ဘားအံမြို့နယ်

November 3, 2021

ဘားအံမြို့နယ်တွင် လူ ၅ ဦးထက် ပိုစုဝေးခြင်းမပြုရန် ပုဒ်မ ၁၄၄ ထုတ်

ကရင်ပြည်နယ်၊ ဘားအံမြို့နယ်ကို  ရာဇဝတ်ကျင်ထုံးဥပဒေ ပုဒ်မ ၁၄၄ အမိန့်ထုတ်ပြန်လိုက်ကြောင်း စစ်ကောင်စီလက်အောက်ခံ မြို့နယ်အထွေထွေအုပ်ချုပ်ရေးဦးစီးဌာနက နိုဝင်ဘာ ၁ ရက်နေ့ ရက်စွဲနဲ့ ထုတ်ပြန်လိုက်ပါတယ်။

ဘားအံနယ်နိမိတ်အတွင်း အများပြည်သူရဲ့လုံခြုံရေးနဲ့ တရားဥပဒေ စိုးမိုးရေးကို ထိခိုက်ပျက်ပြားစေဖို့ ပြုမူဆောင်ရွက်နေတာတွေ့ရှိရတဲ့အတွက် အများပြည်သူရဲ့ လုံခြုံရေး၊ တရားဥပဒေ စိုးမိုးရေးနဲ့ ရပ်ရွာ အေးချမ်းသာယာရေး အပြင် ရုန်းရင်းဆန်ခတ်မှု ဖြစ်ပွားနိုင်တယ်လို့ ယူဆတဲ့အတွက် ပုဒ်မ ၁၄၄ ထုတ်ပြန်တာလို့ ဆိုပါတယ်။

ဒါကြောင့် ဘားအံမြို့နယ်အတွင်း စုဝေးခြင်း၊ ဟောပြောခြင်း၊ ယာဉ်တမျိုးမျိုးကို အသုံးပြု၍ဖြစ်စေ၊ လူကိုယ်တိုင်ဖြစ်စေ စီတန်းလှည့်လည်ခြင်း လှုံ့ဆော်ဆန္ဒပြခြင်း၊ ဖျက်ဆီးခြင်း၊ ရုန်းရင်းဆန်ခတ်လုပ်တာတွေကို တားမြစ်လိုက်ကြောင်း ပါရှိပါတယ်။

ဒါ့အပြင် လူ ၅ ဦး သို့မဟုတ် ၅ ဦး အထက် ပိုတဲ့ သူတွေ ဘားအံမြို့နယ်အတွင်း လမ်းမကြီးများ၊ လမ်းသွယ်၊ လမ်းကြား ဥယျာဉ် သို့မဟုတ် ပြည်သူနဲ့ဆိုင်တဲ့နေရာတွေကို စုဝေးခြင်းမပြုဖို့ နဲ့ ည ၁၀ နာရီ မှ မနက် ၄ နာရီ အချိန်အတွင်းကို ညမထွက်ဖို့ လည်း ထုတ်ဆင့်ကြောင်း ဖော်ပြပါတယ်။

တခြားပြည်နယ်နဲ့တိုင်းတွေက မြို့နယ်တချို့မှာလည်း စစ်ကောင်စီက လူ ၅ ဦးထက် ပိုမစုဖို့ အမိန့်ထုတ်ထားသလို၊ စစ်ကောင်စီ ကျန်းမာရေးဌာနက လူ ၁၀၀ ထက်ပိုစုဝေးပါက အရေးယူမယ်လို့  အမိန့်ထုတ်ထားပေမဲ့ အကြမ်းဖက်စစ်တပ် ထောက်ခံပွဲတွေကိုတော့ လူအင်အားအများအပြားနဲ့ ပြုလုပ်နေတာ ဖြစ်ပါတယ်။

3 months Ago

October 7, 2021

ဘားအံမြို့နယ်တွင် ကျေးရွာသူကြီးခန့်အပ်ပြီး တာဝန်ယူရန် BGF ဖိအားပေး

ကရင်​ပြည်နယ်၊ ဘားအံမြို့နယ် (ကေအန်ယူ- တပ်မဟာ ၁ သထုံခရိုင်)​ ထိန်းချုပ်နယ်မြေအတွင်းမှာ ကျေးရွာသူကြီးခန့်အပ်ပြီး တာဝန်ယူအုပ်ချုပ်ဖို့ အ​​ကြမ်းဖက်စစ်ကောင်စီရဲ့လက်အောက်ခံ ဘီဂျီအက်ဖ်တပ်က ဖိအားပေးညွှန်ကြားလာတယ်လို့ ဒေသခံတွေဆီက သိရပါတယ်။

