ဘီးလင်း

September 8, 2022

ဘီးလင်းတွင် စစ်ကောင်စီတပ်က ဒေသခံများကို လူသားဒိုင်းကာအဖြစ် ဖမ်းဆီးခေါ်ဆောင်

ကရင်အမျိုးသားအစည်းအရုံး (KNU) တပ်မဟာ(၁) သထုံခရိုင်၊ ဘီးလင်းမြို့နယ်ရှိ စစ်ကောင်စီ လေကေးစခန်းတပ်ချိန်းစဉ် စစ်ကောင်စီတပ်က ဒေသခံအရပ်သား ၉ ဦးကို လူသားဒိုင်းကာအဖြစ် အတင်းဓမ္မ ဖမ်းဆီးခေါ်ဆောင်သွားတယ်လို့ KNU သထုံခရိုင်က ထုတ်ပြန်ပါတယ်။

စစ်ကောင်စီ လေးကေစခန်းကို နေရာလဲလှယ်တပ်ချိန်းသွားတဲ့ အာဏာသိမ်း စစ်ကောင်စီ ခမရ (၄၀၁) နဲ့ ခမရ (၄၁၀) ပူးပေါင်းတပ်ဖွဲ့တွေဟာ ဝင်းတာပန်စစ်ကောင်စီစခန်းကို အပြန်လမ်းမှာ ဒေသခံအရပ်သား ၉ ဦကို လူသားဒိုင်းကာအဖြစ် အတင်းဓမ္မ ဖမ်းဆီးခေါ်ဆောင်သွားတာ ဖြစ်ပါတယ်။

လူသားဒိုင်းကာအဖြစ် စစ်ကောင်စီတပ်က ဖမ်းဆီးခေါ်ဆောင်သွားတဲ့သူတွေထဲမှာ ကားမဲကျေးရွာနဲ့ တာပေါခီးကျေးရွာတို့က ရွာသား ၆ ဦး၊ နော့ကတိုခီး၊ ကျောက်တောင်နဲ့ နို့တလာအောတို့က ရွာသား ၁ ဦးစီ၊ စုစုပေါင်း ၉ ဦး ပါဝင်ပါတယ်။

အဲဒီထဲက ကားမဲကျေးရွာနဲ့တာပေါခီးကျေးရွာ ရွာသား ၆ ဦးကို စက်တင်ဘာ ၆ ရက်နေ့မှာ ပြန်လွှတ်ပေးခဲ့ပေမယ့် ကျန်ရွာသား ၃ ဦးကိုတော့ စက်တင်ဘာ ၇ ရက်နေ့ ညနေ ၇ နာရီလောက်မှာ စစ်ကောင်စီ ပိန္နဲတောစခန်းကို လူသားဒိုင်းကာအဖြစ် ထပ်မံ ခေါ်ဆောင်သွားတာပါ။

KNU သထုံခရိုင် ပြောခွင့်ရ ပဒိုစောအေးနိုင်က “စစ်ကောင်စီတွေ တပ်ချိန်းတော့ လမ်းမှာတွေ့တဲ့ ရွာသားတွေကို လူသားဒိုင်းကာအဖြစ် အသုံးပြုဖို့ ခေါ်သွားတာ၊ ၆ ဦးတော့ ပြန်လွတ်လာပြီး၊ ကျန်တဲ့ရွာတွေကတော့ အခုထိ မလွှတ်ပေးဘူး။ ဒီလုပ်ရပ်က အရပ်သားပြည်သူတွေကို ကာကွယ်ပေးရမယ့်အစား လူ့အခွင့်အရေးကို ချိုးဖောက်တာ ဖြစ်တယ်” လို့ ဒီဗွီဘီကို ပြောပါတယ်။

စစ်ကောင်စီတပ်အနေနဲ့ အရပ်သားပြည်သူတွေကို လူသားဒိုင်ကာအဖြစ် အသုံးပြုဖို့ ဖမ်းဆီးခေါ်ဆောင်တာ၊ ပေါ်တာဆွဲတာအပြင် ကျေးရွာထဲ လက်နက်ကြီး ပစ်ခတ်မှုတွေ ရပ်တန့်ဖို့ လိုကြောင်းနဲ့ အခုလို လုပ်ရပ်တွေ ဆက်လက် လုပ်ဆောင်နေမယ်ဆိုရင် နှစ်ဖက်တိုက်ပွဲတွေ ပိုမို ပြင်းထန်လာဖို့ပဲ ရှိမယ်လို့ ဆိုပါတယ်။

