ဘီးလင်းမြို့နယ်

April 2, 2022

ဘီးလင်းမြို့နယ်၌ ပြည်သူ ၅ ဦးကို စစ်တပ်က လက်ပြန်ကြိုးတုပ် ရိုက်နှက်ဖမ်းဆီး

မွန်ပြည်နယ်၊ ဘီးလင်းမြို့နယ်၊ ရွှေရောင်ပြကျေးရွာအုပ်စု၊ အဝင်းကြီးကျေးရွာရှိ အရပ်သားပြည်သူ ၅ ယောက်ကို စစ်တပ်က ရိုက်နှက် လက်ပြန်ကြိုးတုပ် ဖမ်းဆီးသွားတယ်လို့ ကေအန်ယူ တပ်မဟာ(၁) သထုံခရိုင် ဥက္ကဋ္ဌ ပဒိုစောစိုးမြင့်က ဒီဗွီဘီကို ပြောပါတယ်။

ဧပြီ ၁ ရက် နေ့လယ်ပိုင်းမှာ ချောင်းထဲ ငါးပက်နေတဲ့ ကရင်တိုင်းရင်းသား  အရပ်သားပြည်သူ ၅ ယောက်ကို စစ်ကောင်စီတပ် လှုပ်ရှား စစ်ကြောင်းက  စုံစမ်းမေးမြန်းစရာရှိတယ်ဆိုပြီး ရိုက်နှက်ဖမ်းဆီးခေါ်ဆောင်သွားတာ ဖြစ်ပါတယ်။

ဧပြီ ၂ ရက်ဒီကနေ့တော့  မိဘတွေနဲ့ ရပ်မိရပ်ဖတွေက သွားရောက် တွေ့ဆုံခဲ့ပြီး ဖမ်းဆီးခံရသူတွေကို ပြန်လွှတ်ပေးဖို့တောင်းဆိုခဲ့ရာမှာ စစ်ကောင်စီတပ်က တစ်ဦးကို ငွေကျပ် ၁၀ သိန်းနှုန်းပေးဖို့ တောင်းလာတယ်လို့ ပဒိုစောစိုးမြင့်က ပြောပါတယ်။

ရိုက်နှက်ဖမ်းဆီးခံရတဲ့သူတွေဟာ အဝင်းကြီးကျေးရွာက အရပ်သား စောသက်နိုင်ထွန်း ၊ စောထွေးလေး၊ စောဆန်းမင်း၊ စောသန်းငယ်နဲ့ စောလေဒိုးတို့ ကြဖြစ်ပါတယ်။

သူတို့ အားလုံးဟာ ကွမ်းခြံနဲ့ ကြုံရာကျပန်း လုပ်ကိုင်စားသောက်သူတွေ ဖြစ်ပြီး လက်ရှိအချိန်ထိ ပြန်လည် လွတ်မြောက်လာတာ မရှိသေးဘူးလို့ ဒေသခံတွေက ဆိုပါတယ်။

ဘီးလင်းမြို့နယ် ရွှေရောင်ပြကျေးရွာမှာ ပြီးခဲ့တဲ့ မတ်လ ၃၀ ရက်က စစ်ကောင်စီယာဉ်တန်း တိုက်ခိုက်ခံရပြီးနောက် စစ်ကောင်စီတပ်ဘက်က အကြောင်းမဲ့ ပစ်ခတ်တာကြောင့် သထုံမြို့နယ်က အသက် ၆ နှစ်နဲ့ ၉ နှစ်အရွယ် ကလေးငယ် ၂ ဦး သေဆုံးခဲ့တာပါ။

6 months Ago

February 4, 2022

ဘီးလင်းမြို့နယ်၌ စစ်ကောင်စီတပ်က လက်နက်ကြီးဖြင့်ပစ်ခတ်၊ အရပ်သား ၂ ဦး ဒဏ်ရာရ

မွန်ပြည်နယ်၊ ဘီးလင်းမြို့နယ်မှာ စစ်ကောင်စီအမြောက်တပ်က လက်နက်ကြီးနဲ့ ပစ်ခတ်လို့  အရပ်သား ပြည်သူ ၂ ယောက် ကျည်ဆန်စထိမှန် အပြင်းထန် ဒဏ်ရာရရှိခဲ့တယ်လို့ ကရင်အမျိုးသားအစည်းအရုံး KNU တပ်မဟာ (၁) တာဝန်ရှိသူတွေက  ဒီဗွီဘီကို ပြောပါတယ်။

