူ ကျောင်းသား  ၃ ဦးအထိ ဆေးတက္ကသိုလ်တက်ခွင့်ရ ရှိခဲ့ကြတယ်လို့ ဒေသခံတွေထံက သိရပါတယ်။

ဘူးသီးတောင်မြို့ မြို့မိမြို့ဘတဦးက "ဘူးသီးတောင်က ဆရာဝန် ဖြစ်ခဲ့ကြတာတော့ရှိတယ်။ ဒီလို ၃ ယောက်အထိ တပြိုင်တည်း ဆေးကျောင်းတက်ခဲ့ကြတာတော့မရှိခဲ့ဘူး။ ဒီနှစ်ကတော့ ၃ ဦးအထိ ဆေးကျောင်းဝင်တာ ပထမဆုံးအကြိမ်လို့ပြောလို့ ရတယ်။"လို့ ပြောပါတယ်။

ဆေးတက္ကသိုလ်တက်ခွင့်ရသူတွေကတော့  ၆ ဘာသာဂုဏ်ထူးရှင် မောင်မာမတ်အာယစ်၊ ၅ ဘာသာ ဂုဏ်ထူးရှင် မလွင်လွင်ပြုံးနဲ့ ဂုဏ်ထူး ၄ ဘာသာရခဲ့တဲ့ ဂန္ဓာရီ ပရဟိတ္တသင်တန်းကျောင်းမှ ကျောင်းသား မောင်ကျော်သန်းလင်းတို့ ဖြစ်ပါတယ်။

မောင်မာမတ်အာယစ်ဟာ အခု မေလ ၁၂ ရက်ကစပြီး ဆေးတက္ကသိုလ်(၂)မှာ  တက်ရောက်  ပညာသင်ကြားနေပြီလို့လည်း သူ့ရဲ့ အစ်ကိုဖြစ်သူကပြောပါတယ်။

ဂုဏ်ထူး ၄ ဘာသာရှင် ကျောင်းသား မောင်ကျော်သန်းလင်းဟာလည်း  ရမှတ်  ၄၈၅ မှတ်နဲ့ ရန်ကုန်ဆေးတက္ကသိုလ် (၂) မှာ တက်ခွင့်ရရှိ​ခဲ့ပြီး ခမီလူမျိုးတွေထဲမှာ ပထမဆုံးအကြိမ် ဆေးတက္ကသိုလ်တက်ခွင့်ရရှိခဲ့သူဖြစ်တယ်လို့ ခမီလူကြီးတွေထံက သိရပါတယ်။

အခုပညာသင်နှစ် ဆေးတက္ကသိုလ်ဝင်ခွင့်ကို ကျောင်းသားဆိုရင်  အမှတ် ၄၈၅ မှတ်၊ ကျောင်းသူဆိုရင်  ၅၀၅ မှတ် သတ်မှတ်ထားတာဖြစ်ပါတယ်။

မောင်တောကနေ ဂုဏ်ထူး ၅ ဘာသာနဲ့ အောင်မြင်ခဲ့တဲ့ မလွင်လွင်ပြုံးကတော့  ၄၇၉ သာ ရတာကြောင့် ဆေးဝါးတက္ကသိုလ်တက်ရောက်ခွင့်သာရရှိခဲ့တဲ့အတွက် နယ်စပ်ဆေးတက္ကသိုလ်သို့ တက်ရောက်ခွင့်လျှောက်ထားရာမှာ တက်ရောင်ခွင့်ရရှိခဲ့တယ်လို့ သူ့ရဲ့ဖခင်ဖြစ်သူက ပြောပါတယ်။

စစ်ကောင်စီက နိုင်ငံတဝန်း တက္ကသိုလ်တွေ ကောလိပ်တွေကို ပြန်ဖွင့်နေရာမှာ ကျောင်းတက်တဲ့ ကျောင်းသားတွေရှိသလို စစ်ကျွန်ပညာရေးကို သပိတ်မှောက်ပြီး ကျောင်းမတက်တဲ့ ကျောင်းသားတွေလည်း အများအပြားရှိပါတယ်။ 

3 months Ago

May 25, 2022

ဘူးသီးတောင်မြို့နယ်ရှိ မွတ်ဆလင်ကျေးရွာများအား စစ်ကောင်စီတပ်က ရှာဖွေစစ်ဆေးနေ

ရခိုင်ပြည်နယ်၊ ဘူးသီးတောင်မြို့နယ်ရှိ မွတ်ဆလင်ကျေးရွာအုပ်စု ၄ စုကို မေ ၂၅ ရက်မနက်ပိုင်းက စစ်ကောင်စီတပ်တွေ ဝင်ရောက်စီးနင်း ရှာဖွေစစ်ဆေးခဲ့တယ်လို့ ဒေသခံရွာသားတွေက ပြောပါတယ်။

