ဘာစီလိုနာ

December 4, 2021

ဘာစီလိုနာနှင့် ဘိုင်ယန်မြူးနစ် ယှဉ်ပြိုင်ကစားမည့် ချန်ပီယံလိဂ်အုပ်စုပွဲ ပရိသတ်မပါဘဲ ကျင်းပမည်

ဘာစီလိုနာအသင်းနဲ့ ဘိုင်ယန်မြူနစ်အသင်း တွေ့ကြမယ့် လာမယ့်အပတ် ချန်ပီယံလိဂ်အုပ်စု ပွဲစဉ်ကို ပရိသတ်မပါဘဲ ကျင်းပသွားမယ်လို့ ကလပ်အသင်းတွေက ဒီဇင်ဘာ ၃ ရက်မှာ ပြောပါတယ်။

ဘောလုံးပွဲကျင်းပမယ့် ဂျာမနီနိုင်ငံရဲ့ ဘာဗာရီရာပြည်နယ်မှာ ကိုဗစ်-၁၉ ကူးစက်မှု ပြန့်ပွားနေတာကြောင့် ပရိသတ်မပါဘဲ ကျင်းပရတာလို့ ဆိုပါတယ်။

စပိန်အသင်းဖြစ်တဲ့ ဘာကာအသင်းဟာ အုပ်စု E မှာ ဒုတိယနေရာမှာ ရှိနေပြီး၊ ဒီဇင်ဘာ ၈ ရက်နေ့ကျရင် ဂျာမန်အသင်း ဘိုင်ယန်မြူးနစ်နဲ့ မြူနစ်မြို့မှာရှိတဲ့ Allianz Arena ဘောလုံးကွင်းမှာ တွေ့ဆုံရမှာ ဖြစ်ပါတယ်။ 

လာမယ့် ဒီဇင်ဘာ ၇ ရက်နေ့ကျရင် မန်ချက်စတာစီးတီးအသင်းနဲ့ RB Leipzig တို့ ပွဲစဉ်ကိုလည်း ပရိသတ်မပါဘဲ ကျင်းပဖို့ ရှိပါတယ်။ 

ကိုဗစ်-၁၉ ကူးစက်မှု စတုတ္ထလှိုင်းကို စိုးရိမ်နေရတာကြောင် ဂျာမန်အစိုးရဟာ ကြာသာပတေးနေ့ကစပြီး အားကစားပွဲတွေနဲ့ဆိုင်တဲ့ စည်းကမ်းတွေကို ပြန်လည် တင်းကျပ်လိုက်တာလို့ ရိုက်တာသတင်းမှာ ဖော်ပြထားပါတယ်။

ဂျာမနီမှာ ပြီးခဲ့တဲ့ ဒီဇင်ဘာ ၂ ရက်နေ့ တရက်တည်းမှာ  ကိုဗစ်-၁၉ လူနာအသစ် ၇၃,၀၀၀ အသစ် တွေ့ရှိခဲ့ရပြီး ၃၈၈ ယောက် သေဆုံးခဲ့ပါတယ်။

10 hours Ago

December 1, 2021

ဘာစီလိုနာတွင် ဘဏ်ဟောင်းအဆောက်အအုံ မီးလောင်ပြီး လူ ၄ ဦး သေဆုံး

စပိန်နိုင်ငံ ဘာစီလိုနာပြည်နယ်က ဘဏ်ဟောင်းအဆောက်အအုံတခုမှာ နိုဝင်ဘာ ၃၀ ရက်က မီးလောင်လို့ ကလေး ၂ ယောက် အပါအဝင် လူ ၄ ယောက် သေဆုံးတယ်လို့ မီးသတ်သမားတွေက ပြောပါတယ်။

ဗလာကျင်းနေတဲ့ အဆောက်အအုံထဲမှာ မိသားစု ၂ စု နေခဲ့ကြတာလို့ အရာရှိတွေက ပြောပါတယ်။

“လူကြီး ၂ ယောက်၊ ရင်ခွင်ပိုက် ကလေးတယောက်နဲ့ ၃ နှစ်သား ကလေးတယောက် သေဆုံးခဲ့တာ။ လူ ၄ ယောက် အသက်ရှင်ခဲ့ပေမဲ့ မီးခိုးရှူမိလို့ ဆေးကုသ ခံနေရတယ်။ မီးလောင်ရတဲ့ အကြောင်းရင်းကို မသိရသေးဘဲ ရဲတွေက စုံစမ်းစစ်ဆေးနေတယ်” လို့ မြို့ရဲ့ မီးသတ်တပ်ဖွဲ့ အကြီးအကဲ အိန်ဂျယ် လိုပက်ဇ်က ပြောပါတယ်။

ဘာစီလိုနာပြည်နယ်က စွန့်ပစ်အဆောက်အအုံ အများအပြားကို အိမ်ခြေမဲ့ လူတွေက တရားမဝင် သိမ်းပိုက်ထားလေ့ ရှိပါတယ်။

မနှစ်က ဒီဇင်ဘာလမှာ ဘာစီလိုနာမြို့ ဆင်ခြေဖုံးက ကျူးကျော်နေထိုင်သူတွေ သိမ်းပိုက်ထားတဲ့ စွန့်ပစ် ကုန်လှောင်ရုံတခုအတွင်း လူအတော်များများ သေဆုံးခဲ့ဖူးပါတယ်။

3 days Ago
More News
Up