ဘားအံမြို့နယ်၊ ​တကောင်ဘိုးကျေးရွာအုပ်စုထဲက ဂျို့ပင်ဆိပ်ကျေးရွာ၊ မြိုင်ကျေးရွာ၊ ကုန်းတန်းကြီးကျေးရွာ၊ မီးပုံးကျေးရွာက ရပ်မိရပ်ဖနဲ့ ဂေါပကတွေကို မိတ်ထိလာ ကျေးရွာ (ဃို့ကုန်း)ကို အမှတ် ၁၀၁၄ တပ်ရင်း၊ တပ်ခွဲ ၂ မှူး ဗိုလ်တင်ဝင်းက ခေါ်ယူတွေ့ဆုံပြီး အတင်းဖိအားပေး ညွှန်ကြားခဲ့တယ်လို့ ဆိုပါတယ်။

အဆိုပါကျေးရွာတွေမှာ သူကြီးတစ်ယောက်ကို  ၁ လ (သို့မဟုတ်) ၁၅ ရက်စနစ်နဲ့ သူကြီးတာဝန်ယူပြီး အုပ်ချုပ်ဖို့ အောက်တိုဘာ ၃ ရက်နေ့က အမိန့်ပေးညွှန်ကြားခဲ့တယ်လို့ သိရပါတယ်။

ဂျို့ပင်ဆိပ်ကျေးရွာမှာ တစ်လကို သူကြီး ၂ ဦး၊ မြိုင်ကျေးရွာမှာ ၁ လသူကြီး၂ ဦး၊ မီးပုံးကျေးရွာမှာ ၁ လသူကြီး ၄ ဦး၊ ကုန်းတန်းကြီးမှာ ၁၅ ရက်သူကြီး ၃ ဦးစီ တာဝန်ဖို့နဲ့ သူကြီးရွေးချယ်မှုတွေကို အောက်တိုဘာလ ၅ ရက်နေ့ နောက်ဆုံးထားပြီး ရွေးချယ်ဖွဲ့စည်းဖို့ ညွှန်ကြားခဲ့ပါတယ်။

ဘားအံမြို့နယ်၊ ဂျို့ပင်ဆိပ်ကျေးရွာ ဒေသခံတစ်ဦးက "အတင်းဖိအားပေးပြီး မလုပ်ချင်လည်းမရဘူး။ မလုပ်ချင်လည်း လုပ်ရမယ်။ မလုပ်ရင် အသက်အန္တရာယ်ကို ရန်ရှာမယ် ပုံစံ။ ကျနော်တို့ ဒေသခံတွေကတော့ ကေအန်ယူရဲ့ စီမံခန့်ခွဲမှုအောက်မှာပဲ အမြဲရှိနေချင်တာ"လို့ ပြောပါတယ်။

သူကြီးတာဝန်ယူမယ့်သူတွေရဲ့  ဖုန်းနံပါတ်တွေကို ယူထားပြီး မိမိကျေးရွာအတွင်း ကေအန်ယူ၊ ကေအန်အယ်လ်အေ တပ်ဖွဲ့ဝင်တွေနဲ့ပတ်သက်တဲ့ သွားလာလှုပ်ရှားမှုတွေကို ဘီဂျီအက်ဖ်တပ်ဖွဲ့ဆီ ချက်ချင်းသတင်းပေးပို့ဖို့ အမိန့်ပေးညွှန်ကြားထားတယ်လို့ ဒေသခံတွေက ပြောပါတယ်။

အဆိုပါဖြစ်စဥ်နဲ့ပတ်သက်ပြီး ကေအန်ယူတာဝန်ရှိသူ- တပ်မဟာ ၁ သထုံခရိုင် အတွင်းရေးမှူး ပဒိုစောစိုး​မြင့်ကို ဒီဗွီဘီက ဆက်သွယ်မေးမြန်းဖို့ ကြိုးစားပေမယ့် ဖုန်းဆက်သွယ်လို့ မရခဲ့ပါဘူး။

၂၀၂၁ ခုနှစ်၊ ဇူလိုင်လက အမှတ် ၁၀၁၄ နယ်ခြားစောင့်တပ်ရင်းမှာ တာဝန်ထမ်းဆောင်ဖို့ ကျေးရွာတစ်ရွာကို လူတစ်ယောက်နှုန်း စစ်မှုမထမ်းမနေရဆိုပြီး တပ်ခွဲမှူး ဗိုလ်တင်ဝင်းက ကျေးရွာ တာဝန်ရှိသူတွေကို ပြော​ကြားခဲ့တယ်လို့ ဒေသခံတွေက ဆိုပါတယ်။

3 months Ago
More News
Up