ဘရာဇီးနိုင်ငံ အက်စ်ပီရစ်တိုဆန်တိုပြည်နယ်က အာရာခရုဇ်မြို့မှာ နိုဝင်ဘာ ၂၅ ရက်က စာသင်ကျောင်း ၂ ကျောင်း တိုက်ခိုက်ခံရတာကြောင့် ၃ သေဆုံးပြီး ၁၀ ယောက်ထက်မနည်း ထိခိုက်ဒဏ်ရာရရှိခဲ့တယ်လို့ ဒေသခံအစိုးရက ကြေညာချက် ထုတ်ပြန်ပါတယ်။
တိုက်ခိုက်သူလို့ သံသယရှိသူကို ရဲတပ်ဖွဲ့က ဖမ်းမိထားပြီး ရာဇ၀တ်မှုဖြစ်ရတဲ့ အကြောင်းရင်းကို သေသေချာချာ စုံစမ်းစစ်ဆေးနေတယ်လို့ အာဏာပိုင်တွေက ပြောပါတယ်။
ပစ်ခတ်မှုမှာ သံသယရှိသူဟာ အရွယ်မရောက်သေးတဲ့ ကျောင်းသားဟောင်းတယောက် ဖြစ်တဲ့အပြင် ရဲဝန်ထမ်းတဦးရဲ့ သားဖြစ်တယ်လို့ ပြည်နယ်အုပ်ချုပ်ရေးမှူး ရီနာတို ကာဆာဂရန်ဒီက ပြောပါတယ်။
သူဟာ အသက် ၁၈ နှစ် မပြည့်သေးလို့ ထိန်းသိမ်းထားပေမယ့် ဖမ်းချုပ်ထားလို့တော့ မရကြောင်း၊ အဲဒီလူငယ်နဲ့ အဖေဖြစ်သူတို့ဆီကနေ ရရှိထားတဲ့ သက်သေခံချက်တွေအရ ပစ်ခတ်မှုကို ရည်ရွယ်ချက်ရှိရှိနဲ့ စီစဉ်ဆောင်ရွက်ခဲ့တာလို့ အုပ်ချုပ်ရေးမှူးက ပြောပါတယ်။
တိုက်ခိုက်မှုဟာ မနက် ၉ နာရီ ထိုးပြီးချိန်လေးမှာ ပရီမိုဘစ်တီပြည်နယ် မူလတန်းနဲ့ အလယ်တန်းကျောင်းနဲ့ အစိုးရကျောင်း တကျောင်းမှာ ဖြစ်ပွားခဲ့ပြီး ကျူးလွန်သူက ပစ္စတို၊ ခြောက်လုံးပြူးနဲ့ ပစ်ခတ်ခဲ့တာလို့ ကာဆာဂရန်ဒီ က ပြောပါတယ်။
အဲဒီလူငယ်ဟာ စစ်ဝတ်စုံကို ဝတ်ဆင်ထားပြီး နာဇီသင်္ကေတ ဆွာစ်တိက အမှတ်အသားကိုလည်း ယူဆောင်လာတယ်လို့ ဆိုပါတယ်။
ပထမကျောင်း ပရီမိုဘစ်တီမှာ ကောင်ကလေးဟာ အလယ်တန်းရဲ့ဂိတ်ပေါက်က သော့ကိုဖျက်ပြီး ဆရာ ၁၀ ယောက် ရှိနေတဲ့ ဝန်ထမ်းအခန်းထဲကို ဝင်ရောက်ပစ်ခတ်ခဲ့ရာမှာ ဆရာ ၂ ယောက် အခင်းဖြစ်နေရာမှာ သေဆုံးပြီး ဆရာ ၃ ဦးကတော့ ဒဏ်ရာအပြင်းအထန်နဲ့ ဆေးရုံတင်ထားရကြောင်း အက်စ်ပီရစ်တို အုပ်ချုပ်ရေးမှူးက ပြောပါတယ်။
အဲဒီနောက် သံသယရှိသူဟာ တစ်ကီလိုမီတာလောက် အကွာမှာရှိတဲ့ အစိုးရကျောင်းကို သွားရောက်ပြီး အသက် ၁၀ နှစ်မှ ၁၂ နှစ်ကြား ကလေးငယ် ၃ ဦးကို ပစ်သတ်ခဲ့ရာမှာ သူတို့ထဲက ကလေးတဦး သေဆုံးခဲ့ရပါတယ်။
ပြည်နယ်အစိုးရဟာ တိုက်ခိုက်မှုအတွင်း သေဆုံးသွားရသူတွေရဲ့ မိသားစုဝင်တွေ၊ မိတ်ဆွေတွေနဲ့အတူ တစည်းတလုံးတည်း ရှိနေကြောင်း ဖော်ပြခဲ့ပြီး ၃ ရက်တာ ဝမ်းနည်းမှုကာလ အဖြစ် ကြေညာခဲ့ပါတယ်။
၂၀၂၂ ကမ္ဘာ့ဖလားဘောလုံးပြိုင်ပွဲရဲ့ နိုဝင်ဘာ ၂၄ ရက်ညပွဲစဉ်တွေ ဆက်လက် ယှဉ်ပြိုင်ကစားကြရာမှာ ဘရာဇီး၊ ပေါ်တူဂီနဲ့ ဆွစ်ဇာလန်အသင်းတွေအနိုင်ရပြီး တောင်ကိုရီးယားနဲ့ ဥရုဂွေးအသင်းတို့ သရေကျသွားပါတယ်။
