ဘားအံဆေးရုံ

July 21, 2021

ဘားအံဆေးရုံ ကျန်းမာရေးဝန်ထမ်း ၁၁ ဦး ကိုဗစ် - ၁၉ ကူးစက်ခံရ

ကရင်ပြည်နယ်၊ ဘားအံမြို့ ပြည်သူ့ဆေးရုံက ဆရာဝန်အပါအဝင် ကျန်းမာရေးဝန်ထမ်း ၁၁ ဦး ကိုဗစ်-၁၉ ရောဂါ ကူးစက်ခံရတယ်လို့ ဆေးရုံအုပ်ကြီး ဒေါက်တာ ဘရန်အောင်က ဒီဗွီဘီကို ပြောပါတယ်။

ပြီးခဲ့တဲ့ လဆန်းပိုင်းကစပြီး မျိုးရိုးဗီဇပြောင်း ကိုဗစ် -၁၉ ရောဂါကူးစက်ခံရသူ  ဆရာဝန် ၁ ဦး၊ သူနာပြု ၆ ဦး၊ သူနာပြုအကူနဲ့ ဓာတ်ခွဲဌာနအပါအဝင် ကျန်းမာရေးဝန်ထမ်း ၁၁ ဦး ဆေးကုသမှုခံယူနေရတာပါ။

ဘားအံဆေးရုံအုပ်ကြီး ဒေါက်တာ ဘရန်အောင်က "ဆေးရုံကနေ ရောဂါကူးစက်ခံရတာ ဖြစ်ဖို့ကနည်းတယ်။ ဆေးရုံမှာ ကိုဗစ် လူနာရှိတော့ အကာအကွယ်ယူကြတယ်။ ပြင်ပ အိမ်တို့ ဘာတို့က ဖြစ်ဖို့များတယ်လို့  ယူဆတယ်" လို့ ဆိုပါတယ်။

လူနာတွေထဲက ကျန်းမာရေးဝန်ထမ်း ၂ ဦးကတော့ ရောဂါသက်သာပျောက်ကင်းတဲ့အတွက် ဇူလိုင် ၂၁ ရက်မှာ  ဆေးရုံက ဆင်းသွားပြီ ဖြစ်ပါတယ်။

လက်ရှိ သီးသန့်လူနာထားရှိတဲ့ (Isolation Unit) မှာ ကိုဗစ်အတည်ပြုလူနာ ၈၀ နီးပါး  တက်ရောက်ဆေးကုသခံယူနေရသလို့ တိုင်းရင်းဆေးရုံနဲ့ နယ်စပ်ဒေသ တိုင်းရင်းသားလူမျိုးများ ဖွံ့ဖြိုးရေးသင်တန်းကျောင်းတွေမှာပါ ဆေးဝါးကုသမှုတွေ ဆောင်ရွက်ပေးထားရပါတယ်။

ကရင်ပြည်နယ်အတွင်း ကိုဗစ်အတည်ပြုလူနာ ၁၀၀၀ နီးပါးနဲ့  သေဆုံးသူ ၃၀ ကျော်ရှိကာ   ဆေးစစ်မှုမခံရသေးသူတွေကြား ရောဂါကူးဆက်ခံရသူတွေ အများကြီးရှိနိုင်တယ်လို့ ပြည်နယ်အဆင့်   တာဝန်ရှိသူက ပြောပါတယ်။

2 months Ago

July 8, 2021

ဘားအံဆေးရုံကြီးတွင် ကိုဗစ်လူနာများလာသဖြင့် ဆရာဝန်လိုအပ်ချက်ရှိနေ

ကရင်ပြည်နယ် ဘားအံမြို့ပြည်သူ့ဆေးရုံမှာ ကိုဗစ်-၁၉ အတည်ပြု လူနာများပြားလာတဲ့အတွက် ကုသရေးဆရာဝန် လိုအပ်ချက်တွေ ရှိနေတယ်လို့ ဆေးရုံအုပ်ကြီး ဒေါက်တာဘရန်အောင်က ဒီဗွီဘီကို ပြောပါတယ်။

ဘားအံဆေးရုံကြီးမှာ လက်ရှိတာဝန်ထမ်းဆောင်နေတဲ့ ဆရာဝန်အင်အား ၃၀ သာရှိပြီး  သီးသန့်လူနာထားရှိတဲ့ (Isolation Unit)မှာ တက်ရောက်နေတဲ့ ကိုဗစ်အတည်ပြုလူနာ ၇၀ ဦးအပြင် အထွေထွေရောဂါနဲ့ အရေးပေါ်လူနာတွေအတွက် ဆရာဝန် လိုအပ်ချက်တွေ ရှိနေတာပါ။ 

"အဓိက က လက်ရှိဝန်ထမ်း အခြေအနေနဲ့ဆိုရင် ကျနော်တို့ ရုန်းကန်းနေရတယ်။ လက်ထောက် ဆရာဝန်ကို ပြင်ပလူနာဌာနလောက်ပဲ ပေးထားရတယ်" လို့ ဆေးရုံအုပ်ကြီး ဒေါက်တာ ဘရန်အောင်က ဆိုပါတယ်။

ဇွန် ၂၇ ရက်နေ့က စတင်ပြီး  ကိုဗစ်-၁၉ အတည်ပြုလူနာ များပြားလာပြီး နေရာလုံလောက်မှုမရှိတဲ့အတွက်  ဘားအံတိုင်းရင်းဆေးရုံကြီး ဆေးကုသဆောင်မှာ ပြောင်းရွှေ့ဆေးကုသခံယူနေရတဲ့ လူနာ ၅၀ လောက် ရှိပါတယ်။ 

ကိုဗစ်အတည်ပြုလူနာတွေအတွက် လက်ရှိအတိုင်းအတာအထိ ဆေးဝါးနဲ့ အောက်စီဂျင် လုံလောက်မှု ရှိနေပေမယ့် လူနာတွေ ပြားလာပါက နေရာအခက်အခဲအပြင် ဆေးဝါးနဲ့ အောက်စီဂျင် မလုံလောက်မှုတွေ ရှိလာနိုင်တယ်လို့ တာဝန်ရှိသူက ဆိုပါတယ်။ 

ကရင်ပြည်နယ်အတွင်း ကိုဗစ်အတည်ပြုလူနာ ၇၆၀ လောက် ရောဂါကူးစက်ခံထားရပြီး သေဆုံးသူ ၁၀ ဦးကျော် ရှိတယ်လို့ ပြည်နယ်ကျန်းမာရေးဦးစီးဌာန၊ တာဝန်ရှိသူက ပြောပါတယ်။

3 months Ago
More News
Up