ဗုံးပေါက်ကွဲမှု

April 26, 2022

မြဝတီတံတားထိပ် ဗုံးပေါက်ကွဲပြီးနောက် ထိုင်း-မြန်မာ နယ်စပ် လုံခြုံရေးတင်းကျပ်

ကရင်ပြည်နယ်၊ မြဝတီမြို့ မြန်မာ-ထိုင်း အမှတ် (၁) ချစ်ကြည်ရေးတံတားအရှေ့မှာ အင်အားပြင်း ဗုံးပေါက်ကွဲမှုဖြစ်ပြီးနောက် မြဝတီဘက်မှာရော ထိုင်းဘက်ခြမ်း မဲဆောက်မြို့ဘက်မှာပါ တံတားအနီးတဝိုက် လုံခြုံရေး တင်းကျပ်ထားပါတယ်။

မြန်မာ-ထိုင်းနယ်စပ် မြဝတီမြို့မှာ ဧပြီ ၂၃ ရက် ည ၁၀ နာရီခွဲလောက်က  ကားဗုံးနဲ့ ဖောက်ခွဲတိုက်ခိုက်ခဲ့လို့  ရဲတပ်ဖွဲ့ဝင် ၂ ယောက် သေဆုံးပြီး အဆောက်အအုံတွေနဲ့ ကားတွေ ထိခိုက်ပျက်စီးခဲ့တာပါ။  

အလားတူ ပေါက်ကွဲမှုတွေထပ်မဖြစ်စေဖို့  ထိုင်းနိုင်ငံ၊ တာခ်ရိုင်၊ မဲဆောက်မြို့၊ မယ်တောင်ရပ်ကွက်နဲ့ ရပ်ကွက် ၅ ခုလောက်အပါအဝင် ချစ်ကြည်ရေးတံတားနဲ့ ၁ မိုင်လောက်ကို  ထိုင်းအာဏာပိုင်တွေက လုံခြုံရေးတိုးမြှင့်ထားပါတယ်။

လုံခြုံရေးအဖွဲ့ဝင်အများစုဟာ  မြို့နယ်အုပ်ချုပ်ရေးမှ ဖွဲ့စည်းပေးထားတဲ့ နယ်မြေခံလုံခြုံရေးအ ဖွဲ့ဖြစ်တယ်လို့ မယ်တောင်တိုက်နယ် အုပ်ချုပ်ရေးတာဝန်ရှိထံက သိရပါတယ်။

နယ်စပ်လုံခြုံရေးကင်းလှည့်စဉ် ထိုင်းနိုင်ငံသို့တရားမဝင် ဝင်ရောက်လာတဲ့  ဖောက်ခွဲရေးသမားတွေနဲ့ မူးယစ်ဆေးသမားတွေ၊ လူကုန်ကူးသမားတွေကိုပါ စောင့်ကြည့် ဖမ်ဆီးသွားမယ်လို့လည်း အုပ်ချုပ်ရေးဝန်ရှိသူက ပြောပါတယ်။

ဧပြီ ၂၃ ရက် ညက မြဝတီမြို့တွင်းဘက်ကနေ  အမှတ် (၁) ချစ်ကြည်ရေးတံတားဘက်သို့ ဦးတည်ပြီး ချစ်ကြည်ရေးတံတားထိပ် (မြန်မာဘက်ခြမ်း) ဝင်းတံခါးကို ကားနဲ့ ဝင်တိုက်ကာ ယာဉ်မောင်းမပါတဲ့ကားအတွင်းကနေ  ပြင်းထန်တဲ့ပေါက်ကွဲမှု ဖြစ်ပွားခဲ့တာပါ။

အဆိုပါပေါက်ကွဲမှုကို စစ်တပ်နဲ့ ရဲတပ်ဖွဲ့က စစ်ဆေးနေပြီး ဖောက်ခွဲ ဖျက်ဆီးခဲ့သူကို ဖမ်းဆီးရမိရေးအတွက် အပူတပြင်း ဆောင်ရွက်နေတယ်လို့ စစ်ကောင်စီပြန်ကြားရေးက သတင်း ထုတ်ထားပါတယ်။

အဆိုပါပေါက်ကွဲမှုဟာ ဘယ်သူ့လက်ချက်လဲဆိုတာကိုတော့ ဘယ်အဖွဲ့ကမှ ထုတ်ပြန် ကြေညာတာ မရှိသေးပါဘူး။

4 weeks Ago

ပုသိမ်မြို့ရှိ ကညနရုံး ဒုတိယအကြိမ် ဗုံးပေါက်ကွဲ

ဧရာဝတီတိုင်း၊ ပုသိမ်မြို့၊ အမှတ် ၁၃ ရပ်ကွက်မှာရှိတဲ့ ပုသိမ်မြို့နယ် ကညနရုံးရှေ့မှာ ဧပြီ ၂၆ ရက် မနက် ၇ နာရီလောက်က သတိပေးတဲ့အနေနဲ့ ဗုံးဖောက်ခွဲခဲ့တယ်လို့ ပုသိမ်မြို့ပြပြောက်ကျားတပ်ဖွဲ့က သတင်းထုတ်ပြန်ပါတယ်။ 