ဖေဖော်ဝါရီ ၃ ရက် နေ့လယ်ပိုင်းမှာ ဘီးလင်းမြို့နယ်၊ ဇီးဝန်းကျေးရွာရှိ စစ်ကောင်စီအမြောက်တပ်၊ သထုံမြို့နယ် ပိန္နဲတောတပ်စခန်း အမှတ်(၉) အမြာက်ကုန်းကနေ ကျေးရွာတွေထဲကို လက်နက်ကြီး အချက်ပေါင်း ၄၀ ထက်မနည်း ပစ်ခတ်ခဲ့တာပါ။

စစ်ကောင်စီဘက်က ပစ်ခတ်ခဲ့တဲ့ လက်နက်ကြီးကျည် ၂ လုံးဟာ ဘီးလင်းမြို့နယ် မိကျောင်းအိုင်ကျေးရွာအတွင်း ကျရောက် ပေါက်ကွဲခဲ့လို့ နေအိမ်တစ်လုံး ထိမှန် ပျက်စီးခဲ့ပြီး ၊ အရပ်သားပြည်သူ ၂ ဦး ပြင်းထန် ဒဏ်ရာရှိခဲ့တာပါ။

လက်နက်ကြီးထိမှန်ခဲ့လို့ မိကျောင်းအိုင်ကျေးရွာနေသူ စောလာခူး ဘယ်ဘက်လက် ပြတ်တောက် ဒဏ်ရာ၊ နော်ဘိုထူးမှာ ပေါင်ထိမှန်ဒဏ်ရာရရှိခဲ့တယ်လို့ KNU တပ်မဟာ (၁) တာဝန်ရှိသူ တစ်ဦးက ပြောပါတယ်။

ဒါ့အပြင် စစ်ကောင်စီဘက်က ပစ်ခတ်တဲ့ လက်နက်ကြီးကျည်တွေဟာ ဘီးလင်းမြို့နယ် ရွှေကျင်၊ နောင်ကတုတ်၊ ရွှေရောင်ပြ၊ ဖားပိန်နဲ့ ကဒီပုကျးရွာတွေ အနီးဝန်းကျင်မှာ ကျရောက်ပေါက်ကွဲခဲ့ပေမယ့် ဒေသခံပြည်သူတွေ ထိခိုက်ဒဏ်ရာရတာတော့ မရှိဘူးလို့ ဆိုပါတယ်။

စစ်ကောင်စီတပ်က လက်နက်ကြီးနဲ့ ပစ်ခတ်ခဲ့လို့ မနေ့တုန်းက ဘီးလင်းမြို့နယ်ရှိ ရန်ကုန်-မော်လမြိုင်ကားလမ်းနဲ့ သိမ်ဆိပ်-လေးကေကားလမ်း ၂ နာရီကျော်ကြာ ပိတ်ထားခဲ့ရပြီး ခရီးသွားကား ရာနဲ့ချီပြီး ပိတ်ဆို့မှု ဖြစ်ပေါ်ခဲ့ပါတယ်။

ကရင်အမျိုးသားအစည်းအရုံး KNU တပ်မဟာ(၁) ထိန်းချုပ်နယ်မြေ သထုံခရိုင်မှာတော့ စစ်ကောင်စီတပ်နဲ့ ကရင်အမျိုးသား လွတ်မြောက်ရေးတပ်မတော် KNLA တို့ မကြာခဏဆိုသလို တိုက်ပွဲ ဖြစ်ပွားနေပြီး လက်ရှိမှာလည်း  စစ်ရေးတင်းမာနေပါတယ်။

8 months Ago
More News
Up