ဗုံးပေါက်

January 21, 2023

ပါကစ္စတန်တွင် လူစီးရထား ဗုံးပေါက်သဖြင့် ၁၅ ဦး ဒဏ်ရာရ

ပါကစ္စတန်နိုင်ငံအနောက်တောင်ပိုင်း၊ ဘာလိုချီစတန်ပြည်နယ်မှာ ဇန်နဝါရီ ၂၀ ရက်က ခရီးသည်တင် ရထားတစ်စီး ဗုံးပေါက်ကွဲမှုကြောင်း လမ်းချော်သွားရာက အနည်းဆုံး လူ ၁၅ ဦး ဒဏ်ရာရခဲ့ကြောင်း ပြည်နယ်အစိုးရအရာရှိ တဦးက ပြောပါတယ်။ 

ဒီတိုက်ခိုက်မှုကို ဒေသတွင်း ခွဲထွက်ရေးအဖွဲ့ဖြစ်တဲ့ ဘာလို့ချ်လွတ်မြောက်ရေးတပ်မတော်က သူတို့လက်ချက်လို့ တာဝန်ခံ ပြောကြားထားပြီး တိုက်ခိုက်မှုကြောင့် ရထားစက်ခေါင်း အပါအဝင် ရထားတွဲ ၈ တွဲ လမ်းချော်တိမ်းမှောက်သွားကြောင်း လက်ထောက်ကော်မရှင်နာ ဘိုလန် အဂ်ဟာ ဆမြူလာက ရိုက်တာကို ပြောပါတယ်။

အခင်းဖြစ်တဲ့နေရာဟာ တောင်ထူထပ်တဲ့နယ်မြေမှာဖြစ်တာကြောင့် ကယ်ဆယ်ရေးအဖွဲ့ဟာ အခက်အခဲတွေနဲ့ ရင်ဆိုင်နေရကြောင်းလည်း သူကပြောပါတယ်။ 

ဘာလို့ချ်  လွတ်မြောက်ရေးတပ်မတော် (BLA) က ဖော်ပြထားတာကတော့ ပါကစ္စတန်နိုင်ငံရဲ့ နယ်မြေအကြီးဆုံးဖြစ်ပေမယ့် လူဦးရေအနည်းဆုံးဖြစ်တဲ့ မိုးနည်းပါးတဲ့ တောင်တန်းဒေသ  ဘာလိုချီစတန်အတွက် ပြီးပြည့်စုံသော လွတ်လပ်ရေးကို ရည်ရွယ်တာ ဖြစ်တယ်လို့ ဆိုပါတယ်။

ခွဲထွက်ရေးစစ်သွေးကြွတွေဟာ ပါကစ္စတန် လုံခြုံရေးတပ်ဖွဲ့တွေကို အဓိက အာရုံစိုက်ကြတာ ဖြစ်ပြီး ဒေသတွင်းမှာ ပေကျင်းရဲ့စီးပွားရေးခြေလှမ်းတွေ တိုးလာတာကြောင့် သူတို့ဟာ တရုတ် အကျိုးစီးပွားတွေကိုလည်း ပစ်မှတ်ထား တိုက်ခိုက်ကြပါတယ်။ 

ဘာလိုချီစတန်ပြည်နယ်ရှိ တရုတ်ရဲ့ အဓိက ပရောဂျက်တွေထဲမှာ အာရေဗျပင်လယ်ထဲရှိ အရေးပါတဲ့ ရေနံစိမ်းသင်္ဘော လမ်းကြောင်းဖြစ်တဲ့ ဟော်မုဇ် ရေလက်ကြားအနီးရှိ ဂွါဒါ ဆိပ်ကမ်း ဖြစ်ပါတယ်။

2 weeks Ago

January 17, 2023

ဒဂုံဆိပ်ကမ်း ၆၈ ရပ်ကွက်အုပ်ချုပ်ရေးမှူးရုံးတွင် ဗုံးပေါက်

ရန်ကုန်တိုင်း၊ ဒဂုံမြို့သစ်ဆိပ်ကမ်းမြို့နယ်၊ ၆၈ ရပ်ကွက်၊ အောင်သုခလမ်းထောင့်ရှိ ရပ်ကွက်အုပ်ချုပ်ရေးမှူးရုံးမှာ ဇန်နဝါရီ ၁၇ ရက် ဒီနေ့မနက်ပိုင်းက ဗုံးပေါက်ကွဲခဲ့တယ်လို့ ရပ်ကွက်နေသူတွေဆီက သိရပါတယ်။

ဒီနေ့မနက် ၁၁ နာရီခွဲက လူဦးရေစာရင်းကောက်ဖို့ ရပ်ကွက်ရုံးမှာ လူစုထားချိန် ဗုံးပေါက်ကွဲခဲ့တာဖြစ်ပြီး စစ်ကောင်စီတပ်နဲ့ ရဲတွေ ရောက်လာတယ်လို့ ရပ်ကွက်နေသူတဦးက ပြောပါတယ်။

“ဗုံးပေါက်တာ၊ ရပ်ကွက်ရုံးမှာပေါက်တာ၊ သေတာတွေ ထိခိုက်ဒဏ်ရာရတာတော့ မသိဘူး၊ စစ်တပ်ရော ရဲရော စစ်ဆေးနေတယ်။”

အမှတ် ၆၈ ရပ်ကွက် အုပ်ချုပ်ရေးမှူးရုံးမှာ ဗုံးပေါက်ကွဲခဲ့တာ မှန်ပေမဲ့ မပေါက်ကွဲသေးတဲ့ လက်ပစ်ဗုံးတွေ့လို့ စစ်တပ်က ဖောက်ခွဲခဲ့တာဖြစ်တယ်လို့ အုပ်ချုပ်ရေးနဲ့ နီးစပ်သူတဦးက ပြောပါတယ်။

“ရုံးထဲကို ဗုံးနဲ့ပစ်တာဖြစ်မယ်၊ စနက်တံတော့ ဖြုတ်ပြီးသား၊ ဒါပေမဲ့ မပေါက်သေးဘူး၊ ရပ်ကွက်က စစ်တပ်ကို လှမ်းခေါ်လိုက်တာ၊ စစ်တပ်ကလာပြီး ရုံးအနောက်မှာ လာဖောက်တာ။”

စစ်တပ်က လက်ပစ်ဗုံးကို အကာအရံတားကာ ဖောက်ခွဲပြီးနောက် ရပ်ကွက်ရုံး အနီးဝန်းကျင်ကိုလည်း လက်ကျန်ဗုံးရှိမရှိ စစ်ဆေးခဲ့တယ်လို့ ရပ်ကွက်နေသူတွေဆီက သိရပါတယ်။

ရန်ကုန်က မြို့နယ်တချို့မှာ ပြီးခဲ့တဲ့ရက်ပိုင်းအတွင်း ပစ်ခတ်မှုနဲ့ ဗုံးပေါက်ကွဲမှုတွေဖြစ်ပြီး သေဆုံးသူနဲ့ ဒဏ်ရာရသူတွေ ရှိပါတယ်။

2 weeks Ago
More News
Up