“မနက် ၇ နာရီလောက်မှာခွဲတာ အစောပိုင်းသတိပေးတဲ့အနေနဲ့ ခွဲတာဆိုတော့ လူထိခိုက်တာမျိုး မရှိဘူး။ ရုံးရှေ့ မျက်နှာစာမှာပဲခွဲတာ”လို့ ပြောက်ကျားတပ်ဖွဲ့ဝင်တဦးက ပြောပါတယ်။ 

ပုသိမ်မြို့နယ်ကညနရုံးဟာ စစ်အုပ်စုကို အပြည့်အဝထောက်ခံနေပြီး ဝင်ငွေရှာပေးနေတဲ့ ဒေါက်တိုင်တစ်ခုဖြစ်တာကြောင့် ခုလိုသတိပေးတဲ့အနေနဲ့ ဒုတိယအကြိမ် ဖောက်ခွဲခဲ့တာလို့ ဆိုပါတယ်။

ပုသိမ်မြို့မှာ ဧပြီ ၁၆ ရက် သင်္ကြန်အတက်နေ့ကလည်း စစ်ကောင်စီဗဟိုမဏ္ဍပ်အနီး ဗုံးကွဲခဲ့ပါသေးတယ်။

4 weeks Ago

April 25, 2022

ကြံခင်းမြို့တွင် မိုင်တဲလ်တာဝါတိုင်ဗုံးခွဲခံရမှုကြောင့် ဒေသခံ ၁၀ ဦးကျော်ကို စစ်ကောင်စီ ဖမ်းဆီး

ဧရာဝတီတိုင်း၊ ကြံခင်းမြို့နယ်မှာ ဧပြီ ၂၂ ရက်နေ့ မနက်အစောပိုင်းက စစ်အုပ်စုပိုင် မိုင်တဲလ်တာဝါတိုင် ဗုံးပေါက်ကွဲပြီးနောက်ပိုင်း ဒေသခံပြည်သူ ၁၀ ဦးကျော်ကို စစ်ကောင်စီ တပ်သားတွေက ဖမ်းဆီးခဲ့တယ်လို့ သိရပါတယ်။

စစ်အုပ်စုပိုင် မိုင်တဲလ်တာဝါတိုင် ဗုံးပေါက်ကွဲခဲ့တဲ့ ကြို့ပင်စုကျေးရွာ ဝင်ထွက်တဲ့လမ်းတွေကို ပိတ်ဆို့စစ်ဆေးတာတွေပြုလုပ်ပြီး အဲဒီနေ့မှာတင် ပြည်သူ ၈ ဦးကို ဖမ်းဆီးသွားတာလို့ ဒေသခံတွေက ပြောပါတယ်။

“ပေါက်တဲ့အချိန်က တချို့ဒေသခံတွေဆို သိလိုက်မှာတောင် မဟုတ်ဘူး။ နောက်ကျနေပြီ ဖြစ်တဲ့အချိန်မှ မနက်သွားလာတဲ့အချိန် ရွာထိပ်က လာစောင့်ပြီး လူငယ်တွေကို ဖမ်းတော့တာပဲ။ အဲဒီမနက်တင် ၈ ယောက်လောက် ပါသွားတာ။ နောက်နေ့မှာ ၂ ယောက် ထပ်ပါသွားတယ် ပြောတယ်။ ဒါတောင်မသိတာတွေ ရှိဦးမယ်” လို့ ဒေသခံတဦးက ပြောပါတယ်။

တာဝါတိုင်ပေါက်ကွဲမှုနဲ့ပတ်သက်ပြီး ဖမ်းဆီးသွားတဲ့သူတွေကို ဘယ်နေရာ ဖမ်းသွားတယ်ဆိုတာ မသိရသေးသလို ခုချိန်ထိ ပြန်လွတ်လာတာမျိုးလည်း မရှိသေးဘူးလို့ ဆိုပါတယ်။

စစ်အုပ်စုပိုင် မိုင်တဲလ်တာဝါတိုင်ကို ဗုံးခွဲတာဟာ သူတို့ရဲ့လက်ချက် ဖြစ်တယ်လို့ ဧရာဝတီဒေါင်းတမာန်အဖွဲ့က သတင်းထုတ်ပြန်ခဲ့ပေမယ့် စစ်ကောင်စီတပ်သားတွေက ဒေသခံပြည်သူတွေကို စွပ်စွဲဖမ်းဆီးတာတွေ ပြုလုပ်နေတာပါ။

4 weeks Ago
More News
Up