ဘားအံသပိတ်

March 13, 2021

ဘားအံသပိတ်စစ်ကြောင်း အကျဉ်းထောင်ရှေ့နှင့်မြို့တွင်း ဆိုင်ကယ်ဖြင့် လှည့်လည်ဆန္ဒပြ

မတ်လ ၁၃ ရက် မနက်ပိုင်းက ကရင်ပြည်နယ်၊ ဘားအံမြို့မှာ စစ်အာဏာရှင်ဆန့်ကျင်ရေး  ဆိုင်ကယ်သပိတ်စစ်ကြောင်းဟာ လိုက်လံဖမ်းဆီးနေတဲ့ကြား ဘားအံအကျဉ်းထောင်နဲ့ မြို့တွင်းရပ်ကွက်တွေမှာ အဖွဲ့နှစ်ဖွဲ့ခွဲပြီး ကြွေးကြော်သံတွေနဲ့ လှည့်လည်ဆန္ဒပြခဲ့ကြပါတယ်။

ဘားအံမြို့ပေါ်မှာ  ဆန္ဒမ​ပြနိုင်အောင် စစ်ကောင်စီရဲ့တပ်နဲ့ရဲတွေက ဆန္ဒပြသူတွေကို လိုက်လံဖမ်းဆီး​နေတဲ့ကြားက စစ်အာဏာရှင် ကျဆုံးရေး၊ ဆန္ဒပြပွဲအတွင်း ဖမ်းဆီးခံရသူတွေ ပြန်လွတ်ပေးရေး ​ကြွေးကြော်သံတွေနဲ့ ငြိမ်းချမ်းစွာဆန္ဒပြခဲ့တာပါ။

"လိုက်လံဖမ်းဆီးနေတာတွေ ရှိတယ်။ လမ်းလျှောက်ပြီး ချီတက်ဆန္ဒပြလို အဆင်မပြေဘူး။ ဒါကြောင့် ဆိုင်ကယ်နဲ့လှည့်လည်ဆန္ဒပြတာ။ ဘယ်လိုပုံစံနဲ့ပဲဖြစ်ဖြစ် တော်လှန်ရေး အောင်မြင်ဖို့က အဓိက။ ရှေ့ဆက် ပုံစံအမျိုးမျိုးနဲ့ ဆန္ဒပြသွားမယ်"လို့ ဆန္ဒပြ G-Z လူငယ်တစ်ဦးက ပြောပါတယ်။

ဆန္ဒပြရာမှာ လူအင်အား ၅၀၀ ခန့်က ဆိုင်ကယ်၊ ကားတွေနဲ့ ဘားအံအကျဥ်းထောင်နဲ့ မဲ​ဘောင်ရပ်ကွက်၊ အမှတ် ၉ ၊ အမှတ် ၅ ၊ အမှတ် ၄ ရပ်ကွက် ညစျေးနဲ့ ကမ်းနားလမ်းတလျှောက် လှည့်လည်ဆန္ဒပြခဲ့တာပါ။

ကရင်ပြည်နယ်အတွင်း စစ်အာဏာရှင်ကျဆုံးရေး ဆန္ဒပြပွဲအတွင်း ဆန္ဒပြပြည်သူ ၁၀၀ ကျော် အဖမ်းခံခဲ့ရပြီး တချို့ကို နိုင်ငံတော်အကြည်ညိုပျက်စေမှု ပုဒ်မ ၅၀၅( က) နဲ့ တရားစွဲဆိုထားခံထားရသလို အဖမ်းခံရသူတချို့ဟာ ဒီကနေ့အထိ မိသားစုနဲ့ အဆက်အသွယ်မရသူတွေလည်း ရှိနေပါတယ်။

9 months Ago
Up