စစ်ကိုင်းတိုင်း ဘုတလင်မြို့နယ်၊ သခွတ္တနယ်ကျေးရွာက လျှပ်စစ်ဓာတ်အားခွဲရုံ အကြီးအကဲတစ်ဦး ကို အောက်တိုဘာ ၂၁ ရက် နေ့လယ် ၁၂ နာရီလောက်က အမည်မသိလက်နက်ကိုင်အဖွဲ့က သေနတ် ပစ်ခတ်သွားတယ်လို့ ဒေသခံတွေက ပြောပါတယ်။
သခွတ္တနယ်ကျေးရွာက လျှပ်စစ်ဓာတ်အားခွဲရုံက အကြီးဆုံးတာဝန်ရှိသူ ဦးသန့်စင်ဖြစ်ပြီး သေနတ်နဲ့ နှစ်ချက် ပစ်ခတ်ခံရကာ ခြေထောက်မှာ ထိမှန်ဒဏ်ရာရသွားတယ်လို့ ဒေသခံတဦးက ပြောပါတယ်။
“လက်ရှိမှာ ကျနော်တို့ ရွာက လက်ဖက်ရည်တစ်ဆိုင်မှာပုန်းနေတယ်။ ဆေးရုံလည်း မသွားရဲသေးဘူး။ ဘာကြောင့်ပစ်တာလဲဆိုတော့ စစ်ကောင်စီတပ်တွေ လာတုန်းကလည်း စစ်ကားခေါင်းခန်းထဲကနေ PDF စခန်း တွေလိုက်ပြတယ်လို့တော့ သတင်းတွေ ထွက်နေတာရယ်။ နောက်တော့ အခုရက်ပိုင်းအတွင်း မီးဖြတ်တာတွေလည်း အကြိမ်ကြိမ်လုပ်လို့ အခုလိုသေနတ်နဲ့ ဝင်ပစ်တာလို့တော့ပြောကြတာဘဲဗျ။”
ဦးသန့်စင်အား ဘယ်အဖွဲ့စည်းက ပစ်ခတ်သွားတယ်ဆိုတာတော့ မသိရသေးဘူးလို့ ဆိုပါတယ်။
သခွတ္တနယ်ကျေးရွာဟာ စံပြကျေးရွာတစ်ရွာဖြစ်သလို တိုက်နယ်ဆေးရုံလည်းရှိပြီး ဝန်ထမ်းအားလုံး CDM လုပ်ထားတာကြောင့် တိုက်နယ်ဆေးရုံတစ်ခုလုံး ပိတ်ထားရတယ်လို့ ဒေသခံတွေက ပြောပါတယ်။
စစ်ကိုင်းတိုင်း၊ ဘုတလင်မြို့နယ်၊ ထနောင်းကုန်းကျေးရွာနဲ့ ဇီးကုန်းကျေးရွာကြား ပိုးကုန်းလမ်းခွဲ၊ မုံရွာ-ရေဦး-တန့်ဆည်လမ်းမပေါ်မှာ အောက်တိုဘာ ၁၇ ရက် နေ့လယ် ၁ နာရီခွဲက ကားတစ်စီး မိုင်းဆွဲခံရတယ်လို့ သိရပါတယ်။
“ကျနော်တို့နယ်မြေခံ PDF တွေက အထွေထွေအုပ်ချုပ်ရေးမှူးရုံးကား ဖြစ်တယ်လို့ သတင်းရတာနဲ့ အခုလို မိုင်းခွဲတိုက်ခိုက်ခဲ့တယ်။ အကျအဆုံးကတော့ မသိရသေးဘူး။ ကားကတော့ တပတ်လည်သွားတယ်။ ကျနော်တို့လည်း မိုင်းဆွဲပြီး အသက်လုပြေးရတာကြောင့် အတိအကျတော့ မပြောနိုင်ဘူး။ အကျအဆုံးကတော့ များလိမ့်မယ်လို့ ခန့်မှန်းထားတယ်” လို့ ဒေသခံ ပြည်သူ့ကာကွယ်ရေးအဖွဲ့ဝင်တဦးက ပြောပါတယ်။
ဘုတလင်မြို့နယ်အတွင်း အခု အောက်တိုဘာလဆန်းပိုင်းကစပြီး စစ်ကောင်စီတပ်တွေက နယ်မြေရှင်းလင်းရေးတွေ အင်အားအလုံးအရင်းနဲ့ ရှာဖွေမှုတွေ ပြုလုပ်နေပြီး ဒေသခံ ပြည်သူ့ကာကွယ်ရေးတပ်ဘက်ကလည်း စစ်ကောင်စီ ကားတန်းတွေကို အကြိမ်ကြိမ် အခုလို မိုင်းဆွဲခဲ့တာတွေရှိတယ်လို့ ဒေသခံတွေရဲ့ ပြောပြချက်အရ သိရတယ်။
စစ်ကိုင်းတိုင်း မုံရွာမြို့နယ်၊ ကျောက္ကာမြောက်ရွာ လက်ဖက်ရည်ဆိုင်တဆိုင်မှာ အုပ်ချုပ်ရေးမှူး ဦးညီညီဝင်းတို့ အမြွှာညီအစ်ကို ၂ ယောက်ကို အောက်တိုဘာ ၁၇ ရက် မနက် ၉ နာရီလောက် အမည်မသိလက်နတ်ကိုင်အဖွဲ့က ပစ်သတ်ခဲ့တာလို့ သိရပါတယ်။
ဦးညီညီဝင်းရဲ့ သူငယ်ချင်းတစ်ဦးက “ဘယ်အဖွဲ့မှန်းတော့ မသိလိုက်ရဘူးဗျ။ အခု အသတ်ခံရတဲ့ ဦးညီညီဝင်းကတော့ ကျောက္ကာမြောက်ရွာက အုပ်ချုပ်ရေးမှူးတစ်ဦးပဲဗျ။ အုပ်ချုပ်ရေးမှူးတာဝန်ကနေ ထွက်စာတင်ထားတာ ၃ ကြိမ် တင်ထားတယ်ဗျ။ မနက်ခင်း လက်ဖက်ရည်သောက်ရင်း အခုလို ဦးညီညီဝင်းတို့ အမြွှာညီအစ်ကို အသတ်ခံလိုက်ရတယ်”လို့ ပြောပါတယ်။
ဦးညီညီဝင်းတို့ အမြွှာညီအစ်ကိုကို သတ်သွားသူတွေဟာ ဘယ်အဖွဲ့အစည်းက ဆိုတာကိုတော့ သီးခြားအတည်ပြုချက် မရသေးပါဘူး။ လက်ရှိအချိန်မှာ အလောင်းကို အကြမ်းဖက်စစ်ကောင်စီက သယ်ဆောင်သွားတယ်လို့ ဒေသခံတွေရဲ့ ပြောပြချက်အရ သိရပါတယ်။
