သြစတြီးယား ရဲတွေဟာ မြို့တော်ဗီယင်နာက ညလုံးပေါက် ရမ်းကားသောင်းကျန်းမှုအတွက် အဓိကသံသယရှိသူနဲ့ပတ်သက်တဲ့ လူ ၁၄ ယောက်ကို ဖမ်းဆီးပြီးပြီလို့ ပြည်ထဲရေးဝန်ကြီးက နိုဝင်ဘာ ၃ ရက်မှာ ပြောပါတယ်။
သြစတြီးယားနဲ့ မြောက်မက်ဆီဒိုးနီးယား နိုင်ငံသားနှစ်ရပ် ခံယူထားတဲ့ အသက် ၂၀ အရွယ် အမျိုးသား ကူတင်ဖှယ်ဇူလာအီကို ရဲက အခင်းဖြစ်ရာမှာတင် ပစ်ခတ်ဖမ်းဆီးခဲ့ပြီး သူဟာ တိုက်ခိုက်မှုအတွက် အဓိကသံသယရှိသူလို့ ရိုက်တာသတင်းဌာနက ဖော်ပြထားပါတယ်။ စုံစမ်းစစ်ဆေးမှုအတွင်း အရာရှိတွေဟာ အိမ် ၁၈ လုံးကို ဝင်ရောက်စီးနင်းခဲ့ပါတယ်။
တိုက်ခိုက်မှုကြောင့် လူ ၄ ယောက် သေဆုံးပြီး ၂၂ ယောက် ဒဏ်ရာရခဲ့တာပါ။ တိုက်ခိုက်သူတွေရဲ့နောက်မှာ ရပ်တည်နေတဲ့ ကျူးလွန်သူတွေကို ဖမ်းဆီးနှိမ်နင်းမယ်လို့ နိုင်ငံ့အဓိပတိက ရုပ်သံမိန့်ခွန်းအတွင်း ကတိပြုပါတယ်။
တိုက်ခိုက်သူ ဖှယ်ဇူလာအီဟာ အိုင်အက်စ်အကြမ်းဖက်အဖွဲ့နဲ့ ပူးပေါင်းရေး ဆီးရီးယားနိုင်ငံကိုသွားဖို့ ကြိုးစားမှုနဲ့ ၂၀၁၉ ဧပြီလက ထောင်ဒဏ် ၂၂ လ ပြစ်ဒဏ် စီရင်ခံရဖူးတယ်လို့ ပြည်ထဲရေးဝန်ကြီးဌာနက ပြောပါတယ်။ သူ့ကို ဒီဇင်ဘာအစောပိုင်းက ပြန်လွှတ်ပေးခဲ့တာပါ။
ဖှယ်ဇူလာအီဟာ မတိုက်ခိုက်ခင် သူ့ရဲ့ အင်စတာဂရမ် လူမှုကွန်ရက်စာမျက်နှာပေါ်မှာ သူနဲ့ လက်နက် ၂ ခု တွဲပြီး ရိုက်ထားတဲ့ဓာတ်ပုံကို တင်ခဲ့ပါတယ်။
သူဟာ နိုဝင်ဘာ ၂ ရက် ဒေသစံတော်ချိန် ည ၈ နာရီမှာ စတင်တိုက်ခိုက်ခဲ့ပြီး အထူးတပ်ဖွဲ့က အရာရှိတွေက ၉ မိနစ်အကြာမှာ ဖှယ်ဇူလာအီကို အသေပစ်ခတ် ဖမ်းဆီးခဲ့ပါတယ်။
2 years Ago