ရှာဖွေနေတဲ့ ကျေးရွာအုပ်စုတွေကတော့ ဘဂုံးနား၊ မြောင်းနား၊ ကကျက်ဖက်၊ အလယ်ချောင်းနဲ့ သပိတ်တောင်ကျေးရွာအုပ်စုရှိ ရွာသိမ်ရွာငယ် ၃၀ ခန့်ကို စစ်ကောင်စီတပ်က ပိုက်စိပ်တိုက် ရှာဖွေစစ်ဆေးတာလို့ဆိုပါတယ်။

သပိတ်တောင် မွတ်ဆလင် ကျေးရွာဒေသခံတစ်ဦးက “ ဒီနေ့တရက်လုံး စစ်တပ်က ကျနော်တို့ မွတ်ဆလင်ကျေးရွာအုပ်စု ၄ စုက နေအိမ်တွေကို တအိမ်တက် တအိမ်ဆင်း ရှာဖွေမှုတွေ ပြုလုပ်နေတယ်။ ဘာကိုရှာတာလဲ ကျနော်တို့ မသိပါ။ အိမ်ထောင်စုစာရင်းနဲ့ လူ အတူရပ်ပြကြရတယ်”လို့ ပြောပါတယ်။

စစ်ကောင်စီတပ်တွေ အခုလို တအိမ်တက်ဆင်းရှာဖွေနေတဲ့အတွက် ဒေသခံတွေ စိုးရိမ်နေကြတာပါ။

“အဓိက သူတို့စစ်ဆေးနေတဲ့ နေရာတွေက ဘူးသီးတောင်-အငူမှော်လမ်းမှာရှိတဲ့ ကျေးရွာအုပ်စုက ကျေးရွာတွေနဲ့ စိုင်းဒင်ချောင်းဝမှာရှိတဲ့ ကျေးရွာအုပ်စုက ကျေးရွာတွေကို အဓိကထား ရှာဖွေနေကြတာ” လို့ အလယ်ချောင်းကျေးရွာ ဒေသခံတဦးက ဆိုပါတယ်။

ပြီးခဲ့တဲ့ မေ ၂၂ ရက်နေ့က မြောင်းနားကမ်းကျေးရွာနေ အသက် ၄၇ နှစ်အရွယ် မာမတ်တော်ယုပ်ကို ARSA နဲ့ ပတ်သက်လို့ စစ်ဆေးမေးမြန်းစရာရှိတယ်ဆိုပြီး စစ်ကောင်စီတပ်တွေက ဝင်ရောက်ဖမ်းဆီး ခေါ်ဆောင်သွားခဲ့သလို မေ ၂၃ ရက် မနက်ပိုင်းကလည်း ARSA နဲ့ပတ်သက်ပြီး မွတ်ဆလင်အမျိုးသားနှစ်ယောက်ကို ဖမ်းဆီး ခေါ်ဆောင်သွားခဲ့ကာ မွန်းလွဲပိုင်းမှာ ပြန်လွတ်လာခဲ့တယ်လို့ ဒေသခံတွေက ပြောပါတယ်။

၂၀၂၂ ခုနှစ် ဇန်နဝါရီလ အတွင်းမှာ ARSA အဖွဲ့ ခေါင်းဆောင်တွေ အပါအဝင် အင်အား ၅၀ ကျော်လောက်ရှိတဲ့ အဖွဲ့ဝင်တွေ လက်နက်အပြည့်အစုံနဲ့ စစ်ရေးလှုပ်ရှားတဲ့ ဓာတ်ပုံတွေ၊ ဗွီဒီယိုဖိုင်တွေ အွန်လိုင်းပေါ် ထွက်ပေါ်လာခဲ့ပါတယ်။

ပြီးခဲ့တဲ့ ဧပြီလ မွတ်ဆလင်ဘာသာဝင်တွေရဲ့ ရာမာဒန်ဥပုသ်လ အတွင်းမှာလည်း ARSA အဖွဲ့က ဆိုက်ကယ်တွေနဲ့ ဘူးသီးတောင်-အငူမှော်လမ်းတလျှောက်ရှိ ကျေးရွာတွေအတွင်း သွားနေကြတဲ့ ဗွီဒီယိုဖိုင်တွေ အွန်လိုင်းပေါ် တက်လာပြီးနောက် အခုလို လမ်းတလျှောက်ရှိ ကျေးရွာအုပ်စုတွေကို စစ်ကောင်စီက ဝင်ရောက်ရှာဖွေနေတာလို့ အမည်မဖော်လိုတဲ့ ဒေသမှာတာဝန်ကျတဲ့ စစ်ကောင်စီ အရာရှိတဦးက ပြောထားပါတယ်။

3 months Ago
More News
Up