ဘားအံ

May 21, 2022

ဘားအံတွင် လေပြင်းတိုက်ခိုက်သဖြင့် သစ်ပင်များလဲကျပြီး လျှပ်စစ်မီးများပြတ်တောက်

ကရင်ပြည်နယ်၊ ဘားအံမြို့မှာ မေ ၂၀ ရက် ညနေပိုင်းက မုန်တိုင်းဖြတ်ကျော်ဝင်ရောက်စဉ် မိုးသည်းထန်စွာရွာသွန်းပြီး လေပြင်းတိုက်ခိုက်ခဲ့တဲ့အတွက် မြို့တွင်းနေရာတော်တော်များများမှာ သစ်ပင်တွေလဲကျပြီး လျှပ်စစ်မီးတွေ ပြတ်တောက်ခဲ့ပါတယ်။

ကုန်းတွင်းမုန်တိုင်းငယ်ဟာ မေလ ၂၀ ရက် ဝင်ရောက်တိုက်ခိုက်ခဲ့တဲ့အတွက် လေပြင်းနဲ့အတူ မိုးရွာသွန်းခဲ့ရာ သစ်ပင်ကြီးတွေပါလဲကျခဲ့တဲ့အတွက် လျှပ်စစ်မီးတွေပြတ်တောက်ခဲ့သလို ကားလမ်းပိတ်ဆို့မှုတွေ ဖြစ်ပေါ်ခဲ့ပါတယ်။

ဘားအံမြို့ခံတစ်ဦးက”သစ်ပင်ကြီးတချို့  လျှပ်စစ်မီးတိုင်တွေပေါ် လဲကျခဲ့တယ်။ လေပြင်းတိုက်ခိုက်ခဲ့တဲ့ ညနေပိုင်းကစတင်ပြီး ဘားအံမြို့မှာ လျှပ်စစ်မီးပြတ်တောက်တာ အခုထိပဲ။ လူတွေတော့ ထိခိုက်မှုရှိတာ မကြားဘူး”လို့ ပြောပါတယ်။

မြန်မာနိုင်ငံလူမှုကယ်ဆယ်ရေးအဖွဲ့(ဘားအံ)တာဝန်ရှိသူတစ်ဦးက “မြို့ရဲ့ နေရာတော်တော်များများ သစ်ပင်တွေလဲတယ်။ တချို့နေရာတွေမှာ မီးတိုင်တွေပေါ်နဲ့ ကားလမ်းတွေပေါ်လဲကျတော့ လမ်းတွေမပိတ်အောင် အရင်ရှင်းလင်းနေရတယ်။ မနေ့တည်းက ရှင်းနေတာ ဒီနေ့အထိ မပြီးသေးဘူး”လို့ ဆိုပါတယ်။

အခု လေပြင်းတိုက်ခိုက်မှုနဲ့အတူ သစ်ပင်တွေလဲကျရာမှာ လူတွေထိခိုက်မှုမရှိသလို လူအိမ်တွေထိခိုက်မှုမရှိကြောင်း ဒီနှစ်အစ တစ်ရက်တည်း သစ်ပင်လဲကျရှင်းလင်းရာမှာ မနှစ်က မိုးရာသီတစ်နှစ်လုံးစာထက် ပိုရှင်းရှင်းလင်းနေရတယ်လို့  ဆိုပါတယ်။

လေပြင်းတိုက်ခိုက်မှုကြောင့် ထွန့်ပတိုင်ရေကန်အနီး၊ ကော့ဝုန်းဘောလုံးကွင်းအရှေ့၊ အထက(၂)ကျောင်းဝင်းအတွင်း၊ ‌လမ်းဂွ ‌မဲဘောင်ကျောင်းအရှေ့၊ ရေကျော် CB Bank အရှေ့ ၊ ကောလိပ်အရှေ့နဲ့ သံလွင်အရှေ့ခြမ်း မြိုင်ကလေးကျေးရွာဘက် (ဘားအံ-ရန်ကုန်) ကားလမ်းဘေးတွေမှာပါ သစ်ပင်တွေ လဲကျခဲ့ပါတယ်။

ယာဉ်ကြော မပိတ်ဆို့ လဲကျနေတဲ့ သစ်ပင်ကြီးတွေကို ဖြတ်တောက် ရှင်းလင်းရေးလုပ်ငန်းတွေကို မြန်မာနိုင်ငံလူမှုကယ်ဆယ်ရေးအဖွဲ့(ဘားအံ)၊ မြန်မာနိုင်ငံမီးသတ်တပ်ဖွဲ့ (ဘားအံခရိုင်)က ရှာဖွေကယ်ဆယ်ရေးတပ်ဖွဲ့ဝင်တွေ ပူးပေါင်းပြီး လုပ်ဆောင်နေကြပါတယ်။

