ဘဏ်ဝန်ထမ်း

A d v e r t i s e m e n t With Us

September 16, 2020

မန္တလေး UAB ဘဏ်ဝန်ထမ်း ၁ ဦး ကိုဗစ်-၁၉ ကူးစက်ခံရ၊ ဘဏ်ခွဲကို ယာယီပိတ်

မန္တလေးမြို့ရှိ UAB ဘဏ်ခွဲ ဝန်ထမ်းတဦးမှာ ကိုဗစ်-၁၉ ပိုးတွေ့ရှိရတာကြောင့် အဆိုပါ ဘဏ်ခွဲကို ယာယီပိတ်ထားလိုက်တယ်လို့ ဒီကနေ့ သတင်းထုတ်ပြန်ထားပါတယ်။ အဲဒီဝန်ထမ်းဟာ ကျောက်ဆစ်တန်းဘဏ်ခွဲမှာ  တာဝန်ထမ်းဆောင်နေတာဖြစ်ပြီး စက်တင်ဘာ ၁၆ ရက်နေ့မှာတော့ သူ့မှာ ကိုဗစ်-၁၉ ရောဂါပိုး စစ်ဆေးတွေ့ရှိခဲ့တာ ဖြစ်တယ်လို့ ဆိုပါတယ်။ သူဟာ ရုံးကိုတော့ ပြီးခဲ့တဲ့ စက်တင်ဘာ ၁၁ ရက်နေ့မှာ နောက်ဆုံး တက်ရောက်ခဲ့တာဖြစ်ပြီး နောက်နေ့တွေမှာတော့ အိမ်က အလှည့်ကျ တာဝန်ထမ်းဆောင်ခဲ့တယ်လို့ ဘဏ်ရဲ့ ထုတ်ပြန်ချက်ထဲမှာ ဖော်ပြပါတယ်။ လတ်တလောမှာတော့ အဆိုပါကျောက်ဆစ်တန်းဘဏ်ခွဲကို ပိတ်ထားလိုက်ရပြီး UAB အနေနဲ့ မန္တလေးမှာ ဘဏ်ခွဲ ၁၆ ခုရှိတာမို့ အဲဒီဘဏ်ခွဲတွေကနေ အများပြည်သူတွေကို ဝန်ဆောင်မှုပေးနိုင်ကြောင်း ဖော်ပြထားပါတယ်။ UAB ဘဏ်ရဲ့ ဝက်ဘ်ဆိုက်မှာတော့ မန္တလေးက ဘဏ်ဝန်ထမ်း အပါအဝင် ကိုဗစ်-၁၉ ရောဂါပိုးစစ်ဆေးတွေ့ရှိခဲ့ရတဲ့ ဝန်ထမ်းစုစုပေါင်း ၆ ဦးရှိနေပြီလို့ ရေးသားဖော်ပြထားပါတယ်။ သူတို့ထဲက ၅ ယောက်ကတော့ ရုံးချုပ်က ဝန်ထမ်းတွေဖြစ်ကြောင်းနဲ့  စက်တင်ဘာလ ၁၁ ရက်၊ ၁၃ ရက်နဲ့ ၁၅ ရက်နေ့တွေမှာ အသီးသီး Quarantine ဝင်နေကြသူ တွေဖြစ်တယ်လို့ သိရပါတယ်။ PHTO-UAB
4 months Ago

May 22, 2020

ရွှေဘိုမြို့က ပုဂ္ဂလိက ဘဏ်ဝန်ထမ်း ၁ ဦးကို ငွေကျပ်သိန်း ၄၈၀၀ ကျော် အလွဲသုံးစားမှုဖြင့် ဖမ်းဆီး

