ဗုံးခိုကျင်း

January 10, 2022

စစ်ကောင်စီတပ်က ပစ်ခတ်မှုကြောင့် ထီးချိုင့်ကျေးရွာအချို့ ဗုံးခိုကျင်းတူးနေရ

စစ်ကိုင်းတိုင်း၊ ကသာခရိုင်၊ ထီးချိုင့်မြို့နယ်အတွင်းက ကျေးရွာတချို့မှာ စစ်ကောင်စီတပ်တွေက မဆင်မခြင်ပစ်ခတ်နေတာကြောင့် ဒေသခံတွေ ဗုံးခိုကျင်းတွေ တူးနေကြရတယ်လို့ သိရပါတယ်။

ဇန်နဝါရီလ ၇ ရက်နဲ့ ၈ ရက်နေ့ညတွေမှာ ထီးချိုင့်မြို့နဲ့ တစ်မိုင်ခန့်အကွာ ဧရာဝတီမြစ်ကူးတံတားမှာရှိတဲ့ စစ်ကောင်စီ လုံခြုံရေးဂိတ်ကနေ ရမ်းသမ်းပစ်ခတ်ခဲ့တာကြောင့် လူနေအိမ်တွေအနီး လက်နက်ကြီးကျည်တွေ ကျရောက်ပေါက်ကွဲမှု ဖြစ်ပွားခဲ့ပြီးနောက် အခုလို ဗုံးခိုကျင်းတွေ ကြိုတင်တူးထားတာလို့ ဒေသခံတွေက ပြောပါတယ်။

တံတားအနီး ရေဝအုပ်စုအတွင်းက အိမ်ခြေလေးရာဝန်းကျင်ရှိတဲ့ ကျေးရွာငါးခုမှာ ဗုံးခိုကျင်းတွေ တူးနေကြရတယ်လို့ ဒေသခံတောင်သူတစ်ဦးက ပြောပါတယ်။

“ရွာတွေမှာကတော့ အကုန်လုံး ထိတ်လန့်ခြောက်ခြားနေတာပေါ့။ ဘယ်ပြေးလို့ပြေးရမှန်းမသိ၊ ကျည်ဆန်က ဘယ်ဆီလာလို့ လာမှန်းမသိတဲ့အခါကျတော့ ဗုံးခိုကျင်းတွေ တူးကတော့တာလေ။ တခါပစ်ရင် အနည်းဆုံး ငါးမိနစ်လောက်ကြာတယ်၊ ပြီးရင် စက်သေနတ်နဲ့ရော ပစ်တာလေ။ တဖောက်ဖောက်နဲ့ ဆက်တိုက်ကြီး တအားဆွဲတာလေ။" 

ပြီးခဲ့တဲ့ ဒီဇင်ဘာလအတွင်းကလည်း စစ်ကောင်စီတပ်ဖွဲ့ဝင်တွေဟာ ထီးချိုင့်မြို့အနီး၊ မီးချောင်အိုင်ကျေးရွာက တောင်သူတစ်ဦးရဲ့နေအိမ်ကို ဝင်ရောက်ခဲ့ပြီး နွားတစ်ကောင်ကို ပစ်သတ်ကာ ချက်ပြုတ်စားသောက်သွားတယ်လို့ ဆိုပါတယ်။ 

ဒါ့အပြင် ထီးချိုင့်နဲ့ ၃ မိုင်ခန့်အကွာ ကွင်းကြီး-ရွာသစ်ကုန်းကျေးရွာမှာ PDF တွေကို ရှာခိုင်းပြီး မတွေ့လို့ဆိုတဲ့ အကြောင်းပြချက်နဲ့ ၃ ခန်းတွဲအကျယ်အဝန်းရှိ လူနေအိမ်တစ်လုံးကို မီးရှို့သွားတယ်လို့ ဒေသခံတွေက ပြောပါတယ်။ 

အဲ့ဒီလိုတွေ လုပ်ခဲ့တာကြောင့် ကျေးရွာနေပြည်သူတွေဟာ စစ်ကောင်စီတပ်တွေ လာရောက်တာနဲ့ ထွက်ပြေးတိမ်းရှောင်နေကြရတယ်လို့ ဆိုပါတယ်။

ထီးချိုင့်မြို့ပေါ်မှာတော့ စစ်ကောင်စီတပ်ဖွဲ့ဝင်တွေ အများအပြား နေရာချထားပြီး ထီးချိုင့်တံတားပေါ်မှာလည်း တင်းတင်းကျပ်ကျပ် စစ်ဆေးနေတယ်လို့ သိရပါတယ်။

