ဘုတလင်

March 1, 2019

၂၀၀၈ဖွဲ့စည်းပုံ ကျွန်ခေတ်က ဒိုင်အာခီစနစ်နှင့်တူနေဟု စာရေးဆရာထင်လင်းဦး ဘုတလင်၌ ဟောပြော

၂၀၀၈ ဖွဲ့စည်းပုံ ပြင်ဆင်ရေးလူထုဟောပြောပွဲနဲ့  စုပေါင်းချီတက်ပွဲကို စစ်ကိုင်းတိုင်းဒေသကြီး၊ ဘုတလင်မြို့မှာ မတ်လ ၁ ရက်က  ပြုလုပ်ပါတယ်။ ဒီဟောပြောပွဲမှာ စာရေးဆရာ ထင်လင်းဦးနဲ့ စာရေးဆရာ မာန် (တောင်လုံးပြန်) တို့က ဖွဲ့စည်းပုံပြင်ဆင်ဖို့ ဘာကြောင့်လိုအပ်နေသလဲ၊ ဘယ်လောက်အရေးကြီးသလဲ ဆိုတာတွေနဲ့ ပတ်သက်လို့ ဟောပြောခဲ့ပါတယ်။ စာရေးဆရာ ထင်လင်းဦးက “အခြေခံဥပဒေဆိုတာ အဆောက်အဦတခုကို ဘယ်လို ဆောက်မယ်ဆိုတာကို ပန္နက်ရိုက်တာဖြစ်ပြီး စပြီးတော့ ပန္နက်ရိုက်ကတည်းက ရွဲ့စောင်းနေရင် ဘာအဆောက်အဦမှ ဆောက်လို့မရတဲ့အပြင် ဆောက်တဲ့အအုံကလည်း လိမ်ဖယ်ဖယ်ဖြစ်နေ မယ်။ ဒီ ၂၀၀၈ ဖွဲ့စည်းပုံကြောင့် ပြည်သူလူထုက ရွေးကောက် တင်မြှောက်တဲ့စနစ်၊ အစိုးရကို ဦးတည်လို့ မရဘူး။ ကျွန်ခေတ်က ဒိုင်အာခီစနစ်နဲ့တူနေတယ်။”လို့ ပြောပါတယ်။ ဖွဲ့စည်းပုံပြင်ဆင်ရေးက  အန်အယ်လ်ဒီပါတီရဲ့ ရွေးကောက်ပွဲ ကတိဖြစ်သလို လွှတ်တော်တွင်းက ပြင်ဆင်ရမှာဖြစ်ပေမယ့် ပြည်သူတွေအနေနဲ့လည်း ပြင်ဆင်ဖို့ ဆန္ဒရှိတယ်ဆိုတာ သိစေချင်လို့ လာရောက်ဝန်းရံတာလို့ ဒေသခံတဦးက ပြောပါတယ်။ ဘုတလင်မှာ ပြုလုပ်တဲ့ ဖွဲ့စည်းပုံအခြေခံဥပဒေပြင်ဆင်ရေး လှုပ်ရှားမှုကို မြိုခံပြည်သူတွေ တင်မက မုံရွာ၊ ဒီပဲယင်းစတဲ့ အနီးတဝိုက်က ပြည်သူတွေလည်း လာရောက်ဝန်းရံခဲ့ကြပါတယ်။ ဖေဖော်ဝါရီ ၂၈ ရက်ကလည်း ပုလဲမြို့မှာ ဖွဲ့စည်းပုံအခြေခံဥပဒေပြင်ဆင်ရေး လူထုဟောပြောပွဲကို ပြုလုပ်ခဲ့ပါတယ်။
2 years Ago

August 22, 2018

မတ်ပဲ၊ ပဲစင်းငုံလို ဆုံးရှုံးမှုမဖြစ်ရေး ဖရဲသခွား အားထည့်စိုက်ပျိုးကြရန် တိုက်တွန်း