ပြီးခဲ့တဲ့ သြဂုတ် ၃၀ ရက်နေ့ကလည်း လေးကေစခန်းကို တပ်ချိန်းဖို့ စစ်ကြောင်းထိုးလာတဲ့ စစ်ကောင်စီတပ်ဖွဲ့တွေနဲ့ ကရင့်အမျိုးသား လွတ်မြောက်ရေး တပ်မတော်(KNLA)၊ ကရင့်အမျိုးသား ကာကွယ်ရေးအဖွဲ့ (KNDO)၊ မဟာမိတ်တော်လှန်ရေးအင်အားစုတို့ကြား ထိတွေ့ တိုက်ပွဲ ဖြစ်ပွားခဲ့ပါတယ်။

အဲဒီတိုက်ပွဲအတွင်း စစ်ကောင်စီဘက်က ၆ ဦး သေဆုံးပြီး ၂ ဦး ဒဏ်ရာရရှိခဲ့တယ်လို့ KNU သထုံခရိုင်က ထုတ်ပြန်ထားပါတယ်။

3 months Ago

ဘီးလင်း စစ်မှုထမ်းဟောင်း ဒုဥက္ကဋ္ဌ အငြိမ်းစားဗိုလ်မှူး ပစ်သတ်ခံရ

မွန်ပြည်နယ်၊ ဘီးလင်းမြို့၊ ကန်သာယာရပ်ကွက်မှာ စက်တင်ဘာ ၈ ရက် မနက် ၈ နာရီလောက်က ဘီးလင်းမြို့နယ် စစ်မှုထမ်းဟောင်းအဖွဲ့ ဒုဥက္ကဋ္ဌ အငြိမ်းစားဗိုလ်မှူး လှဝင်းသိန်း သေနတ်နဲ့ ပစ်သတ်ခံခဲ့ရတယ်လို့ ဒေသခံတွေက ဒီဗွီဘီကို ပြောပါတယ်။

အငြိမ်းစားဗိုလ်မှူး လှဝင်းသိန်းကို အမည်မသိ လူငယ် ၂ ယောက်က ဆိုင်ကယ် ၂ စီးနဲ့ လာရောက်ပြီး သူ့နေအိမ်အရှေ့မှာပဲ သေနတ်နဲ့ ပစ်ခတ်ခဲ့တာ ဖြစ်ပါတယ်။

အငြိမ်းစားဗိုလ်မှူး လှဝင်းသိန်းဟာ ပစ်ခတ်ခံရတာကြောင့် သေနတ်ဒဏ်ရာ ၄ ချက် ရရှိခဲ့ပြီး သူ့အိမ်ရှေ့ရှိ ဘီးလင်းမြို့နယ်ပြည်သူ့ဆေးရုံ ပို့ဆောင်စဉ် သေဆုံးသွားတာပါ။

ဒေသခံတယောက်က “သူက အရင်က တော်တော်ကြမ်းခဲ့တာ။ အခုကတော့ အဖွဲ့အစည်းအားလုံးက နုတ်ထွက်ထားတယ်လို့ သိရပါတယ်။ ဒါကိုသိတာလည်း ပါမှာပေါ့။ ပြီးတော့ ဒီလူကို မကျေနပ်တဲ့သူက ခပ်များများပဲ” လို့ ပြောပါတယ်။

အငြိမ်းစားဗိုလ်မှူး လှဝင်းသိန်းဟာ စစ်ကောင်စီရဲ့ ဘီးလင်းမြို့နယ် လုံခြုံရေးနဲ့ ပူးပေါင်းဆောင်ရွက်ရေး ကော်မတီ ဥက္ကဋ္ဌအဖြစ်လည်း တာဝန်ထမ်းခဲ့တယ်လို့ သိရပါတယ်။

ဒေသခံတွေအဆိုအရ အငြိမ်းစားဗိုလ်မှူး လှဝင်းသိန်းဟာ စစ်အာဏာရှင်ဆန့်ကျင်ရေး လှုပ်ရှားတွေကို မတရားဖမ်းဆီးရာမှာ ဦးဆောင်ပါဝင်တာ၊ မတရားတဲ့ ပုဒ်မအမျိုးမျိုးတပ်ဖို့ လမ်းညွှန်ခဲ့သူ ဖြစ်တယ်လို့ မြို့ခံတွေကပြောပါတယ်။ 

ဒါနဲ့ပတ်သက်ပြီး ပစ်သတ်ခံရတဲ့ အငြိမ်းစားဗိုလ်မှူး လှဝင်းသိန်းရဲ့ မိသားစု၊ ဆွေမျိုးအသိုက်အဝန်းနဲ့ ပတ်သက်ဆက်နွှယ်သူတွေဘက်က တုံ့ပြန်ပြောဆိုချက်တော့ မရရှိသေးပါဘူး။ 

အငြိမ်းစားဗိုလ်မှူး လှဝင်းသိန်း ပစ်ခတ်ခံရပြီးနောက် စစ်ကောင်စီတပ်ဖွဲ့ဝင်တွေက ဘီးလင်းမြို့ အဝင်အထွက်နေရာတွေမှာ လုံခြုံရေးတင်းကျပ်ပြီး ပိတ်ဆို့ရှာဖွေ စစ်ဆေးနေပါတယ်။