ဓာတ်ပုံ CJ

7 days Ago

October 10, 2021

ဘားအံမြို့၌ မိသားစုဝင်အမျိုးသမီး ၄ ဦး ဗုံးခိုကျင်းအတွင်း အောက်ဆီဂျင်ပြတ် သေဆုံး

ကရင်ပြည်နယ်၊ ဘားအံမြို့နယ် အောက်ကော့ရင်းကျေးရွာအုပ်စု၊ စိမ့်ပိုင်း(ကနစိုးကုန်း)ကျေးရွာမှာ အောက်တိုဘာ ၉ ရက်က မိသားစုဝင် အမျိုးသမီး ၄ ဦး ဗုံးခိုကျင်းအတွင်း အောက်ဆီဂျင်ပြတ်ပြီး သေဆုံးသွားတယ်လို့ ဒေသခံတွေဆီက သိရပါတယ်။

အနက် ၆ ပေ၊ အကျယ် ၁၄ ပေ၊ ဝင်ပေါက် ၂ ပေအကျယ်ရှိ ဗုံးခိုကျင်းထဲ သေဆုံးနေတဲ့ မိသားစုဝင် အမျိုးသမီး ၄ ဦးကို ဒေသခံတွေ တွေ့ရှိခဲ့ပြီး အလောင်းတွေကို ခက်ခက်ခဲခဲ သယ်ထုတ်ယူခဲ့ရတယ်လို့ မျက်မြင် ရွားသားတစ်ဦးက ပြောပါတယ်။

ဗုံးခိုကျင်းအတွင်း အ​ရေးပေါ် စားနပ်ရိက္ခာတွေဖြစ်တဲ့ မီးဖိုချောင်သုံး ပစ္စည်တွေကို ​ကြာရှည်ခံဖို့နဲ့ ပိုးမတက်အောင် ခြင်ဆေးဖျန်းကာ ကျင်းထဲအဖုံးပိတ်ထားခဲ့တာပါ။

စပါးစိုက်ရာသီ လယ်ထဲ ဆင်းပြောင်းရွှေ့နေထိုင်ဖို့ သိမ်းထားတာတွေ ထုတ်ယူဖို့ မိသားစုဝင် ၁ ဦး ဗုံးခိုကျင်းထဲ ဆင်းသွားတိုင်း အသံမကြားရတဲ့အတွက် စိတ်ပူပြီး မိသားစုဝင် ၄ ယောက်အထိ ဆင်းကြည့်ခဲ့ရာက  ၄ ဦးလုံး အောက်ဆီဂျင်ပြတ် သေဆုံးခဲ့တာပါ။

သေဆုံးသူ ၄ ဦးကို အိမ်နီးချင်း ရွာသား ၁ ဦးက ကူညီကယ်တင်ဖို့ ကြိုးစားခဲ့တဲ့ အသက်ရှူကြပ်ပြီး အောက်ဆီဂျင်ကျခဲ့တဲ့အတွက် ဘားအံဆေးရုံကြီးကို ပို့ဆောင်ပြီး ဆေးကုသမှုခံနေရတယ်လို့ ဒေသခံတွေက ဆိုပါတယ်။

ဘားအံဆေးရုံအုပ်ကြီး ဒေါက်တာ ဘရန်အောင်က “အောက်ဆီဂျင်ပြတ်ပြီး အမျိုးသမီး ၄ ဦးလုံး သေဆုံးသွားတာ။ အမျိုးသားတစ်ဦးကတော့ ဆေးရုံမှာ ကုသမှုပေးထားတယ်” လို့ ပြောပါတယ်။

ကရင်ပြည်နယ်အတွင်း အကြမ်းဖက်စစ်ကောင်စီရဲ့တပ်နဲ့ တိုင်းရင်းသားလက်နက်ကိုင်တွေ  တိုက်ပွဲတွေ ဖြစ်နေပြီး တိုက်လေယာဥ်နဲ့ ဗုံးကြဲတိုက်ခိုက်တာတွေကြောင့် ဒေသခံပြည်သူတွေဟာ အသက်အန္တရာယ်လုံခြုံဖို့ ဗုံးခိုကျင်းတွေ အသင့်လုပ်ဆောင်ထားရသလို စားသောက်ရေးအတွက် ကြိုတင်စုဆောင်းထားရပြီး နေ့စဥ် စိုးရိမ်မှုနဲ့ ရှင်သန်နေရတယ်လို့  အရပ်ဘက် လူမှုအဖွဲ့အစည်းမှာ လုပ်ကိုင်နေသူတစ်ဦးက ပြောပါတယ်။

3 months Ago
Up