စစ်ကိုင်းတိုင်း၊ ရွှေဘိုမြို့ရှိ ပုဂ္ဂလိက ဘဏ်ဝန်ထမ်း ၁ ဦးကို ငွေကျပ်သိန်း ၄၈၀၀ ကျော် အလွဲသုံးစားလုပ်မှုနဲ့ ဖမ်းဆီးစစ်ဆေးနေတယ်လို့  ရွှေဘိုမြို့မရဲစခန်း တာဝန်ရှိသူတဦးက ပြောပါတယ်။ ရွှေဘိုမြို့မရဲစခန်း စခန်းမှူး ဒုရဲမှူး သိန်းဆန်းဦးက “ဖြစ်စဉ်ကတော့ ဟုတ်ပါတယ်။ ဝန်ထမ်းအမည်၊ ဘဏ်နာမည်တွေတော့ ပြောလို့မရဘူး။ ကျူးလွန်တယ်လို့ ယူဆရတဲ့သူကို ဖမ်းဆီးထားတယ်။ အမှုဖွင့်ပြီး စစ်ဆေးနေပါတယ်။ တစ်သောင်းတန်အုပ်မှာ ထိပ်ဆုံး ၁ ရွက်ရယ်၊ အောက်ဆုံး ၁ ရွက်ရယ်က တစ်သောင်းတန်ပေါ့။ ကြားထဲမှာက တစ်ထောင်တန်တွေ ထည့်ထားတာပေါ့။ ဒါကို သေသေချာချာ စစ်ဆေးနေတုန်းပါ။ စတွေ့တာတော့ ကောင်တာ Customer တစ်ဦးက စတွေ့တာပေါ့။" လို့ ပြောပါတယ်။ ဒီဗွီဘီက စုံစမ်းချက်အရ အဆိုပါဝန်ထမ်းဟာ ရွှေဘိုမြို့ရှိ ကမ္ဘောဇဘဏ်ခွဲ (၁) က အသက် ၃၀ အရွယ် ဘဏ်ခွဲငွေကြေးတာဝန်ခံ အမျိုးသားတဦးဖြစ်ပြီး ငွေကျပ်သိန်းပေါင်း ၄၈၅၁ သိန်း အလွဲသုံးစားလုပ်မှု မေလ ၁၉ ရက်နေ့က ဖြစ်ပွားခဲ့တာလို့ သိရပါတယ်။ မေလ ၁၉ ရက် ညနေပိုင်းမှာ ငွေထုတ်သူတဦးက ငွေတွေကို စစ်ဆေးချိန်မှာ  တစ်သောင်းတန်အုပ်အဖြစ်  တစ်ထောင်တန် ၉၈ ရွက်ကို တစ်သောင်းတန် ၂ ရွက် အထက်အောက်ညှပ်ပြီး ပြုလုပ်ထားတာကို စတင်တွေ့ရှိခဲ့ပြီး ဘဏ်တာဝန်ရှိသူတွေကို ပြောဆိုခဲ့လို့ တာဝန်ရှိသူတွေက ငွေထုတ်ကောင်တာနဲ့ ငွေသိုလှောင်ခန်းကို ဝင်ရောက်စစ်ဆေးရာမှာ အခုလို ပြုလုပ်ထားတာ ထပ်မံတွေ့ရှိခဲ့တာပါ။  ဘဏ်ရဲ့ ငွေထုတ်ကောင်တာမှာ တစ်သောင်းတန်အုပ် ကျပ်သိန်း ၁၀၀ စီပါ ၁၅ ထုပ်၊ ငွေသိုလှောင်ခန်းမှာ တစ်သောင်းတန် သိန်း ၁၀၀ စီပါ ၄၀ ထုပ်တို့ကို စစ်ဆေးရာမှာ အလားတူ ဖန်တီးပြုလုပ်ထားတာ တွေ့ရှိခဲ့ရတယ်လို့ သိရပါတယ်။ စုစုပေါင်း ငွေထုပ် ၅၅ ထုပ်မှာ ကျပ်သိန်း ၅၅၀၀ ရှိရမှာဖြစ်ပေမယ့် စစ်ဆေးရေတွက်ချိန်မှာ ၆၄၉ သိန်းသာ တွေ့ရှိရပြီး ၄၈၅၁ သိန်းထိ ကွာဟနေတာလည်းဖြစ်ပါတယ်။ ဒီအတွက် ဘဏ်ရဲ့ စီစီတီဗွီတွေကို ထပ်မံစစ်ဆေးရာမှာ ငွေကြေးတာဝန်ခံဆိုသူကို မသင်္ကာဖွယ်တွေ့ရတဲ့အတွက် ဖမ်းဆီးအမှုဖွင့်စစ်ဆေးနေတာလည်း ဖြစ်ပါတယ်။ ကျူးလွန်သူက ရွှေဘိုမြို့၊ အမှတ် ၁၀ ရပ်ကွက်နေသူဖြစ်ပြီး ကနဦး စစ်ဆေးချက်တွေအရ လောင်းကစားလုပ်မိတာကနေ ငွေလိုလို့ လုပ်တယ်ဆိုတာကို ဝန်ခံထွက်ဆိုထားတယ်လို့ ဆိုပါတယ်။ ဒီဖြစ်စဉ်နဲ့ ပတ်သက်ပြီး ရွှေဘိုမြို့ ကမ္ဘောဇဘဏ်ခွဲ (၁) မန်နေဂျာ ဒေါ်ခင်မျိုးခိုင်ကို ဆက်သွယ်မေးမြန်းရာမှာတော့ ဘဏ်ရဲ့ စည်းမျဉ်းစည်းကမ်းတွေအရ ဖြေကြားခွင့်မရှိတဲ့အတွက် ရုံးချုပ်ကိုသာ ဆက်သွယ်မေးမြန်းဖို့ ပြောဆိုခဲ့ပါတယ်။  လတ်တလော ဖမ်းဆီးအမှုဖွင့်ခံထားရသူ ဘဏ်ခွဲငွေကြေးတာဝန်ခံဆိုသူကိုတော့ ရွှေဘိုမြို့မရဲစခန်းမှာ (ပ)၃၁၈/၂၀၂၀၊ ရာဇသတ်ကြီးပုဒ်မ ၄၀၈ အရ အမှုဖွင့်အရေးယူနေပါတယ်။
8 months Ago
Up