ဘီးလင်းမြို့နယ်မှာ စစ်ကောင်စီက ပြီးခဲ့တဲ့ သြဂုတ်လကစပြီး အမျိုးသား ၂ ယောက် ဆိုင်ကယ်အတူမစီးရ၊ အမျိုးသမီးမောင်းတဲ့ ဆိုင်ကယ်အနောက်က အမျိုးသား မလိုက်ရလို့ သတ်မှတ်ထုတ်ပြန်ထားပါတယ်။

3 months Ago

September 1, 2022

ဘီးလင်းတွင် စစ်ကောင်စီတပ်နှင့် KNLA ပူးပေါင်းတပ် တိုက်ပွဲဖြစ်

ကရင်အမျိုးသားအစည်းအရုံး (ကေအန်ယူ) တပ်မဟာ-၁ ထိန်းချုပ်နယ်မြေဖြစ်တဲ့ ဘီးလင်းမြို့နယ်၊ ဝင်းတာပန်နဲ့ ကျောက်ဖျာကျေးရွာကြားမှာ နယ်မြေကျူးကျော် ဝင်ရောက်လာတဲ့ စစ်ကောင်စီတပ်နဲ့ KNLA ပူးပေါင်းတပ်တို့ကြား နှစ်ဖက်တိုက်ပွဲ ဖြစ်ပွားခဲ့တယ်လို့ ကေအန်ယူ သထုံခရိုင် ပြောခွင့်ရက ဒီဗွီဘီကို ပြောပါတယ်။

ပြီးခဲ့တဲ့ သြဂုတ် ၃၁ ရက် နေ့လယ် ၁၂ နာရီခွဲလောက်မှာ တပ်အင်အား ၁၀၀ ကျော်နဲ့ နယ်မြေကျူးကျော် ဝင်ရောက်လာတဲ့ စစ်ကောင်စီတပ်နဲ့ ကရင်အမျိုးသားလွတ်မြောက်ရေး တပ်မတော် (KNLA) ပူးပေါင်းတပ်တို့ကြား ထိတွေ့ တိုက်ပွဲဖြစ်ပွားခဲ့တာပါ။

မိနစ် ၃၀ နီးပါးကြာ ဖြစ်ပွားခဲ့တဲ့ နှစ်ဖက်တိုက်ပွဲအတွင်း စစ်ကောင်စီတပ်က အနည်းဆုံး ၅ ယောက်ထက်မနည်း ထိခိုက်သေဆုံးနိုင်ပြီး KNLA ပူးပေါင်းတပ်က ထိခိုက်မှု တစုံတရာ မရှိဘူးလို့ ဆိုပါတယ်။

ဘီးလင်းမြို့နယ်ထဲ စစ်ရေးဝင်ရောက်လှုပ်ရှားလာတဲ့ စစ်ကောင်စီတပ်ဟာ ခမရ ၄၀၁ နဲ့ ၄၁၀ တပ်ရင်းတွေဖြစ်ပြီး နှစ်ဖက်တိုက်ပွဲဖြစ်ပြီးနောက် စစ်ကောင်စီ လေးကေစခန်းဘက်ကို ပြန်လည်ဆုတ်ခွာသွားတယ်လို့ ကေအန်ယူ သထုံခရိုင်ပြောခွင့်ရ ပဒိုစောအေးနိုင်က ပြောပါတယ်။

နှစ်ဖက်တိုက်ပွဲအတွင်း စစ်ကောင်စီ အဝင်းကြီး အမြောက်တပ်ကနေ ကျောက်ဖျာကျေးရွာ အနီးကို လက်နက်ကြီး အချက် ၂၀ ထက်မနည်း ပစ်ခတ်ခဲ့ပါတယ်။

နှစ်ဖက်တိုက်ပွဲတွေ လအတော်ကြာ ငြိမ်သက်နေတဲ့ ဘီးလင်းမြို့နယ်ထဲမှာတော့ စစ်ကောင်စီတပ်က စစ်ရေး ဝင်ရောက်လှုပ်ရှားလာတာကြောင့် KNLA ပူးပေါင်းတပ်နဲ့ တကျော့ပြန် တိုက်ပွဲတွေ ဖြစ်ပွားလာတာပါ။

ဘီးလင်းမြို့နယ်မှာ စစ်တပ်အာဏာသိမ်းပြီးနောက် စစ်ကောင်စီတပ်နဲ့ KNLA ပူးပေါင်းတပ်တို့ရဲ့ တိုက်ပွဲတွေကြောင့် ဒေသခံပြည်သူ ၄,၀၀၀ ကျော် ဘေးလွတ်ရာကို ထွက်ပြေးတိမ်းရှောင်နေရပြီး လက်ရှိအချိန်ထိ နေရပ်မပြန်နိုင်သေးပါဘူး။

3 months Ago
More News
Up