မနှစ်က ကြုံတွေ့ခဲ့ရတဲ့ မတ်ပဲ၊ ပဲစင်းငုံ ကိစ္စလို ဆုံးရှုံးမှု မဖြစ်စေရန်အတွက် ဖရဲသခွားကို အားထည့်စိုက်ပျိုးကြဖို့ ဘုတလင်မြို့နယ်အုပ်ချုပ်ရေးမှူးက တောင်သူတွေကို တိုက်တွန်း ပြောပါတယ်။ စစ်ကိုင်းတိုင်းဒေသကြီး၊ ဘုတလင်မြို့မှာ ဩဂုတ် ၂၂ ရက်က ပြုလုပ်တဲ့ ဌာနဆိုင်ရာတွေနဲ့  ဖရဲသခွားတောင်သူတွေ စုပေါင်းပြီး ရာသီကြို ညှိနှိုင်းအစည်းအဝေးပွဲမှာ အခုလို ပြောကြားခဲ့တာပါ။ ဘုတလင်မြို့နယ်အုပ်ချုပ်ရေးမှူး ဦးခင်မောင်ဇော်က "ဖရဲသခွားစိုက်ပျိုးရေးနဲ့ ပတ်သက်လာလို့ရှိရင် မတ်ပဲ၊ ပဲစဉ်းငုံကိစ္စတွေကို နမူနာယူရမှာရှိပါတယ်။ မတ်ပဲနဲ့ ပဲစင်းငုံကြောင့် ဘုတလင်မြို့နယ်မှာ ကြီးမားတဲ့ ဆုံးရှုံးမှုဒဏ်ခံခဲ့ရပါတယ်။ ကြားထဲမှာ ကျဆင်းတဲ့ စိုက်ပျိုးရေးကဏ္ဍကို ဖြည့်ဆည်းဖို့အတွက် ဖရဲသခွားလုပ်ငန်းကို အားထည့်ပြီး လုပ်ဖို့ရှိပါတယ်။ ဒီကိစ္စက နယ်စပ်ကုန်သွယ်ရေးကိစ္စနဲ့လည်း သက်ဆိုင်နေတယ်။ မတ်ပဲ၊ ပဲစင်းငုံလိုပဲ ဒီမြို့နယ်မှာ စိုက်ဖို့လုပ်နေတဲ့ ဖရဲ၊ သခွားကလည်း တရုတ်ရဲ့ ဝယ်လက်ကို မှီခိုနေရတယ်" လို့ ပြောပါတယ်။ လက်ရှိမှာ ဘုတလင်မြို့နယ်အတွင်း ဖရဲသခွားစိုက်က ၃၀၀၀ ၀န်းကျင်ရှိပြီး ဒေသရဲ့ အမြင့်ဆုံး ထွက်ကုန်အဖြစ်ရှိနေတာပါ။ မနှစ်က မတ်ပဲနှင့် ပဲစင်းငုံကြောင့် ဒေသရဲ့ GDP ၁၃ ရာခိုင်နှုန်းလောက်ထိ ဆုံးရှုံးမှုဖြစ်ခဲ့တယ်လို့ သိရပါတယ်။ "တောင်သူတွေမှာ မျိုးစေ့အာမခံချက်၊ ဈေးကွက်အာမခံချက်၊ သွင်းအားစုအာမခံချက် စတာတွေနဲ့ပတ်သက်ပြီးတော့လည်း ဆုံးရှုံးမှုတွေရှိနေတယ်"လို့ ဖရဲ၊ သခွားစိုက်တောင်သူ တဦးကလည်း ဆွေးနွေးခဲ့ပါတယ်။ ဖရဲသခွားစိုက်ပျိုးရေးနဲ့ပတ်သက်ပြီး ကုမ္ပဏီတွေက လာရောက် မြေကွက်ငှား ရမ်းလုပ်ကိုင်တာတွေလည်းရှိသလို အဲဒီကုမ္ပဏီမှာ နိုင်ငံခြားသားတွေလည်း ပညာရှင်အဖြစ် လာရောက်လုပ်ကိုင်နေတာတွေရှိပါတယ်။ တချို့က တရားဝင် လုပ်ငန်းဗီဇာနဲ့ လာရောက်လုပ်ကိုင်ကြပေမယ့် တချို့ကတော့ တရားမဝင် လာရောက်လုပ်ကိုင်နေ တာတွေလည်းရှိနေပါတယ်။ နိုင်ငံခြားသားတွေနဲ့ ပတ်သက်လို့ အရင်က အခွန်တွေ မရခဲ့ပေမယ့် ဒီနှစ်ကစပြီး အခွန်ရရှိအောင် လုပ်ဆောင်သွားမယ်လို့ မြို့နယ်အခွန်ဦးစီးကပြောပါတယ်။ ဖရဲသခွားစိုက်ပျိုးတဲ့ မြေယာတွေမှာ ပိုးသတ်ဆေး၊ ပေါင်းသတ်ဆေးစတဲ့ ဓာတုဆေးတွေကို အများအပြားသုံးစွဲနေလို့ မြေဆီမြေလွှာ ပျက်စီးမှုတွေလည်း ပိုမိုကြုံတွေ့လာနေရပါတယ်။ ဒီကိစ္စတွေနဲ့ပတ်သက်ပြီး ဒေသခံလွှတ်တော်ကိုယ်စားလှယ်ကတော့ လွှတ်တော်မှာ တင်သွင်းမေးမြန်းမယ်လို့ ပြောပါတယ်။  ဒီနှစ်မှာတော့ ဒေသခံတောင်သူတွေအနေနဲ့ မနှစ်က အရှုံးများခဲ့လို့ စိုက်ပျိုးသူ နည်းလာနိုင်ပြီး ကုမ္ပဏီကတော့ ပိုမိုစိုက်ပျိုးလာနိုင်တယ်လို့ သုံးသပ်ထားပါတယ်။ လတ်တလောမှာ မြေငှားခဈေးကွက်အနေနဲ့ အရင်နှစ်ကထက်တိုးလာပြီး ဒီနှစ်မှာတော့ ၁ ဧကကို ၅ သိန်းကနေ ၆ သိန်းဝန်းကျင်ထိရှိနေပါတယ်။ အောင်ကိုလတ်
3 years Ago
Up