မုန်းတိုင်းကြောင့် ကရင်ပြည်နယ် လှိုင်းဘွဲ့၊ မြဝတီစတဲ့ မြို့နယ်တွေမှာလည်း သစ်ပင်တွေလဲကျတာ တွေရှိခဲ့ပါတယ်။

အဆိုပါ ကုန်းတွင်းမုန်တိုင်းငယ်ဟာ ဒီကနေ့မနက်ပိုင်းမှာ ထိုင်းနိုင်ငံမြောက်ပိုင်းကိုဝင်ရောက်ပြီး အားကောင်းသောလေဖိအားနည်းရပ်ဝန်းအဖြစ် အားလျော့သွားပြီးလို့ မိုးဇလက ထုတ်ပြန်ထားပါတယ်။

1 month Ago

May 6, 2022

ဘားအံမြို့နယ်၌ စစ်ကောင်စီတပ်နှင့် BGF ပူးပေါင်းတပ်ဖွဲ့က ရွာသား ၁ ဦးကို ပစ်သတ်

ကေအန်ယူ တပ်မဟာ(၁) သထုံခရိုင်၊ ဘားအံမြို့နယ်၊ ထီးကျူကျေးရွာနဲ့ မဲသနကျေးရွာအကြားမှာ စစ်ကောင်စီတပ်နဲ့ BGF ပူးပေါင်းတပ်က အရပ်သားပြည်သူ တယောက်ကို  ပစ်ခတ်သတ်ဖြတ်ခဲ့တယ်လို့ ကေအန်ယူက  ထုတ်ပြန်ပါတယ်။

စစ်ကောင်စီ၊ BGF ပူးပေါင်းတပ်ဖွဲ့ဟာ မေလ ၅ ရက် မနက် ၁၀ နာရီလောက်က ဘားအံမြို့နယ်ကနေ ဘီးလင်းမြို့နယ်ရှိ ဝင်းတာပန်နဲ့ လေးကေ BGF စခန်းတွေကို စစ်ကူ ပေးဖို့ လာရောက်စဉ် ထီးကျူကျေးရွာနဲ့ မဲသနကျေးရွာအကြားမှာ အမျိုးသား တယောက်ကို သေနတ်နဲ့ ပစ်ခတ်သတ်ဖြတ်ခဲ့တာလို့ ဆိုပါတယ်။

ဆိုင်ကယ်နဲ့ နွားစာလာသယ်တဲ့ ထီးကျော်ခီးကျေးရွာနေ  အသက် ၄၂ အရွယ် စောဖားတရုတ်ကို ဆိုင်ကယ်မရပ်ပေးလို့ဆိုပြီး သေနတ်နဲ့ ပစ်ခတ်ခဲ့တာဖြစ်ပြီး စောဖားတရုတ်မှာ တင်ပါးကနေ ဆီးအိမ် သေနတ်ဖောက်ထွက် ဒဏ်ရာရရှိပြီး သေဆုံးသွားခဲ့ပါတယ်။

ကေအန်ယူ တပ်မဟာ(၁) သထုံခရိုင် ဥက္ကဋ္ဌ ပဒိုစောစိုးမြင့်ကတော့ အရပ်သားတွေပေါ် အကြောင်းမဲ့ ပစ်ခတ်တိုက်ခိုက်နေတဲ့ စစ်ကောင်စီ၊ BGF ပူးပေါင်းတပ်ရဲ့ လုပ်ရပ်ဟာ စစ်ရာဇဝတ်မှုကို ကျူးလွန်နေတာ ဖြစ်တယ်လို့  ဒီဗွီဘီကို ပြောပါတယ်။

“မနေ့က လေးကေနဲ့ ဝင်းတာပန်ကို လာတဲ့ လမ်းကြောင်းမှာပဲ ခီးကျော်ခီကျေးရွာသားက နွားစာ သွားဆွဲတဲ့လမ်းမှာပစ်သတ်ခံလိုက်ရတယ်။ အခုစစ်ကောင်စီက ဝင်းတာပန်ဘက်ကိုလာဖို့ရှိတယ်။”