မြန်မာအချိန်ဒီမနက်အစောပိုင်းကန်သွားတဲ့ အုပ်စု (G) ပွဲစဉ်မှာ ဗိုလ်စွဲနိုင်တယ်လို့ ရေးပန်းစားနေတဲ့ နာမည်ကြီး ဘရာဇီးအသင်းက ဆားဘီးယားအသင်းကို (၂-၀) ဂိုးနဲ့ အနိုင်ရသွားပါတယ်။
ဒီပွဲမှာ ဘောလုံးပိုင်ဆိုင်မှုရော ဂိုးပေါက်ကန်သွင်းခွင့်ပါ အသာစီးရခဲ့တဲ့ ဘရာဇီးအသင်းသားတွေ ကောင်းကောင်းခြေစွမ်းပြကစားသွားနိုင်ခဲ့ပြီး နေမာဂိုးမသွင်းနိုင်ခဲ့ပေမဲ့ ရစ်ချာလီဆန်က အနိုင် ဂိုး၂ ဂိုးစလုံးကို ပွဲချိန် ၆၂ မိနစ်နဲ့ ၇၃ မိနစ်တွေမှာ လှလှပပ သွင်းယူပေးခဲ့တာဖြစ်ပါတယ်။
အုပ်စု ( G ) တခြားပွဲစဉ်ဖြစ်တဲ့ ဆွစ်ဇာလန်နဲ့ ကင်မရွန်းတို့ပွဲစဉ်မှာတော့ ဆွစ်ဇာလန်က (၁-၀) ဂိုးနဲ့ အနိုင်ရပြီး ၃ မှတ်၇သွားပါတယ်။
အုပ်စု (H) အဖွင့်ပွဲစဉ်တွေမှာတော့ စီရော်နယ်ဒို ဦးဆောင်တဲ့ ပေါ်တူဂီအသင်းက ဂါနာအသင်းကို (၃-၂) ဂိုးနဲ့ အနိုင်ရပြီး ၃ မှတ်ရသွားပါတယ်။
ဒီပွဲပထမပိုင်းမှာ တဖက်နဲ့ တဖက် ဂိုးမသွင်းနိုင်ကြပဲ ဒုတိယပိုင်းမှာတော့ ပေါ်တူဂီအတွက် အဖွင့်ဂိုးကို စီရော်နယ်ဒိုက ပွဲချိန် ၆၅ မိနစ်မှာ ပင်နယ်တီက တဆင့်သွင်းယူပေးခဲ့ပြီး ပွဲချိန် ၇၈ မိနစ်မှာ ဖီလစ်စကွီရီယာက တဂိုး ပွဲချိန် မိနစ် ၈၀ မှာ ဒီကွန်စီကာအိုလီရာအိုက တဂိုးသွင်းယူပေးခဲ့တာဖြစ်ပါတယ်။
ဂါနာအတွက် ချေပဂိုးတွေကိုတော့ ၇၃ မိနစ်မှာ အေအယောက တဂိုးနဲ့ ပွဲချိန် ၈၉ မိနစ်မှာ ဘူခါရီက တဂိုးသွင်းပေးခဲ့တာဖြစ်ပါတယ်။
ဒီပွဲမှာ ရော်နယ်ဒိုဟာ အကောင်းဆုံးကစားသမားအဖြစ်လည်းရွေးချယ်ခံရပြီး ကမ္ဘာ့ဖလားပြိုင်ပွဲ ၅ ကြိမ်ဆက်တိုက် ဂိုးသွင်းနိုင်တဲ့ ကစားသမားအဖြစ်လည်း မှတ်တမ်းဝင်ခဲ့ပါတယ်။
အုပ်စု (H) တခြားပွဲစဉ်တခုမှာတော့ ဥရုဂွေးအသင်းနဲ့ တောင်ကိုရီးယားအသင်းတို့ ဂိုးမရှိသရေကျပြီး တမှတ်စီ ခွဲယူလိုက်ကြပါတယ်။
ဒီညပွဲစဉ်တွေအပြီးအမှတ်ပေးဇယား အုပ်စု (G) မှာ ဘရာဇီးက အုပ်စုပထမ ၊ ဆွစ်ဇာလန်က ကအုပ်စု ဒုတိယ၊ ကင်မရွန်းနဲ့ ဆားဘီးယားက အမှတ်မရသေးဘဲ အုပ်စု တတိယနဲ့ စတုတ္ထနေရာတွေမှာ အသီးသီးရပ်တည်နေပါတယ်။
အုပ်စု (H) မှာတော့ ပေါ်တူဂီက အုပ်စု ပထမ၊ တောင်ကိုရီးယားနဲ့ ဥရုဂွေးတို့က အုပ်စု ဒုတိယနဲ့ တတိယနေရာအသီးသီးမှာ ရပ်တည်နေပြီး ဂါနာကတော့ အုပ်စု နောက်ဆုံးမှာ ရှိနေပါတယ်။