သေဆုံးသွားတဲ့ စောဖားတရုတ်ဟာ ထီးကျော်ခီး ကျေးရွာလူကြီးဟောင်းဖြစ်ပြီး သူ့ကို စစ်ကောင်စီတပ်နဲ့ (BGF-၁၀၁၄) ဗိုလ်အောင်ချစ် ဦးဆောင်တဲ့အဖွဲ့က ပစ်ခတ်သတ်ဖြတ်ခဲ့တာ ဖြစ်တယ်လို့ ဆိုပါတယ်။

စစ်ကောင်စီတပ်တွေဟာ ဘီးလင်းမြို့နယ်ကို စစ်ကူသွားရာမှာလည်း လမ်းတလျှောက်ရှိ ဒေသခံပြည်သူ အယောက်  ၄၀ ကျော်ကို  အဓမ္မဖမ်းဆီးပြီး လူသားဒိုင်းအဖြစ်အသုံးချကာ စားနပ်ရိက္ခာ၊ စစ်သုံးပစ္စည်းတွေ သယ်ခိုင်းခဲ့တယ်လို့ ကေအန်ယူ သထုံခရိုင်က ထုတ်ပြန်ထားပါတယ်။

မေ ၁ ရက်ကလည်း စစ်ကောင်စီရဲ့တပ်နဲ့ အမှတ် ၁၀၁၄ တပ်ရင်း BGF ပူးပေါင်းတပ်ဖွဲ့ဝင်တွေဟာ သံလွင်မြစ်အနောက်ခြမ်း မြိုင်၊ ကုန်းတန်းကြီး၊ ဝဲပျံချောင်းဝ၊ ဘုရားဆိပ်၊ ဝဲပျံ၊ ပေပင်ဆိပ်၊ မိထ္ထီလာကျေးရွာနဲ့စတဲ့အနီးဝန်းကျင်က အရပ်သားပြည်သူ ၁၀၀ ရာကျော်ကို  လူသားဒိုင်းအပြင် ပေါ်တာအဖြစ် ဖမ်းဆီးခေါ်ဆောင်သွားခဲ့ပြီး လူတစ်ဦးကို ငွေ သိန်း ၂၀၊ ၃၀ တောင်းယူကာ ပြန်လွှတ်ပေးတာရှိတယ်လို့ ဒေသခံတွေက ပြောပါတယ်။

အလားတူ ကြို့ပင်ဆိပ်ကျေးရွာ မင်္ဂလာဆောင်တစ်ခုမှာ ဒေသခံပြည်သူကာကွယ်ရေးတပ်(PDF)တွေ ရောက်နေတယ်ဆိုပြီး မင်္ဂလာဆောင်ကိုလာသူတွေနဲ့ ဒေသခံတွေကိုပါ ဖမ်းဆီးခေါ်ဆောင်သွားပြီး လူတစ်ယောက် ကျပ် ၇ သိန်းတောင်းခံပြီး  ပြန်လွှတ်ပေးခဲ့တယ်လို့ သိရပါတယ်။

သထုံခရိုင်၊ တပ်မဟာ ၁၊ KNDO တပ်ရင်း ၂ နယ်မြေအတွင်းမှာ တပ်စွဲထားတဲ့ လေးကေ၊ ဝင်းတာပန်တပ်စခန်းတွေ ဧပြီလ ၂၃ ရက်ရက် နောက်ဆုံးထားထွက်ခွာပေးဖို့ အသိပေး ထုတ်ပြန်ခဲ့ပေမယ့် ထွက်ခွာမပေးတဲ့အတွက် KNLA ပူးပေါင်းတပ်ဖွဲ့တွေနဲ့ နှစ်ဖက်တိုက်ပွဲတွေ ပိုမိုပြင်းထန်နေသလို့ စစ်ကောင်စီက တပ်အင်အားဖြည့်တင်းဖို့ ကြိုးစားလုပ်ဆောင်နေတယ်လို့ ကေအန်ယူတာဝန်ရှိသူက ပြောပါတယ်။

ဒါအပြင် စစ်ကောင်စီရဲ့တပ်စခန်းက အနီးဝန်းကျင်က ကျေးရွာတွေအတွင်းကို လက်နက်ကြီး၊ လက်နက်ငယ်အပါအဝင် လေကြောင်းကပါ ဗုံးကြဲတိုက်ခိုက်ခဲ့တဲ့အတွက်  ဒေသခံလူနေအိမ်တွေ မီးလောင်ပျက်စီးခဲ့သလို အရပ်သားပြည်သူ သေဆုံးတာနဲ့ ဒဏ်ရာရရှိတာတွေရှိပါတယ်။

2 months Ago
More News
Up